So David nqochenaxata ye Jerusalén aso arca maye laỹe' soua nqataxaco
1So David damaxasoxoolec da qano'oxoosheguem so nỹecpi, qoỹanaigui som huaqta'a't nỹecpi maye lalamaxat somaye, nataqa'en damaxasoxoolec da qaỹo'ot so npe'l da yaqto' qoỹanaigui aso arca maye laỹe' soua lqataxaco Ñim Lo'onatac 'Enauacna. 2Huaña nache so David, 'eeta': «Nachenata na leviitapi da ishet da ỹache qome añi arca maye laỹe' naua lqataxaco Ñim Lo'onatac 'Enauacna, cha'aye Ñim Nataxala' lca'ateua'a co'ollaxa namayepi da yaqto' nachenata da ishet da ỹache añimaye, qataq da yaqto' nache 'eetai' da huetague' de'era lo'onataxanaxac.»
3Qaq ime co'ollaxa nache laỹona't 'enauac so Israel le'ecpi huaña ye Jerusalén, da yaqto' aso laỹe' soua lqataxaco Ñim Nataxala', qanqochenaxata so lma' maye iqataxanai' co'ollaxa so David. 4Qaq nataqa'en laỹona't som chegoxoguetpi so Aarón qataq so leviitapi, 5qataq som chegoxoguetpi so Quehat, qataq som lataxala' Uriel, qataq som lqaỹañecpi somaye, nache ivi' ciento veinte. 6Qaq som chegoxoguetpi so Merari, qataq som lataxala' Asaías, qataq som lqaỹañecpi, ivi' doscientos veinte da ima'a't. 7Qaq som chegoxoguetpi so Guersón, qataq som lataxala' Joel, qataq som lqaỹañecpi somaye, ivi' ciento treinta da ima'a't. 8Qaq som chegoxoguetpi so Elisafán, qataq so lataxala' Semaías, qataq so lqaỹañecpi somaye, nache ivi' doscientos da ima'a't. 9Qaq so chegoxoguetpi so Hebrón, qataq so lataxala' Eliel, qataq so lqaỹañecpi somaye, nache ivi' ochenta da ima'a't. 10Qaq som chegoxoguetpi so Uziel, qataq so lataxala' Aminadab, qataq so lqaỹañecpi somaye, nache ivi' ciento doce da ima'a't.
11Qaq ime, nache so David iỹaxanalo soua ntaxaỹaxanaxanaqa Sadoc, qataq so Abiatar, qataq soua leviita Uriel, Asaías, Joel, Eliel qataq so Aminadab, 12nache 'enapegalo, 'eeta': «Qami' maye qami' lataxala'ate nam llalaqpi na leviitapi, qami' qataq nam qarhuo'oi le'ecpi qanqui'itaxachiita qome, yaqto' ishet da qauache añi arca maye laỹe' naua lqataxaco Ñim Nataxala', maye Natamnaxala' na Israel le'ecpi, da qanqochenaxachiỹa ye lma' maye mashe seqataxanai', 13cha'aye so hua'auchiguiñi co'ollaq so'otaq de'era, nache qami' saishet da qauo'oche damaye, ỹoqo'oye Ñim Nataxala' maye Qanatamnaxala', huo'oi soua nqa't da nachaalataxac, souaxat da saishet da senataq ca 'eetec ca lataxac da lamaxasoxonaxac.»
14Huaña nache so ntaxaỹaxanaxanecpi, qataq so leviitapi, nqui'itaxatta da yaqto' ishet da ỹache da nqochenaxat aso arca maye laỹe' soua lqataxaco Ñim Nataxala', maye Natamnaxala' so Israel le'ecpi. 15Nache so leviitapi ỹache aso laỹe' soua nqataxaco, ỹacheraleguete naua lallaco soua 'epaxaye maye lachoxola'ate asomaye, cha'aye nachera da lamaxasoxonaxac Ñim Nataxala' maye ỹamaxalec co'ollaxa so Moisés.
16Qaq so David, nataqa'en ỹamaxalec so lataxala'pi so leviitapi da ỹauo'o so no'onaxanaxanecpi ỹachegoxotaigui so maiche lauo' le'ecpi, ỹauota'a aso lviquepi salteeriopi, arpapi qataq so latoviaxanatacpi lcat da yaqto' huo'o da la'añaxac da do'onaxaata'ai' souaxat da ntonaxac. 17Nache so leviitapi ỹaneuo so Hemán, som llalec so Joel, qataq som lauo' le'ec Asaf, som llalec so Berequías, qataq so Etán maye llalec so Cusaías, maye chegoxogueta so Merari. 18Nataqa'en qoỹaneuo som laỹepi lauo' le'ecpi soomaye da yaqto' lasom lo'opi, som: Zacarías, Jaziel, Semiramot, Yejiel, Uní, Eliab, Benaías, Maseías, Matatías, Elifelu, Mecneías, Obed Edom qataq so Jeiel.
19Qaq soua 'onaxanaxaiqa Hemán, Asaf qataq so Etán, nachesoua soua pa'aira'aguet da iuaxaata'a't soua natoviaxanatal lcat bronce. 20Qaq so Zacarías, Aziel, Semiramot, Yejiel, Uní, Eliab, Maseías qataq so Benaías nachesoua soua iviqueetrapigui aso salteeriopi, 21qaq so Matatías, Elifelu, Mecneías, Obed Edom, Jeliel qataq so Azazías, nachesoua soua iviqueetrapigui aso arpapi da yaqto' ỹaueca'aguet da no'onaxanaxac. 22Qaq so Quenanías maye lataxala' so leviitapi maye nvique lo'opi, nacheso so pa'aỹa'aguet da no'onaxanaxac cha'aye ỹaỹaten damaye. 23Qaq so Berequías qataq so Elcana, nachesoua soua ilotrague' so ñegueuo so npe'l maye netaigui aso laỹe' soua nqataxaco. 24Qaq soua ntaxaỹaxanaxanaqa Sebanías, Josafat, Natanael, Amasay, Zacarías, Benaías qataq so Eliezer, nachesoua soua nasheere lo'o da huaña ye datatauga ye hueta'a aso laỹe' soua lqataxaco Ñim Lo'onatac 'Enauacna. Qaq so Obed Edom qataq so Yejías, soomaye nataqa'en ilotrague' so ñegueuo so npe'l maye netaigui aso laỹe' soua nqataxaco.
25Qaq so David, qataq so nqueroxonecpi ye Israel, qataq so lataxala'pi so qalota alleppi, ỹataqta machiguiñi da ỹe'eguena'a aso laỹe' soua lqataxaco Ñim Nataxala', ỹachegoxotchiguiña ye lma' so Obed Edom. 26Qaq souaxat da Ñim Lo'onatac 'Enauacna da itauaatac som leviitapi maye ỹachetac aso laỹe' soua lqataxaco Ñim Nataxala', nache qoỹanot Ñimaye so siete huaca llalqa qataq so siete peenaqpi. 27Qaq so David, huomtaigui so lapo' maye chegaqaigui na ỹataqta no'on lino, qataq nataqa'en so leviitapi maye ỹachetac aso laỹe' soua nqataxaco, nataqa'en so 'onaxanaxaicpi, qataq so Quenanías maye ilotague' da no'onaxanaxac. Qaq so David, nataqa'en nqolaataña so efod maye chegaqaigui na lino. 28Qaq 'era da 'eetec da 'enauac so Israel le'ecpi ỹachetac aso laỹe' soua lqataxaco Ñim Nataxala', nache ỹa'alaqtai' da ntonaxac, qataq do'onaxaata'ai' da l-lamaxa ana peenaq lcouepi, qataq ana trompeetapi, qataq na natoviaxanatacpi lcat, qataq ana salteeriopi, qataq ana arpapi.
29Qaq asa'aso laỹe' soua lqataxaco Ñim Nataxala', co'ollaq qaiviraxateua'a so huaqta'a't nỹecpi maye lalamaxat so David, nache aso Mical, maye llalec so Saúl, co'ollaq dalletaviigui so nalloxoqui, nache co'ollaq ila'a so nta'a David, da dasottac souaxat da ntonaxac, nache asomaye nomteguet da ỹataqta deqaiga somaye.
