So David loxonec so siiriopi qataq so amoniitapi
1Qaq co'ollaq mashe qaỹoqtegue de'era, nache ileu so Najás, maye nta'a ye Amón, nache so llalec, talec da lo'onataxanaxac somaye. 2Nache so David, co'ollaq deuennataxan, nache 'eeta': «Aỹem sechoxoren qome ñi Janún, maye llalec so Najás, cha'aye so lta'a ỹataqta aỹem ichoxoren co'ollaxa.» Nache so David, ỹamaq so ltaxaỹaxanaxanecpi da yaqto' ỹa'añaqchet somaye souaxat da l-leuaxa so lta'a, qalaxaye co'ollaq ivita so lamaxashecpi so David ye na'alhua so amoniitapi, da yaqto' ỹa'añaqchet so Janún, 3nache so lataxala'pi so amoniitapi, 'enapega so Janún, 'eeta': ¿'Am 'amaqtaqaic, peta'a 'aua'amaqten da ñi David namaq na la'aqtaxanaxanecpi da nacherata da 'am ỹa'añaqchet? ¡'A'i, yo'oqta da namayepi anac da imeten, naloqten qataq da ỹauattoota ne'ena qana'alhua!
4Qaq huaña, nache so Janún, damaxasoxoolec da qaỹaconeua'a so lamaxashecpi so David, nache qanamarec ana lqa' lauepi qataq qaicolaxata'aguelo soua alogo, nache tachiguiñalo qanqa'en naua lleegue, ime, nache ỹamaq da ỹe'eguelaxat. 5Qaq so David, co'ollaq la'axaỹaxac de'era huaigui se'eso ỹalleppi, nache damaxasoxona da qaica'ata'aguet, cha'aye somayepi ỹataqta lta'araic da lcoxo, qataq qoỹenapega da nache naña ye Jericó, ivitta'a da qaltaq ñaxat ana lqa' lauepi somayepi, nache ishet da ỹe'eguelaq. 6Qaq so amoniitapi co'ollaq ila'a da dalemata so David, nache so Janún, qataq som amoniitapi ỹamaq aso treinta y tres mil kilos aso plata da yaqto' nsheue naqa'en so alleppi maye netalec so caipi, qataq so netangui aso naigonapi alaataxaquipi, maye hueta'a ye Mesopotamia, Siria, Macá qataq ye Soba, 7nache so Janún qataq so amoniitapi isheeten da qaỹamaq aso treinta y dos mil naigonapi alaataxaquipi, qataq so nta'a ye Macá lỹatac so nalleppi, nache hua'a ye nalotta ye Medeba. Qaq so amoniitapi nataqa'en ca'ai som lalamaxat huaqta'a't nỹecpi, nache naỹamaxat da nalat. 8Qaq so David co'ollaq ỹaỹaten de'era, nache ỹamaq so Joab, qataq 'enauac so alleppi, som ỹalleppi maye ỹataqta 'añaxaicpi. 9Qaq so amoniitapi jec co'ollaxa, nache naỹamaxaañi, hua'a so ñegueuo so huaqta'a't nỹecpi, qaq so nta'alpi maye naỹa da itauan co'ollaxa somayepi, nache no'onañi huetauga so no'onaxa. 10Qaq so Joab co'ollaq ila'a som chegaqa'ague da dataỹa'ague qataq som chegaqa'ague na l-laq da huotaique iloquiaxan somaye, nache lca'aua'a so ỹataqta no'on alleppi Israel le'ecpi da delogui' so siiriopi. 11Qaq som laỹepi nalleppi somaye ipataxaguet so lqaỹa Abisay, da yaqto' delogui' so amoniitapi, 12nache 'enapego' 'eeta': «Da huo'otaq napacalec da ỹa'añaxac na siiriopi, nache 'auanac qome da aỹem 'autauan, qaq da huo'otaq napacalec da 'ara'añaxac na amoniitapi, nache aỹem, 'am setauan qome. 13Qaq 'ana'añaxat qome, ỹataqta ña'añaxataq da seloquiaxalec na qarhuo' le'ecpi qataq na huaqta'a't nỹecpi maye lalamaxat Ñim Qanatamnaxala'. Qaq Ñim Nataxala', ỹo'ot qome cam ỹaỹamaqchiguiñi naqa'en.»
14Nache so Joab, qataq so nalleppi, nqo'ona da delogui' so siiriopi, qalaxaye somayepi dataueeguesop so Joab. 15Qaq so amoniitapi co'ollaq ila'a da datauec so siiriopi, nache nataqa'en somayepi dataueeguesop so Abisay, som lqaỹa so Joab, nache ỹe'eguenaua'a so huaqta'a't nỹecpi. Huaña nache so Joab, ỹe'eguelaxa ye Jerusalén.
16Qaq so siiriopi co'ollaq ila'a da so Israel le'ecpi loxonec somayepi, nache ỹamaq so ltaxaỹaxanaxanecpi da 'enapega da anac da ntaune' so siiriopi maye neta'atague da le'ego so tala Éufrates, qaq somayepi anac, nache datataueegue so Sofac, som lataxala' so nalleppi so Hadad Ezer. 17Qalaxaye so David co'ollaq qaỹa'aqtaxanem de'era, nache laỹona't 'enauac so Israel le'ecpi, nache taitague da le'ego ỹa'axasoxoolec so tala Jordán, nache so David, ỹamaxalec da naỹamaxat naqa'en so nalleppi da yaqto' dataỹa'aguet da delogui' so siiriopi. Ime, nache delogui' somayepi, 18qalaxaye so siiriopi, dataueeguesop so Israel le'ecpi, nache so David ỹalauat so siete mil alleppi maye netangui aso naigonapi, qataq so cuarenta mil alleppi maye petañepi, qaq so David nataqa'en ỹalauat so Sofac, som lataxala' so alleppi siiriopi. 19Qaq som ltauapi so Hadad Ezer, co'ollaq ila'a da so Israel le'ecpi loxonec somayepi, nache ỹo'ot da naỹamaxataxac da naỹamaxate' so David, huaña nache so David choche ilattac somayepi. Qataq nache chegoqchiguiña da so siiriopi, saishet da ỹe'eguelaxa da itauan so amoniitapi.
