1Ỹoqo'oye so David 'enapeco': «Ne'ena, nachena na naña qome aca atamnaxaqui maye lalamaqte Ñim Lo'onatac 'Enauacna, maye Nataxala', qataq aca nca'atoxonaxalate da yaqto' ỹachalec ca lachetaqtaxanaxat qaỹavigaxatta na Israel le'ecpi.»
Da aỹamaxataxac da yaqto' qaỹo'ot aso atamnaxaqui
2Qaq ime co'ollaxa nache so David, ỹamaxalec da laỹona't som chegaqauecpi maye netaña ye na'alhua na Israel le'ecpi, nache iỹaxana som coma' lo'opi da ichec na coma', da yaqto' qanauaxaỹaxaasheguem asom atamnaxaqui maye lalamaqte Ñim Lo'onatac 'Enauacna. 3Qaq so David, nataqa'en iqataxanai' so qalota lcat da yaqto' qaitoqna't so lasompi, qataq da qaitoqneuo aso legaxaistepi so lasompi, qataq so ỹataqta qalota bronce, 4qataq so ỹataqta qalota 'epaq cedro, cha'aye som lma' ye Sidón qataq ye Tiro ỹataqta qalota co'ollaxa so 'epaq cedro nda'a somaye.
5Qaq so David, deuennataxaatac co'ollaxa, nache 'eeta': «Ñim ỹalec Salomón, ñimaye ñaq nogotolec saxanaxa da ỹoqta ỹe, qaq acam atamnaxaqui maye lalamaqte Ñim Nataxala' maye qano'oxoosheguem qome, acamaye ỹataqta late'erai qataq ỹataqta huo'o da llo'oxoyec qom netalec ana 'alhua, qaq ỹoqo'oye aỹem choche seqataxanai' nam no'onataxatpi qome acamaye.»
Ỹoqo'oye so David, co'ollaq ñaq taỹa'a da ileu, nache iqataxanai' 'enauac se'eso no'onataxanaxatpi. 6Ime co'ollaxa, nache so David, iỹaxana so llalec Salomón, nache huaqata da no'oxoosheguem qome aso atamnaxaqui maye lalamaqte Ñim Nataxala', maye Natamnaxala' so Israel le'ecpi, 7nache 'eeta': «'Am ỹalcolec, aỹem huo'o da iuennataxa da ño'oxoosheguem aca atamnaxaqui maye lalamaqte Ñim Nataxala', maye Ñatamnaxala'. 8Qalaxaye da la'aqtac Ñim Nataxala', 'eeta': ‹'Am, ỹataqta qalota so 'aucoraxatec ntago'q, qataq qalota so 'auo'ot alaataxacpi, ỹoqo'oye saishet da nache 'am da 'ano'oxoosheguem qome aca atamnaxaqui maye ỹalamaqte. 9Qalaxaye huo'o qome ca 'aỹa'alec maye nlaqchigui da nlagaxayec, qaq na npa'aguenaxauapi maye lauoreuapi, so'otec qome da nhuoteete' camaye, qaq ỹoqo'oye camaye le'enaxat qome Salomón. 10Qaq camaye, nacheca qome ca no'oxoosheguem aca atamnaxaqui maye ỹalamaqte. Qaq camaye nache Aỹem lta'a, qataq camaye ỹataqta ỹalamaxat ỹalec, nache camaye sanagui da nache 'eetai' qome da lta'a na Israel le'ecpi.›
11Qaq nagui 'am ỹalcolec, ỹataqta 'am hueta'aguet qome Ñim Nataxala', yaqto' 'avira'a da 'aushet da 'ano'oxoosheguem aca atamnaxaqui maye lalamaqte Ñim Nataxala' maye 'Anatamnaxala', qaq nache ipacchigui qome dam la'aqtac Ñimaye co'ollaq 'am ỹa'axatta'a. 12Qaq Ñim Nataxala', 'am ỹanem qome da naỹaanataxanaxac qataq da naỹaanec, yaqto' qom 'am ỹanem da 'aulo'ogue na Israel le'ecpi, nache ỹataqta 'aualaxalec na lqataxacpi Ñim Nataxala' maye 'Anatamnaxala'. 13Qaq qom ỹataqta 'aualaxalec da 'auo'ot na lqataxacpi, qataq na lapaxañi lataxacpi Ñim Nataxala', maye ỹamaxalec co'ollaxa so Moisés da ỹanem na Israel le'ecpi, nache ỹataqta ỹaỹamaqchiguiñi qome 'enauac nam 'auo'otpi. Qaq ỹataqta 'ana'añaxat qome, ỹataqta 'aua'añaxachigui ye 'arhuel, qataq saishet da leuapigui da 'arvilỹaxac, qataq saishet da 'añe'etac. 14Ña 'aulochigui qome da aỹem, ỹataqta lta'araic co'ollaxa da ña'añaxataxac, da seqataxanai' aso tres mil trescientos tonelada ana oro, qataq treinta y tres mil tonelada na plata, qataq so ỹataqta qalota bronce, qataq so lcat maye saishet da qaỹaỹaten ca lcata. Qataq nataqa'en seqataxanai' na 'epaq qataq na coma', qalaxaye 'am maiche 'anquigaxatec qome, da yaqto' qano'oxoosheguem aca atamnaxaqui maye lalamaqte Ñim Nataxala'. 15Nataqa'en lhuotta na qalota 'onataxanaxaicpi da 'auamaq, nam ỹaỹaten da ichec na coma', nỹec lo'opi, na ỹaỹaten da ichec na 'epaq, qataq nam ỹataqta sa nqalaate' da ỹo'ot 'enauac na ỹotta'a't no'onatacpi, 16da do'onataxana na oro, plata, bronce qataq na lcat. Qaq ỹoqo'oye 'auacoolec qome da 'auo'ot de'era no'onataxanaxac, qaq Ñim Nataxala' 'am itauan qome.»
17Qaq ime co'ollaxa, nache so David 'enapega 'enauac so lataxala'pi so Israel le'ecpi, da itauan so llalec Salomón, 'eeta': 18«Ñim Nataxala' maye Qanatamnaxala'ai qami' hueta'agueta, nache qami' ỹanema co'ollaxa da nlagaxayec 'enauac nam qoviita'alo, qataq aỹem ỹanem da selo'ogue 'enauac nam netalec ne'ena 'alhua, qaq namayepi nache huetalec da lamaxasoxonaxac Ñimaye qataq nam lalamaxat nhuo' le'ecpi. 19Qaq nagui, ỹataqta imauec qome da qarquiyaqteỹaxaqui qataq da qanachaalataxaqui, da qanmichiỹaique Ñim Nataxala' maye Qanatamnaxala'ai. Qaq ỹoqo'oye nagui, qauacoñiilec qome da qauo'oche aca atamnaxaqui maye lalamaqte Ñim Lo'onatac 'Enauacna maye Nataxala', da yaqto' añi arca maye laỹe' da aỹamaxataxac, qataq nam no'onataxanaxatpi maye qoỹanot co'ollaxa Ñim Nataxala', nache qanquigaxachiỹa qome acam atamnaxaqui maye qano'oxoosheguem da lalamaqte Ñim Nataxala'.»
