Som iuattague' soua ñeguereuo
1Qaq nataqa'en co'ollaq qanaloqchiiñi som iuattague' soua ñeguereuo, nache som coreiitapi, qalca'aua'a so Meselemías, som llalec so Coré, maye llalec so Asaf. 2Qaq soua llalqa so Meselemías, so ỹe le'enaxat Zacarías, Jediael, Zebadías, Jatniel, 3Elam, Johanán qataq so Elioguenay.
4Qaq soua llalqa so Obed Edom, so ỹe le'enaxat Semaías, Josabad, Yoaj, Sacar, Natanael, 5Amiel, Isacar, qataq so Peultay, cha'aye Ñim Lo'onatac 'Enauacna, ỹanem da lchoxonnataxanaxa so Obed Edom da qalota naqa'en so llalaqpi.
6Qaq so Semaías, som llalec so Obed Edom, nataqa'en huo'oi soua llalqa, qaq soomaye nache lataxala'ate so lauo' le'ecpi maye chegoxoguet so lta'alpi, cha'aye se'esoua ỹale't ỹataqta 'añaxaiqa. 7Qaq soua llalqa so Semaías le'enaxa't Otni, Rafael, Obed, Elzabad, Eliú qataq so Samaquías, qaq se'esoua ỹale't ỹataqta 'añaxaiqa. 8Qaq 'enauac se'esopi da chegoxoguetpi so Obed Edom, somayepi qataq so llalaqpi qataq so lqaỹañecpi, qaq 'enauac se'eso ỹalleppi sansatta qataq 'añaxaicpi da do'onataxaatac. Qaq da ima'a't nache ivi' sesenta y dos se'eso chegoxoguetpi so Obed Edom.
9Qaq som llalaqpi qataq so lqaỹañecpi so Meselemías, ivi' dieciocho, qaq se'eso ỹalleppi ỹataqta 'añaxaicpi.
10Qaq so llalaqpi so Josá, maye chegoxoguet so Merari, le'enaxat Simerí, som nataxala', qaq somaye saishet da nacheso so ỹe, qalaxaye som lta'a ỹanagui somaye da nataxala', 11qaq soua lỹa't llalqa le'enaxa't Hilcías, Tebalías, Zacarías. Qaq so llalaqpi, qataq so lqaỹañecpi so Josá, da ima'a't nache ivi' trece.
12Qaq 'era da 'eetec co'ollaq qanaloqchiiñi da nmeeta'a't qanqa'en somayepi da iuattague' soua ñeguereuo, nache 'eeta'am som nataxala'pi qataq so lqaỹañecpi, da yaqto' huetague' na no'onatacpi aso atamnaxaqui maye lalamaqte Ñim Nataxala'. 13Qaq da 'eetec da qailo'ogue ñi 'oonolec soua ñeguereuo, nache nallera't qanqa'en se'eso ñalaqpi, qaq saishet da qalca'ataua'a da huo'otaq ỹepi huo'otaq na'asapi.
14Qaq co'ollaq nallera't somayepi, nache so Selemías, taalec da ilo'ogue so ñegueuo maye pa'aỹa'ague da nala' lliguisheguem, qaq so llalec Zacarías maye ỹaanataxanaxaiqa naua lqataxaco, taalec da ilo'ogue so ñegueuo maye pa'aỹa'ague da sheu'. 15Qaq so Obed Edom, taalec da ilo'ogue so ñegueuo maye pa'aỹa'ague da la'añaxa, qaq soua llalqa somaye, taaleguete da iloregue so naỹamaqtaxanaqa' asom atamnaxaqui. 16Qaq so Josá, taalec da ilo'ogue so pa'aỹa'ague da nala' lliguiñi maye naña so ñegueuo Salequet, som nqa'aic maye taỹasheguema na pa'asheguem.
Qaq da nmeeta'a't somayepi nache, 'eeta': 17Ye 'oonolec na'a'q, nache seis so huetra'a so ñegueuo maye pa'aỹa'ague da nala' lliguisheguem, qataq cuatro som huetra'a so pa'aỹa'ague da sheu', qataq cuatro so huetra'a so pa'aỹa'ague da la'añaxa, qataq dos so huetra'a ñi 'oonolec soua naponaxanaxaqui'. 18Qataq so qasoxoc maye pa'aỹa'ague da nala' lliguisheguem, nache cuatro so huetra'a da ilotrague' so nqa'aic, qataq dos soua huetra'a da ilotegueto so qasoxoc. 19Qaq 'era da 'eetec co'ollaq qanaloqchiiñi da lo'onataxanaxac som iuattague' soua ñeguereuo, som chegoxoguetpi so Coré qataq so Merari.
20Qaq so laỹepi leviitapi, qalaq pa'aỹa'aguet da ilotague' aso laỹe' ana anom maye netaigui aso atamnaxaqui, qataq so naỹamaqtaxanaqa' da qaỹaỹamaxat som nogoxoshetpi maye sa qaishetapec. 21Qaq so llalaqpi so Laadán, maye chegoxoguet so Gersón, somayepi nache lataxala' so jehieliitapi. 22Qaq soua llalqa so Yejieli, qataq soua lqaỹa't, Zetán qataq so Joel, soomaye ilotrague' aso laỹe' aso anom maye netaigui aso atamnaxaqui.
23Qaq som chegoxoguetpi so Amirán, Isar, Hebrón qataq so Uziel, 24qaq som ỹoqta qaipataxaguet da ilo'ogue aso laỹe' aso anom, le'enaxat Sebuel, som chegoxoguet so Gersón, qataq so Moisés.
25Qaq som lauo' le'ecpi somaye, maye ỹoqta chegoxoguetpi so Eliezer, le'enaxat Rejabías, Jesaías, Jorán, Zicri qataq so Selomit.
26Qaq so Selomit, qataq soua lqaỹa't nachesoua soua ilotagueto som naỹamaqtaxanaqa'pi da qaỹaỹamaxat 'enauac som nogoxoshetpi maye sa qaishetapec, maye ỹaneuo co'ollaxa so nta'a David, qataq som lataxala'pi so nhuo' le'ecpi, qataq som lataxala'pi so mil, qataq so cien alleppi, qataq so laỹepi lataxala'pi so alleppi. 27Qaq se'eso nogoxoshetpi, somayepi ỹachegoxotaigui co'ollaxa so qalota alaataxacpi, nache ỹaneuo da yaqto' qaỹaỹamaxaañi aso atamnaxaqui maye lalamaqte Ñim Nataxala'. 28Qaq nataqa'en huetaigui asomaye som ỹaneuopi co'ollaxa so Samuel, maye huo'oi na l-loxoco, qataq so Saúl, som llalec so Cis, Abner, som llalec so Ner, qataq so Joab, maye llalec aso Seruyá. Qaq 'enauac se'eso qoỹaneuopi co'ollaxa, nache ilotague' so Selomit qataq soua lqaỹa't.
29Qaq so Quenanías, qataq soua llalqa, maye chegoxogueta so Isar, nachesoua soua 'amaqtaqaiqa nataxala'ate ye Israel, qataq pa'aỹa'agueta da qanaỹamaxate' nam lta'alpi na laỹepi shiỹaxauapi.
30Qaq som chegoxoguetpi so Hebrón, maye pa'aỹa'aguet co'ollaxa da ilotague' so Israel le'ecpi maye hueta'a da pa'aỹa'ague da nala' lliguiñi so tala Jordán, qataq huetague' 'enauac na no'onatacpi maye lalamaxat Ñim Nataxala', qataq na no'onatacpi maye ilotague' so nta'a, nacheso so Jasabías, qataq so lauo' le'ecpi, maye ivi' mil setecientos som ỹalleppi maye ỹataqta 'añaxaicpi.
31Qaq co'ollaq mashe ivi' soua cuarenta vi'iye da nta'a so David, nache qanmit aso le'enaxat lmalate so nhuo' le'ecpi maye chegoxoguetpi so Hebrón, huaña nache qailalec da ỹalectaigui somayepi so ỹataqta 'añaxaicpi ỹalleppi, maye hueta'a ye Jazer, maye huaigui ye Galaad. Qaq som lataxala' som chegoxoguetpi so Hebrón, le'enaxat Jerías, 32qataq ỹalecta'aguet so lauo' le'ecpi maye ỹataqta 'añaxaicpi, qaq somayepi ivi' dos mil setecientos som lataxala'pi so nhuo' le'ecpi. So nta'a David, ỹanem co'ollaxa da ilo'ogue so nhuo' le'ecpi maye chegoxoguetpi so Rubén, qataq so Gad, qataq som laỹe so maiche nalamaxat nhuo' le'ecpi maye chegoxoguetpi so Manasés, da yaqto' huapegue' 'enauac nam no'onatacpi maye lalamaxatpi Ñim Lo'onatac 'Enauacna, qataq so nta'a.
