So Salomón nacheso so nmeneguet so David
1Qaq so David, huaña co'ollaxa ye Jerusalén da laỹona't 'enauac so nataxala'pi ye Israel, som lataxala'pi so maiche nalamaxat nhuo' le'ecpi, qataq so lataxala'pi som alleppi maye qaicolaxachigui co'ollaxa da yaqto' do'onataxaatacot so nta'a, qataq so lataxala'pi so mil, qataq so cien alleppi, qataq so ilotague'pi so 'alhuapi, qataq so 'atetpi maye lalamaxatpi so nta'a qataq so llalaqpi somaye, qataq so 'amaqtaqaicpi nataxala'pi, qataq so ỹataqta 'amaqtaqaicpi qataq 'añaxaicpi lataxala'pi so alleppi.
2Qaq huaña, nache so David nachaañi, nache 'eeta': «Ñaq aỹem qana'axaỹaxañiỹa, qami' ỹaqaỹañicpi, qataq qami' ỹalamaxat ihuo' le'ecpi. Aỹem, iuennataxa co'ollaxa da ño'oxoosheguem ca nỹec da yaqto' qoỹanaigui taxa añi arca maye laỹe' naua lqataxaco Ñim Nataxala', qataq nacheca ctaxa ca lanataqa' Ñim Lo'onatac 'Enauacna, qataq mashe seqataxaatai' da yaqto' qano'oxoosheguem. 3Qalaxaye Ñim Lo'onatac 'Enauacna, aỹem 'enapega, 'eeta': ‹Saishet qome da nache 'am da 'ano'oxoosheguem aca atamnaxaqui, cha'aye 'am alaataxaic qataq qalota so 'aucorec ntago'q.›
4Qalaxaye Ñim Nataxala', maye Natamnaxala' na Israel le'ecpi, aỹem lca'ateua'a co'ollaq salectaigui so ỹaqaỹañecpi da yaqto' nache 'eetai' naqa'en da aỹem lta'a na Israel le'ecpi. Qataq Ñimaye lca'ateua'a co'ollaxa na lauo' le'ecpi so Judá da yaqto' nataxala'pi, qaq nache ỹachegoxottoigui se'eso nhuo' le'ecpi da lca'aua'a na ỹaqaỹañecpi, qataq nache aỹem ỹachegoxottoigui na ỹaqaỹañecpi da aỹem lca'ateua'a da yaqto' aỹem lta'a 'enauac na Israel le'ecpi.
5Qaq nagui, nam qalota ỹalaqpi maye aỹem ỹanem co'ollaxa Ñim Nataxala', nache ỹachegoxottoigui da lca'aua'a so ỹalec Salomón, da yaqto' nso'ongui añi so'onaxaqui da ỹo'ot da lo'onataxanaxac Ñim Nataxala' da ilo'ogue na Israel le'ecpi. 6Qaq Ñim Lo'onatac 'Enauacna, aỹem 'enapega co'ollaxa 'eeta': ‹So 'aỹa'alec Salomón, nacheso qome so no'oxoosheguem aca atamnaxaqui maye ỹalamaqte, qataq ca ñeqasoxocpi, cha'aye lleca'ateua'a somaye da ỹalec, qataq somaye nache aỹem lta'a, 7qaq somaye da ỹataqta queteguelo da ỹo'o't naua iqataxaco, qataq naua llapaxayiñi lataxaco, 'eeta'am da 'eeta'ac nagui, nache aỹem nache 'eetai' qome ñaqa'en da lo'onataxanaxac.›
8Qaq nagui, qauauañiichigui 'enauac qami' Israel le'ecpi, huaigui ne'ena naponaxac maye ỹo'ot Ñim Nataxala', qataq Ñim Lo'onatac 'Enauacna qomi' hua'aqtegalo da qami' seqatalo da ỹataqta qaualaqaiguet 'enauac nam lamaxasoxonaxacpi Ñim Nataxala' maye Qanatamnaxala'ai, yaqto' ne'ena ỹataqta no'on 'alhua, nache 'eetai' qome da qaralamaxache, qataq nache taỹa'a da lalamaxat cam qaỹa'alquipi. 9Qaq 'am ỹalec Salomón, ỹataqta 'auauattota qome Ñim Natamnaxala' na 'arta'a, qataq ỹataqta 'aumato'ot da 'arquiyaqteỹaxac, qataq da 'arasapachaxa, cha'aye Ñim Nataxala' ỹataqta ilaua'a da nquiyaqteỹaxac, qataq naua nhuennataxaco. Qaq ỹoqo'oye da 'anmitaique ñimaye, nache ishet da 'auanata, qalaxaye da qoca'ai, nache ñimaye saishet da 'am ihuooneguet. 10Qaq ỹoqo'oye ỹataqta 'antoueeta'ac qome da Ñim Nataxala', 'am lca'aua'a da yaqto' 'ano'oxoosheguem ca nỹec maye lanataqa' qome ñimaye. Ỹoqo'oye 'ana'añaxatat qome, nache 'auacoolec da 'auo'ot camaye.»
11Huaña nache so David, ỹanem so llalec Salomón aso huetalec da lataxac da no'onataguec aso atamnaxaqui, nỹecpi, naỹamaqtaxanaqa'pi, qataq so pa'asheguem nanataxaquipi, qataq som pa'aỹauo no'ochaqa'pi, qataq som ndaqa' sa qaishetapec. 12Qataq nataqa'en ỹanem asom huetalec 'enauac nam lapaxañi lataxacpi da qaỹo'ot so nqasoxoc aso atamnaxaqui, qataq so nanataxaquipi maye coleesop asomaye, qataq aso laỹe' ana anom, qataq so naỹamaqtaxanaqa'pi da qaỹaỹamaxat anam nachetaqtaxanaqtepi sa qaishetapec, 13nataqa'en so lo'ochaqa'pi so ntaxaỹaxanaxanecpi qataq so leviitapi, maye nmeeta'a'tpi da inoxoneuo da do'onataxan, qataq 'enauac nam no'onatacpi aso atamnaxaqui, qataq 'enauac nam no'onataxanaxatpi da qaỹo'ot da ño'oxonnataxanaxac asa'aso atamnaxaqui.
14Qaq nataqa'en so David, ỹanem so llalec Salomón, aso ỹataqta qalota oro qataq plata, da yaqto' qaỹo'ot 'enauac na no'onataxanaxat da qaỹo'ot da ño'oxonnataxanaxac, 15qataq aso lashe aso ncoỹaraxanaxaquipi, qataq aso ncoỹaraxanaxaquipi, asom qaỹauota'a na oro qataq na plata, nache naloqnagui ye lquiilo añi 'oonole soomaye, 16nataqa'en ỹanem so oro, nache naloqnagui ye lcata ñi 'oonolec soua lmala'ate aso nauolepi maye nachetaqtaxanaqte, som qaỹauota'a na oro qataq na plata. 17Nataqa'en ỹanem so oro da yaqto' qaỹo'ot so nquerenaxanaxatpi, nemaxanaqtepi, qataq aso ỹomaxaquipi. Nache naloqnagui ye lcata aso 'oonole aso ỹomaxaquipi, maye qaỹauota'a na oro qataq na plata. 18Nataqa'en ỹanem so ỹataqta qalota maye imauec oro da yaqto' qaỹo'ot aso nca'atoxonaxalate da qaỹauo'o na nchenaxanaxat, nataqa'en ỹanem so llalec, aso oro da yaqto' qaỹo'ot aso naigona maye netrangui qanqa'en soua ne'enaqtaqa huo'oi naua laua't, maye ỹauattraguilo naua laua't, nache ỹapotralec aso laỹe' soua lqataxaco Ñim Nataxala'.
19Nache so David, 'enapeco': «'Enauac ne'ena nanettañepi, aỹem ỹachaxana co'ollaxa Ñim Nataxala' da yaqto' saỹaten da lataxac da no'onataguec qome que'eca no'onatacpi.»
20Huaña nache so David 'enapega so llalec Salomón, 'eeta': «¡'Am, ỹataqta 'ana'añaxat qome, ỹataqta 'aua'añaxachigui ye 'arhuel, nache 'auacoolec da 'auo'ot de'era no'onataxanaxac! ¡Qataq saishet da leuapigui da 'arvilỹaxac, qataq saishet da 'añe'etac, cha'aye Ñim Nataxala' maye Ñatamnaxala', 'am hueta'aguet qome! Ñimaye saishet da 'am ỹaxanec qataq saishet da 'am ca'ai, nache ivitta'a da 'aumatta 'enauac de'era no'onataxanaxac, da 'ano'oxoosheguem aca atamnaxaqui maye lalamaqte Ñim Nataxala'. 21Qaq 'ena nam ỹalecta'a't ntaxaỹaxanaxanecpi qataq na leviitapi, maye lhuotta da pa'aỹa'aguet da ỹo'ot qome nam no'onatacpi aca'aca atamnaxaqui maye lalamaqte Ñim Lo'onatac 'Enauacna. Qaq nataqa'en 'am itauan qome nam shiỹaxauapi maye sa nqalaate' da ỹo'ot na ỹotta'a't no'onatacpi, qataq nam lataxala'pi 'enauac na nhuo' le'ecpi 'am itauan qome.»
