Nachaqñita Ñim Lo'onatac 'Enauacna salaxasoxoguet qataq sho'oxorenaq
1Qami' ñauochaxau' ỹaqaỹa't maye sa'amaqtenaqtac So Cristo, ñeshetaique da qami' qauaỹaañi da so hua'au qarta'alpi 'enauac somayepi ỹa'axasoxoolec aso auaxai le'enaxat auaxai togaxarai. Ñim Lo'onatac 'Enauacna ipelteetalec co'ollaxa somayepi so lo'oc na piguem. 2Qaq 'enauac de'era llecỹaxac somayepi, damaye 'eeta'am da nachera da nachelaxanataguec somayepi da yaqto' na'areua'a qanqa'en so Moisés. 3Nataqa'en 'enauac somayepi chectac so nallec maye chegoqo'ot Ñim Lo'onatac 'Enauacna. 4So Cristo nnaictague' somayepi, qalaxaye saqcha'a. Qataq nacheso so 'etaxat co'ollaxa maye chegaqaigui so coma', da yaqto' ỹa'axaneguet na laquip somayepi. Qaq 'enauac somayepi nỹomgui se'eso 'etaxat. 5Qalaxaye ñaqaiyeta somayepi saqalota na lataxacpi maye saishet da ỹo'ot da ntonaxac Ñim Lo'onatac 'Enauacna. Qaq ỹoqo'oye vichiguiñalo ana nhuachiquipi somayepi se'eso toolec 'alhua.
6Qaq 'enauac de'era huaigui somayepi nachera da qanapaxaguenataguec, da yaqto' saishet da seqopitaqa'a ca sa ỹaỹamaxañi, 'eeta'am da 'eetec somayepi. 7Ỹoqo'oye qami' saishet da qaue'enaxache da 'eetec somayepi da huo'o na natameetacot na ỹaqa'api maye saq 'en qataq choche ne'enaqtacpi. Cha'aye naua nanettaleguete ana la'aqtac lmalate Ñim Lo'onatac 'Enauacna 'eeta': «So shiỹaxauapi nso'ooñi. Ime, qaq ỹo'ot so lquia'axac qataq nỹomtac. Ime, nache nachaañi da dasora't, qaỹo'oxoreetac na ne'enaqtacpi.» 8Nataqa'en saishet da saxaigui da quisheguetaxac, 'eeta'am da 'eetec somayepi. Qaq ỹoqo'oye ileu so veintitrés mil shiỹaxauapi so 'oonolec na'a'q. 9Nataqa'en saishet da she'eguenaqtac Ñim Nataxala', 'eeta'am da 'eetec somayepi da huo'o co'ollaxa na ye'eguenataxan. Qaq ỹoqo'oye huo'o so ileupi co'ollaq so na'araxanaqpi detoxongui somayepi. 10Nataqa'en saishet da huo'o ca quetapeguelec Ñim Lo'onatac 'Enauacna, 'eeta'am da 'eetec co'ollaxa somayepi da huo'o na quetapeguelec so Moisés qataq so Aarón. Nache qaỹalauat, ỹalauat so chegaqasheguem lamaxashec laataxanaxaic Ñim Lo'onatac 'Enauacna.
11Qaq 'enauac de'era huaigui som hua'au qarta'alpi, damaye qoỹiyiñi da naloqnaxanaxat da qaỹauotaique qomi' qaiqatalo nagui da souaqtaiguilo naua pa'atre'c na'axa'te. 12Qaq ỹoqo'oye qaica qome ca 'eetega da qaica ca lasouaxashet, cha'aye saiuena'a da nacheca ca la'auaxanec da huo'o ca lasouaxashet. 13Da qañe'eguenataguiiqui maye qami' nvittegalo, damaye nachera da 'eeta'am da ñe'eguenataguec na 'enauac shiỹaxauapi. Qalaxaye qami' ishet da qaupi'iỹa'ai Ñim Lo'onatac 'Enauacna, cha'aye Ñimaye saishet da qami' ỹasheetema ca qañe'eguenataguiiqui da huo'otaq sa qanaloỹeeguet. Nachaqrata da huo'otaq nvi' ca qañe'eguenataguiiqui, nache Ñim Lo'onatac 'Enauacna qami' ỹachaxanalo ca lataxac da yaqto' ishet da qanaloỹa'aguet camaye.
14Ỹoqo'oye qami' ỹaqaỹañicpi, qami' ñauochaxau', saishet qome da qavio'oxoyiñiitac na qanatameetacotpi maye choche ne'enaqtacpi qataq saq 'en. 15Aỹem saỹaten da qami' ỹaanaxanaxaiqa, qaq ỹoqo'oye saỹaten da aỹem qauaỹaañiteguet. 16Da lquia'axac So Qarataxala' naxa da ñeỹomaxagui aso ỹomaxaqui qataq da seỹaxanaqot Ñim Lo'onatac 'Enauacna da ỹaalec da lqouagaxanaqtaic, nache 'enauac da shenaqta ñeuanaqaua'a da ltago'qỹaxac So Cristo. Qataq naxa da ñecolaxataxañi aso nauole da sacheguenaq, nache nataqa'en ñeuanaqaua'a da lo'ocỹaxac So Cristo. 17Na'aictaxa da qomi' qalote', qalaxaye 'enauac da sacheguenaq aso 'oonole nauole 'ayiiña, nache qomi' shenaqta'am ca 'oonolec no'ocỹaxac.
18Ña qaumiiñi na Israel le'ecpi. Nam chectac na nachetaqtaxanaxat huaca lapat maye qoỹaneuo, namayepi nhuanaua'a da lqouagaxanaqtaic Ñim Lo'onatac 'Enauacna, souaxat ne'ena nachetaqtaxanaxatpi. 19Saishet da sheetega da ỹataqta huo'o naq 'enec na qanatameetacotpi maye saq 'en qataq choche ne'enaqtacpi, huo'otaq na nachetaqtaxanaxat lapat maye qoỹanot namayepi da huo'otaq saq 'ena'am ca lỹa. 20Da sheetega 'eeta': Na saishet da ỹauatton Ñim Lo'onatac 'Enauacna, namayepi da ivita da ỹauo'o na lachetaqtaxanaxat, nache ne'ena lachetaqtaxanaxat taỹot na lamaxashecpi maye saqcha'a so pa'aguenataxanaxaic, qaq saishet da nacheñi Ñim Lo'onatac 'Enauacna. Qaq aỹem saishet da saỹamaxaren da qami' qa'aitapegueua'a na lamaxashecpi so pa'aguenataxanaxaic. 21Qataq saishet da qanỹomiigui aca ỹomaxaqui maye naigui da qaỹo'oxoren So Qarataxala', nache nataqa'en qanỹomiigui aca ỹomaxaqui maye naigui da qaỹa'amaqten na lamaxashecpi maye saqcha'a so pa'aguenataxanaxaic. Qataq saishet da qolliqui ca nallec maye naigui da qaiuennate So Qarataxala', nache nataqa'en qolliqui ca nallec maye qoỹanot na lamaxashecpi so pa'aguenataxanaxaic. 22¿Qami' qauoitaique peta'a da dalemata qanqa'eñi Ñim Lo'onatac 'Enauacna? ¡Qomi' saishet da ñapagaqalec da la'añaxac Ñimaye!
Ñimitaqaique ca ishet da ỹaỹamaxaañi cam qarỹa
23Huo'o da qoñiita na 'eeta' da la'aqtac: «Aỹem huesochiguiñi da maiche soiqueetac da huo'o ca so'ot.» ¡Qaq de'era qara'aqtaqui ỹoqta 'eesa! Qalaxaye saishet da 'enauac nam 'eetapeguec ca shiỹaxaua da ỹaỹamaqchiguiñi qataq saishet da 'enauac da ỹa'añaqchet da qara'amqaanataxanaxac. 24Qaq ỹoqo'oye qaica ca nmittaique ca maiche laỹamaxa. Nachaqrata da nmitaique ca nataqa'en ỹaỹamaxaañi ca lỹa.
25Qami' qolliqui qome 'enauac na lapat maye chegaqaigui aca nmenaxaqui namaye. Saishet da qaunataxañiitapeguelec ca chegaqa'ague, yaqto' saishet da sa ỹaỹamaxañi da qarhuennataqai. 26Cha'aye ana 'alhua qataq 'enauac nam huetalec, namayepi lalamaxat Ñim Nataxala'.
27Qaq saiuena'a da huo'otaq huo'o ca saxanaxa da da'amqaanataxan da qami' 'enapegalo da qarquia'axauai, qaq qolliqui 'enauac nam qami' ỹanema. Saishet da qaunataxañiitapeguec ca chegaqa'ague yaqto' saishet da sa ỹaỹamaxañi da qarhuennataqai. 28Qalaxaye da huo'o ca qami' da'aqtaxanema, 'eeta': «Ne'ena lapat, mashe qoỹanot na qanatameetacotpi maye saq 'en qataq choche ne'enaqtacpi,» nache saishet da qolliqui, yaqto' saishet da qauque'emaqchichi da lhuennataxac cam qami' da'aqtaxanema, cha'aye qami' qaica ca 'eetec da qolliqui qalaxaye cam qami' da'aqtaxanema maye ishet da ique'emaqchet da lhuennataxac. 29Aỹem ỹataqta sa saỹamaxaren da saq so'ot cam iuennataxac, cha'aye souaxat da ca lỹa shiỹaxaua 'eetega da sa ỹaỹamaxañi. 30Cha'aye da huo'otaq ñeqouagaxaueelec ca anoq da sanot da ña'achec Ñim Lo'onatac 'Enauacna qaq ¿ta'ainco' da aỹem qanayectapeguelec souaxat da sachectac camaye? 31Qaq da huo'otaq qauqui'i, huo'otaq qanỹomi, huo'otaq huo'o ca lỹa qauo'oche, qaq no'on da qaỹa'añiitoigui 'enauac da qayo'oxonnataxanaxaqui Ñim Lo'onatac 'Enauacna. 32Saishet da huo'o ca huañi qanqa'eñi na judiopi, huo'otaq na saq judiopi, huo'otaq na ỹa'amaqteetacpi Ñim Lo'onatac 'Enauacna. 33Qaq aỹem ỹataqta ñepogoxoueetague' da 'enauac qaỹaỹamaxareeta ca so'ot. Qaq saishet da maiche ñimittaique ca ỹaỹamaxa. Nachaqrata da sauotaique da ñeqouaguec ca iỹa yaqto' ishet da qanca'alaxatec.
