1 Corintios 12

₁Qami' ỹaqaỹañicpi, ñeshetaique da qauaỹaañita da lataxac na lachetaqtaxanaxatpi So Saqcha'a Na'añaxac Qui'itta maye ỹanem ñi 'oonolec na shiỹaxauapi.

₂Co'ollaq qami' saxanaxa da qaua'amaqchiñi So Cristo, nache qausomiitac, qavio'oxoyiñiitac na qanatameetacotpi maye saq 'en qataq choche ne'enaqtacpi qataq qaicaua caua la'aqtaqa. ₃Ỹoqo'oye ñeshetaique nagui da qauaỹaañita da qaica ca shiỹaxaua da ỹauectac So Saqcha'a Na'añaxac Qui'itta, nache ỹasaxaleguete naua qauema ltaxaỹaxaco So Jesús. Qataq nachaqnata nam ỹauectac So Saqcha'a Na'añaxac Qui'itta na ỹauatton da So Jesús, nacheso Som Nataxala'.

₄Saq 'ena'a't na nachetaqtaxanaxatpi maye qoỹanem na shiỹaxauapi, qalaxaye 'oonolec So Saqcha'a Na'añaxac maye chegoqo'ot. ₅Qataq saq 'ena'a't da lataxac da qaỹo'onataxanot So Qarataxala', qalaxaye 'oonolec Ñimaye so'onataxanaqtacot. ₆Qataq saq 'ena'a't da lataxac da lo'onataxanaxac na shiỹaxauapi, qalaxaye nacheñi Ñim Lo'onatac 'Enauacna maye ỹo'onataxanaxanec ca 'oonolec cam nalotaua'a da ỹo'ot. ₇Ñim Lo'onatac 'Enauacna qomi' ỹapaxague'n ỹachegoxotchigui So Saqcha'a Na'añaxac Qui'itta da qomi' ỹanema na lachetaqtaxanaxatpi da yaqto' ñepogoxoinaqapegue' da so'otaxac ca ỹaỹamaqchiguiñi ca qarỹa. ₈Qaq Ñimaye huo'o na ỹanem da ỹaanaxanaxaic da detaqa, qataq huo'o na ỹanem da saqalota da lauattonaxanaxac da detaqa, chegoqchigui naqa'en So Saqcha'a Na'añaxac. ₉Huo'o na ỹanem da lta'araic da lpi'iỹaxac, chegoqchigui naqa'en So Saqcha'a Na'añaxac, qataq huo'o na ỹanem da ishet da nataren na sa no'onpi. ₁₀Qataq huo'o na ỹanem da na'añaxac da ỹo'ot na sa qaỹauanapega, qataq huo'o na ỹanem da ỹa'axa't naua na'aqtaqa maye chegoqo'oto Ñim Lo'onatac 'Enauacna. Qataq huo'o na ỹanem da ỹauatton nam saq cha'api da huo'otaq choche tenataxanaxaic da nachaxan, huo'otaq nacheso So Saqcha'a Na'añaxac Qui'itta. Qataq huo'o na ỹanem da detaxaiguilo naua na'aqtaqa maye sa qaỹaỹate'n. Qataq huo'o na ỹanem da ỹaỹaten da ỹa'axa't ca naiguilo ne'enaua na'aqtaqa. ₁₁Qalaxaye nachaqsota so 'oonolec Saqcha'a Na'añaxac Qui'itta maye chegoqo'ot 'enauac ne'enapi. Somaye maiche chegoqchigui da naloqnec na ỹotta'a't lachetaqtaxanaxatpi da ỹanem ñi 'oonolec shiỹaxaua.

₁₂Na ỹa'amaqteetac So Cristo, 'eeta'am da lo'ocỹaxac ca 'oonolec shiỹaxaua. Qalota na na'attaua'a logoxoshetpi, qalaxaye 'oonolec da lo'ocỹaxac. ₁₃Cha'aye qomi' huo'o na judío le'ec, qataq huo'o na saishet. Qataq huo'o na nlatacpi, qataq huo'o na huesochiguiñi. Qalaxaye 'enauac qomi' qanachelaxanguilo So Saqcha'a Na'añaxac Qui'itta, da yaqto' 'oonolec ca qara'amqaanataxanaxac qataq 'oonolec da qaro'ocỹaxac. Qaq ñi 'oonolec da shenaqta, Ñim Lo'onatac 'Enauacna ỹami' So Saqcha'a Na'añaxac Qui'itta.

₁₄Da 'oonolec no'ocỹaxac saishet da 'oonolec ca lataxac, cha'aye saqalota na logoxoshetpi. ₁₅Da ca napia' 'eeta': «Aỹem, saishet da aỹem nhuaq, qaq ỹoqo'oye saishet da ña'attaua'a de'era no'ocỹaxac,» qaq 'enauac qomi' saỹaanaq da na'attaua'a de'era no'ocỹaxac na'aictaxa da la'aqtac de'era. ₁₆Huo'otaq ana ntela da 'enapec: «Aỹem saishet da aỹem na'aite, qaq ỹoqo'oye saishet da ña'attaua'a de'era no'ocỹaxac,» qaq da la'aqtac de'era, qalaxaye nache 'ena'am na'attauo. ₁₇Cha'aye da qaro'ocỹaxac da 'enauac da 'eeta'am aca na'aite, nache saishet da sa'axasoq, cha'aye qaca aca qartela. Qaq da 'enauac da no'ocỹaxac da 'eeta'am aca ntela, nache saishet da setaxanaq cha'aye qaica ca qarmic. ₁₈Qalaxaye Ñim Lo'onatac 'Enauacna maiche chegoqchigui da naloqchiichiguiñi de'era no'ocỹaxac da ỹa'areuo na logoxoshetpi. ₁₉Cha'aye ne'ena nogoxoshetpi da 'oonolec ca lataxac, qaq ¿chaq 'eetectaxa ca lataxac da no'ocỹaxac? ₂₀Qaq na'aictaxa da ỹotta'a't da lataxac na nogoxoshetpi, qalaxaye 'oonolec da qana'attaua'a no'ocỹaxac.

₂₁Qaq ỹoqo'oye ana na'aite sa ỹañoxot da 'enapega na nhuaq da 'eeta': «'Am sa seuen.» Qataq na nqaic sa ỹañoxot da 'enapegalo naua napia'ate da 'eeta': «Qami' sa seue'n.» ₂₂Chaqrata da ca pa'aigue naua nogoxoshe'ete ca 'eeta'am da qaica ca la'añaxac, qaq nacheca ca ỹactec da qaiuen. ₂₃Qataq ca pa'aigue naua nogoxoshe'ete ca 'eeta'am da qaica ca naigui, qaq nacheca ca ỹactec da qantela'a. 'Eeta'am ñaqa'enaq da huo'o ca pa'aigue da no'ocỹaxac da saishet da sachaxanaq. ₂₄Qalaxaye mashe sa iuen da qaiyaquen ca huo'o da llo'oxoyec. Qaq 'era da 'eetec Ñim Lo'onatac 'Enauacna co'ollaq ỹa'ara't de'era no'ocỹaxac, yaqto' ca pa'aigue ca 'eeta'am da qaica ca naigui ishet da ỹactec naqa'en da qaỹo'oxoren, ₂₅yaqto' de'era no'ocỹaxac, nache 'eetai' da na'atta't. Qataq ñi 'oonolec ỹataqta npogoxoinapegue' da itauan ca lỹa. ₂₆Qaq ỹoqo'oye da huo'o ca 'oonolec ca pa'aigue ne'ena nogoxoshetpi da daỹalli, nache 'enauac na laỹepi nataqa'en daỹalli. Qataq da huo'o ca 'oonolec ca pa'aigue da qaỹo'oxoren, qaq nataqa'en na laỹepi ivirauga da ntootapigui'.

₂₇Ñi 'oonolec da qoñiita na'attaua'a na laỹepi 'amqaanataxanaxaicpi, qaq 'enauac qami' qana'ayeetaua'a da lo'ocỹaxac So Cristo. ₂₈Na 'amqaanataxanaxaicpi, Ñim Lo'onatac 'Enauacna ỹami' da lo'onataxanaxac ñi 'oonolec namayepi. Ỹamataxaachiguiñi na lamaxashecpi So Jesús. Ime, qataq jec na la'aqtaxanaxanecpi Ñim Lo'onatac 'Enauacna. Ime, qataq jec na dapaxaguenataxanapecpi. Nataqa'en nam ishet da ỹo'ot na sa qaỹauanapega. Ime, qataq jec na ishet da nataren na sa no'on, qataq na itaunec da lhuenaxanaxa ca lỹa, qataq na ishet da nataxala'. Ime, qataq huo'o na ỹanem da ishet da detaxaiguilo naua na'aqtaqa sa qaỹauanapegalo. ₂₉Saishet da 'enauac namaxashecpi, qataq saishet da 'enauac na'aqtaxanaxanecpi qataq dapaxaguenataxanapecpi, nataqa'en saishet da 'enauac da ỹo'ot na sa qaỹauanapega, ₃₀huo'otaq da nataren na sa no'on, qataq saishet da 'enauac detaxaiguilo naua na'aqtaqa maye sa qaỹauanapegalo, qataq saishet da 'enauac da ỹaỹaten da ỹa'axat ca naigui ne'enaua na'aqtaqa. ₃₁Qaq ỹataqta ỹaỹamaqchiguiñi da qauoitaique da qauacoñiiguet ca no'on naỹaanec da chegoqo'ot So Saqcha'a Na'añaxac. Qalaxaye aỹem qami' sapaxagueneque cam ỹactec da lyac.