1 Corintios 15

₁Qaq nagui qami' ỹaqaỹañicpi, sauotaique da qami' seuennataxanaxaneque de'era no'on na'axaỹaxac maye qami' sanema co'ollaxa. Qaq qami' qauacoñiiguet co'ollaxa damaye qataq huo'o da qarpi'iỹaxaqui. ₂Da qoquiito'ot da qanaquitaxaqui de'era no'on na'axaỹaxac, nache qarca'alliiuec. Qaq da saishet, nache qaica ca naigui damaye co'ollaxa da qauacoñiiguet.

₃Dam sa'auaxaachiguiñi maye qami' sapaxagueneque, damaye nataqa'en aỹem qaỹapaxaguenec co'ollaxa, 'eeta': So Cristo qomi' ileualeguete souaxat da qaye'etaxaloxo. Qaq damaye ipacchigui da 'enapec ana nere maye huetalec na la'aqtacpi Ñim Lo'onatac 'Enauacna, da ₄Somaye qailareñi. Qaq co'ollaq inoxoore'c soua tres na'axa'te, nache Ñim Lo'onatac 'Enauacna qaltaq nca'alaxatec. ₅Qaq ime, nache Somaye hua'auchiguiñi da nachaxana so Pedro, ime qaltaq jec soua lỹa't once lamaxa'she. ₆Ime, nache qaltaq nachaxana so napacalec ca quinientos som ca'attague' co'ollaxa. Qaq qalota nagui namayepi na ña nca'altauec, qataq huo'o na mashe qanmataxanaxanec. ₇Qaq co'ollaq qaỹata'ague qaltaq nachaxana so Santiago, ime qaltaq 'enauac so laỹepi lamaxashecpi.

₈Nache sepa'atec da aỹem nachaxana Somaye, na'aictaxa da aỹem shena'am da lañoxoc ca nogotolec maye ichiỹa'a ca laloqo' da ñiguiñi. ₉Cha'aye aỹem qaica ca ỹa'amaqchec, saq shena'am na laỹepi lamaxashecpi So Jesús, qataq sa yaloua'a da aỹem qoỹanagui da aỹem lamaxashec Somaye, cha'aye secaatac na ỹa'amaqteetacpi co'ollaxa. ₁₀Qalaxaye Ñim Lo'onatac 'Enauacna ỹataqta aỹem ỹauotec, ỹoqo'oye ỹauo'o aỹem lamaxashec nagui Ñimaye. Saishet co'ollaxa da so'otan da la'añaxac maye aỹem ỹami', qataq ñapacalec da lo'onataxanaxac na laỹepi lamaxashecpi Ñimaye. Qalaxaye 'enauac de'era so'ot, damaye chegoqchigui da la'añaxac Ñim Lo'onatac 'Enauacna. ₁₁Qaq ỹoqta 'eesa da aỹem qataq na laỹepi namaxashecpi qaica ca qara'amaqchec. Dam ỹataqta ỹactec da huo'o da la'amaqchec, damaye nachera da qara'aqtaxanaxac da sa'axataqtac da no'on na'axaỹaxac, dam qami' qaua'amaqchiñiitac nagui.

₁₂Qaq 'era da no'on na'axaỹaxac maye sa'axataqtac 'eeta': Ñim Lo'onatac 'Enauacna nca'alaxatec co'ollaxa So Cristo. Qaq ¿Ta'ainco' ye huo'o da qoñiita na 'eetega da saishet da qaltaq ỹe'eguelaxalec da nca'alec na leuaxaicpi? ₁₃Cha'aye da na leuaxaicpi da saishettaxa da qaltaq ỹe'eguelaxalec da nca'alec, nache nataqa'en taxa So Cristo saishet da ỹe'eguelaxalec da nca'alec co'ollaxa. ₁₄Qaq da saishettaxa da nca'alec qanqa'en So Cristo, nache de'era no'on na'axaỹaxac maye sa'axataqtac qaicactaxa ca naigui, qataq nataqa'en qaica ca naigui da qami' qaua'amaqchiñiitac So Cristo. ₁₅Qaq taxa da ỹoqta 'eesa da na leuaxaicpi saishet da qaltaq ỹe'eguelaxalec da nca'alec, nache qomi' choche satenataxanaqtac da sa'axataqtac Ñim Lo'onatac 'Enauacna qataq da sa'axataqtac da Ñimaye nca'alaxatec co'ollaxa So Cristo. ₁₆Cha'aye da saishet da nca'alec qanqa'en na leuaxaicpi, nache So Cristo saishettaxa da nca'alec qanqa'en. ₁₇Qaq So Cristo da saishettaxa da ỹe'eguelaxalec da nca'alec qanqa'en, nache qaica ca naigui da qarpi'iỹaxaqui Somaye. Qataq na qarasouaxashechi saishettaxa da qaỹapalaxat. ₁₈Qaq nataqa'en na mashe qanmataxanaxanecpi nam quetañi' da ỹa'amaqten So Cristo, namayepi imauec da deqat. ₁₉Da qanaquitaxac So Cristo da nda'a't da talec nagui da ñaq ñachaataqtac, nache saishet da huo'o ca 'ena'ama qomi' da qarachoxoyec.

₂₀Qalaxaye ỹataqta 'eesa da ¡So Cristo ỹe'eguelaxalec da nca'alec! Qaq damaye ỹa'axat da nataqa'en taỹa'a da ỹe'eguelaxalec da nca'alec na laỹepi leuaxaicpi. ₂₁Cha'aye de'era nleuaxa chegoqchigui co'olloxocheye so Adán, qaq nache 'eetec nataqa'en chegoqchigui So Cristo da ishet da qanca'alaxatec na leuaxaicpi. ₂₂Qaq 'enauac na shiỹaxauapi ileu 'eeta'am da l-leuaxa so Adán, qaq nache 'eetec nataqa'en da chegoqchigui So Cristo da ishet da 'enauac da ỹe'eguelaxalec da nca'alec na shiỹaxauapi. ₂₃Qalaxaye ñi 'oonolec ỹataqta ca maiche laloqo' da qaltaq qanca'alaxatec. So Cristo mashe sogote la'auaxanec da nca'alec qanqa'en. Qaq qom ñe'eguelaq Somaye, nache nca'alec nam quichiguiñi' da ỹa'amaqteetac Somaye. ₂₄Huaña, nache ivita ca loga'tna, nache So Cristo nlaxaañi da la'añaxac 'enauac na ỹotta'a't damaxasoxonapecpi. Huaña, nache ỹanot da lo'onataxanaxac da ilo'ogue 'enauacna ñi Lta'a maye Lo'onatac 'Enauacna. ₂₅Cha'aye So Cristo iuen da ñaq 'eetalec da nta'a choche ivitta'a que'eca na'a'q qom loxonec 'enauac na ipa'agueetacpi. ₂₆Qaq que'eca pa'atec da qanauec qome, nachera da nleuaxa. ₂₇Ana nere maye huetalec na la'aqtacpi Ñim Lo'onatac 'Enauacna da 'eeta': «Ñim Lo'onatac 'Enauacna ipataxalec da ilo'ogue 'enauac So Cristo», qaq de'era na'aqtac «'enauac» damaye saishet da ỹalectoigui Ñim Lo'onatac 'Enauacna da nataqa'en qailo'ogue, cha'aye Ñimaye maye ỹami' da 'enec So Cristo da ilo'ogue 'enauacna. ₂₈Qaq qom mashe 'enauac da qaipataxalec 'enauacna so Ñalec, nache Somaye maiche nañanot da 'enec Ñim Lo'onatac 'Enauacna. Nache huaña nache Ñim Lo'onatac 'Enauacna imata'a't da ilo'ogue 'enauacna, cha'aye Ñimaye nacheñi ñi chegoqchigui da ỹami' 'enauac da 'enec So Cristo da ilo'ogue 'enauacna.

₂₉Qaq ¿hua'ague ca 'eetec ye da qoñiita huo'o na nañan da qanachelaxan, cha'aye da lhuennataxac 'eetega da ishet da qanca'alaxatec ca lỹa maye mashe saqca? Qalaxaye da 'eesa da na leuaxaicpi saishet da ỹe'eguelaxalec da nca'alec, nache ¿ta'ainco' taxa da nañan da qanachelaxan souaxat namayepi?

₃₀Qataq qomi' ¿ta'ainco' taxa da sanaxaguet na lchecsat da qanachaalataxac 'enauaque naua na'axa'te? ₃₁Qami' ỹataqta qauaỹaañita da 'enauaque naua na'axa'te da sootaigui da lchec da nleuaxa. Qaq de'era ỹataqta 'eesa, 'eeta'am da ñetonaxac da qami' ñetootegueque, cha'aye mashe qaua'amaqchiñiitac So Cristo. ₃₂Co'ollaq soota'a ye Éfeso, nache satata'aguet na ỹalleppi maye 'eeta'am ca shiguiỹac dequi'iỹapec. Qalaxaye da 'eesa da na leuaxaicpi saishet da ỹe'eguelaxalec da nca'alec, nache ¿negue't ca ỹaueguec maye sachegoxotaigui de'era? Qaq ỹoqo'oye ỹaỹamaqchiguiñi da so'otaq de'era na'aqtac naxa maye 'eeta': «Sequia'aq qataq ñeỹomaq, cha'aye qonte' seleuaq.»

₃₃Saishet qome da maiche qanatenacheetapeguela't. Cha'aye 'eesa naxa da na'aqtac maye 'eeta': «Ca qauemaic shiỹaxaua na'aqchet ca no'on lataxac ca lỹa.» ₃₄Ỹataqta qauennataxañiitelec ca qauo'oche, qataq saishet da sa qaualaqaiguet Ñim Lo'onatac 'Enauacna. Qaq nache sheetec de'era, yaqto' qami' huo'o da qara'aloqoi. Cha'aye huo'o da qoñiita na saishet da ỹauatton Ñim Lo'onatac 'Enauacna.

₃₅Qalaxaye saiuena'a da huo'o ca aỹem inat, 'eeta': «¿Ca 'eeteco' da na leuaxaicpi da qaltaq ỹe'eguelaxa da nca'alec? ¿Chaq 'eeteco' qome ca lo'ocỹaxac?» ₃₆De'era nnataxanaxac, ỹataqta qaica ca laỹamqa', cha'aye da qanshetaique da nañaxat aca nañiguishe, nache iuen da hua'auñi da taigui qanqa'en na 'alhua aca ala. ₃₇Aca qoỹaañi da huo'otaq ala na trigo, huo'otaq aca lỹa nañiguishe ala, acamaye ỹataqta npe'eneguet da lataxac da mashe ñaxat. ₃₈Qalaxaye añi 'oonole nañiguishe, Ñim Lo'onatac 'Enauacna maiche ỹoiqueetac ca ỹanem lataxac. ₃₉Nataqa'en saishet da 'enauac da 'eeta'a't da no'ocỹaxac. Cha'aye na shiỹaxauapi huo'o da maiche lalamaxat lataxac da lo'ocỹaxac. Nache 'ena'am na shiguiỹacpi, huo'otaq na huaỹotac, huo'otaq na 'etaxat le'ecpi. Namayepi saishet da 'eeta'a't da lo'ocỹaxac. ₄₀Nache 'eetec nataqa'en huo'o da maiche lataxac da lo'ocỹaxac na hueto'ot na piguem, qataq huo'o da maiche lataxac da lo'ocỹaxac nam huetalec ana 'alhua. Da lyacỹaxac da lo'ocỹaxac nam hueto'ot na piguem saishet da 'ena'am da lo'ocỹaxac na huetalec ana 'alhua. ₄₁Na le'eraxa añi nala' saishet da 'ena'am na le'eraxa ñi ca'agoxoic qataq ana huaqaañipi. Qataq nataqa'en ana huaqaañipi saishet da 'ena'a't na le'eraxa. ₄₂Qaq nache 'eetec nataqa'en qom qanca'alaxatec na leuaxaicpi. ₄₃Da huo'o ñi ileu, nache qailareñi da lo'ocỹaxac, qaq de'era no'ocỹaxac ivira da qaica ca lyac qataq qaica ca la'añaxac. Qalaxaye que'eca shiỹaxaua da qaltaq nca'alec, nache da lo'ocỹaxac ỹataqta huo'o da lyac qataq huo'o da la'añaxac, nache saishet da qaltaq ileu. ₄₄Ca qailareñi yo'oqchigui no'ocỹaxac, qalaxaye qom qanca'alaxatec, nache huo'o da lo'ocỹaxac saqcha'a. Qaq da 'eesa da huo'o ca no'ocỹaxac yo'oqchigui, nache nataqa'en huo'o ca no'ocỹaxac saqcha'a.

₄₅Qaq ỹoqo'oye ana nere maye huetalec na la'aqtacpi Ñim Lo'onatac 'Enauacna 'eeta': «So hua'auchiguiñi ỹale, le'enaxat Adán, nacheso so la'auaxanec da huo'o da lca'alaxa.» Qalaxaye So Cristo som pa'atec Adán, nacheso som saqcha'a maye ishet da ỹan da nca'alaxa. ₄₆Qaq ỹoqo'oye hua'auñi da yo'oq de'era yo'oqchigui no'ocỹaxac, ime, nache nvi' dam saqcha'a no'ocỹaxac. ₄₇So hua'auchiguiñi shiỹaxaua, qaỹachegoxotaigui ana 'alhua. Qalaxaye so pa'atec shiỹaxaua, Somaye chegoqo'ot na piguem. ₄₈'Enauac qomi' maye sonaqtalec ana 'alhua, da qaro'ocỹaxac shenaqta'am da lo'ocỹaxac so Adán, maye qaỹachegoxotaigui ana 'alhua. Qaq na hueto'ot na piguem, da lo'ocỹaxac qalaq 'eeta'am da lo'ocỹaxac So Cristo. ₄₉'Eeta'am da nagui qomi' sanaqtañi da lo'ocỹaxac so hua'auchiguiñi ỹale maye qaỹachegoxotaigui ana 'alhua, qaq nache 'eetec nataqa'en qome da shenaqta'am da lo'ocỹaxac So Cristo maye piguem le'ec.

₅₀Qami' ỹaqaỹañicpi da sauotaique da qami' sa'axatema 'eeta': de'era yo'oqchigui qaro'ocỹaxac saishet da inoxoneua'a ca lo'onataxanaxac Ñim Lo'onatac 'Enauacna maye saqcha'a qataq qaica ca loga't. ₅₁Qalaxaye ñeshetaique da qauaỹaañi de'era saqcha'a 'eetapeguec Ñim Lo'onatac 'Enauacna da saishet da 'enauac da seleuaq, qalaxaye 'enauac qome da qomi' qanaralaxa't. ₅₂Qaq ỹataqta nque'elaxatta qome de'era, 'eeta'am da 'oonolec nqachegoxoñi ca shiỹaxaua, qom qaỹa'axaỹa aca pa'atec nasheere. Qom qaỹasheeraxalecna, nache na leuaxaicpi nca'alec qanqa'en. Huaña, nache saishet da qaltaq ileu. Qaq qomi' maye sa'amaqtenaqtac So Cristo maye ñaq ñeca'alaqtauec qomi' qanaralaxa't. ₅₃Cha'aye de'era qarapachiỹaxac maye ishet da nlaguiñi, damaye iuen da ỹaañi qanqa'en cam saishet da nlaguiñi. De'era yo'oqchigui qaro'ocỹaxac maye ishet da ileu, damaye iuen da ỹaañi qanqa'en cam saishet da ileu. ₅₄Qaq qom ivira de'era, nache ỹataqta ipacchiguilo naua nanettralec ana nere maye huetalec na la'aqtacpi Ñim Lo'onatac 'Enauacna maye 'eeta':

₅₆Da nleuaxa do'ogoxona da ñe'etaxaloxo da qomi' ique'emaqche't, qaq da ñe'etaxaloxo huo'o da la'añaxac souaxat da do'ogoxona na namaxasoxonaxacpi maye chegoqo'ot so Moisés. ₅₇Qalaxaye sanaqot da qana'achec Ñim Lo'onatac 'Enauacna da qomi' ỹanema da ishet da sauegaxanaq, chegoqchigui naqa'en So Qarataxala' Jesucristo.

₅₈Qaq ỹoqo'oye qami' ñauochaxauapi ỹaqaỹañicpi, saqco' qome ca qanamachiỹaique, qoquiito'ot da qauo'ocheetac da lo'onataxanaxac So Qarataxala'. Cha'aye qami' qauaỹaañita da qaro'onataxanaxaqui da qauo'onataxañiitacot Somaye ỹataqta huo'o da nsheetenaguec.