Ñim Lo'onatac 'Enauacna qomi' iỹaxanalo da so'onataxanaqot So Cristo
1Qami' iuen da qomi' qauamachiỹa'aque da choche qomi' lo'onataxanaxanaqa So Cristo, qomi' ipataxaleguete da sapaxaguenataxanaxac dam 'eetapeguec Ñim Lo'onatac 'Enauacna maye saqcha'a co'ollaxa. 2Qaq cam huo'o ca qaipataxalec no'onataxanaxac camaye iuen da ỹataqta npe'et. 3Aỹem saishet da huo'o ca iuogoxo da aỹem qanmichi, huo'otaq da aỹem qaỹataxanot ca yo'oqchigui nta'a da aỹem nmit. Nache 'ena'am aỹem saishet da sa'aualec da ñimitteguela't. 4Aỹem saishet da ñetoonec da huo'o ca so'ot sa ỹaỹamaxañi, qalaxaye damaye saishet da naigui da ỹoqta 'eesa da aỹem huesochiguiñi da qaica ca ỹasouaxashet. Ñim Lo'onatac 'Enauacna maye nachaqñita hueto'ot da la'añaxac da aỹem nmit. 5Qaq ỹoqo'oye qami', saishet da qaua'aviỹalec da qanmichi ca qarỹai, nato' qom ñe'eguelaq So Jesucristo. Qaq qom ñe'eguelaq Somaye, nache ỹachaxan nam saqcha'a qataq nam iuennatega ñi 'oonolec. Nache Ñim Lo'onatac 'Enauacna ỹo'oxoren ñi 'oonolec, chegoqchigui cam ỹo'ot.
6Saloqnaxaatapigui so Apolo qataq aỹem, yaqto' qami' ishet da qauachegoqoichigui da shenaqta da qauaỹaañi da naigui da na'aqtac naxa maye 'eeta': Saishet da qanapacỹapeguelec dam nanettalec ana nere, maye huetalec na la'aqtacpi Ñim Lo'onatac 'Enauacna. Yaqto' qaica ca ipettega da ca lo'onataxanaxanec Ñimaye napacalec da la'amaqchec ca lỹa. 7Cha'aye ¿negue't ca 'am ỹanagui da 'anataỹaña na 'araỹepi? ¿Negue'to' ca saq chegoqo'ot Ñim Lo'onatac 'Enauacna na 'am hueto'ot? Qaq Ñimaye da 'am ỹanem na 'am hueto'ot, qaq ¿ta'ainco' ye 'ana'amaqteetac, 'eeta'amo' da 'enauac na 'am hueto'ot maiche 'ara'añaqteguishec?
8Qami' mashe qami' hueto'oto 'enauac nam qanqopichiitaique: mashe qami' sallaxanaqa, qataq mashe qoñiita'am na nta'alpi, qaq 'eeta'am da nache qomi' qauasaqaitre'c. ¡'Onaxaico' da ỹataqta 'eesa da qami' nta'al! ¡Yaqto' qami' qaro'onataxanaxau' da qomi' nta'al! 9Qalaxaye qomi' maye qomi' namaxa'she, Ñim Lo'onatac 'Enauacna 'eeta'am da qomi' ipa'axaatre'c. Shenaqta'am ca ncoñeteguishec maye taỹa'a da qaỹalauat, souaxat ca lasouaxashet. Seviraqta'aguet da qomi' imeteeta'ape na shiỹaxauapi qataq 'enauac na chegaqasheguem lamaxashecpi Ñim Lo'onatac 'Enauacna. 10Qaq qomi' souaxat da salaxasoxoguet So Cristo, nache na shiỹaxauapi qomi' ỹamata'aque da qaica ca saỹaanaqpec, qalaxaye qami' chegoqchigui da lqouagaxanaqtaic So Cristo, nache qami' qaỹamata'aque da qami' ỹaanaxanaxaiqa. Qomi' qaica ca qara'añaxac, qami' qalaq qami', 'añaxaiqa. Na shiỹaxauapi qomi' no'otanguilo, qaq qami' qalaq ỹataqta huo'o naq 'enec qanqa'en. 11Nagui ñaq 'eetalec da huo'o da qanque'etaxanaxac na qarqouaxa, qataq na qaraquip, qataq qaica ca ñapoxoña. Na shiỹaxauapi saishet da qomi' iyacna'ape, qataq qaica ca ỹoqta qarma'. 12Ñasamaxañi souaxat na yo'oqchigui qaro'onatac. Na shiỹaxauapi qomi' isheueetaleguete, qalaq qomi' seroxoleguete naua qartaxaỹaxaco ỹaỹamaqchiyiñi. Qomi' qaicaata'ape, qalaq ña'añaxataxaguet da qancanaguec. 13Qomi' qaỹasaxaleguete naua ntaxaỹaxaco sa ỹaỹamaxaayiñi, qalaxaye da sasataxaguet qalaq seroxoguet da ỹaỹamaqchiguiñi. Qaq nagui ñaq 'eetalec da qomi' qaỹe'enaxatteguema ca lasogoñi, huo'otaq na lte nam ỹasaxauec na shiỹaxauapi.
14De'era shiyiñi, damaye saishet da huo'otaq ñeshetaique da qami' sa'aloqche't. Chaqrata da ñeshetaique da qami' seqatalo, cha'aye qami' ỹauotaqa'ate ỹalqa. 15Qaq na'aictaxa da ivi' ca diez mil na qami' ỹapaxagueneque da na'aqtaguec So Cristo, qalaxaye na qarta'ailpi saishet da qalota. Aỹem 'oonolec maye lta'a da qarpi'iỹaxaqui So Cristo Jesús. Cha'aye aỹem maye qami' sa'axatema co'ollaxa da no'on na'axaỹaxac maye na'aqtaguec So Cristo, nache qaviyiỹa'a da 'eeta'am da qami' ỹalaqpi. 16Qaq ỹoqo'oye qami' ñachoxoreetoiguilo da qoquiitelec da ỹataxac.
17Qaq qami' samaxalo so Timoteo maye ỹauotaxat 'eeta'am ca ỹalec, cha'aye somaye ỹataqta ỹalaxaguet So Qarataxala'. Qaq ỹoqo'oye ỹataqta ipe'et somaye. Qaq somaye qome qami' iuennataxanaxaneque nam ỹapaxaguenataxanaxacpi maye na'aqtaguec So Cristo dam sapaxagueetapeguec 'enauac nam hueta'a na 'amqaanataxanaxaicpi. 18Huo'o na na'amaqteetai' da qoñiita, cha'aye ipettega da saishet da qami' she'eguelaxalo. 19Qalaxaye Ñim Lo'onatac 'Enauacna qom aỹem ỹami' da saqaỹaloq da qami' ñamaqtegalo. Huaña, nache ishet da saỹaten chaq 'eetec ca la'añaxac que'eca na'amaqteetai' naxa, cha'aye camayepi saishet da nda'a't da detaqtac maye nataqa'en ỹo'ottac nam 'eetega. 20Da huo'o ca netaigui da lo'onataxanaxac Ñim Lo'onatac 'Enauacna, nache ỹachaxan damaye, ỹachegoxotchigui nam ỹo'otpi, qaq saishet da nda'a't da choche ỹa'axattac. 21¿Negue't ca ỹoqta qaupaquiitaique qom qami' ñeqo'onalo? ¿Peta'a qaravilliỹa da qami' seroleguete ca iuaxanaxanaxat, qalqo' da isoxoyec qataq da huesotta ỹataxac?
