1 Corintios 7

₁Aso qara'aqtaqui lmalate maye saconeguet qalaq qami', aỹem qaunacheetac da ỹaỹamaqchiguiñi da na shiỹaxauapi saishet da huaron. ₂Qaq damaye ỹaỹamaqchiguiñi. Qalaxaye da iuennataxac 'onaxaic da ca ỹale ỹauo'o aca lalamaqte lhua, qataq aca 'alo ỹauo'o ca ỹataqta lalamaxat lhua, yaqto' saishet da nqaañi da quisheguetaxac maye sa qaishetapec. ₃Qaq ca ỹale maye mashe huaron ỹataqta iloteguet aca lhua. Nache 'ena'am aca 'alo ỹataqta iloteguet ca lhua. ₄Aca 'alo maye mashe huaron, acamaye saishet da lalamaxat da lo'ocỹaxac, nache 'ena'am ca ỹale. Cha'aye da huarona't, nache aca 'alo lalamaxat ca ỹale, qaq ca ỹale lalamaqte aca 'alo. ₅Qaq saishet da sa naỹaana't caamaye. Nachaqrata da naỹateeta't da ỹauo'o ca laloqne'c da saishet da nauaña't, souaxat da ỹauotraique da ỹataqta nañaareguet da nqouagaxaunaxa'c. Qalaxaye da ime, nache qaltaq ipactegue da nauaña't, cha'aye saiuena'a da ỹasouaxat da saishet da naỹateetrela't, nache so pa'aguenataxanaxaic huo'o ca llegueuo da ỹauo'o ca lasouaxashe't.

₆'Enauac de'era maye cheta'ague da qami' sa'axattapeguema damaye ỹalamaxat iqataxac, qaq saishet da ỹoqta ỹamaxasoxonaxac. ₇Aỹem huo'o da iyaxa da 'enauac aỹem qoỹeeta'am da qaca aca ihua, qalaxaye Ñim Lo'onatac 'Enauacna ỹotta'a't na nachetaxat naqa'en na shiỹaxauapi. Ca 'oonolec 'eeta' da lataxac, qataq ca lỹa 'eeta'.

₈Qaq nam qaca aca lhua qataq ana pa'ai, huo'o da ỹa'aqtac da 'onaxaic da nache 'eetai' da saishet qome da huaron, 'eeta'am aỹem. ₉Qalaxaye da saishet da nalo'oguet da lapaxaỹaxa, qaq 'onaxaic da ỹataqta huaron, cha'aye ỹaỹamaqchiguiñi da huaron, saq 'ena'am da choche dapaqtac.

₁₀Qalaxaye na mashe sogote da huaron, sami' de'era namaxasoxonaxac maye saishet da ỹalamaxat, damaye chegoqo'ot So Qarataxala': da aca 'alo saishet da ỹalat ca lhua. ₁₁Aca 'alo da huo'otaq ỹalat ca lhua, qaq no'on da saishet da naralaxat ca lhua, nachaqrata da na'aqtaxane' ca lhua da yaqto' ỹaỹamaxaayiñi cam saishet da naỹamaxayinguilo co'ollaxa. Qalaxaye nataqa'en ca ỹale saishet da hua'aualec da ỹalat aca lhua. Qaq damaye saishet da ỹamaxasoxonaxac, damaye lamaxasoxonaxac Ñim Lo'onatac 'Enauacna.

₁₂Qaq huo'o da lỹa ỹalamaxat iqataxac, qaq saishet da nacheso So Qarataxala'. Da huo'o ca 'oonolec na 'amqaanataxanaxaicpi da huo'o aca lhua maye saishet da da'amqaanataxan, qalaxaye acamaye da ỹaỹamaxareeta da neta'aguet camaye, nache ca ỹale no'on da saishet da ỹalat. ₁₃Nataqa'en nache 'ena'am da huo'o aca 'alo maye 'amqaanataxanaxai, da huo'o ca lhua da saishet da da'amqaanataxan, qalaxaye camaye da ỹaỹamaxareeta da neta'aguet acamaye, nache aca 'alo no'on da saishet da ỹalat camaye. ₁₄Cha'aye Ñim Lo'onatac 'Enauacna ivira'a da ỹaconeguet qome ca ỹale souaxat da huaroneguet aca ỹa'amaqteetac So Cristo. Nataqa'en ivira'a da ỹaconeguet aca 'alo souaxat da huaroneguet ca ỹale maye ỹa'amaqten So Cristo. Nataqa'en ca llalaqpi caamaye Ñim Lo'onatac 'Enauacna ỹaconeguet da ỹalecnoigui na lalamaxatpi, qaq saishet da imaqa'aguet camayepi da 'ena'am naqa'en ca nshepaxan. ₁₅Qalaxaye ca ỹale, huo'otaq aca 'alo maye sa da'amqaanataxa'n, da ipacapegue' da dalaataxan, qaq nache no'on da ỹo'ot damaye. Qaq da nache 'eetec de'era, nache ca 'amqaanataxanaxaic, huo'otaq aca 'amqaanataxanaxai, ipactegue da huesochiguiñi. Cha'aye Ñim Lo'onatac 'Enauacna qomi' iỹaxanalo da selagaqtapiguiñi. ₁₆¿Qaq ca 'eeteco' 'am 'alo da ishet da 'auaỹaten da 'anca'alaxatec ca 'arhua? Qataq ¿ca 'eeteco' 'am ỹale da 'auaỹaten da 'anca'alaxatec aca 'arhua?

₁₇Huo'o dam sauotaique da ỹataqta ỹaỹateeta na 'amqaanataxanaxaicpi, 'eeta': 'Enauac na ỹalleppi qataq na 'alpi, iuen da saq ỹaxanec dam lataxac co'ollaxa iỹaxana Ñim Lo'onatac 'Enauacna, da yaqto' ỹalecnoigui nam lalamaxatpi Ñimaye. ₁₈Da huo'o ca 'oonolec da qoñiita da ỹa'amaqten So Cristo da mashe huo'o ca la'anaxat na lo'oc, nache saishet da ỹoxottapiguiñi. Qaq da huo'o ca lỹa da da'amqaanataxan qalaxaye qaica ca na'anaxashet na lo'oc, nache camaye sa iuen da ỹauo'o ca na'anaxashet. ₁₉Na'aictaxa da huo'o ca na'anaxashet na lo'oc ca shiỹaxaua, huo'otaq qaica, qalaxaye nache 'ena'am. Cha'aye nachaqcata ca ỹo'ot ca 'eetapeguec Ñim Lo'onatac 'Enauacna, nacheca ca ỹaỹamaxareeta. ₂₀Ca 'oonolec iuen da saq ỹaxanec cam lataxac co'ollaq ỹa'amaqten So Cristo. ₂₁Da huo'otaq 'am nlatac co'ollaq 'am iỹaxana Ñim Lo'onatac 'Enauacna, qaq no'on da saishet da 'aumelec da 'alotapeeguet damaye. Qalaxaye da huo'o ca na'a'q da 'ashet da 'am huesochiguiñi, nache 'aqopitaxanapec. ₂₂Cha'aye ca shiỹaxaua da nlatac co'ollaxa da ỹa'amaqten So Qarataxala', nache Somaye ỹanem da huesochiguiñi. Qaq nache 'eeta'am cam huesochiguiñi da da'amqaanataxan co'ollaxa, nache camaye l-latac So Qarataxala'. ₂₃Cha'aye ỹataqta lta'araic da lashiichiỹaxac co'ollaxa da desheenaxanalo qami' Ñim Lo'onatac 'Enauacna, da yaqto' qami' lalamaqa'ate. Ỹoqo'oye saishet da qanashiñiita da qami' l-lataqa ca choche shiỹaxaua. ₂₄Qaq ỹoqo'oye qami' ỹaqaỹañicpi nagui da qoquiitague' Ñim Lo'onatac 'Enauacna, qalaq ñi 'oonolec saishet da ỹaxanec da lataxac co'ollaq qaiỹaxana.

₂₅Qaq ana pa'ai qataq ana saxanaxa da huaron, aỹem qaica ca iqataxac chegoqo'ot So Qarataxala' da sanem. Qalaxaye sami' da iuennataxac, qaq ishet da aỹem qaipi'iỹa'a souaxat da lqouagaxanaqtaic Ñim Lo'onatac 'Enauacna maye aỹem huetalec. ₂₆Da iuennataxac 'eeta': Ca shiỹaxaua no'on da nache 'eetai' da saq ỹaxanec cam hueta'a, souaxat naua na'axa'te maye souaqtaiguilo da ỹataqta huo'o da lqalai'c. ₂₇Ca ỹale da huo'o aca lhua, qaq no'on da saishet da ỹalat. Qaq da saxanaxa da huaron, qaq no'on da nache 'eetai' da sa huaron. ₂₈Qalaxaye da huo'o ca huaron, qaq camaye saishet da huo'o ca lasouaxashet. Qaq nache 'ena'am aca qa'añole da huo'otaq huaron, qaq acamaye saishet da huo'o ca lasouaxashet. Qalaxaye nam mashe huaron, qalaq ivireguet na lqalaicpi, qaq ỹoqo'oye sauotaique da sevitaqna'aguet namayepi de'era.

₂₉Qami' ỹaqaỹañicpi, da sauotaique da qami' sa'aqtaxanema 'eeta': Mashe sa qaỹaraue'c naua na'axa'te maye souaqtaiguilo. Ỹoqo'oye nagui na mashe huaron no'on da 'eeta'am da saxanaxa da huaron, ₃₀qataq nam huo'o da laquicoxo 'eeta'am da matapiguiñi, qataq na ntootapigui' 'eeta'am da daquicotac, qataq na desheenaxatega na logoxoshetpi qalaq 'eeta'am da qaica ca lalamaxat, ₃₁qataq nam iqopitaxaatac da ỹacoota'aguet nam yo'oqchigui maye huetalecna, qaq no'on da saishet da ime'eguet. Cha'aye na yo'oqchigui maye huetalecna, taỹa'a da imeuo.

₃₂Ñeshetaique da ỹataqta qami' huesochiyiñi, qaica ca qami' nqanaxa't. Ca ỹale da ñaq lamaxaic, nache no'on da npogoxoinapegue' da ỹo'ot na lo'onataxanaxacpi Ñim Nataxala', cha'aye huotaique da ỹaỹamaxareeta Ñimaye; ₃₃qalaxaye cam mashe huaron camaye ime'eguet na no'onatacpi maye huetalecna, cha'aye huotaique da machiguiñi naqa'en aca lhua, ₃₄qaq 'era da 'eetec da saq 'oonolec da lhuennataxac. Qaq nache 'eetec aca alo maye mashe qaica ca lhua qataq aca qa'añole maye ñaq lamaxai ỹataqta nalemaqte' na lo'onataxanaxacpi Ñi Qarataxala', cha'aye souaxat da qui'itta da lo'ocỹaxac qataq da saqcha'a lca'alaxa; qalaxaye aca mashe huaron qalaq nalemaqte' na no'onatacpi ye na'a'q, cha'aye huotaique da machiguiñi naqa'en ca lhua.

₃₅De'era ỹa'aqtac maye qami' sanema, damaye maiche qanaỹamaxataxaqui, qaq saishet da 'eeta'am da qami' secoñerai'salo. Nachaqrata da sauotaique da qaica ca qana'aqtaguiqui sa ỹaỹamaxañi, qataq yaqto' qaica ca qami' nqanaxa't da qoquiitague' So Qarataxala'.

₃₆Qalaxaye da huo'o ca ỹale da huo'o aca na'aqtaxaatague' da huotaique da lhua, qaq camaye da ila'a da ỹaỹamaqchiguiñi da huaroneguet acamaye cha'aye mashe ivi' ye llaxa da ishet da ỹo'ot de'era, qaq no'on da huarona't, cha'aye de'era saishet da qauem da ỹauaachigui Ñim Lo'onatac 'Enauacna. ₃₇Qalaxaye da huo'o ca lỹa shiỹaxaua da nomta da saishet da huotaique da huaron, qataq nala'aguet da lyaxayec, nache camaye ỹaỹamaqchiguiñi da saishet da huaron. ₃₈Qaq ỹoqo'oye ca huaron camaye ỹaỹamaqchiguiñi da ỹo'ot. Qaq ca saishet da huaron, nache camaye ỹataqta ỹactec da ỹaỹamaqchiguiñi da ỹo'ot.

₃₉Aca 'alo mashe huaron, acamaye ncoñetta'aguet ca lhua qom ña nca'altauec camaye. Qalaxaye ca lhua da huo'otaq mashe ileu, nache acamaye ỹataqta huesochiguiñi da huo'otaq huaroneguet ca lỹa ỹale maye la'amqaanataxanaxaua. ₄₀Qaq 'era da iuennataxac, cha'aye aỹem nataqa'en sa'amaqten da aỹem netanguit So Saqcha'a La'añaxac Ñim Lo'onatac 'Enauacna.