1 Corintios 9

₁Aỹem huesochiguiñi, qataq aỹem namaxashec. Cha'aye aỹem ñauane' co'ollaxa So Jesús. Qaq ña'achec, cha'aye de'era ỹo'onataxanaxac, damaye chegoqchigui da qami' qaua'amaqchiñi So Cristo. ₂Na'aictaxa da huo'o na 'eetega da saishet da aỹem lamaxashec So Jesús, qalaxaye qami' 'eesa qanqa'eñi da aỹem lamaxashec Somaye. Cha'aye aỹem qauachegoxochiichigui da qaua'amqaanataxañi, qaq damaye ỹa'axat da ỹoqta 'eesa da aỹem lamaxashec So Jesús.

₃Qaq 'era da ỹasataxac maye sero'oguet nam aỹem quetapeguelec da ₄ñi Bernabé qataq aỹem nataqa'en ishet da saconaxaguet ca qanallec qataq ca qanỹomgui da chegoqchigui da qaro'onataxanaxac. ₅Qataq nataqa'en ishet da ñenaigaqtague' aca qarhua de'era qoyecỹaxac, 'eeta'am da 'eetec na laỹepi lamaxashecpi So Qarataxala' Jesús, qataq soua lalamaqa'ate lqaỹa't, nataqa'en so Pedro. ₆Qaq qami' ¿qaupi'itaxañiỹa peta'a da aỹem qataq so Bernabé iuen da saishet da saxanaxañi da yo'oqchigui qaro'onataxanaxac da yaqto' huo'o ca qarhuenec? ₇¿Negue't ca ishet da taua'a da nale ca nta'a, nache maiche nsheetetapeguela't? Qataq ¿negue't ca ishet da ỹaañi ana uva, qaq saishet da chec ana ala? Qataq ¿negue't ca ishet da ilotague' ana qagueta, qaq saishet da nỹomgui na lche' maye nlomtac? ₈Qaq saishet da qaupi'itaxañiỹa da choche shiỹaxaua lhuennataxac de'era shenapec, cha'aye na namaxasoxonaxacpi maye chegoqo'ot so Moisés nataqa'en 'enapec de'era. ₉Cha'aye da nanettañi namaxasoxonaxac 'eeta': «Saishet da 'auauo'o ca lapoxot na alap ca 'arauegaxanaxala' huaca, da yaqto' saishet deque'e da 'auapiaxanaxaalec na trigo da 'anqattac ana ala.» Qaq damaye saishet da nachaqcata ca nauegaxanaxala' huaca da huaqattega, ₁₀nataqa'en nacheqomi' maye qomi' huaqattegalo. De'era namaxasoxonaxac qoỹiyiñi co'olloxocheye da qaỹauotaique qanaỹamaqtaguec, cha'aye ca shiỹaxaua maye na'attapiguisheguem ca 'alhua qataq ca nqattac ana ala na trigo ishet da ỹataqta huo'o da naquitaxac da ỹaconeguet ca naigui da lo'onataxanaxac. ₁₁Qaq nache 'eetec nataqa'en da qomi' qami' sa'aqtaxanaqteguema da no'on na'axaỹaxac, nache 'ena'am da qami' sanaqtapegueleguete ana nañiguishe ala maye saqcha'a. Qaq ỹoqo'oye da lashiichiỹaxac de'era qaro'onataxanaxac qomi' huo'o da shenaxac da qami' seỹaxanaqoto da qomi' qaỹa'añima cam seuenaqtaique maye qarhuenec. ₁₂Ye na laỹepi maye nataqa'en hueto'ot da talec da qaushiichiñi da lo'onataxanaxac, qaq ¿taloxocheyo' da saq ishet da qomi' qaushiichiñi'?

Qalaxaye qomi' saishet da nache shenaqtec de'era. Nachaqrata da qomi' ña'añaxataxaguet 'enauac na chochena, yaqto' qaica ca nqanaxat da no'on na'axaỹaxac maye na'aqtaguec So Cristo. ₁₃Qami' qauaỹaañi da na do'onataxaategueua'a añi no'onaxanaxaqui late'erai, namayepi chectac na nallec maye lalamaxat añi no'onaxanaxaqui. Dam ỹoqta sheetega 'eeta': nam huetapegue' añi nca'atoxonaxalate da ỹavigaxattac na nachetaqtaxanaxat huaca lapat, namayepi chectac na qaiỹotauga lapat. ₁₄Qaq nache 'eetec nataqa'en da lamaxasoxonaxac So Qarataxala' da ca ỹa'axattapeguec da no'on na'axaỹaxac, camaye ishet da deque'etapigui de'era lo'onataxanaxac. ₁₅Qalaxaye aỹem saishet da huo'o ca huaña da qami' sequicto'oto, qataq saishet da qami' samaxalo ana'ana ỹere da sauotaique da huo'o ca aỹem qaỹa'añim. ¡Cha'aye ỹataqta 'onaxaic ñaqa'en da seleetañi' de'era ỹo'onataxanaxac, saq 'ena'am da huo'o ca chegoqtec da aỹem illapeguem de'era ỹo'onataxanaxac maye maiche iuennataxac da saishet da qaisheeten!

₁₆Da sa'axattac da no'on na'axaỹaxac, qaq saishet da sauotaique da aỹem ỹo'oxoraq. So'ot damaye, cha'aye aỹem ỹamaxalec Ñim Lo'onatac 'Enauacna. Qaq ¡choxoraicolec aỹem da saishet da so'ot damaye! ₁₇Qaq ỹoqo'oye aỹem saishet da sepactaique da aỹem qaisheeten da sa'axattac da no'on na'axaỹaxac, cha'aye saishet co'ollaxa da aỹem qainat da so'ot damaye; ¡Damaye maiche iuennataxac da so'ot! ₁₈Qalaxaye ca 'eetec de'era ¿negue't ca ỹaueguec da so'ottac de'era? Damaye nachera da ñetonaxac da sa'axattac da no'on na'axaỹaxac, qalaxaye saishet da so'ogoxona da shenec, da yaqto' qaisheeten da ỹo'onataxanaxac da aỹem lamaxashec So Cristo.

₁₉Na'aictaxa da aỹem huesochiguiñi, qalaxaye se'enaxat da, 'eeta'am da aỹem l-latac 'enauac na shiỹaxauapi, yaqto' ỹataqta saqalota na ỹaueguec shiỹaxauapi da ỹa'amaqten So Cristo. ₂₀Da sootaigui naxa na judiopi, nache se'enaxat da lataxac namayepi, yaqto' ishet da setauan da ỹa'amaqten So Cristo. Qaq ỹoqo'oye sepaqueelec na namaxasoxonaxacpi maye chegoqo'ot so Moisés, na'aictaxa da mashe saishet da aỹem qaỹamaqtalec da so'ot. ₂₁Qaq naxa da sootaigui na saishet da quetague' na namaxasoxonaxacpi maye chegoqo'ot so Moisés, nache se'enaxat da lataxac namayepi, yaqto' ishet da setauan da ỹa'amaqten So Cristo. Qaq damaye, saishet da naigui da sa salaxaguet na lamaxasoxonaxacpi Ñim Lo'onatac 'Enauacna. Nachaqrata da salaxaguet namayepi, cha'aye aỹem shectague' da lataxac So Cristo. ₂₂Qataq naxa da sootaigui na saxanaxa da da'añi da lpi'iỹaxac, nache se'enaxat da lataxac. Yaqto' ishet nataqa'en da setauan namayepi. Qataq 'era da sheetec da ỹataqta ñacoola't da se'enaxatchigui da lataxac ñi 'oonolec na ỹotta'a't shiỹaxauapi, yaqto' ishet da qanca'alaxatec namayepi. ₂₃Qaq 'enauac de'era so'ot souaxat da ỹauoche da no'on na'axaỹaxac, qataq nataqa'en sauotaique da ñeuanaua'a cam qaica ca 'ena'am da lyac maye naigui de'era na'aqtac.

₂₄Qami' qauaỹaañita da huo'otaq huo'o ca qomitaxac, nache saishet da 'enauac na nqomittac da nauec ca qanallettapigui, chaqrata da 'oonolec ca ỹaconeguet cam qanallettapigui. Qaq qomi' maye qolaqtague' So Cristo, damaye 'eeta'am ca qomitaxac, qaq ỹoqo'oye iuen da ñaỹamaxataqta da yaqto' ñauegaq ca qanallettapigui. ₂₅'Enauac na naỹamaxattac da taua'a ca qomitaxac, ỹataqta ndeneguet 'enauac nam ishet da na'aqchet. Qaq namayepi 'eetec de'era, cha'aye nshetaique da nauec cam qanallettapigui maye nataqa'en taỹa'a da imeuo. Qalaxaye qomi' sauoqtaique da ñauegaq cam qanallettapigui maye saishet da huo'o ca loga't. ₂₆Qaq ỹoqo'oye aỹem huo'o da ña'añaxataxac da yaqto' saconeguet damaye. Saishet da seloctac da qaica ca sheetapeguec. ₂₇Nachaqrata da aỹem selotegue da ñapaxaguenataguec qataq ỹataqta huo'o da iuogoxo da ñellañi da maiche ỹataxac. Cha'aye da aỹem sa'aqtaxaatapeguem da no'on na'axaỹaxac ca lỹa shiỹaxaua, nache sa saỹamaxaren da Ñim Lo'onatac 'Enauacna aỹem nqateua'a.