1 Reyes 15

₁Qaq co'ollaq mashe ivi' dieciocho vi'iye da nta'a so Jeroboán, maye llalec so Nabat, nache so Abián, ỹacoolec da lo'onataxanaxac da ilo'ogue so netaña ye Judá. ₂Nache ivi' tres vi'iye da lo'onataxanaxac da nta'a, co'ollaq netaña ye Jerusalén. Qaq aso late'e somaye le'enaxat Macá, maye llale so Absalón. ₃Qaq so Abián, qalaq ipacchigui da qaltaq ỹo'ottac na saỹaỹamaxañipi nasouaxashetpi maye ỹo'ot co'ollaxa so lta'a. Nache da lquiyaqteỹaxac, saishet da ỹataqta ỹalaxaguet Ñim Nataxala' maye Natamnaxala', qaq saq 'ena'am so David, maye chegoxoguet somaye. ₄Qalaxaye Ñim Nataxala', souaxat da lauotaxanaqtaic so David, nache Ñimaye nache 'eetai' naqa'en da 'ettaigui aso lcoỹaraxanaxaqui somaye da netaña ye Jerusalén, ỹoqo'oye nmeneguet naqa'en so llalec da yaqto' ilo'ogue da no'onataxanaxac huaña ye Jerusalén, yaqto' Ñimaye npaxattalec yemaye. ₅Cha'aye so David, ỹo'ot co'ollaxa nam ỹataqta ỹaỹamaxareeta Ñim Nataxala', qataq ỹataqta saishet da ca'ai nam lamaxasoxonaxacpi Ñim Nataxala', nachaqsota so Urías maye hitiita da huasoilec, souaxat da damaxasoxoolec co'ollaxa da qaỹalauat. ₆Qataq de'era lo'onataxanaxac so Roboán, nache huetoigui co'ollaxa da queto'ot da nalattague' so Jeroboán, nache ivitta'aguet da lo'onataxanaxac so Abián da nalattague' somaye. ₇Qaq nam laỹe maye ỹo'otpi so Abián, nache 'enauac da nanettalec aso nere, maye nanettalec da na'aqtaguec nam ỹo'otpi so nta'alpi ye Judá. Qaq nataqa'en so Abián nache queto'ot co'ollaxa da nalattague' so Jeroboán. ₈Qaq co'ollaq ileu so Abián, nache qailareñi huaña qanqa'en ye huaqta'a't nỹecpi maye lalamaxat so David. Qaq da lo'onataxanaxac somaye da nta'a nache talec so llalec Asá.

₉Qaq co'ollaq mashe veinte vi'iye da nta'a so Jeroboán ye Israel, nache so Asá ỹacoolec da lo'onataxanaxac da nta'a ye Judá, ₁₀nache ivi' cuarenta y un vi'iye da hueta'a ye Jerusalén da nta'a. Qaq aso lcote somaye le'enaxat Macá, asom llale so Absalón. ₁₁Qaq so Asá, ỹo'ot co'ollaxa na ỹataqta ỹaỹamaxareeta Ñim Nataxala', 'eeta'am da 'eetec so hua'au lta'a David. ₁₂Cha'aye ỹo'orauec co'ollaxa som shiỹaxauapi maye nquisheshigui da la'amqaanataxanaxac, qataq nqateua'a 'enauac som ne'enaqtacpi maye lo'onatacpi co'ollaxa so hua'au lta'alpi somayepi. ₁₃Qataq nataqa'en nqateua'a da lo'onataxanaxac aso lcote Macá da late'e so nta'alpi, souaxat da damaxasoxoolec da qaỹo'ot so lqui'i aso Aserá da yaqto' natamnaxalate. Nache somaye ilaxachigui qataq ỹavigaxat co'ollaxa asa'aso natamnaxalate aso lcote, huaña so la'auaxac ye Cedrón. ₁₄Qaq na'aictaxa co'ollaxa da saishet da 'enauac da nlaxaañi na atamnaqa'pi maye nalec ana lcomaraxalatepi, qalaxaye so Asá saishet da ỹaxanec da ỹa'amaqteetac Ñim Nataxala'. ₁₅Qaq nataqa'en ỹachaigui aso atamnaxaqui maye lalamaqte Ñim Nataxala', 'enauac so oro, plata, qataq so laỹepi nogoxoshetpi maye somaye, qataq so lta'a, ỹanot co'ollaxa Ñim Nataxala'.

₁₆Qaq so Asá, nache queta co'ollaxa da nalattague' so Basá maye nta'a ye Israel. ₁₇Qaq so Basá maye nta'a ye Israel, taỹa co'ollaxa ye Judá da iloquiaxan, huaña nache no'oxoosheguem so lpaqtaxat ye Ramá, da yaqto' qaica ca na'aqtaxane' so Asá, maye nta'a ye Judá. ₁₈Nache so Asá ỹacona 'enauac so oro qataq plata, maye huetaigui aso naỹamaqtaxaqui, maye naigui aso atamnaxaqui maye lalamaqte Ñim Nataxala', qataq so huetaigui so nma' lta'araic, nache ỹanem so ltauapi somaye, da yaqto' ira'a so Ben Adad, maye nta'a ye Siria, som llalec so Tabrimón qataq laual so Hezión, qaq somaye netaña ye Damasco. Qaq nataqa'en ỹamaxa somaye da la'aqtac, 'eeta': ₁₉«'Am, qataq aỹem, so'otaq qome ca qanaỹamaxataxac, 'eeta'am da 'eetec co'ollaxa soua qarta'al. Qaq nagui 'am samaxa da 'anme ñaqa'en na oro, qataq na plata. Qaq ỹoqo'oye 'anqo'ona qome ñi Basá maye nta'a ye Israel, da 'anlaxaañi da 'anaỹamaxataxac co'ollaq 'anaỹamaxate' ñimaye, yaqto' ñimaye ỹaxaañi da aỹem iloquiaxaatac.» ₂₀Nache so Ben Adad ỹasateguet co'ollaxa de'era la'aqtac so nta'a Asá, nache ỹamaq so lataxala'pi so nalleppi da yaqto' nqo'onalo naua nañalo so huaqta'a't nỹecpi ye Israel da iloquiaxan. Qaq huaña nache loxonec ye Iyón, Dan, Abel Betmacá, qataq 'enauac ye Quinéret, qataq 'enauac ye na'alhua so Neftalí. ₂₁Qaq co'ollaq ỹaỹaten de'era so Basá, nache ỹaxaañi da no'oxootapiguisheguem so lpaqtaxat ye Ramá, nache ỹe'eguelaxa ye Tirsa. ₂₂Huaña nache so nta'a Asá, iỹaxanegue 'enauac so Judá le'ecpi, qaica naqa'en ca no'onañi da yaqto' qaỹache 'enauac so coma'pi, qataq so 'epaqpi maye do'onataxaatega co'ollaxa so Basá da no'oxootapiguisheguem so lpaqtaxat ye Ramá. Qaq so nta'a Asá, nache do'onataxana somayepi da no'oxoosheguem so lpaqtaxat so huaqta'a't nỹecpi ye Geba, maye lalamaxat so Benjamín, qataq ye Mispá.

₂₃Qaq na laỹepi maye ỹo'otpi co'ollaxa so Asá, dam la'añaxac, qataq som no'oxoosheguempi huaqta'a't nỹecpi, nache nanettalec aso nere maye huetalec 'enauac da na'aqtaguec nam ỹo'otpi so nta'alpi ye Judá.

Qaq co'ollaq mashe ỹa'axaiquiolec so Asá, nache huo'o da lalolaxa, hualeguete naua lapia'ate, ₂₄Qaq co'ollaq ileu so Asá, nache qailareñi qaỹauaxaỹaxana'ai' so hua'au lta'alpi, maye huaña ye huaqta'a't nỹecpi, maye lalamaxat so David. Qaq da lo'onataxanaxac da nta'a, nache talec so llalec Josafat.

₂₅Qaq co'ollaq mashe ivi' dos vi'iye da nta'a ye Judá so Asá, nache so Nadab maye llalec so Jeroboán, ỹacoolec da lo'onataxanaxac da nta'a ye Israel, qaq da lo'onataxanaxac da nta'a ivi' dos vi'iye. ₂₆Qalaxaye ỹo'ot co'ollaxa nam sa ỹaỹamaxarenpi Ñim Nataxala', cha'aye icaachigui nam qauem maye ỹo'otpi co'ollaxa so lta'a, nache ỹo'ot da huo'o na lasouaxashetpi so Israel le'ecpi. ₂₇Qalaxaye so Basá, som llalec so Ajías, maye chegoxoguet na lauo' le'ecpi so Isacar, dataỹa'aguet co'ollaxa somaye, nache ỹalauat huaña ye Guibetón, yem huaqta'a't nỹecpi maye lalamaxat so filisteopi, yem coleesop co'ollaxa so Nadab, qataq so nalleppi Israel le'ecpi. ₂₈Qaq huetoigui so vi'i tres da ilotague' so Judá le'ecpi so Asá, da so Basá ỹalauat so Nadab, qaq somaye nache talec da no'onataxanaxac da nta'a. ₂₉Qaq co'ollaq choche ỹacoolec da lo'onataxanaxac da nta'a so Basá, nache ỹalauat 'enauac so llalaqpi so Jeroboán, ỹataqta nmichiguiñi naqa'en. Qaq nache ipacchigui da la'aqtac Ñim Nataxala', maye ỹanem co'ollaxa so lamaxashec Ajías maye lma' ye Silo. ₃₀Qaq de'era souaxato' na lasouaxashetpi co'ollaxa so Jeroboán, maye ỹo'ot nataqa'en na lasouaxashetpi so Israel le'ecpi, qaq nachena na ỹo'ot da lalemataic Ñim Nataxala' maye Natamnaxala' so Israel le'ecpi. ₃₁Qaq na laỹepi na'aqtaguecpi so Nadab, qataq 'enauac na ỹo'otpi, nache qoỹettalec aso nere maye huetalec nam ỹo'otpi co'ollaxa so nta'alpi ye Israel. ₃₂Qaq co'ollaq ñaq do'onataxaata'ape da nta'al ye Israel soua Asá qataq so Basá, nache queta co'ollaxa da nalattega't soomaye.

₃₃Qaq co'ollaq mashe ivi' tres vi'iye da nta'a so Asá ye Judá, nache so Basá maye llalec so Ajías, ỹacoolec da lo'onataxanaxac da nta'a, huaña ye Tirsa, da ilo'ogue 'enauac so Israel le'ecpi, qaq nache ivi' veinticuatro vi'iye da nta'a somaye. ₃₄Qalaxaye somaye ỹo'ot co'ollaxa nam saỹaỹamaxarenpi Ñim Nataxala', cha'aye icaachigui nam qauem maye ỹo'otpi so Jeroboán, nam ỹo'ot na lasouaxashetpi co'ollaxa so Israel le'ecpi.