So Elías ỹa'axata'a da qaica ca auot
1Qaq so na'aqtaxanaxanec Elías, maye lma' ye Tisbé, yem huagui ye 'alhua Galaad, 'enapega co'ollaxa so Ajab, 'eeta': «Ỹataqta 'eesa da nca'altauec Ñim Nataxala', maye Natamnaxala' na Israel le'ecpi, maye aỹem lamaxashec, da ne'enaua vi'iye qaica qome ca auot, qataq ca 'aỹa, nache choche ivitta'a qom ỹoltaq san ca ỹa'aqtac.» 2Ỹoqo'oye Ñim Nataxala', 'enapega so Elías, 'eeta': 3«Qoca'ai qome ne'ena, nache 'aigue da nala' lliguisheguem, nache 'anqañoxooñi qom huaña so la'auaxac Querit, maye pa'aigue da nala' lliguisheguem so tala Jordán. 4Yaqto' ishet da 'anỹomtapigui na le'ec 'etaxat somaye, qaq Aỹem qalaq samaq qome ca teguesanpi da 'am irotega ca 'oq.» 5Nache so Elías, ỹo'ot co'ollaxa da la'aqtac Ñim Nataxala', nache jec, taỹa da naña so la'auaxac Querit, maye pa'aigue da nala' lliguisheguem so tala Jordán. 6Qaq so teguesanpi, nache irotega aso nauole, qataq so lapat, ye nte'eta qataq ye avit, qaq somaye nache nỹomtapigui na le'ec 'etaxat se'eso la'auaxac. 7Qalaxaye co'ollaq mashe qaỹata'aguelo soua na'axa'te, nache deqaqa so la'auaxac, souaxat da qaica ca auot se'eso 'alhua.
So Elías qataq aso pa'ai maye lma' ye Sarepta
8Qaq huaña, nache Ñim Nataxala' 'enapega so Elías, 'eeta': 9«Qoñisheguem qome, nache 'anqo'ona ye huaqta'a't nỹecpi ye Sarepta, maye huaigui ye 'alhua Sidón, nache qonaña qome yemaye. Qaq Aỹem mashe shenapega añi 'alo pa'ai maye lma' yemaye, da 'am ỹanem qome ca 'oq.» 10Nache so Elías ñisheguem, taỹa ye Sarepta. Qaq co'ollaq ivireua'a so ñegueuo so huaqta'a't nỹecpi, nache ila'a aso 'alo pa'ai maye laỹootega't so 'epaqpi da yaqto' l-le' lashecpi. Nache so Elías iỹaxana asomaye, nache 'enapega, 'eeta':
Ñaq aỹem 'anqouaguec qome, da aỹem 'andouga ca 'etaxat, huetangui 'anqa'en aca ỹomaxaqui, yaqto' ñeỹom. 11Qaq co'ollaq mashe jec asomaye da ỹe'eguenaua'a so 'etaxat, nache so Elías qaltaq iỹaxanapegue' asomaye, nache 'eeta':
Ñaq aỹem 'anqouaguec da aỹem 'andouga nataqa'en ca nauole laỹolec. 12Nache asomaye 'enapeco':
Ỹataqta nca'altauec Ñim Nataxala' maye 'Anatamnaxala', maye ỹaỹaten da qaca aca datoxoi ỹauole. Qataq yetai' ña'ayiiña maye huetagui añi laỹe', nalochigui ana 'oonole ñapocna, qataq añi aceite laỹe' mashe saq 'amaqtaq datai' huetangui. Qaq ỹoqo'oye llaỹootega't na 'epaqpi da yaqto' so'ot aca nauole, da yaqto' deque'e ñi ỹalec qataq aỹem. Qaq nache pa'atec da sequia'aq, huaña nache seleuaq qome souaxat na qarqouaxa. 13Nache so Elías 'enapeco':
Saishet da 'añe'etac, 'aue qojec, nache 'auo'ot da qonetega. Qalaxaye que'ecatai' no'onañi 'ayiiñolec, 'aua'auaxaañi qome da 'auo'ot aca saq 'amaqtaq nauole nlarañi, nache aỹem 'andouga. Qaq da ime, nache 'auo'ot aca lỹa, yaqto' qollec 'am, qataq ca 'aỹa'alec. 14Cha'aye Ñim Nataxala', maye Natamnaxala' na Israel le'ecpi, 'eeta':
Añi laỹe' na 'ayiiña, qalaq saimeuo qome ca huetagui, qataq añi laỹe' na aceite, qalaq saqoue ca le'ec, choche ivitta'a ca na'a'q da Ñim Nataxala', anac naqa'en ca auot da talec ana 'alhua. 15Nache asomaye jec, nache ỹo'ot dam ỹamaxalec so Elías. Nache asomaye, qataq so llalec, qataq so Elías, ỹataqta huo'oi soua na'axa'te da huo'o so aloq. 16Cha'aye saimeuo so 'ayiiña maye huetagui aso laỹe', qataq aso laỹe' so aceite, qalaq saimeuo so le'ec, nache ipacchigui da la'aqtac Ñim Nataxala', maye ỹanem co'ollaxa so Elías da ỹa'axat. 17Qaq co'ollaq mashe qaỹoqteguelo soua na'axa'te, nache sano'on so llalec asa'aso pa'ai, nache ivira'a da ỹataqta dalola, nache mashe qaicaua nataqa'en naua la'a'che. 18Nache aso pa'ai 'enapega so Elías, 'eeta':
'Am nale Ñim Lo'onatac 'Enauacna ¿negue't cam qonetapeguec da sheeta? ¿Peta'a 'auanac da aỹem 'antoonaxanaxanec na ỹasouaxashetpi, nache 'auo'ot da ileu na ỹalec? 19Nache so Elías 'enapeco':
Ñaq aỹem 'aỹa'anem na 'aỹa'alec, nache somaye nsoxouo so llalec aso pa'ai, nache irosheguema so pa'asheguem nỹec, maye netasheguema somaye, nache nnanaxanaxaalec so lmala'. 20Ime, nache ỹataqta nlamaxaren da iỹaxanot Ñim Nataxala', 'eeta':
«'Am Nataxala', maye 'Am Ñatamnaxala', ¿peta'a nataqa'en da 'auauo'o da nqui'ic aram pa'ai, maye sootaña na lma', da ileu 'anqa'en na llalec?» 21Nache somaye tres da ỹe'eguelaxalec da nqapaxanegue so nogotolec, nache ỹataqta nlamaxaren da iỹaxanot Ñim Nataxala', 'eeta':
«'Am Nataxala', maye 'Am Ñatamnaxala', ¡'Am ñachoxonnot da ñaq 'añe'eguelaxata da nachaalataxac ne'ena nogotolec!» 22Nache Ñim Nataxala', hua'axaỹa da nachoxonnaxac so Elías, nache qaltaq nca'alec naqa'en so nogotolec. 23Nache so Elías, sa naỹaloxon da ỹacoosop so nogotolec, nache irogoña so pa'aguiñi nỹec, nache ỹanem aso late'e. Nache, 'eeta':
¡Ña 'aumeten, na 'aỹa'alec, nca'alec! 24Nache aso 'alo 'enapeco':
Nagui, aỹem saỹateeta, da ỹoqta 'eesa da 'am nale Ñim Lo'onatac 'Enauacna, qataq cam qonapec, qalaq ỹoqta 'eesa la'aqtac Ñim Nataxala'.
