So lanaxanaqa' uva lma' so Nabot
1Qaq co'ollaq mashe qaỹoqtegue de'era, nache so Nabot maye lma' ye Jezrel, somaye huo'o so lanaxanaqa' uva lma', huaña som saqaỹapeque so lma' lta'araic so nta'a Ajab, maye naña ye Samaria. 2Qaq huo'o so na'a'q, nache so Ajab 'enapego' so Nabot, 'eeta':
'Onaxaictaxa da aỹem 'aỹa'anem ye 'anaxanaqa' uva lma', yaqto' saalec na ỹañiguishecpiolec, cha'aye sa qaỹapeque ñi ima' lta'araic. Qaq aỹem, 'am sanem ca lỹa nanaxanaqa' uva lma' maye napacalec da lyac yemaye da naiguet ñaqa'en, qaq da huo'otaq 'auaỹamaxareeta da plata aca lasheue ye 'anaxanaqa', nache aỹem seshet da 'am sanem acamaye. 3Qalaxaye so Nabot 'enapego' so Ajab, 'eeta':
Ñim Nataxala', aỹem saỹashenem qome da 'am sanem ne'ena 'alhua, maye aỹem no'onaxata'aguet co'ollaxa soua ita'al, da yaqto' ỹalamaxat naqa'en. 4Nache so Ajab, jec co'ollaxa ỹe'eguelaxa so lma', qalaxaye ỹataqta daquico, qataq qaica ca lama', souaxat de'era la'aqtac so Nabot da, 'eeta': «Saishet da 'am sanem na 'alhua maye aỹem no'onaxata'aguet soua ita'al, da yaqto' ỹalamaxat naqa'en.» Qaq co'ollaq ivireuo somaye, nache nnaañi, datatot so lque so nỹec, qataq sa deque'e. 5Huaña nache aso Jezabel, maye lhua somaye, nqo'oneua'a co'ollaxa, nache inattac, 'eeta':
¿Ta'ainco' ye 'auaquicota, qataq sa 'auque'e? 6Nache so Ajab 'enapeco':
Qomye setaqtague' so Nabot, maye lma' ye Jezrel, nache sequictacot da aỹem imenot ye lanaxanaqa' uva lma', huo'otaq da nshetaique da naiguet ñaqa'en ca lỹa 'alhua yemaye, nache sanem. Qalaxaye somaye 'eeta': «Saishet da 'am sanem.» 7Nache aso lhua Jezabel, 'enapego' somaye, 'eeta':
¿Peta'a saisheto' da nache 'am, da 'am nta'a na Israel? Ñaq qoñisheguem, nache 'auque'e, qataq 'auamachiguiñi, cha'aye aỹem, seshet da sañoxot da 'aralamaxat qome yi'iye lanaxanaqa' uva lma' so Nabot. 8Qaq asomaye, nache sa naỹaloxon da ỹo'ot aso lere, nanettalec naqa'en so Ajab, qataq itoqoolec aso la'anaxanaqte somaye. Ime, nache ỹamaxa so nqueroxonecpi, qataq so nataxala'pi, som naigui so huaqta'a't nỹecpi maye naigui so lma' so Nabot. 9Qaq da huetalec asa'aso nere, 'eeta': «Qauo'oche qome ca qanqouaqchetaxaqui, nache so Nabot nso'ootañi qanqa'eñi qome datateguet na nhuo' le'ecpi. 10Qataq datategueta qanqa'eñi caua dos ỹale't 'etaxaloxoiqa, maye saq'en ca ỹa'axa't, yaqto' caamaye ỹa'axa't qome da so Nabot isheueetac Ñim Nataxala', qataq ñi nta'a Ajab. Qaq da ime, nache qaupa'axañiiuec ca Nabot, nache qaualauache qauroilec ca coma'.» 11Nache se'eso shiỹaxauapi maye lma' se'eso huaqta'a't nỹecpi, maye naigui so lma' so Nabot, qataq so nqueroxonecpi, qataq so nataxala'pi, ỹo'ot 'enauac de'era lamaxasoxonaxac aso Jezabel, maye huetalec aso lere maye ỹamaxa somayepi. 12Nache somayepi ỹo'ot so nqouaqchetaxac, nache nso'ootañi naqa'en so Nabot, datateguet naqa'en se'eso shiỹaxauapi. 13Huaña, nache nvildeuo co'ollaxa soua dos ỹale't maye 'etaxaloxoiqa, nache datategueta qanqa'en so Nabot, nache soomaye da'aqtaxaarem se'eso shiỹaxauapi, da so Nabot isheueetac co'ollaxa Ñim Nataxala', qataq so nta'a Ajab. Qaq co'ollaq ime, nache qaipa'axanec somaye, qaỹauegueuga so pa'auec so huaqta'a't nỹecpi, nache qaỹalauat qairota'a so coma'. 14Ime, nache qaỹamaxa da la'axaỹaxac aso Jezabel da so Nabot, qairolec so coma' da qaỹasaq, nache ileu. 15Qaq co'ollaq choche ỹaỹaten de'era aso Jezabel, nache 'enapega so Ajab, 'eeta':
'Aue, 'anqo'ona ye lanaxanaqa' uva lma' so Nabot, maye Jezrel le'ec, yem saỹashen co'ollaxa da 'am imenot somaye, nache 'auo'ot 'aralamaxat. Cha'aye so Nabot qaica, somaye mashe ileu. 16Nache so Ajab co'ollaq ỹaỹaten da ileu so Nabot, nache taỹa se'eso nanaxanaqa' uva lma', maye lalamaxat co'ollaxa so Nabot, nache ỹacona da ỹauo'o lalamaxat. 17Huaña, nache Ñim Nataxala', 'enapego' so Elías maye lma' ye Tisbé, 'eeta': 18«Sa 'anaỹaloxon qome da 'anqo'ona ñi Ajab, ñim nta'a ye Israel, maye naña ye Samaria. Qaq nagui ñimaye netaña ye uva lma' maye lanaxanaqa' co'ollaxa so Nabot, yem taỹa da ỹacona da ỹauo'o lalamaxat. 19Nache qonapega qoneta': ‹Da la'aqtac Ñim Nataxala', 'eeta': Qaq souaxat da 'aualauat so Nabot, qataq 'auotaxanec na lalamaxat somaye, nache yem huaña co'ollaxa da so pioxoppi, napilectalec so ltago'q so Nabot, nache huaña qome nataqa'en da ca pioxoppi, napilectalec ca 'artago'q.›» 20Nache so Ajab 'enapega so Elías, 'eeta':
«¿'Am ñepa'aguenaxaua? ¿Qalaq isheto' da aỹem 'auanata?» Nache so Elías, 'enapeco':
«Aja', 'am sanata, cha'aye nda'a't da 'auo'ottac na ỹataqta sa ỹaỹamaxaren Ñim Nataxala'. 21Ỹoqo'oye da la'aqtac Ñim Nataxala', 'eeta': ‹Aỹem, 'am ñamaxa qome ca ỹataqta qauem, nache ỹataqta nmichiguiñi ñaqa'en 'enauac na 'aỹa'alaqpi, qataq 'enauac na ỹalleppi maye 'am chegoxoguetpi, qataq nam nlatacpi, qataq nam saishet da nlatacpi maye netaña na Israel. 22Nache na 'aỹa'alaqpi, se'enaxattem qome da sheetec co'ollaxa so llalaqpi so Jeroboán, maye llalec so Nabat, qataq so Basá, maye llalec so Ajías, souaxat da aỹem 'aunogoqchet, cha'aye 'auo'ot da huo'o 'anqa'en da lasouaxashet na Israel le'ecpi. 23Qaq aso Jezabel, nataqa'en talec da la'aqtac Ñim Nataxala', 'eeta':
Na pioxoppi chec qome na lapat aso Jezabel, hualec ye no'onaxa ye Jezrel. 24Qaq nam lauo' le'ecpi ñi Ajab, cam ileuaigui na huaqta'a't nỹecpi, nache chec qome ca pioxoppi, qaq cam ileuauga ca no'onaxa, qalaq chec qome ca maỹopi maye chegoqo'ot na piguem.›» 25Qaq ỹataqta qaica ca 'eeta'am ñi Ajab, da ỹataqta qauem nam ỹo'otpi souaxat da ỹalaxaguet añi lhua Jezabel, da ỹo'ot nam sa ỹaỹamaxaren Ñim Nataxala'. 26Qataq ỹataqta qaiqaiga na ỹo'otpi, souaxat da natameetacot na nqolacpi, 'eeta'am nam ỹo'otpi co'ollaxa so amorreopi, maye ỹo'orauec co'ollaxa Ñim Nataxala', ỹauaachigui naqa'en na Israel le'ecpi.
27Qaq so Ajab, co'ollaq hua'aqchigui de'era, nache ncolaxata'aisalo soua alogo, nache ỹaayiñi soua sansatte' alogo, qataq nqouaqchet. Qataq nache ỹaatrañi se'esoua alogo da do'oche, qataq ỹataqta daquicota. 28Qaq huaña, nache Ñim Nataxala', 'enapega so Elías, 'eeta': 29«¿Peta'a 'auauaachigui ñi Ajab, da huo'o da ntogotaxac da Aỹem datato'ot? Qaq souaxat da huo'o da ntogotaxac ñimaye, nache Aỹem, saishet qome da ñamaxa ca nhuaxanaguec na llalaqpi, nagui da ña nca'altauec ñimaye, maye nacherata da talec ñaqa'en qome ca nhuaxanaguec cam llalec ñimaye.»
