So Micaía ỹa'axata'a da nanoxonaguec so Ajab
1Qaq choche inoxootrec co'ollaxa soua tres vi'iye, da so siiriopi saishet da nalaate' so Israel le'ecpi. 2Qalaxaye co'ollaq ivita so vi'i tres, nache so Josafat maye nta'a ye Judá, nqo'ona da namaqtega so Ajab, maye nta'a ye Israel. 3Nache so nta'a ye Israel 'enapega so ltauapi, 'eeta':
¿Qami' peta'a sa qauaỹachiñi da qaralamaxat ye Ramot maye huaigui ye Galaad? Qalaq ¿ta'ainco' da qaica ca shenaqa'ac ñi nta'a ye Siria da yaqto' qomi' ỹe'eguelaxatoto yemaye? 4Nache somaye inat so Josafat, 'eeta':
¿Peta'a ishet da aỹem 'autauan da seloquiaxan ye Ramot, maye huaigui ye Galaad? Nache so Josafat 'enapeco':
Aỹem qataq na ñalleppi, qataq na ilo caipi, 'am souaqta'aguet. 5Qalaxaye aỹem 'anqouaguec da hua'auñi da 'auchemaxata ca la'aqtac Ñim Nataxala'. 6Nache so Ajab, maye nta'a ye Israel, iỹaxaneuga so na'aqtaxanaxanecpi, maye huac da ivi' cuatrocientos ỹalleppi, nache inat somayepi, 'eeta':
¿Peta'a ishet da ñeqo'ona ye Ramot, maye huaigui ye Galaad da seloquiaxan, qalqo' saishet? Nache somayepi 'enapeco':
Aja', ishet da 'anqo'ona da 'auloquiaxan, cha'aye Ñim Nataxala' 'am ỹanem da 'oxonec yemaye. 7Qalaxaye so nta'a Josafat, 'enapeco':
¿Peta'a qaica ca lỹa la'aqtaxanaxanec Ñim Nataxala', ne'ena souaqta'a da yaqto' nataqa'en senataq? 8Nache som nta'a ye Israel, ỹasateguet so Josafat, 'eeta':
Aja', ñaq huo'o so lỹa, maye ishet da senataq ca 'eetec ca la'aqtac Ñim Nataxala', qaq somaye le'enaxat Micaía, som llalec so Imla. Qalaxaye ỹataqta sa sesheteguet somaye, souaxat da saishet da aỹem da'aqtaxanem ca no'on, nda'a't na qauem da ỹa'axata'a. Qalaxaye so Josafat 'enapego' somaye, 'eeta':
Saishet taxa da 'anasaxauec de'era. 9Nache so Ajab, iỹaxaneuga so ltaua, nache ỹamaq, 'eeta':
Ña 'avi'iguenauga, nache sa naỹaloxon 'anqa'en da anac ca Micaía, maye llalec so Imla. 10Qaq so nta'a ye Israel, qataq so Josafat, maye nta'a ye Judá, ñi 'oonolec soomaye nso'ootangui aso maiche nso'onaxaqui, qataq ỹaatrañi soua alogo maye lo'onataxanaxaqui' da nta'a, netraña so naponqa' maye sa qaỹapeque so ñegueuo ye Samaria. Qaq 'enauac so na'aqtaxanaxanecpi datato'oto soomaye, ỹa'axattac na l-loxocpi. 11Nache so Sedequías, maye llalec so Quenaná, ỹo'o't co'ollaxa soua le'enaqtaqa huaca lcoue ỹachegoxotaigui so lcat, nache ỹa'alaqtai', 'eeta':
«Da la'aqtac Ñim Nataxala', 'eeta': ‹Ne'enaua huaca lcoue, nachenaua naua 'auo'ogoxonalo qome da 'auloquiaxan ye siiriopi, nache ivitta'a da ỹataqta nmichiguiñi 'anqa'en.›» 12Qaq 'enauac se'eso na'aqtaxanaxanecpi da 'eeta'a't da la'aqtaxanaxac da 'eetega so nta'a, 'eeta':
«'Aue, 'anqo'ona ye Ramot maye huaigui ye Galaad da 'auloquiaxan, cha'aye Ñim Nataxala', 'am ỹanem qome yemaye da 'oxonec.» 13Nache so namaxashec maye ỹe'eguena'a co'ollaxa so Micaía, 'enapego' somaye, 'eeta':
So na'aqtaxanaxanecpi, 'enauac da 'eeta'a't da la'aqtaxanaxac, da da'aqtaxaatapeguem so nta'a Ajab, da taỹa'a da no'on. Qaq ỹoqo'oye no'on taxa da nataqa'en 'am, 'ano'onaxat ca 'ara'aqtaxanaxac, yaqto' nateeteguet qome da la'aqtaxanaxac somayepi. 14Nache so Micaía, 'enapeco':
Qaq cha'aye 'eesa da nca'altauec Ñim Nataxala', nache cam la'aqtac maye aỹem ỹanem Ñimaye, nacheca qome ca sa'axat. 15Nache so Micaía co'ollaq ivireua'a so nta'a, nache se'eso nta'a, inat somaye, 'eeta':
Micaía, ¿peta'a ishet da ñeqo'onaxa ye Ramot maye huaigui ye Galaad da seloquiaxanaq, qalqo' saishet? Nache so Micaía 'enapeco':
Aja', ishet da 'anqo'ona da 'auloquiaxan yemaye, cha'aye Ñim Nataxala' 'am ỹanem qome da 'oxonec yemaye. 16Qalaxaye so nta'a 'enapeco':
¿Qaq chaq lcate' da she'eguelaxaalec da 'am shenapega, da 'aỹa'an ca 'ara'aqtac, nache aỹem 'aua'aqtaxaatem ca ỹataqta 'eesa la'aqtac Ñim Nataxala'? 17Nache so Micaía 'enapeco':
«Aỹem, selota'a da 'enauac na Israel le'ecpi, laguelec ana qasoxonaxapi, 'eeta'am aca qagueta da qaica ca ilo'ogue. Nache da la'aqtac Ñim Nataxala', 'eeta':
‹Ne'ena shiỹaxauapi qaica ca lataxala', qaq no'on da ñi 'oonolec namayepi ỹe'eguelaxalo naua lma'ate ỹachetec da l-lagaxayec.›» 18Nache so nta'a ye Israel 'enapego' so Josafat, 'eeta':
¿Qaq peta'a saisheto' da 'am sa'aqtaxaatapeguem, da de'era shiỹaxaua ỹataqta saishet da aỹem da'aqtaxanem ca no'on, nda'a't na qauem? 19Nache so Micaía, qaltaq 'enapec:
Qaq souaxat de'era 'ara'aqtac, nache nagui 'ana'axaỹaxana da la'aqtac Ñim Nataxala', 'eeta': Aỹem sauaachigui Ñim Nataxala' da nso'ootangui aso nso'onaxaqui, qaq so nalleppi Ñimaye nachattañi, huo'o so pa'ata'ague na aloic qataq na ne'emaq. 20Nache Ñim Nataxala', denataxan, 'eeta': ¿Negue't ca ishet da ỹayena'a ñi Ajab, da taỹa ye Ramot maye huaigui ye Galaad da iloquiaxan, yaqto' nache huaigui da ileu? Qaq somayepi ỹotta'a't dam la'aqtaxanaxac. 21Qalaxaye huo'o so nachaateua'a Ñim Nataxala', nache somaye 'enapec, aỹem sayena'a qome ñimaye. Nache Ñim Nataxala', inat somaye, 'eeta': ¿Qaq ca qonetec qome? 22Nache somaye 'enapec: Qomye ñeqo'ona da so'onataxana na la'aqtaxanaxanecpi ñi nta'a, da ỹa'axat ñaqa'en da natenataxanaxac. Nache Ñim Nataxala' 'enapego' somaye, 'eeta': 'Aue, 'anqo'ona, nache 'auo'ot damaye, cha'aye 'auañoxot qome. 23Qaq nagui mashe 'auaỹaten da Ñim Nataxala', ỹachaiguilo naua ala'api 'enauac na 'ara'aqtaxanaxanecpi so saqcha'a tenataxanaxaic, qaq Ñimaye mashe ỹa'axat da nache qouaigui qome que'eca alaataxac da 'avireguet ca qauem. 24Huaña, nache so Sedequías, som llalec so Quenaná, ca'ata so Micaía, nache iuaxanoigui na lashec, nache 'eeta':
Che ¿hua'ago' ca tateuga se'eso lamaxashec Ñim Nataxala', co'ollaq aỹem ca'ai da yaqto' 'am detaxaỹot? 25Nache so Micaía, 'eeta':
Qomye maiche 'auaỹaten qom ivita ca na'a'q, da 'ateua'alo da 'anqañoxottapiguiñi. 26Huaña, nache so nta'a ye Israel, 'eeta':
Qauacoñiiua'a qome da Micaía, nache qauaviquiỹa ca Amón, maye nataxala' ye huaqta'a't nỹecpi, qataq ca ỹalec Joás. 27Nache qoñiỹapegalo caamaye da maiche ỹa'aqtac da qaỹapoua'a, qoỹanaigui aca ncoñetaxanaxaqui, qataq da qaiquia'axan, nache ndotec aca nauole, qataq 'etaxat ca qoỹaata'am, ivitta'a qom qaltaq ye'eguelaq da qaica cara, da ñachaalataxac. 28Nache so Micaía qaltaq 'enapeco':
«Qom qaica cara, da 'anachaalataxac qom 'añe'eguelaq, qache saishet da nacheñi Ñim Nataxala', da aỹem ỹa'aqtaxanaxan.» Nataqa'en 'eeta':
'Enauac qami', qaua'aqaichigui de'era nagui.
Da 'eetec da l-leuaxa so nta'a Ajab
29Qaq huaña, nache so Ajab, maye nta'a ye Israel, qataq so Josafat, maye nta'a ye Judá, je'c da nqo'oora ye Ramot, maye huaigui ye Galaad. 30Nache so nta'a ye Israel, 'enapego' so Josafat, 'eeta':
Aỹem, qom saigui ca alaataxac, nache saayiñi caua ỹaqa'alo anogo, qaq 'am qalaq nache 'aỹa'aatrañi qome caua maiche 'ogo da 'am nta'a.
Nache so nta'a ye Israel, ỹaayiñi soua ỹaqa'alo anogo, nache taigui so alaataxac. 31Qalaxaye so nta'a ye Siria, huaqata co'ollaxa se'eso treinta y dos nataxala'pi maye netangui aso naigonapi alaataxaquipi, da saishet da iloquiaxan ca camachaqca, maye nachecata ca nta'a ye Israel. 32Nache se'eso nataxala'pi, maye netangui aso naigonapi alaataxaquipi, co'ollaq ila'a so Josafat, nache 'eeta': «Yo'oqta da nachena ne'ena na nta'a ye Israel». Nache coleesop somaye da yaqto' iloquiaxan, qalaxaye so nta'a Josafat, deỹaxan co'ollaxa da qaitauan. 33Qaq somayepi co'ollaq ila'a da saishet da nacheso so nta'a ye Israel, nache somayepi ca'ai somaye. 34Qalaxaye huo'o so 'oonolec se'eso alleppi da choche ỹaỹenec co'ollaxa aso lchecna, nache tagui so nta'a, tatoigui so lsoxoqui soua ỹaatrañi nalaataxaqui', nache ique'emaqchet somaye. Nache so nta'a 'enapega so laigona lo'o, 'eeta':
'Anconnaxaañi ana naigona, nache aỹem 'anqateeguesop ne'ena alaataxac, cha'aye aỹem seque'emaq. 35Qaq se'eso na'a'q ỹataqta lta'araic se'eso alaataxac, qaq so nta'a qalaq qanasoqtañi, qanachaalataxaatangui aso laigona da natata'ai' qanqa'en so siiriopi. Qalaxaye na ltago'q ỹataqta saishet da vi'iiguet, nache huecottauec na lauel aso laigona, ỹoqo'oye so mashe avit, nache ileu. 36Qaq co'ollaq mashe yaqta'a da inoxooñi aso nala', nache qaicoyeguen so alleppi, qoỹeeta':
«Ñi 'oonolec da qoñiita ỹe'eguelaxa qome ca lma' qataq ca na'alhua, 37cha'aye ye nta'a ileu.»
Ime, nache se'eso nta'a qaira'a ye Samaria, qaq nache huaña yemaye da qailareñi. 38Qaq ime, nache qaiỹo aso naigona qaỹauegaxaama aso laỹe' so 'etaxat maye naña ye Samaria, asom nacheltapigui naxa aso quisheguetaxaipi, qaq so pioxoppi qalaq napilectalec co'ollaxa so ltago'q so nta'a Ajab. Qaq huaña nache ỹataqta ipacchigui da la'aqtac co'ollaxa Ñim Nataxala'. 39Qaq na laỹepi na'aqtaguecpi so Ajab, qataq 'enauac nam ỹo'otpi, qataq so lma' lta'araic maye llo'oxoraxat na marfil, qataq so huaqta'a't nỹecpi maye no'oxoosheguem co'ollaxa, nache nanettalec aso nere maye huetalec da na'aqtaguec so nta'alpi ye Israel. 40Nache co'ollaq ileu so Ajab, nache so llalec Ocozías, talec da lo'onataxanaxac somaye.
Da lo'onataxanaxac so nta'a Josafat
41Qaq so Josafat, maye llalec so Asá, co'ollaq ỹacoolec da lo'onataxanaxac da ilo'ogue ye Judá, nache huetoigui so vi'i cuatro da nta'a so Ajab, maye nta'a ye Israel. 42Qaq somaye, ivi' treinta y cinco vi'iye da nachaalataxac co'ollaq ỹacoolec da lo'onataxanaxac da nta'a, qataq veinticinco vi'iye da nta'a huaña ye Jerusalén. Qaq aso late'e somaye, le'enaxat da Azuba, maye llale so Siljí. 43Qaq somaye ỹataqta quetegue da no'on lataxac so lta'a Asá, qaq nam ỹo'otpi somaye ỹataqta ỹaỹamaxareeta Ñim Nataxala'. Qalaxaye so qaỹoqotcheguema atamnaqa'pi, saishet co'ollaxa da qanlaxaañi, cha'aye so shiỹaxauapi, nache queto'ot da huaña naxa naqa'en da ỹaneuo na lachetaqtaxanaxatpi, qataq da ỹavigaxat na lchenaxanaxat. 44Nache so Josafat, ỹataqta nhuoteete' co'ollaxa so nta'a ye Israel. 45Qaq 'enauac na laỹepi na'aqtaguecpi, qataq na ỹo'otpi, qataq co'ollaq nalattac so Josafat, nache nanettalec aso nere maye huetalec da na'aqtaguec so nta'alpi ye Judá. 46Qataq somaye ca'ai naqa'en yi'iye 'alhua, som sodomiitapi maye nquisheshigui naxa da la'amqaanataxanaxac, som no'onañi co'ollaq ñaq huo'o so Asá, maye lta'a somaye. 47Qaq se'eso na'a'q, qaica co'ollaxa ca nta'a yi'iye Edom, nachesota som nataxala' ilotague' som hueta'a yemaye. 48Qataq se'esoua na'axa'te so Josafat, ỹo'ot aso notaxaquipi da qanayeguelec na 'etaxat, maye 'eeta'am ana notaxaquipi ye Tarsis, da yaqto' taỹa ye Ofir da ilaique na oro, qalaxaye saishet da ivira yemaye, cha'aye asomaye huacac co'ollaq huaña ye Ezión Guéber. 49Nache so Ocozías, maye llalec so Ajab, 'enapega so Josafat, 'eeta': 'Onaxaictaxa da 'anasheeteguet na ỹamaxashecpi da nqotaua'a ana nnotaxaqui na 'aramaxashecpi. Qalaxaye so Josafat, sa nasheneguet co'ollaxa somayepi. 50Qaq co'ollaq ileu so Josafat, nache co'ollaq qailareñi, nache qaỹalecnoigui so lta'alpi maye huaña ye huaqta'a't nỹecpi, maye lalamaxat so lta'a David. Qaq so llalec Jorán, nache talec da lo'onataxanaxac da nta'a.
Da lo'onataxanaxac so nta'a Ocozías
51Qaq so Ocozías maye llalec so Ajab, ỹacoolec da lo'onataxanaxac da ilo'ogue so Israel le'ecpi, huaña ye Samaria, co'ollaq mashe ivi' diecisiete vi'iye da nta'a ye Judá so Josafat. Qaq so Ocozías, ivi' dos vi'iye da ilotague' ye Israel. 52Qalaxaye somaye ỹo'ot co'ollaxa na ỹataqta sa ỹaỹamaxaren Ñim Nataxala', cha'aye icaachigui da lataxac so lta'a, qataq aso late'e, qataq so Jeroboán, maye llalec so Nabat, som ỹo'ot co'ollaxa da huo'o na lasouaxashetpi so Israel le'ecpi. 53Cha'aye somaye ỹo'oxoreetac co'ollaxa, qataq natameetacot so Baal, nache ỹataqta inogoqchet Ñim Nataxala', maye Natamnaxala' so Israel le'ecpi, cha'aye ỹe'enaxatchigui nam ỹo'otpi co'ollaxa so lta'a.
