1So Salomón no'oxoosheguem co'ollaxa so maiche lma', qaq ivi' soua trece vi'iye da ỹo'ottac nache imat 'enauac somaye. 2Qaq nataqa'en no'oxoosheguem co'ollaxa so lma' lta'araic le'enaxat da «Naviaq ye Líbano», maye ivi' ye cuarenta y cinco metros ye lalogaxa, qataq veintidós metros y medio ye lcateueegue, qataq trece metros y medio ye lshequitcheguema, qataq cuatro soua inoictrec lauoqtel na 'epaq cedro maye nllañi so l-llecnaxatpi somaye. 3Nache qaỹo'ot so lapo' qaỹauota'a na nchiiguishec na 'epaq cedro, nache qalapaxalec se'eso l-llecnaxatpi maye huetalec aso cuarenta y cinco lauoqtepi, qaq quince qanqa'en aso inoictec lauoqtepi. 4Qataq qaỹo'o't soua nalloxoqui' tres qanqa'en soua lpa'axaco, qataq inoicchiyiñi qanqa'en, nache ñi 'oonolec datatta qanqa'en ñi lỹa. 5Qaq 'enauac se'eso lasompi, cuatro qanqa'en naua laỹel, qataq tres qanqa'en soua inoictrec nalloxoqui', qaq ñi 'oonolec datatta qanqa'en ñi lỹa. 6Nataqa'en ỹo'ot so lapo' aso lauoqtepi da yaqto' nhuataxanaqa', maye ivi' ye veintidós metros y medio ye lalogaxa, qataq trece metros y medio ye lcategue. Qataq datatta so lỹa nhuataxanaqa' maye huo'o aso lauoqtepi qataq so lapo'. 7Nataqa'en ỹo'ot so nỹec da yaqto' lo'onataxanaxaqui da ỹo'ot da nalochiguiñi lataxac, qataq huaña da nmit na nasouaxashetpi, nache 'enauac na pa'auo somaye lapaxaua'a so 'epaq cedro chegoqchiguiña na pa'aguiñi nache ivittasheguema so pa'asheguem. 8Qaq so lma' lta'araic so Salomón, datatta so nỹec maye lo'onataxanaxaqui, qaq nache vichiguingui na laiñi soomaye so nqasoxoc, qaq da lataxa'c soomaye qalaq nache 'eeta'a't. Qataq nataqa'en ỹo'ot so lma' lta'araic aso llale so faraón maye lhua somaye, qaq da no'onataguec somaye nache 'eeta'am so lma' so Salomón. 9Nache 'enauac se'eso no'onatac nỹecpi, no'onataxat qanqa'en so ỹataqta no'on coma' maye 'eeta'a't qanqa'en ye lcata da qaichec, nache qaỹachegoxotchiguiña so lo'oxonaxala' da qano'oxoosheguem, nache ivittasheguema so pa'asheguem, qataq nache 'eeta'am da qaỹo'oxon na pa'auo qataq na pa'auec somayepi. 10Qaq co'ollaq qaỹo'ot so lo'oxonaxala', nache qaỹo'onataxana so ỹataqta no'on qataq lta'al coma', nache huo'o so ivi' ye cuatro metros y medio, qataq huo'o so ivi' ye tres metros sesenta centímetros. 11Qaq nache chegoqchiguiña somaye nache taỹasheguema na pa'asheguem da qaỹauota'a nataqa'en so ỹataqta no'on coma', qataq nache 'eeta'a't ye lcata da qaichec, qataq so 'epaq cedro. 12Qaq so lpaqtaxat maye coleesop so qasoxoc lta'araic, tres qanqa'en da qano'oxoosheguem, qaỹo'onataxana so qaichecta coma', qataq qaỹauo'o so mpa'aỹasheguem l-llecnaxat 'epaq cedro, qaq nache 'eeta'am qanqa'en da no'onataguec so pa'aỹauo lpaqtaxat so nqasoxoc aso atamnaxaqui maye lalamaqte Ñim Nataxala'.
13So nta'a Salomón damaxasoxona da qaỹe'eguena'a so Jirán, maye lma' ye Tiro, 14som llalec aso 'alo pa'ai maye chegoxoguet so Neftalí, qaq so lta'a somaye maiche lma' co'ollaxa ye Tiro som ỹataqta ỹaỹaten co'ollaxa da ỹo'ot na lcat bronce. Qaq so Jirán ỹataqta sa nqalat qataq ỹaanataxanaxaic, qataq ỹaỹaten 'enauac na lataxacpi da ỹo'ot na lcat bronce, ỹoqo'oye somaye nqo'ona co'ollaxa so nta'a Salomón, nache ỹo'ot 'enauac nam no'onatacpi maye qaỹamaxalec somaye. 15Nache somaye ỹo'o't soua dos nhuoqtel na lcat bronce, maye ivi' ye ocho metros ye lalogaxa, qataq cinco metros y medio ye lcata ye colliichigui. 16Nataqa'en ỹo'o't soua dos llo'oxoraqte bronce, nache ỹanaguilo na pa'asheguem se'esoua nhuoqtel. Qaq ye lshequitcheguema somaye, ivi' ye dos metros y veinticinco centímetros. 17Nataqa'en ỹo'o't soua lpaqtaqa lca'ache, nache ỹanagui na pa'asheguem se'esoua nhuoqtel da yaqto' llo'oxoraxa't soomaye, qaq añi 'oonole soomaye siete so netagui npaqtac. 18Qataq ỹo'o't soua dos aso inoicchiguiñi ne'enaqta granadapi, nache ipaxategueta naua laỹel se'eso npaqtac lcat da yaqto' coleesop naqa'en se'esoua pa'airashegue'm llo'oxoraqa'ate se'esoua nhuoqtel. Qataq 'eeta'am naqa'en da lataxa'c soua lỹa't nhuoqtel. 19Qaq soua pa'atchiyiguem llo'oxoraqtel maye netaleguete naua loga'te se'esoua nhuoqtel, qalaq 'eeta'am ana lauoxo ana lache late'e, qaq soomaye huac da ivi' ye dos metros ye lalogaxa. 20Qaq soua ỹoqta pa'atchiyiguem loga'te se'esoua nhuoqtel, nache qaiconnaxaasop aso doscientos ne'enaqta granadapi da llo'oxoraqte inoicchiguiñi, nache huaqta'aguet qanqa'en se'eso npaqtac lcat. 21Nache so Jirán, ỹa'alyiñi co'ollaxa se'esoua lauoqtel aso atamnaxaqui. Qaq co'ollaq ỹa'ayiñi aso pa'aỹa'ague da aloic asomaye, nache ỹanagui da le'enaxat Jaquín, qaq aso na'ague da ne'emaq, nache ỹanagui da le'enaxat Bóaz. 22Qaq na pa'aỹasheguem se'esoua nhuoqte, qalaq 'eeta'am nataqa'en da lataxac ana lauoxo ana lache late'e. Huaña co'ollaxa nache ime da qaỹo'otta'ape se'esoua nhuoqtel.
23Qaq ime co'ollaxa, nache so Jirán ỹo'ot aso ỹataqta late'erai lcat bronce, da laỹe' na 'etaxat, asomaye colliichigui. Qaq ye lcachiguiñi na alap da taỹa'ata so lỹa laỹe, nache napacalec ye cuatro metros, qaq ye lshequitcheguema ivi' dos metros y veinticinco centímetros, qaq ye lcata da colliichigui qalaq trece metros y medio. 24Qaq na npa'aguiñi soua laỹel so alap asomaye, nache quetoto naqa'en aso ne'enaqtapi nqapegaxai ana ltañi maye netagui ana ala, nache aso diez ala, ivi' cuarenta y cinco centímetros naqa'en ye lshecta añi lỹa. 25Qaq asa'aso laỹe' na 'etaxat huetaleguete naqa'en soua doce huaca lhuaraiqa ne'enaqtaqa lcat bronce, qaq tres soua datatra'ague naqa'en da sheu', qaq soua lỹa't tres datatra'ague da la'añaxa, qataq soua lỹa't tres qalaq datatra'ague da yo'oxoñi, qaq soua lỹa't tres nache datatra'ague da avit, nache 'enauaque soomaye qoshetaua'a naqa'en so laiñi asa'aso laỹe na 'etaxat. 26Qaq ye lcategue da lquesaxanaxa naua laỹel, qalaq ivi' ocho centímetros, qaq da lataxac na alap asomaye qalaq 'eeta'am ana lauoxo ana lache late'e, qaq asomaye ivi' cuarenta y cuatro mil litro na tangui 'etaxat. 27Qataq nataqa'en ỹo'o't soua diez lo'oxonaxala'ate lcat bronce, qaq añi 'oonole soomaye ivi' ye un metro ochenta centímetros ye lalogaxa, qataq un metro ochenta centímetros ye lcategue, qataq un metros treinta y cinco centímetros ye lshequitcheguema. 28Qaq se'esoua lo'oxonaxala'ate, nache qota'agueta qanqa'en soua la'axasoxola'ate naua laỹel asomaye, 29qaq naua laỹel se'esoua lo'oxonaxala'ate, nache huetalec qanqa'en so ne'enaqtacpi llonpi, huaca lhuaraicpi, qataq soua shiỹaxau' maye huo'oi naua laua't. Qaq so pa'asheguem qataq na pa'aguiñi se'eso ne'enaqtac huaca lhuaraicpi, qataq so llonpi, nache huo'o aso llo'oxoraqtepi lauoxo ana guirnalda. 30Qaq añi 'oonole se'esoua lo'oxonaxala'ate, cuatro qanqa'en naua lasaxanna bronce, qaq soua lconnaxaqui' soua lasaxanna, nataqa'en bronce. Qaq na pa'aguiñi soua cuatro pa'airauec lamaqa'ate, nache huetaleguete qanqa'en soua ỹactrec lsheeneqa na lcat bronce, nache na laỹel soomaye qaỹauo'o aso llo'oxoraqte lauoxo ana guirnalda. 31Qaq na alap asa'aso laỹe' na 'etaxat, nache qano'oxoosheguem so cuarenta y cinco centímetros da ỹaquitcheguem qanqa'en. Qataq colliichigui se'eso alap, qaq soua lmala'ate ivi' sesenta y ocho centímetros ye lshequitcheguema. Qataq naua laỹel na alap asomaye, nache qaỹo'ot so ne'enaqtacpi, qalaxaye cuatro qanqa'en naua laỹel, qaq saishet da colliichigui. 32Qaq soua cuatro lasaxannal nache huetro'ot na pa'aguiñi soua lmala'ate, qaq soua lauaq maye lconnaxaqui' soua lasaxannal, nache na'atta'agueta qanqa'en soua lo'oxonaxalatel. Qaq ye lshequitcheguema añi 'oonole se'esoua lasaxannal ivi' sesenta y ocho centímetros, 33qaq da lataxa'c soua lasaxannal, qalaq 'eeta'am da lataxac ana lasaxannapi ana naigona. Qataq soua lauaq maye lconnaxaqui', qataq soua la'aitel, qataq so lauaqpi maye ỹa'añaxara't soua lasaxannal, qataq aso laiñiguishe maye taỹapegueua'a so lauaqpiolec, qalaq 'enauac qaỹauota'a na lcat bronce. 34Qaq añi 'oonole soua lo'oxonaxalatel, nache na'attaua'alo qanqa'en soua cuatro la'axasoxola'ate, qaq añi 'oonole soomaye, nache naua'alo naua lamaxal. 35Qaq na pa'aỹasheguem asa'aso lo'oxonaxalatepi nache colliichiguilo qanqa'en, qataq veintidós centímetros y medio ye lshequitcheguema, qataq nache qota'aguet qanqa'en soua la'axasoxola'ate qataq soua naconqa. 36Qaq so Jirán, ỹo'o't soua le'enaqtaqa shiỹaxau' maye huo'oi naua laua't, qataq so llonpi qataq aso chaicpi, da ỹachaleguete naua laỹel soua lo'oxonaxalatel, qataq na npa'achiguiñi asomaye, ỹachalec aso llo'oxoraqtepi lauoxo ana guirnalda. 37Qaq 'era da 'eetec co'ollaq ỹo'o't se'esoua diez lo'oxonaxalatel, maye ỹauota'a na lcat, qataq 'eeta'a't naqa'en da no'onataguec, qataq ye lcata qataq ye lalogaxa. 38Nataqa'en ỹo'ot aso diez nỹoxonaxaquipi lcat bronce, maye ivi' ye un metro ochenta centímetros añi 'oonole, qataq nalotangui na ochocientos ochenta litros na 'etaxat, nache ỹanalec añi 'oonole asa'aso lo'oxonaxalatepi asomaye. 39Nache cinco soua lo'oxonaxalatel maye pa'aira'ague da aloic aso atamnaxaqui, qataq cinco soua pa'aira'ague da ne'emaq asomaye. Qaq aso laỹe' na 'etaxat, qalaq naña naqa'en da pa'aỹa'ague da aloic aso atamnaxaqui. 40Nache so Jirán, ỹo'ot nataqa'en aso taxaquipi, nsheraxanaxatpi qataq aso ỹomaxaquipi. Qaq huaña, nache so Jirán imat da ỹo'ottac 'enauac se'eso lo'onatacpi maye ỹamaxalec so nta'a Salomón, da yaqto' lalamaxat naqa'en aso atamnaxaqui maye lalamaqte Ñim Nataxala': 41som dos nhuoqtel, qataq soua llo'oxoraqte colliichiguilo maye nasheguema na pa'asheguem soomaye, qataq soua mpa'airasheguem llo'oxoraqa'ate npaqtaqa, 42qataq aso cuatrocientos ne'enaqtapi granadapi maye dos da inoictec naqa'en, da neraua'alo naua laỹel soomaye, nache coleesopa naqa'en se'esoua llo'oxoraqte colliichiguilo maye neraña na pa'asheguem se'esoua nhuoqtel, 43qataq soua diez no'oxonaxalatel maye netalec naqa'en soua diez laỹe' na 'etaxat, 44qataq aso late'erai laỹe' na 'etaxat, qataq soua doce huaca lhuaraiqa maye neto'ot na pa'aguiñi asomaye, 45qataq aso taxaquipi, nsheraxanaxatpi, qataq aso ỹomaxaquipi. Qaq 'enauac se'eso no'onatacpi maye so nta'a Salomón, ỹamaxalec da ỹo'ot co'ollaxa so Jirán da lalamaxatpi naqa'en aso atamnaxaqui maye lalamaqte Ñim Nataxala', somayepi 'enauac bronce. 46Qaq so nta'a Salomón hua'auñi co'ollaxa da lapaxaguet so nshaxa so le'enaqtacpi, huaña ye nalochiguiñi 'alhua so tala Jordán, maye vichiguinguilo ye Sucot qataq ye Saretán. 47Qataq so nta'a Salomón saishet co'ollaxa da naloqten ye lquiilo se'eso nhuenecpi, cha'aye ỹataqta qalota. 48Qaq so Salomón, nataqa'en damaxasoxoolec da qaỹo'ot so laỹepi lhuenecpi aso atamnaxaqui maye lalamaqte Ñim Nataxala': Asom nca'atoxonaxalate oro, qataq so nquia'axala' maye nataqa'en oro, maye qaỹachetalec naxa aso nauole maye qoỹanot Ñim Nataxala', 49qataq aso ncoỹaraxanaxaqui lashe maye imauec da oro, maye cinco soua pa'aira'ague da aloic, qataq cinco soua pa'aira'ague da ne'emaq, asom netaña ye naloteuga so ndaqa' maye saqaishetapec, qataq netaguilo asomaye aso llo'oxoraqtepi lauoxopi, qataq aso ncoỹaraxanaxaquipi, qataq aso nchegaxanaqtepi, 50qataq aso ỹomaxaquipi, nchegaxanaxatpi, npelegaxanaxatpi, nemaxanaxatpi, qataq aso nchenaxanaxat laỹe', qaq somayepi imauec oro, nataqa'en 'enauac oro so ñegueuo so ndaqa' maye saqaishetapec, qataq so lasompi aso atamnaxaqui. 51Qaq 'era da 'eetec co'ollaq ime 'enauac aso atamnaxaqui maye lalamaqte Ñim Nataxala', maye damaxasoxoolec da qaỹo'ot so nta'a Salomón. Qataq somaye damaxasoxoolec da qairouo 'enauac so nhuenecpi plata, qataq oro maye ỹaneuo co'ollaxa so lta'a David, nache qaỹachaigui aso atamnaxaqui maye lalamaqte Ñim Nataxala'.
