1Qaq ỹoqo'oye iuen da qaỹa'axañiiñi da qauo'ocheetac na qauem. Saisheto' da qauatenataxañiitac, qataq saishet da dos naua qoquiitegueto, qataq saishet da qami' quiỹaxanaqtaqaiqa, qataq saishet da qami' na'aqtaqa lo'o'. 2Nachaqrata da qanmichiỹaique 'enauac na no'on maye itauan da saqcha'a qarca'alaqai, 'eeta'am ca nogotolec maye cheta'ague da ñiguiñi da lhuogoxo da nmitta'a na lche' aca late'e. Qaq da nache qoñiitec de'era, nache qami' no'o'n 'amqaanataxanaxaiqa, qaq Ñim Lo'onatac 'Enauacna nache qami' nca'alaxatre'c, 3cha'aye qami' mashe qauaỹaañita da So Qarataxala' ỹataqta soxoraic.
Nam dalaxaic lalamaxatpi Ñim Lo'onatac 'Enauacna
4-5Qami' qoñiita'am ca coma' maye nca'altauec, maye iueetac Ñim Lo'onatac 'Enauacna da no'oxoosheguem aca lo'onaxanaxaqui maye saqcha'a. Qaq ỹoqo'oye qanquiquiỹot So Jesucristo, cha'aye nacheso so coma' nca'altauec, qataq ỹo'otan na shiỹaxauapi co'ollaxa. Qalaxaye Ñim Lo'onatac 'Enauacna lca'aguishec co'ollaxa Somaye da 'eeta'am naqa'en ca coma' maye ỹactec da lyac. Nataqa'en qami' no'o'n ltaxaỹaxanaxanaqa na shiỹaxauapi da qaitaxaỹapegue' Ñim Lo'onatac 'Enauacna qataq chegoqchigui So Jesucristo da qaỹa'añiỹot Ñim Lo'onatac 'Enauacna ana nachetaqtaxanaqte maye ỹaỹamaxareeta Ñimaye. 6Cha'aye da la'aqtaxanaxac Ñim Lo'onatac 'Enauacna maye nanettalec ana la'aqtac lmalate Ñimaye 'eeta':
«Aỹem da soota'a ye Jerusalén
qalaq sheeta'am ca coma'
maye qaica ca 'ena'am da lyac qataq nca'aguishec.
Aỹem coma' maye ỹataqta nhuenec
qaq da ỹo'onataxanaxac ñelletañi ca nỹec.
Qaq cam Aỹem pi'iỹa'a
nache camaye saishet da qaỹatenachet.»
7Qami' qaua'amaqchiñi Ñim Lo'onatac 'Enauacna, ỹoqo'oye ỹataqta huo'o naq naigui qanqa'eñi se'eso coma' maye qaica ca 'ena'am da lyac. Qalaxaye nam saishet da ỹa'amaqten, nache ỹo'ot dam la'aqtaxanaxac ana nere maye huetalec na la'aqtacpi Ñim Lo'onatac 'Enauacna maye 'eeta':
«So coma' maye ỹo'otan co'ollaxa
som ỹo'ottac añi no'onaxanaxaqui late'erai,
nacheso nagui som ỹe'eguelaxa da ỹataqta nhuenec da qaỹo'ot ca nỹec.»
8Nataqa'en ye lỹa nanettalec ana nere maye huetalec na la'aqtacpi Ñim Lo'onatac 'Enauacna 'eeta':
«'Ena nam coma'
maye qalota na desalliilec;
qataq qalota na pogolaxaisop.»
¡Qaq namayepi ivireguet de'era! ¡Souaxat da saishet da ỹa'amaqten da na'aqtaguec So Jesucristo!
Nam lalamaxatpi Ñim Lo'onatac 'Enauacna
9Qalaxaye qami' qaualliquiitaigui na llalaqpi Ñim Lo'onatac 'Enauacna; qami' ltaxaỹaxanaxanaqa na shiỹaxauapi da qauo'onataxañiitacot Ñim Nta'a; qataq qami' lalamaqa'ate. Qaq de'era chegoqchigui Ñim Lo'onatac 'Enauacna co'ollaq qami' nqateeguesopa na napalaxa maye nachera da ñe'etaxaloxo, nache qami' inoxonaqcheteua'alo da yo'oqchiguiñi maye qaica ca 'ena'am da lyac. Qaq ỹoqo'oye qaua'axache da llo'oxoyec Ñim Lo'onatac 'Enauacna maye qami' ỹo'oteque.
10Qami' co'ollaxa saishet da qami' lalamaqa'ate Ñim Lo'onatac 'Enauacna,
qalaxaye nagui ỹataqta qami' lalamaqa'ate Ñimaye.
Ñim Lo'onatac 'Enauacna co'ollaxa saishet da qami' ichoxoreeta'ape,
qalaxaye nagui Ñimaye ỹataqta qami' lauotaqa'ate.
Da no'on nataxac maye ishet da qanayeegue
11Qami' ñauochaxau' ỹaqaỹarolqa maye sa'amaqtenaqtac So Cristo, qami' qoñiita'am ca chegaqauec maye cara'acolec da hueta'a ana 'alhua. Saisheto' da qoquiitalec da maiche qaralamaxache qarqopitaxanaqtaiqui, cha'aye da qauo'oche damaye, nache qami' iqataqche't.
12Qataq ỹataqta qano'onaxache da qarataxaqui da qoviitaigui cam shiỹaxauapi maye saishet da ỹa'amaqten Ñim Lo'onatac 'Enauacna. Yaqto' na'aictaxa da saishet da qami' iyacna'ape nagui da qami' detaqtegalo, 'eeta'am naqa'en da qami' 'etaxaloxoicpi, qalaxaye namayepi ila'a qome ca ỹaỹamaqchiguiñi qaro'onataxanaxaqui, nache ỹo'oxoreetac Ñim Lo'onatac 'Enauacna qom ivita ca na'a'q da ñi 'oonolec da qoñiita ỹaneuo da lo'onataxanaxac.
Huo'o naq 'enec qanqa'en na nta'alpi
13Da yaqto' qaica ca qauema naua la'aqtaqa da detaqtega So Qarataxala' Jesucristo, nache qami' iuen da ỹataqta qaualaqaiguet 'enauac na nta'alpi. Qataq qaualaqaiguet ñi lataxala' na nta'alpi maye netaña ye nỹecpi ye Roma, cha'aye ñimaye nacheñi ñi qoỹanem da na'añaxac da ilotague' na 'alhuapi. 14Qaualaqaiguet nataqa'en na ỹaneuo co'ollaxa ñimaye, da yaqto' ỹauo'o ca nhuaxanaguec nam ỹo'ot ca qauem, qataq ỹauo'o ca nsheetenaguec cam ỹo'ot ca 'onaxaic. 15Ñim Lo'onatac 'Enauacna huotaique da qauo'oche ca ỹaỹamaqchiguiñi, yaqto' na shiỹaxauapi maye qaica ca ỹaỹaanapec, qaica ca qami' ỹasaxaleguete qarasouaxashechi.
16Qami' huesochiyiñi cha'aye qauo'onataxañiitacot Ñim Lo'onatac 'Enauacna. Qalaxaye saishet da souaxat da qami' huesochiyiñi, nache ishet da qauo'oche ca qauem. 17Nachaqrata da ỹataqta huo'o naq 'enec qanqa'eñi 'enauac na shiỹaxauapi qataq ỹactec qanqa'eñi da qarauotaxanaqtaiqui nam ỹa'amaqten So Jesús. Qavio'oxoyiñi Ñim Lo'onatac 'Enauacna qataq huo'o naq 'enec qanqa'eñi ñi lataxala' na nta'alpi maye netaña ye nỹecpi ye Roma.
Da lo'onataxanaxac na nlatacpi
18Qaq na nlatacpi samaxalec da ỹalaxaguet na na'aco'pi qataq huo'o naq 'enec naqa'en. Qalaxaye saishet da nda'a't da ỹalaxaguet na no'on da lataxac qataq choxonnataxanaxaic, nachaqrata da nataqa'en ỹalaxaguet na qauemaicpi. 19Ñim Lo'onatac 'Enauacna ỹaalec da nqouagaxa nam souaxat da ỹalaxaguet Ñimaye, nache huo'o da nque'eenaxac maye choche qaỹo'otec qataq na'añaxateguet. 20Da huo'o ca qaỹauo'o ca nhuaxanaguec souaxat da huo'o ca ỹo'ot qauem, nache camaye da na'añaxateguet qataq lhueneguet ca nque'eenaxac, nache de'era saishet da qaỹa'aalac. Qalaxaye da huo'otaq huo'o ca nque'eten qataq na'añaxateguet da nque'eenaxac souaxat da ỹo'ottac ca ỹaỹamaqchiguiñi, nache Ñim Lo'onatac 'Enauacna ỹaalec da nqouagaxa camaye.
21Da huo'o ca choche qaỹo'otec da nque'eenaxac, nache no'on da tachigui lauel da la'aqtac Ñim Lo'onatac 'Enauacna da ca huo'o da nque'eenaxac, nache iuen da na'añaxateguet. Cha'aye 'era da 'eetec co'ollaxa So Cristo da yaqto' qomi' ishet da seloxolec Somaye, cha'aye huo'o da nque'eenaxac co'ollaxa souaxat qami'. 22So Cristo saishet da huo'o ca lasouaxashet, qataq saishet da huo'o ca ỹatenachet. 23Qataq co'ollaq qaisheueetac, qalaq saishet da ỹe'eguelaxata'aguet da nsheunaguec, qataq saishet da ỹasauaxattac som ỹo'otpi da nque'eenaxac. Nachaqrata da hua'aqta'a da Ñim Lo'onatac 'Enauacna da huapegue' qataq ilo'ogue, cha'aye Ñimaye nmit qome 'enauacna qataq ipagaqchiichigui ca lataxac. 24So Cristo ỹache 'enauac na qarasouaxashetpi, cha'aye ileualec so npe'enaxaqui. Qaq ỹo'ot damaye yaqto' qomi' saxanaxañi 'enauac nam so'otaqtac qauem, nache ndotec da so'otaqtac cam 'onaxaic. So Cristo co'ollaxa ỹataqta qaique'emaqchet, yaqto' ishet da qami' no'oite'. 25Qami' co'ollaxa qoñiita'am aca qaguetapi maye isomtac, qalaxaye nagui mashe qañe'eguelaqaiua'a So Cristo maye 'eeta'am ca ilotague' ana qagueta, qataq npaxattalec.
