1 Pedro 4

₁Iuen da qami' lhuotte' da qanqui'ichiñi, qoñiita'am da 'eetec So Cristo da huo'o da nque'eenaxac co'ollaq hueta'a ana 'alhua. Cha'aye da qami' qanqui'ichiñi da qoñiita'am Somaye, nache saishet da qoquiito'ot da qauo'ocheetac na qarasouaxashechi. ₂Qaq damaye ỹachaxan da qaỹa'axañiiuec da qoquiitegueto naua qauema qarqopitaxanaqtaicolli', huaña nache dam ñaq huo'o qanachaalataxaqui qoquiilec da qauo'oche dam ỹataqta 'eetapeguec Ñim Lo'onatac 'Enauacna. ₃Cha'aye mashe qalote' soua na'axa'te da qauo'ocheetac nam qauem maye ỹo'ottac nam saishet da ỹa'amaqten Ñim Lo'onatac 'Enauacna. Se'esoua na'axa'te qami' qoviitaigui nam ỹotta'a't namanaxanaqtaiguesat, qataq na qauem nqopitaxanaqtaiguesat, qataq qami' taxaiqa, qataq qaualliquiitaua'a na naponaxacpi maye ishet da huaigui da qaỹo'ot ca qauem, qaq dam ỹataqta ỹactec da qauem maye qauo'ocheetac, nachera dam qanatamñeetacot na ne'enaqtacpi maye saq 'en. ₄Qalaxaye nagui qami' mashe saishet da qaualliquiitaigui namayepi, ỹoqo'oye namayepi saishet da qami' iyacna'ape da qami' detaqtegalo. ₅¡Qalaxaye namayepi mashe saqaỹaloq da ỹa'axatem 'enauac nam ỹo'ottacpi Ñim Lo'onatac 'Enauacna, Ñim nmitna maye mashe naỹamaxattai' da nmit na shiỹaxauapi maye nca'altauecpi qataq nam mashe ileupi! ₆Cha'aye nachera da huo'omshe So Cristo ỹa'axat da no'on na'axaỹaxac ivira'a da da'aqtaxanem na mashe ileu: da yaqto' Ñim Lo'onatac 'Enauacna da mashe ime da nmit nam ỹo'ottacpi namayepi co'ollaq ñaq nca'altauec, nache so saqcha'a lca'alaxa somayepi ishet da hueta'aguet Ñim Lo'onatac 'Enauacna.

₇Mashe nayeeta'a ye loga't 'enauacna. Qaq ỹoqo'oye ỹataqta qanloitec, qataq ỹataqta sa qauasaguiyi da qanqouagaxauñiitac.

₈Qalaxaye ỹataqta ỹactec qanqa'eñi da qarauotaxanaqtaiqui ca qarỹai, cha'aye da nsoxoyec nachera da ỹapalaxat na nasouaxashetpi.

₉Qataq ñi 'oonolec da qoñiita ỹataqta ilo'oguet ca lỹa da namaxasoxoic, qataq saishet da quetapeguelec, nachaqrata da ỹo'otec da lamaicỹaxac camaye.

₁₀Ñi 'oonolec da qoñiita ỹaconeguet na no'on lachetaqtaxanaxatpi Ñim Lo'onatac 'Enauacna: Qaq no'on da ỹataqta qauloiteguet da qoviỹapegue' na qaraỹepi. ₁₁Da huo'o ca qoỹanem da ỹaỹaten da ltaxaỹaxac, qaq no'on da ỹa'axat da la'aqtac Ñim Lo'onatac 'Enauacna. Qataq da huo'o ca ỹaỹaten da itauan na laỹepi, nache iuen da ỹo'ot, ỹachegoxotchigui da la'añaxac maye chegoqo'ot Ñim Lo'onatac 'Enauacna maye ỹami' da ỹo'ot damaye. Qaq huaña, nache 'enauac nam qauo'oche, chegoqchigui da na laỹepi shiỹaxauapi ỹo'oxoren Ñim Lo'onatac 'Enauacna, chegoqchigui So Jesucristo som chochaq tatec da llo'oxoyec qataq da la'añaxac. Aja', nache 'eetec.

₁₂Qami' ñauochaxau' ỹaqaỹarolqa maye qoquiitague' So Cristo, saishet da qami' ỹe'elaqche't qom qaviyeeguet na lqalaiguesat maye ỹe'eguen da qarpi'iỹaxaqui Ñim Lo'onatac 'Enauacna. Cha'aye damaye saishet da sa qaỹauanapega. ₁₃Nachaqrato' da ỹataqta qauamaichiguiñi da ishet da qanqui'ichiñi da qoñiỹa'am da nque'eenaxac co'ollaxa So Cristo, yaqto' nataqa'en huo'o da qantonaxaqui qom ñe'eguelaq Somaye da ỹachaxan da llo'oxoyec qataq da la'añaxac.

₁₄Da huo'otaq huo'o ca qami' isheueeta'ape souaxat da qarpi'iỹaxaqui So Cristo, qaq no'on da que'eca qansheunaguiiqui, 'eeta'am qanqa'eñi ca qana'achecỹaxaqui maye chegoqo'ot Ñim Lo'onatac 'Enauacna. Qaq de'era naigui da som ỹo'oxoraic Saqcha'a La'añaxac Ñim Lo'onatac 'Enauacna, nache 'eetai' da qami' hueta'agueta. ₁₅Qaq da huo'o ca 'oonolec da qoñiita da huo'o da nque'eenaxac, qalaxaye saishet qome da souaxat da laataxanaxaic, huo'otaq cachaxaic, huo'otaq da ỹo'ottac na qauem, huo'otaq tatapegueua'a ca sa lalamaxat. ₁₆Da huo'o ca 'oonolec da huo'o da nque'eenaxac souaxat da quetague' So Cristo, nache saishet da huo'o da la'agaxa, nachaqrata da ỹaatacot da na'achecỹaxac Ñim Lo'onatac 'Enauacna souaxat da quetague' So Cristo.

₁₇Mashe ivita ye laloqo' da Ñim Lo'onatac 'Enauacna nmit 'enauac na shiỹaxauapi, nache ỹa'auaxaachiguiñi da nmit na maiche lalamaxatpi. Qaq da ỹa'auaxaachiyiñi da qomi' nmi't qataq ỹauo'o da qanque'eenaxac, nache ¡chaq 'eetec ca taỹa'aguet nque'eenaxac nam saishet da ỹalaxaguet Ñim Lo'onatac 'Enauacna! ₁₈Qataq da huo'o da lqalaic da nca'alec nam ỹo'ottac da ỹaỹamaqchiguiñi ¡qaq chaq 'eetec qome cam taỹa'aguet na qauemaicpi qataq na 'etaxaloxoicpi! ₁₉Qaq ỹoqo'oye nam huo'o da nque'eenaxac souaxat da maiche ỹasheeteguet Ñim Lo'onatac 'Enauacna, nache iuen da queto'ot da ỹo'ottac cam ỹaỹamaqchiguiñi qataq hua'aqta'a da Ñimaye ilotague', cha'aye Ñimaye maiche lo'onatac da nachaalataxac camaye qataq ỹataqta ipacchigui cam ỹachaxanapec.