So Samuel ncoyeguene' so Israel le'ecpi
1Huaña nache so Samuel 'enapega 'enauac so Israel le'ecpi, 'eeta':
Qami' qauauañiichigui da aỹem so'ot 'enauac nam qauỹaxañiỹaique, qataq sauo'o ñi qarta'ai. 2Qaq nagui 'iñi ñim nta'a maye qami' ilo'oguelo qome. Aỹem qalaxaye, mashe aỹem ỹa'axaiquiolec, qataq mashe ỹapagaq na iqaic, qaq naua ỹalqa nache qami' ỹalectaiguilo. Qaq aỹem qami' selotegueto co'ollaxa chegoqchiguiña so ñaq aỹem nsoqolec, nache ivitta'a nagui, 3qaq nagui soota'a ne'ena, qalaq da huo'o co'ollaxa ca secachiỹa ca lauegaxanaxala' huaca, huo'otaq 'ashena, huo'otaq da huo'o co'ollaxa ca huetaiya' ñaqa'en, huo'otaq da huo'o ca aỹem isheeten da yaqto' so'ot ca 'eetapeguec sa ỹaỹamaxañi lataxac, nache nagui qaua'axache cam ỹasouaxashet, ỹauaachigui qanqa'eñi Ñim Nataxala', qataq ñi nta'a maye lca'aguishec Ñimaye, yaqto' aỹem sesheeten qome aca ỹavigaxaiste. 4Qalaxaye somayepi 'enapeco':
Ỹataqta saỹauanega da qomi' sa 'achera'ape, huo'otaq da qomi' sa 'auaỹamaxata'ape, huo'otaq da qomi' 'aucachiỹoto.
5Nache so Samuel 'enapeco': Ñim Nataxala' qataq ñim nta'a maye lca'aguishec Ñimaye, qami' ỹauaachiguilo nagui da qaica ca qauloỹalec ỹasouaxashet.
Nache somayepi 'enapeco':
Aja', nache 'eetec.
6Nache, so Samuel qaltaq 'enapega so shiỹaxauapi, 'eeta':
Ñim Nataxala' ỹachegoxotchigui co'ollaxa so Moisés, qataq so Aarón, da nqateeguesop ye Egipto so hua'au qarta'ailpi. 7Qaq nagui aỹem qana'axaỹaxañiỹa qome, aỹem qanachaachiua'a da yaqto' qami' sataỹa'agueta da qami' seuennataxanaxaneque 'enauac nam qalota maye qami' ỹo'oteque co'ollaxa Ñim Nataxala', qataq som hua'au qarta'ailpi. 8Qaq so Jacob co'ollaq inoxoneua'a ye Egipto, nache ye egipciopi ỹataqta sa nañaxaasheguem co'ollaxa so hua'au qarta'ailpi, nache somayepi iỹaxanot co'ollaxa Ñim Nataxala', nache Ñimaye ỹamaq so Moisés qataq so Aarón da yaqto' nqateeguesop ye Egipto, nache ỹanalec ne'ena 'alhua. 9Qalaxaye somayepi icoua'ai Ñim Nataxala' maye Natamnaxala', nache Ñimaye ỹaneguet co'ollaxa da la'añaxac so Sísara, som lataxala' so nalleppi so Jabín, som nta'a maye lma' ye Jazor, qataq da la'añaxac so filisteopi, qataq so nta'a maye lma' ye Moab, maye iloquiaxan co'ollaxa somayepi. 10Qalaxaye co'ollaq ime de'era, nache somayepi da'aqtaxaatem Ñim Nataxala' da huo'o da ỹasouaxat, cha'aye ca'ai Ñimaye da yaqto' natamnot so ỹotta'a't lqui'ipi so Baal, qataq aso Astarté, nache iỹaxanot Ñimaye da isoueeguesop da la'añaxac so mpa'aguenaxauapi, qataq ỹanot da la'aqtac da nacheñita Ñimaye da queto'ot da ỹo'oxoreetac. 11Nache Ñim Nataxala' qaltaq ỹama'q co'ollaxa soua Yerubaal, Barac, Jefté, qataq aỹem Samuel da yaqto' qami' isoueeguesopa da la'añaxac so qampa'aguenaxauaipi, qaq huaña nache qami' ishet da qaltaq qavi'imaqaitac na qoviita'a. 12Qalaxaye qami', co'ollaq qauloỹa'a da so Najás, so lta'a so amoniitapi, da huotaique da qami' iloquiaxa'n, nache aỹem qauỹaxañiỹot da sauo'o ca nta'a da qami' ilo'oguelo, qamaq ñi qarta'ai nacheñi Ñim Nataxala' maye Qanatamnaxala'ai. 13Qalaxaye 'iñi nagui ñi nta'a maye qarca'aguishiqui. Ñim Nataxala' qami' ỹanema ñim qauỹaxañiỹaique co'ollaxa. 14Qaq nagui qami' iuen da qavio'oxoyiñi Ñim Nataxala', qataq qanatamñiỹot, qana'axaỹaxañiỹalo naua ltaxaỹaxaco, qataq saishet da sa qaualaqaileguete naua lamaxasoxonaxaco, nache da qami', qataq ñim qarta'ai da ỹataqta qoquiitegue Ñim Nataxala' maye Qanatamnaxala'ai, nache ishet da qaulaquiitapiguiñi. 15Qalaxaye da sa qaualaqaiguet, qataq sa qauo'oche' naua lamaxasoxonaxaco, nache Ñimaye qami' iuaxa'n qome, 'eeta'am da 'eetec so hua'au qarta'ailpi. 16Qaq ỹoqo'oye qanaỹamaxache nagui, yaqto' ishet da qauauañiichigui ca ỹataqta lta'araic naqa'en da na'aalaxa maye ỹo'ot Ñim Nataxala'. 17Qaq ye qami' qauaỹachiñi da nagui, laloxoqui da qanqat na ala na trigo, qaq saishet da laloxoqui' naua auo'oche. Qalaxaye aỹem seỹaxanot qome Ñim Nataxala', nache Ñimaye namaq qome ca nalataxa qataq ca auot, yaqto' qami' qauauattoñiita qataq qauaỹaañiita, da ỹataqta ỹauaachigui Ñim Nataxala' da qauem da qauo'oche co'ollaq qauỹaxañiỹaique ca qarta'ai. 18Nache se'eso na'a'q so Samuel, iỹaxanot Ñim Nataxala', nache Ñimaye namaq so nalataxa qataq so auot, nache 'enauac so shiỹaxauapi ỹataqta qalota da lcolanaxa Ñim Nataxala' qataq so Samuel. 19Qaq ỹoqo'oye 'enauac somayepi 'enapega so Samuel, 'eeta':
'Anachoxonnot qome Ñim Nataxala' maye 'Anatamnaxala', nache 'auỹaxaalec ne'ena 'aramaxashecpi, yaqto' saishet da seleuaq, cha'aye co'ollaq seỹaxanaqaique ñi qarta'a nache maiche ñequigaxataxauec da qarasouaxashet. 20Nache so Samuel, 'enapeco':
Saishet qome da qayi'i. Cha'aye 'eesa da ỹataqta qauem da qauo'oche, qalaxaye nagui nache saishet qome da qoquiỹa'ai Ñim Nataxala', nacherato' da ỹataqta qaumachiỹo'ot da qarquiyaqteỹaxaqui da qavio'oxoyiñi. 21Saishet qome da qoquiigue na saq'en atamnaxala'pi maye saishet da detaunaxan huo'otaq da deca'alaqtaxan, cha'aye namayepi qaica ca naigui. 22Qaq Ñim Nataxala' souaxat da llo'oxoyec da le'enaxat, nache saishet da qami' ca'aisalo, cha'aye Ñimaye ỹauotaique da qami' lalamaxatpi nhuo' le'ecpi. 23Qaq aỹem qalaq saishet qome da saxaañi da qami' ñatameetapegueleguete, yaqto' saishet da hueto'ot Ñim Nataxala' ca ỹasouaxashet, nacherata da qami' sapaxagueneque ca ỹaỹamaqchiguiñi, qataq ca no'on qoyecỹaxaqui, 24yaqto' nacherata da huo'o naq 'enec qanqa'eñi Ñim Nataxala', qataq ỹataqta 'eesa da qaumachiỹo'ot da qarquiyaqteỹaxaqui da qavio'oxoreñiitac, qataq qauennachiỹa'a qome som qalota maye qami' ỹo'oteque co'ollaxa Ñimaye. 25Qalaxaye da qauacoñiỹa da qauo'oche na qauem, nache qami', qataq ñim qarta'ai nache qoquiỹañi' qome da qami' qailaxachiguilo.
