Qanalaate' so filisteopi
1So Saúl mashe ỹe co'ollaq ilo'ogue so Israel le'ecpi, qaq co'ollaq mashe huo'oi soua ivi' vi'iye da ilotague' somayepi, 2nache lca'aua'a so tres mil alleppi Israel le'ecpi. Qaq so dos mil nache no'ona'aguet somaye co'ollaq huaña ye Micmas, qataq aye qasoxonaxapi maye naña ye Betel, qaq so mil maye laỹepi somayepi, nache no'ona'aguet so Jonatán, maye hueta'a ye Gabaa maye lma' so Benjamín. Qaq som ỹacauec shiỹaxauapi, so Saúl ỹamaq da ỹe'eguelaxaua'alo soua lma'ate. 3Nache so Jonatán iloquiaxan co'ollaxa so alleppi filisteopi maye hueta'a ye Gabaa, nache loxonec, qaq de'era qoỹeetec, ỹaỹaten co'ollaxa so filisteopi. Qalaxaye so Saúl damaxasoxoolec co'ollaxa da qaỹashiiyigui aso nasheerepi da qaiconnaxaalec 'enauac se'eso nma', da yaqto' qaicoyeguen som hebreopi. 4Nache 'enauac so Israel le'ecpi la'axaỹaxac co'ollaxa da so Saúl iloquiaxaatac som alleppi filisteopi, qaq ỹoqo'oye nachera da huo'omshe so filisteopi dalemataỹa so Israel le'ecpi, ỹoqo'oye so alleppi Israel le'ecpi laỹona't co'ollaxa huaña ye Gilgal da datalec so Saúl. 5Qaq so filisteopi qalaq laỹona't co'ollaxa da delogui' so Israel le'ecpi. Nache ivi' treinta mil aso nnaigonapi maye nalaataxaqui, qataq seis mil so nalleppi maye netalec so caipi qataq ỹataqta qalota so petañepi, 'eeta'am na lsoche na 'alhua maye huangui aso auaxai. Nache somayepi nqo'ona ye Micmas, nache ỹanaña yemaye so lanataqa' maye pa'aỹa'ague da nala' lliguisheguem ye Bet Avén. 6Nache so Israel le'ecpi qaica qanqa'en ca ldaqa', cha'aye so filisteopi iloquiaxan co'ollaxa somayepi, nache somayepi nqañoxooñi taiguilo naua auaco qataq ana llimiaxañipi, qataq taigui aso coma'pi, qataq so lca'amaxapi qataq aso lchequepi. 7Nache somayepi qalota so ỹa'axasoxoolec so tala Jordán, da taỹa ye na'alhua so Gad qataq so Galaad, qalaxaye so Saúl ñaq hueta'a co'ollaxa ye Gilgal, nache 'enauac so nalleppi da ca'attague' somaye, qalaxaye ỹataqta qalota da lcolanaxa. 8Qaq so Saúl nache lhuataxanaqa' yemaye soua siete na'axa'te, ilotagui som na'a'q maye laloqnec so Samuel, qalaxaye so Samuel saishet co'ollaxa da ivita ye Gilgal, nache so shiỹaxauapi inoictauec da jec. 9Nache so Saúl 'enapeco':
Aỹem qanaviquiiua'a qome ca shiguiỹacpi da yaqto' sanaxauo da qarachetaqtaxanaqte qaỹavigaxatta, qataq aca qarachetaqtaxanaqte maye qanhuaachigui.
Qaq nacheso somaye da ỹaneuo so nachetaqtaxanaxat. 10Qaq co'ollaq ime so Saúl da ỹaneuo aso nachetaqtaxanaqtepi qaỹavigaxatta, nache ivireuo so Samuel. Nache so Saúl ca'atta'aguet somaye da nquine', 11qalaxaye so Samuel 'enapega somaye 'eeta':
¿Ta'ainco' ye 'auo'oto' de'era?
Nache so Saúl 'enapeco':
Qomye sela'a da mashe inoictauec da jec so shiỹaxauapi, souaxat da saishet da 'anvi' nache saishet da 'aupacchigui som 'araloqnec, qataq ye filisteopi mashe laỹoota'a't hueta'a ye Micmas, 12nache tachigui iuel da saiuena'a da huenoteeguesop ye hueta'a da naña na Gilgal da aỹem iloquiaxan, qaq ñaq saxanaxa da seỹaxanot Ñim Nataxala', ỹoqo'oye nachera da huo'omshe sacoolec da saneuo so nachetaqtaxanaxat.
13Nache so Samuel 'enapeco':
«¡'Am ỹataqta huo'o da 'oic peta'a! Qamaq taxa da 'aualaxaguet da namaxasoxonaxac maye 'am ỹanem Ñim Nataxala', nache Ñimaye ipacchigui taxa da nache 'eetai' naqa'en da 'aro'onataxanaxac da 'aulotague' na netaña na Israel. 14Qalaxaye nagui, da 'aro'onataxanaxac da 'am nta'a saishet qome da nache 'eetai'. Ñim Nataxala' nmitaique qome ca shiỹaxaua maye ỹaỹamaxareeta, nache ỹanagui da lataxala' na shiỹaxauapi maye lalamaxatpi Ñimaye, cha'aye 'am sa 'aualaxaguet da lamaxasoxonaxac maye 'am ỹanem co'ollaxa Ñimaye.» 15Nache so Samuel saqaỹaloq da ca'ai ye Gilgal da nqo'ona ye Guibea maye lalamaxat so Benjamín. Qaq so alleppi qalaq ca'ategue so Saúl da yaqto' deloqui. Huaña nache so Saúl naloqten co'ollaxa so shiỹaxauapi maye nnaictague', nache ivi' seiscientos ỹalleppi. 16Qaq so Saúl qataq so llalec Jonatán, qataq so alleppi maye nnaictrague' soomaye, nache hueta'a co'ollaxa ye Gabaa maye lma' so Benjamín, qaq so filisteopi qalaxaye nache lanataqa' co'ollaxa ye Micmas, 17qalaxaye so alaataxaicpi filisteopi jec co'ollaxa, chegoqoolec so lanataqa', qaq tres soua lpa'axaco, nache huo'o so taigue da pa'aỹa'ague ye Ofrá, yem na'alhua so Sual, 18qaq so laỹepi qalaq taigue da pa'aỹa'ague ye Bet Jorón, qaq so pa'atec laỹepi qalaq taalec ye toolec 'alhua maye pa'aỹa'ague añi lcomaraxalate maye naña ye Zeboyin. 19Qaq 'enauac ye na'alhua so Israel le'ecpi qaica da huo'o ca 'oonolec lcat lo'o, cha'aye na filisteopi sa ỹashenem na hebreopi da ỹo'ot ca ỹeelonec, qataq aca lataquiaxai. 20Qaq ỹoqo'oye 'enauac naxa so Israel le'ecpi iuen da nqo'ona so filisteopi da yaqto' iqueuoc na nashep na na'arau, lasheugaxanaqte, nqachepe, qataq ana lsheraxanaqte. 21Nache naxa da iqueuoc na nashep na na'arau, qataq aso lasheugaxanaqtepi, nache ỹataqta qoỹoqteua'a qanqa'en da isheeten, qataq nache 'ena'am da iqueuoc ana nqachepe qataq da ỹaỹamaxaañi ana lataquiaxai. 22Qaq ỹoqo'oye so nnaictague'pi so Saúl qataq so Jonatán qaica ca hueto'ot ca ỹeelonec huo'otaq aca taquiaxai so na'a'q maye huo'o da loquiaxac. 23Qaq huaña co'ollaxa nache so laỹepi nalleppi so filisteopi, jec da nqo'ona so na'axasoxonatac ye Micmas.
