So David ỹalauat so Goliat
1So filisteopi laỹona't co'ollaxa so nalleppi da yaqto' deloqui, nache laỹonqa' ye Soco, maye lalamaxat so llalaqpi so Judá, nache hua'a da lanataqa' ye Efesdamin maye vichiguinguilo yeua Soco qataq ye Azeca. 2Qaq so Saúl nataqa'en laỹona't som Israel le'ecpi, nache hua'a da lanataqa' so ca'amegue ye Elá, nache naỹamaxat da yaqto' lhuotta da delogui' so filisteopi. 3So filisteopi hueto'ot na loigue añi qasoxonaxa, qaq so Israel le'ecpi qalaq hueta'atague da le'ego, qaq so ca'amegue vichiguingui na laiñi.
4Qaq huaña nache chegoqtoigui so alleppi filisteopi so 'oonolec alaataxaic, qaq somaye ivi' tres metros ye lalogaxa. Somaye le'enaxat da Goliat, qataq lma' ye Gat. 5Qaq somaye ỹaatañi co'ollaxa aso naro'o lcat bronce, qataq so nhuomaigui lpaqtaxat ana ltogue maye chegaqaigui nataqa'en na bronce, maye ivi' cincuenta y cinco kilos. 6Qaq nacheso se'eso lcat bronce so chegaqaigui soua lapoqo'ote naua lchel, qataq aso lataquiaxai maye ỹachetalec na lallac. 7Qaq so lqaic aso lataquiaxai somaye, colliichigui 'eeta'am ana nqaleenaxanaqte, qaq so lsheenec lcat asomaye ivi' seis kilos. Qaq so lpaqtaxanaqte lo'o qalaq ỹa'auaxaata. 8Nache so Goliat vi'iiguet co'ollaxa, nache inogoqchettac so alleppi Israel le'ecpi, 'eeta':
¿Ta'ainco' da qanaỹamaxachiichiguiñi da yaqto' qauloqui? Ye aỹem filisteo, qaq qami' qalaq qami' lamaxashecpi ñi Saúl. Qaq ña qalca'aiua'a qome ca 'oonolec da qoñeeta da yaqto' aỹem naña da selogui'. 9Qaq camaye da ishet da aỹem delogui', qataq da aỹem nauec, nache qomi' qarlataqalli' qome, qalaxaye da ñauec camaye, nache qami' qarlataqa qome. 10Qaq ne'ena na'a'q, aỹem shecot da senogoqchettac na nalleppi na Israel le'ecpi. ¡Ñaq anac qome ca 'oonolec ỹale da yaqto' selogui'!
11Nache so Saúl, qataq 'enauac so Israel le'ecpi co'ollaq hua'aqchigui de'era la'aqtac so filisteo, nache qaica ca la'añaxac souaxat da lcolanaxa.
12Qaq huo'o so ỹale maye lma' ye Belén le'enaxat Yesé, maye co'ollaq huaigui da lo'onataxanaxac da nta'a so Saúl, nache somaye nale'ena da mashe ỹe. Qaq se'eso ỹale, ocho soua llalqa, qaq so David nache nataqa'en llalec somaye. 13Qaq se'esoua tres maye ỹe't llalqa somaye, Eliab, Abinadab qataq so Sama, nache ỹalectraigui co'ollaxa so nalleppi so Saúl maye nalattague' so filisteopi. 14Qaq so David, maye ñaq na'asa, 15somaye nache ivittegueuga so lanataqa' so nalleppi so Saúl. Qaq naxa da ime, nache qaltaq ỹe'eguelaxa ye Belén, da yaqto' ilo'ogue aso qaguetapi maye lalopi so lta'a.
16Qaq se'eso filisteo, nache quetoto soua na'axa'te da inogoqchettac so Israel le'ecpi, ye nte'eta qataq ye avit, qaq nache queto'ot de'era, choche iviraxattrauec soua cuarenta na'axa'te.
17Qaq huo'o so na'a'q, nache so Yesé 'enapega so llalec David, 'eeta':
«'Auacoosop qome ca veinte kilos ne'ena trigo maye datoxoic, qataq ana'ana diez nauolepi 'ayiiña, nache sa 'anaỹaloxon qome da 'arougalo caua 'arqaỹa't maye huetrauga yem lanataqa' ca alleppi. 18Nataqa'en 'auache' qome ne'enaua diez queso, da 'arouga ca lataxala' ca alleppi. Qataq 'auchemaxatalo nataqa'en caua 'arqaỹa't da qaica camachaqca, qataq 'auauo'o qome ca 'anache maye la'anaxat da ỹoqta 'eesa da qaica cara caamaye.»
19Qaq se'eso na'a'q so Saúl, qataq soua lqaỹa't so David, qataq 'enauac so alleppi Israel le'ecpi ñaq hueta'a so ca'amegue ye Elá da deloctague' so filisteopi.
20Qaq so lỹa na'a'q, nache so David ỹataqta no'ottasheguem, nache aso qaguetapi ỹaqa'a so ipataxaguet da ilo'ogue naqa'en. Qaq somaye nache jec, ỹache 'enauac so nallecpi maye chegoqo'ot so lta'a Yesé. Qaq co'ollaq ivita so nanataqa', nache so alleppi mashe naỹamaxattac da nalat, qataq ỹa'alaqtalec da nalaataxac. 21Nache so Israel le'ecpi, qataq so filisteopi, mashe nalogoñi datata'a't da yaqto' delogoỹa't. 22Nache so David icotan so lla'ac, icotana'aguet so ilotague' so no'ogoxonaxatpi qataq so nallecpi, nache nqalgoqta'a so alleppi nache taigui da yaqto' ina't soua lqaỹa't, da qaica camachaqca da nachaalataxa'c. 23Qaq co'ollaq ña detaqtegueto soomaye, nache so alaataxaic filisteo maye le'enaxat Goliat, somaye nnoxonec, chegoqtoigui so laỹepi filisteopi. Nache qaltaq ỹe'eguelaxalec da inogoqchettac so Israel le'ecpi ỹe'enaxatchigui dam 'eeta'ac naxa so lỹa na'a'q. Nache so David hua'aqchigui somaye.
24Qaq so Israel le'ecpi co'ollaq ila'a se'eso shiỹaxaua, nache ỹataqta datauec souaxat da lcolanaxa. 25Nache somayepi huo'o' na 'enapec: «¿Mashe qauauañiichigui de'era shiỹaxaua maye nnoxonec? ¡Damaye anac da inogoqchettac na Israel le'ecpi! Qaq da huo'o ca ishet da loxonec damaye, nache ñi nta'a Saúl, ỹanem qome da lsallaxa camaye, qataq ỹanem añi llale da lhua naqa'en, qataq ca lauo' le'ecpi camaye saishet da ỹauo'o aca lsheetenaxanaqte da isheeten ñimaye.»
26Nache so David inattaco' som hueta'a yemaye, 'eeta':
¿Chaq negue't ca qoỹanem ca shiỹaxaua maye ishet da ỹalauat de'era filisteo, qataq da ỹapalaxat da nsheunaguec na Israel le'ecpi? Cha'aye, ¿negue't dam da' filisteotto maye ỹaqa'a da la'amqaanataxanaxac da anac da yaqto' isheuen na nalleppi Ñim Lo'onatac 'Enauacna maye nca'altauec?
27Nache somayepi ỹa'axatem somaye dam qaỹachaxanapec da qoỹanem cam ishet da ỹalauat so Goliat. 28Qalaxaye so Eliab, som ỹe lqaỹa so David, somaye hua'aqchigui co'ollaxa so David da na'aqtaxaatague' se'eso ỹalleppi. Nache ỹataqta dalemataỹa somaye, nache 'eetego', 'eeta':
«¿Negue't ca huo'omshe 'auanaicna'a? ¿Negue't ca 'aupataxaguet da ilo'ogue aca qaguetapi maye huetauga ye toolec 'alhua? Aỹem sauatton na 'annataxanaxacpi, qataq naua qauema 'arhuennataxaco, cha'aye 'auanac da choche 'anmeenaxaneuga da alaataxac.»
29¿Nache so David, 'enapeco': Negue'to' cam saỹaỹamaxañi so'ottac nagui, ye choche sechemaqtaxaatac?
30Ime, nache somaye ca'ai so lqaỹa, nache qaltaq taỹa so lỹa ale da inat, nache ñaq 'eetalec de'era na'aqtaxanaxac. 31Qaq huo'o na hua'aqchigui co'ollaxa so David da dechemaqtaxaatac, nache jec da da'aqtaxaneua'a so Saúl. Nache somaye damaxasoxoneuga so David. 32Huaña nache so David 'enapega so Saúl, 'eeta':
Qaica qome ca leetapigui lauel souaxat de'era filisteo, cha'aye aỹem maye aỹem 'aramaxashec, 'am nta'a, aỹem ashec nagui da selogui' damaye.
33Nache so Saúl 'enapeco': 'Am saishet da 'andotec da 'aulogui' de'era filisteo, cha'aye 'am ñaq 'am nsoqolec, qaq damaye qalaq nache 'eetai' da alaataxaic, chegoqchiguiña co'ollaq ña nsoqolec.
34Nache so David 'enapeco':
Aỹem maye aỹem 'aramaxashec, 'am nta'a, aỹem selotague' naxa ana lalo qaguetapi ñi ita'a. Qaq naxa da anac na llon huo'otaq oso, nache da huo'o ana inaca'a ana qaguetapi maye selotague', 35nache aỹem secaalec naxa, nache seque'emachet qataq seuotaxanec ana qagueta, qaq da huo'otaq ñe'eguelqot da aỹem iloquiaxan, nache saconguilo naua lanoqo, nache seuaxaatalec, choche ivitta'a da salauat. 36Qaq na'aictaxa da llon huo'otaq oso, qalaq ne'ena 'aramaxashec ishet da ỹalauat. Qaq nagui nache 'eeta'am ñaqa'en de'era filisteotto maye ỹaqa'a da la'amqaanataxanaxac, cha'aye ¿ta'ainco' da isheueetac na nalleppi Ñim Lo'onatac 'Enauacna maye nca'altauec? 37Qaq Ñim Nataxala' maye aỹem nca'alaxateeguesop naxa na llon qataq na oso, Ñimaye nataqa'en aỹem nca'alaxateeguesop qome da lhuaqỹaxac de'era filisteo.
Huaña nache so Saúl, 'enapeco':
'Aue qojec, qaq Ñim Nataxala' nache 'am nnaictague' qome.
38Ime, nache so Saúl no'otaxanaxan co'ollaxa so David, ỹanaxanaxaanguilo soua maiche nalaataxaqui' alogo somaye, qataq aso naro'o ima'a't bronce, qataq ỹanaxanaxaangui so lapoxot ana ltogue maye nalaataxaqui. 39Ime, nache so David na'achigui so lainec, nache ỹe'eguen da queuoỹapigui', qalaxaye souaxat da saq naỹa'aque se'esoua anogo, nache saishet da coto, ime nache 'enapego' so Saúl, 'eeta':
Aỹem sa seshet da saatrañi ne'enaua anogo, cha'aye saishet da sanaỹa'aque.
Ime, nache nqa't 'enauaque soomaye. 40Nache ỹacona so npon, qataq taxaama so la'auaxac, nache ỹaconalo soua cinco coma'yolqa, nache ỹoxochiguilo so loxoiqui maye ỹachetac. Ime nache nasoqta'a so lpocnaxanaxat, nache nqo'ona se'eso filisteo. 41Qaq so filisteo nataqa'en nache nquicta'a ye hueta'a so David, nache ca'attaueegue so lpaqtaxanaqte lo'o. 42Qaq so filisteo ỹamata'a so David, nache co'ollaq ila'a da ña nsoqolec, qovioxoraic qataq nalochiguiñi da lataxac, nache qaica ca 'enec naqa'en. 43Nache 'enapega somaye, 'eeta':
¿Peta'a 'aupi'itaxaatega da aỹem pioq da aỹem 'aurolec na qo'oipaq da aỹem 'auloquiaxan?
Qaq nache talec naqa'en na qauem la'aqtacpi so David, irolec da le'enaxat na ne'enaqtac maye natamnaxala'pi somaye. 44Qataq 'enapego', 'eeta':
¡Ña 'auanaicna'a, yaqto' sami' da chec na 'arapat na maỹopi piguem le'ecpi, qataq nam huauec shiguiỹacpi!
45Qalaxaye so David 'enapeco':
'Am, aỹem 'ananauga da aỹem 'aurolec na 'ainec, 'archecna qataq ana 'arataquiaxai. Qalaxaye aỹem, 'am ñanauga da 'am serolec da le'enaxat Ñim Nataxala' maye Qaica ca Ỹaqalanapec, maye Natamnaxala' na nalleppi na Israel le'ecpi, maye 'anshetaique da 'aulogui'. 46Qaq nagui Ñim Nataxala' aỹem ỹanem da 'am ỹoxonec, nache 'am salauat, qataq sequesoxouec na 'arqaic, qaq nachena ne'ena na'a'q da sanem na maỹopi piguem le'ecpi, qataq na huauec shiguiỹacpi da lo'ocỹaxac na nalleppi na filisteopi, yaqto' 'enauac na huetalecna ỹaỹaten da huo'o naq 'enec Ñim Natamnaxala' na Israel le'ecpi. 47Qaq 'enauac ne'ena lapoota'a'tpi maye hueta'a ne'ena, ỹaỹaten qome da Ñim Nataxala' saishet da iuen ca ỹeelonec huo'otaq aca taquiaxai da deca'alaqtaxan. Cha'aye de'era alaataxac maiche lalamaxat Ñim Nataxala', qaq nacheñi ñi qomi' ỹanema qome da qoñeeta da qami' qoroxonqa.
48Qaq so filisteo co'ollaq nquiga so David da delogui', nache so David nataqa'en ca'ata'aguet somaye. 49Nache ỹacooñigui so loxoiqui da nqatsheguem so coma' 'olec. Ime nache ipoquen so filisteo, nache so coma' 'olec taalec na latap somaye. Qaq so coma' 'olec ye ỹataqta llapteuo na latap somaye, nache huañi naqa'en nache ỹa'atchiguiñi na lashec. 50Qaq 'era da 'eetec so David co'ollaq loxonec so filisteo, irolec so lpocnaxanaxat qataq so coma' 'olec nache ỹalauat, qaq somaye ye saishet da ỹachetac ca lainec, 51nache nqalgaqa'a se'eso filisteo, da yaqto' ỹacona so lainec, nache nqatsheguem da ira'a da ỹalauat. Ime, nache icheguec so lqaic.
Nache so filisteopi co'ollaq ỹauaachigui da ileu som ỹataqta ntenaxat da huo'o da alaataxac, nache jec da datauec. 52Nache so alleppi Israel le'ecpi, qataq som chegoxoguet so Judá ỹa'alaqtalec da nalaataxac, nache jec da icanapec som filisteopi, choche iviraxatta'a ye ca'amegue qataq ñeua laso'omi ye Ecrón. Qaq 'enauac som nqa'aic maye chegoqchiguiña ye Sagarayin da taỹa'a ye Gat qataq ye Ecrón, ỹataqta vichiguiiñalo na nalaatac filisteopi.
53Qaq so Israel le'ecpi co'ollaq ime, da icaatac so filisteopi, nache ñe'eguelaq da ỹacona so nogoxoshetpi maye hueta'a so nanataqa'. 54Qaq so David ỹacona so lqaic so filisteo, nache iroua'a ye Jerusalén, qaq soua lo'ogoxonaqa'ate so filisteo qalaq ỹacheraigui so lalamaxat lpe'l somaye.
55Qaq so Saúl, co'ollaq ỹauaateueegue so David da ñaq taỹauga so filisteo, nache inattaco' co'ollaxa so Abner, som lataxala' so nalleppi, 'eeta':
Abner, ¿chaq negue't llalec se'eso nsoq?
56Qaq so Abner 'enapeco': 'Am nta'a, aỹem sa saỹaten. Nache so nta'a 'enapeco': 'Auchemaxata qome somaye.
57Qaq so David co'ollaq mashe ỹalauat so filisteo, nache ñe'eguelaxauo nache so Abner ỹacona na lhuaq somaye da ỹauegueua'a so Saúl. Qaq so David nasoqta'a so lqaic so filisteo. 58Nache so Saúl inattac somaye, 'eeta':
'Am nsoq, ¿negue't cam 'arta'a?
Nache so David 'enapeco':
Qomye aỹem llalec ñi Yesé, maye lma' ye Belén, ñim maiche 'aramaxashec.
