So Jonatán itauan so David
1Qaq so David datauec, chegoqchiguiña ye Nayot maye huaña ye Ramá, nache nqo'ona so netaña so Jonatán, nache inat, 'eeta':
«¿Negue't co'ollaxa ca so'ot aỹem? ¿Negue't cam so'ot qauem, huo'otaq ca ỹasouaxashet da ñi 'arta'a, huotaique da aỹem ỹalauat?»
2Nache so Jonatán 'enapeco':
«¡'A'i, saishet qome da 'eetec de'era! ¡Saishet qome da 'am ỹalauat ñimaye! 'Am 'auaỹateeta da ñi ita'a saishet da sa da'aqtaxanem aỹem naxa da huo'o ye tatapigui lauel da ỹo'ot, na'aictaxa da saq 'amaqtaq huo'otaq lta'araic, ¿qalaq ta'ainectaxa da ñi ita'a aỹem ỹoxottaisop dam da'? ¡'A'i, saishet!»
3Qalaxaye so David qaltaq ỹe'eguelaxalec da la'aqtac, 'eeta':
Ñi 'arta'a ỹaỹateeta da ỹataqta aỹem 'arauotaxat, qaq yo'oqta da saishet da 'am da'aqtaxanem qome de'era, cha'aye ivittaique da huo'otaq sa 'auaỹamaxaren. ¡Qalaxaye 'am sanem da ỹa'aqtac, qataq Ñim Nataxala', da ỹoqta 'eesa da mashe saqaỹapeque da ileuaxa!
4Nache so Jonatán inat somaye, 'eeta':
¿Negue't ca 'anshetaique da 'am so'otec?
5Nache so David 'enapeco':
Qonte' qaltaq qaỹo'ot ca nquia'axac da qaique'elec ñi dalaxaic ca'agoxoic, qaq aỹem saqỹet naxa da iquia'axaua ñi nta'a. Qalaxaye 'am ñachoxonnot da aỹem 'auasheetem qome da ñeqañoxooñi, sauga na no'onaxa, nache ivitta'a ca avit ca lỹa na'a'q da sootauga. 6Qaq ñi 'arta'a qom aỹem denataxanaique, qaq 'aua'axatem qome da aỹem 'am sequiguiỹo'ot da ñeqo'ona ye ima' Belén, cha'aye 'enauac ye ihuo' le'ecpi ỹo'ot aca ỹavigaxat lachetaqtaxanaqte ye 'oonolec vi'i. 7Qaq qom saishet da dalemata, nache aỹem samachiguiñi qome. Qaq da huo'otaq dalemata, nache 'am 'auaỹateeta da ỹoqta huotaique da aỹem ỹalauat. 8Qaq cha'aye mashe sanaqot da qara'aqtac Ñim Nataxala' da qomi' auochaxau', ỹoqo'oye 'am ñachoxonnot da aỹem 'anqouaguec, da huo'otaq huo'o co'ollaxa ca so'ot qauem nache no'on da aỹem 'aualauat. Qaq saiuen da aỹem 'auauegueua'a ñi 'arta'a.
9Qalaxaye so Jonatán 'enapeco':
¡Saishet da 'arhuennataxac de'era! Aỹem qom saỹaten da ñi ita'a ỹoqta 'eesa da huotaique da 'am ỹalauat, nache 'am sa'aqtaxanem qome.
10Nache so David inat somaye, 'eeta':
¿Negue'to' qome ca ỹauo'o ca ỹa'axaỹaxac da ñi 'arta'a huotaique da aỹem ỹalauat?
11Nache so Jonatán 'enapeco':
Qolaq qome, saxauga na no'onaxa.
Nache 'enauaque soomaye da tareuga so no'onaxa, 12qaq huaña somaye nache so Jonatán 'enapega so David, 'eeta':
'Am sanem da ỹa'aqtac hua'aqchigui ñaqa'en Ñim Nataxala' maye Natamnaxala' na Israel le'ecpi, da ỹoqta aỹem 'eesa da qonte', qataq ca lỹa na'a'q qom mashe 'eeta'am nagui, nache senat qome ñi ita'a, ca 'eetec ca lhuennataxac. Qaq qom saỹaten da no'on ca lhuennataxac da qoneta, nache 'am ñamaxauga qome ca 'ara'axaỹaxac. 13Qalaxaye ñi ita'a, qom qauem ca lhuennataxac da qoneta, qaq Ñim Nataxala' ỹataqta lta'araic qome naqa'en ca ñeuaxanaguec, da saishet da 'am sesoxon da yaqto' 'ananeltaxan. ¡Qaq Ñim Nataxala' ỹataqta 'am itauan qome, 'eeta'am da 'eetec co'ollaq itauaatac ñi ita'a! 14Qaq da huo'otaq ña ñeca'altauec qom 'am ichoxoren Ñim Nataxala', nache nataqa'en aỹem 'auchoxoren qome, nache saishet da 'aua'aqta'a da aỹem qaỹalauat. 15Qataq saishet qome da 'aucoua'ai da 'auchoxoren na ỹalaqpi. ¡Na'aictoxo' da Ñim Nataxala' nmatchiguiñi qome da ỹalauat 'enauac na 'ampa'aguenaxauapi! 16Qaq 'era da 'eetec so Jonatán da naỹamaxate' so lauo' le'ecpi so David. 17Qaq cha'aye so Jonatán ỹataqta ỹauotec so David, nache qaltaq ỹe'eguelaxaalec da ỹan naqa'en da la'aqtac da nache 'eetai' da nauochaxaua somaye. 18Ime, nache 'enapega, 'eeta':
Qonte' qaỹo'ot ca nquia'axac da qaique'elec ñi dalaxaic ca'agoxoic, qaq qom qaila'a da qui'itchiguingui añim 'anso'onaxaqui naxa, nache yo'oqta da 'am qainataxanaique. 19Qalaxaye qonte' qataq ca lỹa na'a'q, nache ỹoqta 'am qaiqatapec qome. Qaq ỹoqo'oye ỹoltaq 'anqo'ona qome ye 'anqañoxotaqa' so lỹa na'a'q. Nache aỹem 'auata'aguet qome, qoueta'a ye saqaỹapeque añi coma' Ézel. 20Qaq aỹem saỹineguelo qome de'era laỹe caua tres ichecnal, 'eeta'am da choche ñapaxagueetac. 21Ime, nache samaq qome ca ỹamaxashec da ỹe'eguena'alo, sheeta': «'Asoma 'avi'eguena'alo yeua ichecnal.» Qaq da sheeta': «Yeua ichecnal huetraña na npa'aicna'a na qoueta'a, 'asoma 'auaconalo,» nache ishet qome da qaica ca 'auauotaique da 'annoxonec, cha'aye qaica camachaqca. Qaq sanot de'era ỹa'aqtac, Ñim Nataxala'. 22Qalaxaye da shenapega so ỹamaxashec sheeta': «Yeua checnal huetraña na pa'aicna na qoueta'a, nache qojec qome, cha'aye Ñim Nataxala' 'eetega da qojec.» 23Qaq Ñim Nataxala' nacheñita ỹauaachiguilo qomi', qataq hua'aqchigui da sanaq da qara'aqtac maye ñasataxagui nagui.
24Nache so David nqañoxooñi tauga so no'onaxa, qaq co'ollaq ivita da qaique'elec so dalaxaic ca'agoxoic, nache so nta'a nso'ooñi datalec so nquia'axala' da yaqto' deque'e. 25Nache ñichiguiña so nache 'eetai' naxa da nso'onqa' netot so nỹec. Qaq so Jonatán datateguet so nta'a, qaq so Abner qalaq netaua'a na laỹe so nta'a. Nache aso nso'onaxaqui so David qui'itchiguingui. 26Nache se'eso na'a'q so Saúl qaica ca la'aqtac, cha'aye ipi'itaxaatega da huo'o ca huetapoigui so David, nache saishet da qui'itta. 27Qalaxaye so lỹa na'a'q maye mashe ivi' dos na'axa'te so nquia'axac, nache ñaq 'eetalec da qui'ittangui aso nso'onaxaqui so David. Nache so Saúl inattac so llalec Jonatán, 'eeta':
¿Ta'ainco' ye shecait, qataq nagui da saqanac da deque'e ca llalec so Yesé?
28Nache so Jonatán 'enapeco':
So David aỹem nachoxonnot da sasheetec da taỹa ye Belén. 29Nache somaye 'eeta': 'Am ñachoxonnot da aỹem 'auasheeta da ashec, cha'aye ca ihuo' le'ecpi ỹavigaxat aca lachetaqtaxanaqte huaña ye Belén, qataq ca ỹaqaỹa aỹem 'enapega da salectauo. Nache aỹem sasheetec da jec somaye, ỹoqo'oye saishet da anac nagui da 'am lquia'axaua.
30Nache so Saúl ỹataqta dalemataỹa so Jonatán, nache 'enapega, 'eeta':
¡'Am maye 'am llalec añi 'etaxaloxoi! ¿Peta'a 'aupi'itaxaatega da sasaỹaten da ỹataqta 'anauochaxaua so llalec so Yesé, qaq somaye ỹataqta ỹo'ot qome da 'arcoxo qataq añi 'arate'e? 31Cha'aye qom ña nca'altauec so David, nache 'am saishet qome da 'avira'a da 'am nta'a. ¡Qaq ỹoqo'oye nagui 'auamaxasoxona camaye da aỹem qanauegueua'a, cha'aye camaye ỹoqta 'itchiguiñi da ileu qanqa'en!
32Qalaxaye so Jonatán 'enapeco':
¿Ta'ainco' da qaỹalauat? ¿Negue'to' ca ỹo'ot saỹaỹamaxañi somaye?
33Nache so Saúl irolec aso lataquiaxai da ỹa'arapec so Jonatán, huaña nache somaye ỹaỹaten da so lta'a ỹoqta 'eesa da huotaique da ỹalauat so David. 34Nache so Jonatán ỹataqta dalemata, nache ñesheguem ca'ai so nquia'axala'. Nache saishet da ỹalegueua'a so nquia'axac so lỹa na'a'q, cha'aye saỹaỹamaxaren qataq ỹaquicoqchet da so lta'a ỹoqta dalemataỹa so David. 35Qaq so lỹa na'a'q nache huenoxonec so Jonatán nnaictague' so lamaxashec nsoqolec da tauga so no'onaxa, nache taỹa so ỹecapiguiña co'ollaq na'aqtaxaatague' so David. 36Qaq co'ollaq ivitra, nache 'enapega somaye, 'eeta':
'Anqalgoq qome da 'avi'eguena'alo naua ichecnal maye saỹeerec.
Nache so lamaxashec nqalgoq, qaq co'ollaq ñaq queta, nache so Jonatán ỹaỹenec aso lchecna, nache asomaye tachiguiña so qaỹata'a so hueta'a so lamaxashec. 37Qaq som lamaxashec co'ollaq ivita so tachiguiña aso checna, nache so Jonatán ỹa'alaxalec so lamaxashec, 'eeta':
¡Na qoueta'a nache pa'aicna ye huetaña aye ichecna!
38Qaq so Jonatán qaltaq ỹa'alaxalec so lamaxashec, 'eeta':
¡'Anqalgoq, saishet da 'avi'iiguet!
Nache so lamaxashec so Jonatán ỹaconalo soua checnal, nache nda'alo somaye. 39Qalaxaye saishet da huo'o ca npi'itaxaataique se'eso nsoqolec, cha'aye nachaqsota so Jonatán, qataq so David da ỹaỹateetrac da naigui de'era na'aqtac. 40Qaq ime co'ollaxa, nache so Jonatán ỹanema soua lo'ogoxonaqa'ate so lamaxashec, nache 'enapega da iroua'alo so lma'.
41Qaq co'ollaq mashe ỹoxogue so namaxashec, nache so David nnoxonec, chegoqteua'a so nqañoxotaqa', nache tres da ỹa'alyiñi naua l-llecte qataq ỹataqta iviraxata'aguet naqa'en na latap na 'alhua. Ime, nache napigoqtega't, qataq nỹeeta'a't, choche ivitta'a da nmitchiguem da nnoinaxac so David. 42Ime co'ollaxa, nache so Jonatán 'enapega so David, 'eeta':
'Aue, qojec nacherata da qaica camachaqca qome da 'icỹaxac, cha'aye qomi' mashe sanaqot so qara'aqtac Ñim Nataxala' da nache 'eetai' qome da qomi' hueta'agueta, qataq cam qomi' chegoxogueta.
Ime, nache jec so David, qaq so Jonatán, qalaq ỹe'eguelaxaua'a so lma'.
