So David nca'alaxatec so lma' ye Keila
1Qaq huo'o so na'a'q nache so filisteopi iloquiaxan so netaña ye Keila, nache ỹache so cheta'ague da nchegoxoshec trigo. Qaq co'ollaq qaỹa'aqtaxanem de'era so David, 2nache somaye inat Ñim Nataxala', 'eeta':
¿Peta'a ishet da aỹem 'auasheetem da ñeqo'ona da seloquiaxan ye filisteopi?
Nache Ñim Nataxala', 'enapeco':
Aja', 'anqo'ona da 'auloquiaxan, nache 'anca'alaxatec qome ye netaña ye huaqta'a't nỹecpi ye Keila.
3Qalaxaye so nalleppi so David, 'enapeco':
Qomi' da souaqta'a na Judá, qalaq ỹataqta huo'o da qarcolanaxa, ¡qaq qom ñeqo'onaxa ye Keila nache ỹataqta nquictec qome da qarcolanaxa da seloquiaxai' ye alleppi filisteopi!
4Nache so David qaltaq ỹe'eguelaxalec da inat Ñim Nataxala', nache Ñimaye, 'enapeco':
'Aue, qojec 'anqo'ona ye Keila, cha'aye aỹem 'am sanem da 'oxonec ye filisteopi.
5Nache so David qataq so nalleppi jec nqo'ona ye Keila, nache delogui' so filisteopi, nache loxonec somayepi, qataq deuotaxanec so na'atetpi. Qaq 'era da 'eetec so David da nca'alaxatec so lma' ye Keila.
6Qaq so Abiatar, som llalec so Ajimélec, maye nqañoxotaxaua co'ollaxa so David, nataqa'en taỹa ye Keila, nache ỹachetac so ntogue lapoxot le'enaxat efod. 7Qaq co'ollaq qaỹa'aqtaxanem so Saúl da so David hueta'a ye Keila, nache 'enapeco': «Ñim Lo'onatac 'Enauacna aỹem ỹanem da ỹoxonec ca David, cha'aye taua'a ye huaqta'a't nỹecpi maye napotaua'a, nache saishet qome da datauec.»
8Nache sanaỹaloxon so Saúl da laỹona't so nalleppi, da yaqto' taỹa ye Keila, da coleesop da nauan so David qataq so nalleppi. 9Qalaxaye so David co'ollaq ỹaỹaten da so Saúl qaltaq huotaique da iloquiaxan somaye. Nache iỹaxaneuga so ntaxaỹaxanaxanec Abiatar da iroua'a somaye so ntogue lapoxot le'enaxat efod. 10Nache so David 'enapeco':
'Am Nataxala' maye Natamnaxala' na Israel le'ecpi, ne'ena 'aramaxashec ỹaỹaten da anac ca Saúl, da huotaique ỹalauat 'enauac na lma' na Keila souaxat aỹem. 11Qaq na lma' na Keila. ¿Peta'a aỹem ỹaneguet qome da lhuaqỹaxac ca Saúl? ¿Qataq 'eesa peta'a de'era ỹa'axaỹaxac da ca Saúl anac qome da aỹem ñe'eguena'a? ¡Aỹem 'am ñachoxonnot 'am Nataxala', maye Natamnaxala' na Israel le'ecpi, da aỹem 'aua'aqtaxaatem!
Nache Ñim Nataxala', 'enapeco':
Aja', ñi Saúl anac qome.
12Nache so David qaltaq ỹe'eguelaxalec da denataxan, 'eeta':
¿Na lma' na Keila, peta'a aỹem qataq na ñalleppi qomi' ỹanegueta da lhuaqỹaxac ca Saúl?
Nache Ñim Nataxala', 'enapeco':
Aja', qami' ỹanegueta qome.
13Huaña nache so David qataq so seiscientos nalleppi, ca'ai ye Keila, nache tateguelo qaica ca ỹoqta hueta'a, qaq co'ollaq qaỹa'aqtaxanem so Saúl da so David ca'ai ye Keila, nache somaye saishet da ipaca'a yemaye.
So David hueta'a ye toolec 'alhua
14Nache so David hua'a co'ollaxa ye toolec 'alhua, nache nqañoxotoigui so auacpi maye nasheguema añi qasoxonaxa ye Zif, qaq na'aictaxa da ica'n soua na'axa'te da so Saúl nmittaique, qalaxaye Ñim Lo'onatac 'Enauacna saishet da ỹaneguet da lhuaqỹaxac somaye. 15Qaq so David co'ollaq ỹaỹaten da so Saúl nmittaique somaye da yaqto' ỹalauat, nache somaye hua'a ye Horeb, yem toolec 'alhua ye Zif.
16Qalaxaye so Jonatán, som llalec so Saúl, nqo'ona co'ollaxa ye Horeb yem hueta'a so David, nache ỹa'añaqchettac somaye da nache queto'ot da pe'etega Ñim Lo'onatac 'Enauacna. 17Nache 'enapego' somaye, 'eeta':
Saishet qome da 'añe'etac, cha'aye ñi ita'a Saúl saishet da 'am ỹanata qome, qaq 'am 'avira'a qome da 'am nta'a na Israel, qaq aỹem nache 'am ỹo'onataxanaxaua qome. Qaq de'era, ñi ita'a Saúl mashe ỹaỹateetac.
18Huaña nache soomaye ỹauaachigui naqa'en Ñim Nataxala' da qaltaq naỹamaxara't da nache 'eetai'salo da auochaxau', qaq co'ollaq ime de'era, nache so Jonatán ỹe'eguelaxa so lma', qaq so David nache hua'a ye Horeb. 19Qalaxaye so ỹalleppi maye lma' ye Zif nqo'ona ye Gabaa, nache da'aqtaxanem so Saúl, 'eeta':
Ñi David hueta'a ye qana'alhua, nqañoxottaigui ye auacpi maye naigui añi qasoxonaxa maye naña ye Jaquilá ye Horeb, maye pa'aỹa'ague da sheu' ye toolec 'alhua. 20Qalaxaye qom 'anshet da 'auanac 'am nta'a, nache qomi' 'am sanaxam qome ñimaye.
21Nache so Saúl 'enapega somayepi, 'eeta':
¡Ñim Lo'onatac 'Enauacna qami' ỹanema qome da lchoxonnataxanaxa, souaxat da aỹem qauchoxoreñi! 22Qaq nagui qoqui nache ỹataqta qauaỹataxareñiita cam ỹoqta hueta'a camaye, qataq chaq negue't cam ỹoqta ỹauaachigui co'ollaxa, cha'aye aỹem qaỹa'aqtaxaatapeguem da camaye ỹataqta sanqalat. 23Nache ỹoqta qanaloqchiñiita ca ỹoqta ỹe'egueetapoigui nqañoxotaxaquipi camaye, ime nache qañe'eguelaqai da aỹem qaua'aqtaxañim, yaqto' nache qami' ñenaicapegueto qome. Qaq da ỹoqta 'eesa da hueta'a yi'iye 'alhua ca David, nache ỹataqta ñematte' qome naua lma'ate yem lauo' le'ecpi so Judá da ñemitaique camaye.
24Nache se'eso ỹalleppi ncoyeguene' so Saúl da ỹe'eguelaxa ye Zif ye maiche lma' somayepi, qaq so David qataq so nalleppi mashe hueta'a co'ollaxa ye toolec 'alhua ye Maón, yem nalochiguiñi 'alhua maye pa'aỹa'ague da sheu' ye toolec 'alhua. 25Qaq so David co'ollaq ỹaỹaten da so Saúl nmittaique somaye, nache nquiguiña aso coma' maye naña ye toolec 'alhua ye Maón. Nache so Saúl co'ollaq ỹaỹaten so hueta'a somaye, nache nqo'ona da icanapec. 26Nache so Saúl quetot so loigue aso coma', qaq so David qataq so nalleppi, qalaq queto'ot so lỹa loigue aso coma' da yaqto' datauec, qalaxaye so Saúl qataq so nalleppi co'ollaq mashe coleesop so hueta'a so David, qataq mashe yaqta'a da loxonec, 27nache nvi' so namaxashec da 'enapega so Saúl, 'eeta':
«¡'Am 'amaqtaqaic, 'auỹalapigui' qome da 'avi'eguelaq, cha'aye ye filisteopi ỹataqta icogaxaatac ye hueta'a ye qana'alhua!
28Nache so Saúl ỹaxaañi da icaatac so David, nache ỹe'eguelaq da yaqto' delogui' so filisteopi. Qaq ỹoqo'oye aña'añi coma', nache qoỹanagui da le'enaxat Selá Hamajlecot maye naigui da: ‹Coma' maye huaña so qoỹetpi.›»
So David choche ichoxoren so Saúl da sa ỹalauat
29Ime, nache chegoqchiguiña yi'iye so David, da nqo'ona da naña so ñe'eguenaxaquipi ye Engadí.
