1Qaq so Saúl co'ollaq ime da icaatac so filisteopi, nache ỹe'eguelaxauo, nache qaỹa'aqtaxanem da so David hueta'a ye toolec 'alhua maye le'enaxat Engadí. 2Huaña, nache so Saúl lca'aua'a so tres mil som ỹataqta no'on ỹalleppi maye ỹachegoxotaigui 'enauac so Israel le'ecpi. Ime, nache jec da nmitaique so David qataq som nalleppi, nache tasheguema so pa'asheguem aso coma' maye lanataqa' ana huauec quetaq. 3Qaq co'ollaq ivita ye naña aso qagueta laỹe', qaq nache saqaỹapeque asomaye ye naña som auac maye nqañoxottaigui so David qataq so nalleppi, nache so Saúl taiguio' somaye da yaqto' lcotela't. Qaq so David qataq so nalleppi nache huetaiguio' se'eso auac da nqañoxottañi. 4Nache so nalleppi so David 'enapego' somaye, 'eeta':Nagui nache ỹoqta ipacchigui da la'aqtac Ñim Nataxala' co'ollaq 'am 'enapega, 'eeta': 'Am sanem qome ñi 'ampa'aguenaxaua, nache maiche 'oiqueetac ca 'auataxaateuga.
Nache so David ñesheguem, nache nchettaua'a da ipeleguec so lapo' laỹe so Saúl. 5Qalaxaye co'ollaq ime, de'era ỹo'ot nache ỹataqta huo'o da ntogotaxac, 6nache 'enapego' so nalleppi, 'eeta':
¡Ñim Nataxala', aỹem ỹeltaxaneguet qome da so'otec ca sa ỹaỹamaxañi ñi ỹataxala' maye nta'a! ¡Ñimaye huo'omshe nta'a cha'aye lca'aguishec Ñim Nataxala'!
7Nache so David nllañi so nalleppi, nache saỹashenem da iloquiaxan so Saúl, qaq so Saúl, co'ollaq ime nache chegoqtoigui so auac da ỹoltaq jec. 8Nache so David nataqa'en chegoqtoigui so auac da ca'attaueegue somaye, nache iỹaxaatague', 'eeta':
«¡'Am ỹataxala', maye 'am nta'a!»
Nache co'ollaq nqoilec so Saúl, nache so David ỹa'alyiñi naua l-llecte iviraxata'aguet na latap na 'alhua. 9Nache 'enapeco':
¿'Am nta'a, ta'ainco' da 'aualaxagueto' co'ollaxa nam ỹa'axattac da sauotaico' da 'am so'otec ca qauem? 10Qaq nagui, 'auaỹateeta da Ñim Nataxala' aỹem ỹanem da nache 'am sachaigui taxa ñi'iñi auac da 'am salauat, qaq na'aictaxa da na ñalleppi aỹem ỹamaqtalec da nache 'am salauat, qalaxaye aỹem choche 'am sechoxoren, nache shenapec saishet da salauat ñi ỹataxala', cha'aye ñimaye lca'aguishec Ñim Nataxala'.
11Qaq nagui 'am nta'a ña 'aumeten na ñasoqta'a, namaye nachena na laỹe na 'arpo' maye secheguec, qalaq saishet da 'am salauat. Qaq nagui nache 'auaỹateeta da saishet da sauotaique da 'am salauat, qataq nataqa'en qaica ca ỹasouaxashet da qoneta. Qalaxaye 'am nta'a, maiche aỹem 'aucaatac da huotaique da aỹem 'aualauat. 12¡Qaq Ñim Nataxala' maiche qomi' nmi't qome, qataq maiche aỹem ỹe'eguelaxateguet qom huo'o ca sasouaxat da qoneta! Qalaxaye aỹem saishet da 'am so'otec ca qauem. 13Cha'aye som na'aqtacaic naxa, 'eeta': «Nam qauem, chegaqaigui nam qauemaicpi.» Qaq ỹoqo'oye aỹem saishet da she'egueeta'a da 'anachaalataxac 'am nta'a. 14Qaq ¿Chaq negue't cam 'anmittaique, 'am maye 'am lta'a na Israel le'ecpi? ¿Chaq negue't cam 'aucaatac? ¿Peta'a nachaỹem, ye sheeta'am ca pioq leuaxaic, huo'otaq ca pioq lalaxat? 15¡Qaq Ñim Nataxala' nacheñi ñi qomi' nmi't qome! ¡Qaq Ñimaye nmi't qome cam sasoilec, nache aỹem iueelec da yaqto' aỹem ỹeltaxaneguet da qoneta!
16Qaq co'ollaq ime da ltaxaỹaxac so David, nache so Saúl 'enapeco':
¡Qache nache 'am ỹalcolec David, maye aỹem 'autaqtecot!
Huaña nache so Saúl ỹataqta nỹeetac, 17nache 'enapeco':
'Am, ỹataqta aỹem 'auo'otec da nalochiguiñi lataxac, qaq saq 'ena'am aỹem, cha'aye nmeneguet 'anqa'en da no'on dam qauem maye 'am so'otec. 18Cha'aye nagui aỹem 'auachaxana da 'arauotaxanaqtaic da sheeta, na'aictaxa da Ñim Nataxala' aỹem ỹaneguet da 'arhuaqỹaxac, qalaxaye ñaqaiyeta saishet da aỹem 'aualauat, 19cha'aye negue'tom ca chochaq ỹaxaatec da ilalec ca mpa'aguenaxaua da qaica ca 'ena'ac da nachaalataxac. Qaq nagui Ñim Nataxala', 'am ỹanem qome ca no'on, souaxat de'era ỹaỹamaqchiguiñi maye aỹem 'auo'otec ne'ena na'a'q. 20Qaq nagui ỹoqta 'eesa ñaqa'en da taỹa'a da 'am nta'a, qaq da 'aro'onataxanaxac da 'aulo'ogue na Israel le'ecpi ỹataqta nquictasheguem qome. 21Qaq ỹoqo'oye nagui, 'onaxaic da 'aỹa'anot ca 'ara'aqtac Ñim Nataxala' da ỹoqta 'eesa 'anqa'en da saishet da 'anmatchiguiñi qome cam aỹem chegoxoguetpi, qataq saishet da 'auapalaxat da le'enaxat na ihuo' le'ecpi.
22Qaq huaña nache so David ỹanem da la'aqtac so Saúl. Huaña nache so Saúl ỹe'eguelaxa so lma', qaq so David qataq so nalleppi nataqa'en ỹe'eguelaxa so nqañoxotaqa'.
