Da l-leuaxa so Samuel
1Qaq co'ollaq ileu so Samuel, nache 'enauac so Israel le'ecpi laỹona't da yaqto' nỹeelec somaye. Ime, nache qailareña ye maiche na'alhua maye huaigui ye Ramá. Huaña nache so David taỹa ye toolec 'alhua ye Parán.
So David qataq aso Abigaíl
2Qaq ye Maón naña co'ollaxa so ỹale maye ỹataqta sallaxanec, qaq somaye huo'o so lalamaxat lma' naña ye Carmel, qaq aso lalo quetaqpi ivi' mil, qaq aso qaguetapi ivi' tres mil, nache somaye hueta'a co'ollaxa ye Carmel da npetectac aso lalopi qaguetapi. 3Qaq somaye le'enaxat Nabal, qataq chegoxoguet so Caleb, qaq somaye ỹataqta yeloxoic qataq qauem da lataxac, qaq aso lhua le'enaxat Abigaíl, qaq asomaye ỹataqta 'onaxai qataq ỹataqta ỹaanataxanaxai. 4Qaq so David co'ollaq hueta'a ye toolec 'alhua, nache ỹaỹaten da so Nabal hueta'a ye Carmel npetectac aso lalo qaguetapi, 5nache ỹama'q soua diez lamaxa'she nache, 'eeta': «Qanqo'oñiỹa qome ye Carmel, nache qauache da iquinaxanaxac maye taỹa'a ca Nabal.» 6Qataq qaỹa'añim qome da ỹa'aqtac maye, 'eeta':
Ỹataqta 'am nlaqchigui qome da 'arlagaxayec, qataq na 'aỹa'alaqpi, qataq 'enauac nam 'aralamaxatpi. 7Aỹem saỹaten da 'anpetectac ana 'arelo qaguetapi. Qataq 'auaỹateeta da na ilotague' ana 'arelo qaguetapi, co'ollaq hueta'a na souaqta'a Carmel, qalaq saỹauana da huo'o ca secachaxa na logoxoshetpi, huo'otaq da so'otaxac ca qauem. 8Qalaxaye 'aunat qome na 'aramaxashecpi, nache 'am da'aqtaxaatem qome de'era, qaq ỹoqo'oye ỹataqta lta'araic qome da ña'achecỹaxac da 'auaỹamaxatte' da 'aulo'ogueta ne'enaua ỹamaxa'she, cha'aye no'on da lviraxa'c ne'ena na'a'q. Qaq 'am ñachoxoreetot da 'aỹa'anema qome naamaye, qataq nam 'aramaxashec David cam 'am hueto'ot, cha'aye 'eeta'am da aỹem 'aỹa'alec.
9Nache co'ollaq ivildeuo soua lamaxa'she so David, nache soomaye ỹanem so Nabal da la'aqtac so David. Ime, nache huetra'a iuattra'a ca 'eetec ca lasataxac somaye. 10Qalaxaye so Nabal 'enapeco':
¿Negue't que'eca David? ¿Negue't que'eca llalec cam Yesé? ¡Cha'aye nagui qalota na nlatacpi maye dataueeguesop na na'aco'pi! 11¿Ta'ainco' taxa da sanem nam sauotaique aloq, qataq laquip na ipetegaxanaxanecpi, cam shiỹaxaua maye sasaỹaten ca chegaqa'ague?
12Nache soua lamaxa'she so David ỹe'eguela'q, qaq co'ollaq ivitra so David nache da'aqtaxanem 'enauac na la'aqtacpi so Nabal. 13Nache so David 'enapego' so nalleppi, 'eeta':
¡'Enauac qami' qana'achiigui qome na qoraiñiqui!
Nache 'enauac somayepi na'achigui so lainec, nataqa'en so David. Nache cuatrocientos ỹalleppi so ca'ategue somaye, qaq so doscientos maye laỹepi somayepi, qalaq no'onañi da ilotague' so nogoxoshetpi. 14Qalaxaye huo'o' so 'oonolec so lamaxashecpi so Nabal, jec da da'aqtaxanem aso Abigaíl, asom lhua so Nabal nache, 'eeta':
So David huo'oi soua nama'q lamaxa'she, da namaxa da lquinaxanaxac ñi qana'aco' qalaxaye ñimaye saishet da iyacna'ape soomaye. 15Qamaq se'esoua ỹale't ỹataqta qomi' ỹaỹamaxatte' 'enauaque se'esoua na'axa'te co'ollaq souaqta'agueta soomaye yi'iye no'onaxa, saishet da qomi' sa ỹalemaxa't, qataq saishet da qomi' decachiỹoto. 16Nacherata da qomi' npaxattaleguete ye na'a'q qataq ye pe, co'ollaq seloqtague' ana qaguetapi. 17Qalaxaye ñim 'arhua, ye ỹataqta qauem da lataxac, qataq saishet da qaitaxaỹot, qaq 'onaxaic qome da 'auo'ot ca 'auataxaateuga de'era, cha'aye so David mashe lhuennataxa da iloquiaxan ñim qana'aco' qataq 'enauac na lauo' le'ecpi.
18Nache aso Abigaíl ỹataqta sa ỹaỹaloxon da laỹona't aso doscientos nauole 'ayiiña, qataq soua dos lo'oc maye laỹe' so lataxa, qataq soua cinco qagueta nauole, qataq cuarenta kilos aso ntoñiguishe ala na nañiguishec, qataq cien aso nqaxaỹaqta uva, qataq doscientos aso nauolepi maye lalegue ala ana hiigo nqaxaỹaqta. Nache 'enauac somayepi ỹasaxalec so 'ashenapi. 19Ime, nache 'enapega so lamaxashecpi, 'eeta':
Qaua'aviita qome, aỹem qalaq qami' seca'attaueeguelo qomele.
Qalaxaye asomaye saishet da da'aqtaxanem de'era so lhua. 20Nache aso Abigaíl nelec so 'ashena, nache nqañoxotchiguiñi nactangui na laỹe añi qasoxonaxa. Qaq co'ollaq ila'aguet so David qataq so nalleppi da natena'aguet, nache jec asomaye da ca'ata'aguet.
21Qaq so David ñaq cha'ago' da detaqtac, 'eeta': «Choche ne'en da ñauaatalec so na'atetpi ca Nabal co'ollaq huetalec ye toolec 'alhua, da qaica ca seỹaxaneua'a da lasheue ñaqa'en, qaq nagui qalaq aỹem iro'oguet da qauem da no'on maye so'otec. 22Nache somaye, 'enapeco':
¡Ñim Lo'onatac 'Enauacna, ỹataqta lta'araic naqa'en ca ñeuaxanaguec, qom sa nmichiguiñi ñaqa'en nagui, huo'otaq qonte' ca nnaictague'pi camaye!»
23Nache aso Abigaíl co'ollaq ila'aguet so David, nache huenoteeguesop so lalo 'ashena, nache ỹa'alyiñi naua l-llecte, qataq iviraxata'aguet na latap na 'alhua. 24Ime, nache qapaloiguilo naua lchel somaye, nache 'enapega 'eeta':
¡'Am ỹataxala', aỹem maye ỹasouaxashet de'era! Qalaxaye ñaq aỹem 'anqouaguec da 'ana'axaỹaxana da shenapec. 25Saishet qome da 'auqocha'a da qauem lataxac ñi Nabal, cha'aye ñimaye maiche ỹo'oxoreetac da le'enaxat, maye naigui da sanaỹaten. Qaq de'era sanaỹaten lataxac ñimaye, nache nnaictague' naxa da huo'o da pa'aigue. Aỹem, qalaxaye sa sauanegueta co'ollaq nvi' soua 'aramaxa'she. 26Qalaxaye nagui Ñim Nataxala' 'am saỹashenem da 'aucoldec naua ntago'q, qataq da 'auo'ogoxona da 'ara'añaxac da 'apalaique 'arvi'. Qaq 'eeta'am qome so Nabal ca nhuaxanaguec nam 'ampa'aguenaxauapi, qataq 'enauac nam huotaique da 'am ỹo'otec ca qauem 'am ỹataxala'. 27Qaq nagui 'onaxaic da 'auaconeguet ne'ena ỹachetaqtaxanaxat nallec da yaqto' 'aỹa'anoigui na 'aramaxashecpi maye 'annaictague'. 28Qataq 'am ñachoxonnot da choche 'auchoxoren qome ana'ana 'aramaxashe da huo'o ca ỹasouaxat. Qaq ỹoqta 'eesa ñaqa'en da Ñim Nataxala' 'am ỹanem qome, qataq ca 'aỹa'alaqpi da ilo'ogue na Israel le'ecpi, cha'aye nachaqrata naxa da 'am ỹamaq Ñim Nataxala' nache 'auloqui. Qaq ỹoqo'oye 'enauaque qome naua na'axa'te da 'anachaalataxac da saishet da talec ca qauem. 29Qaq da huo'o ca 'am icaatac da huotaique 'am ỹalauat, qaq Ñim Nataxala' npaxattalec qome da 'anachaalataxac. Qaq cam 'am ipa'agueetac, qalaq Ñim Nataxala' ỹasaxauec qome, 'eeta'am naqa'en ca coma' laỹe da qaipocnec. 30Qaq ỹoqo'oye qom ipacchigui 'enauac nam no'on maye 'am ỹachaxanapecot co'ollaxa Ñim Nataxala', qataq da 'am ỹanagui da 'am lataxala' na Israel le'ecpi, 31nache saishet qome da 'anque'etaxangui da 'anllaqtac da 'aucoldec naua ltago'q ca qaica ca ỹasouaxat, qataq da 'auo'ogoxona da 'ara'añaxac da 'apalaique 'arvi'. Qaq qom ivita da 'am ỹanem da lqouagaxanaqtaic Ñim Nataxala', nache 'auennata'a qome ana'ana 'aramaxashe.
32Nache so David 'enapego' asomaye, 'eeta':
Ỹataqta soxoraic Ñim Nataxala', Ñim Natamnaxala' na Israel le'ecpi, maye 'am namaq da yaqto' aỹem 'auqata'aguet, 33qataq ỹataqta 'auamachiguiñi qome 'am souaxat da no'on 'araỹaanataxanaxac. Cha'aye aỹem 'avitaqna'aguet da secolde'c naua ntago'q, qataq da so'ogoxona da ỹa'añaxac da sepalaique ca ivi'. 34Qaq cha'aye nca'altauec Ñim Nataxala' maye Natamnaxala' na Israel le'ecpi, maye nacheñi ñi aỹem nqanaxat da saishet da 'am so'otec ca qauem. Cha'aye taxa da sa 'auỹalapigui' da 'auanac da aỹem 'auqata'aguet, nache qonte' nte'eta nache saishettaxa da 'oonolec ca nca'altauec nam nalleppi ñi Nabal.
35Ime, nache so David ỹaconeguet 'enauac so ndouec asomaye, huaña nache 'enapega, 'eeta':
'avi'eguelaxa qome ca 'arma', qalaxaye huo'o da 'arlagaxayec, cha'aye mashe 'auaỹaten da 'am salaxaguet, qaq aỹem 'am sanem qome cam 'auỹaxanaique.
36Nache aso Abigaíl co'ollaq ỹe'eguelaq, nache natenalec so Nabal hueta'a so lma' ỹo'ottac so ỹataqta 'onaxaic lquia'axac maye 'eeta'am da lquia'axac ca nta'a. Qaq somaye ỹataqta machiguiñi qataq mashe taxaic, qaq ỹoqo'oye asomaye saishet da da'aqtaxanem nacherata da iuata'aguet so lỹa na'a'q. 37Qaq so lỹa na'a'q co'ollaq mashe imeuec da ltaxa so Nabal, nache aso Abigaíl ỹataqta da'aqtaxaatem da 'eetec da temaq qanayeuaigui. Qaq somaye co'ollaq hua'aqchigui de'era nache nque'elaxatta da decopche, ime nache sa da'añiigue. 38Qaq co'ollaq inoxoorec soua diez na'axa'te, nache Ñim Nataxala' qaltaq ỹe'eguelaxalec da ỹauo'o so lque'emaxa somaye, huaña nache ileu. 39Qaq so David co'ollaq la'axaỹaxac da ileu so Nabal, nache 'enapeco':
¡Ỹataqta soxoraic Ñim Nataxala', cha'aye ỹe'eguelaxateguet da qauem maye aỹem ỹo'otec co'ollaxa ye Nabal! ¡Ñimaye aỹem ỹeltaxaneguet da so'ot ca qauem, qalaxaye ỹo'ot da maiche talec naqa'en da qauem ye Nabal!
Ime, nache so David ỹamaxa so la'aqtac aso Abigaíl da ỹauotaique da lhua. 40Qaq so lamaxashecpi so David co'ollaq ivita ye Carmel, nache da'aqtaxanem aso Abigaíl, 'eeta':
Ñi David qomi' namaxalo da qoneta, cha'aye ỹauotaique da 'am lhua ñimaye.
41Nache asomaye ỹa'alyiñi naua l-llecte, nache iviraxata'aguet na latap na 'alhua, nache 'enapeco':
Aỹem maiche aỹem lo'onataxanaxana ca David, qaq aỹem qaica ca shectega, qataq aỹem ỹataqta lleuotta da ishet da seỹoi' naua lapia'ate ca lamaxashecpi camaye da aỹem ỹamaxalec.
42Qaq co'ollaq ime da 'enapec de'era, nache iỹalapigui' da naỹamaxat, nache nnaicapegueto soua cinco l-latal, qataq nelec so 'ashena nache ca'attaueeguelo soua lamaxa'she so David. Ime nache huaroneguet somaye.
43Qaq so David nataqa'en huaroneguet co'ollaxa aso Ajinoán maye lma' ye Jezrel, nache 'enauaque da lhua't se'esoua dos. 44Qaq so Saúl qalaq mashe ỹan co'ollaxa aso llale Mical, maye lhua so David, da ỹauo'o lhua naqa'en so Paltí, som llalec so Lais maye lma' co'ollaxa ye Galín.
