1Qaq se'eso na'a'q so filisteopi laỹona't so nalleppi da yaqto' taỹa da delogui' so Israel le'ecpi. Nache, so Aquis 'enapego' so David, 'eeta':
Aỹem sauotaique da saỹaten da 'am qataq na 'analleppi aỹem qoquiigue da ñalat. 2Nache so David, 'enapeco':
Aja' ỹaỹamaqchiguiñi, qaq nagui 'am nta'a, nache 'auaỹaten da ỹataqta ñalaua'a da so'ot de'era.
Nache so Aquis, 'enapeco': Da 'eetec de'era, nache 'am sanem da nache 'eetai' da 'am lataxala' nam aỹem nauaatalec qome.
So Saúl qataq aso 'alo maye lma' ye Endor
3Qaq so Samuel mashe ileu co'ollaxa, nache qailareña ye Ramá maye maiche lalamaxat lma', nache 'enauac ye Israel da nỹeetapeguelec somaye. Qaq so Saúl mashe ỹo'orauec co'ollaxa som shiỹaxauapi maye ilaviigui ca lỹa, qataq so ima'aguet na nqui'ipi.
4Qaq so filisteopi laỹona't co'ollaxa nache taỹa ye Sunén, nache hua'a da lanataqa', qaq so Saúl naqa'en laỹona't so Israel le'ecpi, nache ỹo'ot so lanataqa' ỹanaña ye Gilboa. 5Qalaxaye so Saúl co'ollaq ila'a so alleppi filisteopi, nache huo'o da lcolanaxa, qataq nomteguet da qaica ca la'añaxac da lquiyaqteỹaxac. 6Ỹoqo'oye so Saúl inat co'ollaxa Ñim Nataxala', qalaxaye Ñimaye saishet da ỹasateguet da ỹachegoxotchigui ca lchoxonaxac, huo'otaq so coma' maye le'enaxat urim, huo'otaq so na'aqtaxanaxanecpi. 7Ỹoqo'oye so Saúl 'enapego' so ltauapi, 'eeta':
Qanmichiỹaique qome aca 'alo maye ishet da iỹaxaneuga na nqui'ipi, yaqto' ñeqo'ona da sauo'o ca inataxanaxac.
Nache so ltauapi somaye, 'enapeco':
Huo'o añi 'alo maye ilaviigui ca lỹa, naña ye Endor.
8Nache so Saúl ne'enaqchinguilo co'ollaxa soua ỹaqa'alo anogo, nache jec se'eso pe, nnaictagueto soua dos nale't da nqo'ona asa'aso 'alo. Nache 'enapego', 'eeta':
Sauotaique da aỹem 'auaỹaanaxanaxanec cam ñaq natauo, qataq da aỹem 'anauegueua'a ca lqui'i cam sauotaique da ñauane'.
9Nache aso 'alo, 'enapeco':
'Am 'auaỹaten da so Saúl, nqateeguesop ne'ena 'alhua, nache ỹo'orauec 'enauac so shiỹaxauapi maye ilaviigui ca lỹa, qataq so ima'aguet na nqui'ipi. ¿Qaq ta'ainco' da aỹem 'auanaỹa nagui da aỹem 'auatenachet, qataq 'auauotaique da aỹem qaỹalauat?
10Qalaxaye so Saúl, 'eeta':
'Am sanem da ỹa'aqtac hua'aqchigui ñaqa'en Ñim Nataxala', da qaica qome ca qouaigui sa ỹaỹamaxañi qom aỹem 'autauan.
11Nache aso 'alo 'enapeco':
¿Negue't cam 'anshetaique da ñauegueuo?
Nache so Saúl 'enapeco':
Ña 'anauegueuo ca lqui'i so Samuel.
12Nache aso 'alo, co'ollaq ila'a so lqui'i so Samuel, nache ỹa'alaq, nache 'enapega so Saúl, 'eeta':
¡Qache nache 'am Saúl! ¿Ta'ainco' ye aỹem 'auatenachet?
13Qalaxaye so nta'a Saúl 'enapeco':
Saishet da 'añi'i. ¿Negue't cam 'aula'a nagui?
Nache asomaye 'enapeco':
Qomye sela'a da nqui'i chegoqtoigui ana 'alhua.
14Nache denataxan so Saúl, 'eeta':
¿Ca 'eetec ca lataxac camaxa?
Nache asomaye 'enapeco':
Qomye damaye ỹa'axaiquiolec, qataq huota'a da lapo'.
Huaña, nache so Saúl ỹaỹaten da nacheso so Samuel, nache ỹa'alyiñi naua l-llecte, qataq iviraxata'aguet naqa'en na latap na 'alhua. 15Nache so Samuel 'enapega so Saúl, 'eeta':
¿Ta'ainco' ye aỹem sa 'aualemaxat, da aỹem 'anauegueuo?
Nache so Saúl 'enapeco':
Qomye aỹem ỹataqta lta'araic da ỹaquicoxo, souaxat na filisteopi da aỹem iloquiaxaatac, qataq Ñim Lo'onatac 'Enauacna aỹem ca'ai, mashe saishet da ỹauo'o ca ỹa'axaỹaxac da chegoqchigui naqa'en na la'aqtaxanaxanecpi, huo'otaq ca nchoxonaxac. Qaq nachera da huo'omshe 'am seỹaxaneuga, da yaqto' aỹem 'aua'aqtaxanem cam sheetec.
16Nache so Samuel 'enapeco':
Qalaq ¿ta'ainco' da aỹem 'aunattac, ye Ñim Nataxala' mashe 'am ca'ai, qataq ỹataqta 'am npa'aguene'? 17Ñim Nataxala' ipacchigui nagui dam 'am sa'aqtaxaateguem co'ollaxa. Ñimaye 'am nqateeguesop da 'aro'onataxanaxac da 'am nta'a, nache ỹanem so David, 18cha'aye 'am saishet da 'aualaxaguet da lamaxasoxonaxac Ñimaye, qataq sa 'aualaxaguet da 'enapec da 'anmatchiguiñi da 'aualauat so amaleciitapi. Qaq ỹoqo'oye Ñim Nataxala' 'era da 'eetec 'am nagui. 19Qataq Ñim Nataxala' ỹanem na filisteopi da loxonec na Israel le'ecpi, nataqa'en 'am, qataq na 'aỹa'alaqpi, qaq qonte', nache 'am qataq naua 'aỹa'alqa aỹem qarhuoreuai qome. Nache Ñim Nataxala' ỹo'ot da so filisteopi loxonec naqa'en so alleppi so Israel le'ecpi.
20Huaña nache so Saúl, nque'elaxatta da decopche souaxat da ỹaguec da ỹe'elaxam de'era la'aqtac so Samuel. Qataq nataqa'en souaxat da qaica cam chec imauec se'eso na'a'q, qataq se'eso pe, qaq nachera da huo'omshe qaica ca la'añaxac. 21Nache asa'aso 'alo co'ollaq ila'a so Saúl da ỹataqta sanaỹaten souaxat da lqaigaxa, nache 'enapega, 'eeta':
Aỹem, maiche aỹem 'aramaxashe, ỹoqo'oye salaxaguet dam 'aramaxasoxonaxac, nache sa seren da ñachaalataxac. 22Qaq ỹoqo'oye nagui 'am ñachoxonnot, qaq no'on da aỹem 'aualaxaguet, aỹem so'ot ca 'oq da yaqto' 'auque'e, yaqto' huo'o da 'ara'añaxac, nache ishet da qaltaq qojec qome.
23Qaq so Saúl sanashen co'ollaxa da deque'e, qalaxaye so lataxala'pi so nalleppi qataq aso 'alo dequicto'ot somaye. Huaña nache ishet da ỹasat da deque'e, nache ñisheguem nso'oolec so mala'. 24Nache aso 'alo, ỹalauat so huaca llalec ỹataqta chaxaraic maye netaña so lma', qataq iraqten so 'ayiiña, nache ỹo'o't soua lauole, qaica naqa'en ca lalegue maye ỹasheeraxachigui. 25Qaq co'ollaq imat se'eso nallec, nache iroua'a so Saúl, qataq so lataxala'pi so nalleppi somaye. Qaq nacheso se'eso pe co'ollaq imat da lquia'axac somayepi, nache 'enauac da jec.
