Da l-leuaxa so Saúl qataq soua llalqa
1Qaq so filisteopi delogui' co'ollaxa so Israel le'ecpi, nache so Israel le'ecpi dataueeguesop somayepi, qataq qalota so ileu huaña añi qasoxonaxa ye Gilboa. 2Qaq so filisteopi saq ỹaxaañi da icaatac so Saúl qataq soua llalqa, nache ivitta'a da ỹalaua't, so Jonatán, Abinadab qataq so Malquisúa maye llalqa so Saúl. 3Ime, qataq qaimalec da qailoquiaxan so Saúl, nache so checnec lo'opi ivira'a da ishet da latenec somaye, nache somaye ỹataqta nlaxagui da lcolanaxa. 4Nache 'enapega so ltaua maye lpaqtaxanaqte lo'o, 'eeta':
Ña 'anqatsheguem na 'ainec, nache aỹem 'aua'arapec, yaqto' saishet da anac ne'ena ỹaqa'a da la'amqaanataxanaxac, nache aỹem ỹalauat qataq aỹem ỹa'ashaxan.
Qalaxaye so lpaqtaxanaqte lo'o ỹataqta lta'araic da lcolanaxa, ỹoqo'oye saishet da ỹo'ot de'era, nache so Saúl ỹacona so maiche lainec nache nqapaxaanguit somaye. 5Nache so lpaqtaxanaqte lo'o co'ollaq ila'a da ileu so Saúl, nache nataqa'en somaye nqapaxaanguit so maiche lainec, nache l-leuaxaua somaye. 6Qaq 'era da 'eetec da huaigui se'eso 'oonolec na'a'q da ileu so Saúl, qataq soua tres llalqa, qataq so lpaqtaxanaqte lo'o qataq 'enauac so nalleppi. 7Nache so Israel le'ecpi maye neta'atague da le'ego so ca'amegue, qataq da le'ego so Jordán, co'ollaq ỹauaachigui da datauec so nalleppi so Israel le'ecpi, qataq da ileu so Saúl qataq soua llalqa. Nache somayepi nataqa'en datauec, ca'ai so huaqta'a't nỹecpi. Huaña nache anac so filisteopi da naigui somayepi.
8Qaq so lỹa na'a'q co'ollaq so filisteopi tauga da laỹona't so no'on logoxoshetpi so leuaxaicpi, nache ilalec so Saúl qataq soua tres llalqa da huetraiya' mashe ileu', huetraña añi qasoxonaxa ye Gilboa. 9Huaña nache icheguec so lqaic so Saúl qataq nqa't soua lo'ogoxonaqa'ate, qataq ỹamaxa so lamaxashecpi 'enauac so netalec ye na'alhua so filisteopi, da yaqto' ỹa'axatem da no'on la'axaỹaxac so shiỹaxauapi qataq so netaigui aso natamnaxaqui somayepi. 10Qaq soua lo'ogoxonaqa'ate so Saúl qoỹaaraigui aso atamnaxaqui maye netaigui aso Astarté, qaq so lo'ocỹaxac somaye, qalaq ntaxattañi qanqa'en da qaỹasaxalec so lpaqtaxat coma' so huaqta'a't nỹecpi ye Betsán.
11Nache so lma' ye Jabés maye huaigui ye Galaad co'ollaq ỹaỹaten de'era ỹo'otec so Saúl so filisteopi, 12nache 'enauac so ỹalleppi maye 'añaxaicpi jec, nache imauec se'eso pe da queta, choche ivitta'a da nqaañi so lo'ocỹaxac so Saúl, qataq soua llalqa maye ntaxattrañi, huetaleguete so npaqtaxanaxat ye Betsán. Ime, nache ỹe'eguelaxa ye Jabés, yem huaña da ỹavigaxat so lapat soomaye. 13Qaq ime nache qalaỹona't so lpi'inecpi, nache huo'oto qanqa'en aso qo'oipaq da qailalyiñi. Qaq co'ollaq ime de'era, nache siete na'axa'te da nqouaqchet somayepi, souaxat de'era lasouaxac.
