1Nache anaco' so lma' ye Quiriat Yearin nache ỹache aso arca maye laỹe' da naỹamaxataxac Ñim Nataxala', nache qoỹanaigui so lma' so Abinadab, maye naña aso lcomaraxalate, huaña nache qoỹaasheguem so llalec Eleazar da yaqto' ilo'ogue asomaye.
So Samuel lataxala' so Israel le'ecpi
2Qaq mashe inoxoorec co'ollaxa soua veinte vi'iye da netaña ye Quiriat Yearin aso arca maye laỹe' da aỹamaxataxac, nache 'enauac so Israel le'ecpi ỹataqta nmittaique Ñim Nataxala'. 3Ỹoqo'oye so Samuel 'enapego' 'enauac so Israel le'ecpi, 'eeta': «Da ỹoqta qaumachiỹo'ot da qarquiyaqteỹaxaqui Ñim Nataxala', nache qauasaqaiuec 'enauac nam atamnaxala'pi maye chegaqauec, qataq na lqui'ipi aso Astarté, nache qaumachiỹo'ot da qanachaalataxaqui Ñim Nataxala', qataq nachaqñita qome Ñimaye da qavio'oxoyiñiitac. Nache Ñimaye qami' nqateeguesopa qome da la'añaxac na filisteopi.»
4Nache so Israel le'ecpi ỹasaxauec co'ollaxa som ỹotta'a't lqui'ipi so Baal qataq aso Astarté, nache nacheñita Ñim Nataxala' da ỹaatacot da llo'oxonnataxanaxac. 5Ime, nache so Samuel 'enapego' somayepi, 'eeta': «Qalaỹoñiỹa't qome 'enauac na Israel le'ecpi da hua'a ye Mispá, nache aỹem seỹaxanot qome Ñim Nataxala' da qami' ñachoxoreeleguete.»
6Nache so Israel le'ecpi laỹona'to' hua'a ye Mispá, qaq nache huaña yemaye da nqatsheguem so 'etaxat, nache icorec da ỹanot Ñim Nataxala' da 'eco' lachetaqtaxanaqte da ỹanot Ñimaye, qataq ỹataqta nqouaqchet, qataq ỹa'axatta da huo'o da lasouaxashet hueto'ot Ñim Nataxala'. Qaq nache huaña ye Mispá, da so Israel le'ecpi ỹauo'o lataxala' so Samuel. 7Qaq so filisteopi co'ollaq ỹaỹaten da so Israel le'ecpi laỹoota'a't hueta'a ye Mispá, nache so lataxala'pi so filisteopi nqo'ona da dataỹa'aguet somayepi. Qaq so Israel le'ecpi, co'ollaq ỹaỹaten de'era, nache ỹataqta huo'o da lli'iỹaxa, 8nache somayepi 'enapego' so Samuel, 'eeta': «Saishet qome da 'axaañi da qomi' 'auỹaxaategueleguete da 'anachoxoreetacot Ñim Nataxala' maye Qanatamnaxala', yaqto' qomi' nca'alaxateeguesopa da la'añaxac ye filisteopi.»
9Nache so Samuel ỹaconeua'a sotai' qagueta llalec nache ỹanot Ñim Nataxala' da ỹauo'o lachetaqtaxanaqte ỹavigaxatta, ime nache nachoxonnot Ñim nataxala' da nqouagaxaueelec so Israel le'ecpi, nache Ñim Nataxala' ỹasateguet somaye. 10Qaq so Samuel co'ollaq ñaq ỹavigaxattac aso lachetaqtaxanaqte, nache som filisteopi nqo'ona da iloquiaxan so Israel le'ecpi, nache Ñim Nataxala' ỹauo'o so lta'araic nllimiaxa ỹaneguet somayepi, nache ñi'i naqa'en, qaq 'era da 'eetec so Israel le'ecpi da loxonec somayepi. 11Nache so Israel le'ecpi sanaỹaloxon da ca'ai ye Mispá da icanapec so filisteopi, nache iloquiaxaatac choche iviraxatta'a ye npa'aỹañi ye Bet Car. 12Qaq co'ollaq ime, nache so Samuel ỹacono' so 'oonolec coma' nache ỹananguilo yeua Mispá qataq ye Sen, nache ỹanagui da le'enaxat Ebenezer, cha'aye 'enapeco': «Choche ivitta'a nagui da Ñim Nataxala' ña qomi' itauaata'ape.»
13Nache so filisteopi noxonecpi co'ollaxa, nache saishet da ỹoltaq ỹe'eguelaxaua'a ye na'alhua so Israel le'ecpi co'ollaq ña nca'altauec so Samuel, nache Ñim Nataxala' ỹataqta dataỹa'aguet so filisteopi. 14Qaq 'era da 'eetec so Israel le'ecpi co'ollaq ñe'eguelaxaala't so huaqta'a't nỹecpi maye ỹacona co'ollaxa so filisteopi, chegoqchiguiña ye Ecrón nache ivitta'a ye Gat, nache ỹe'egueloqot somayepi so 'alhua maye loxonec co'ollaxa so filisteopi. Qaq 'era da 'eetec da so Israel le'ecpi da isoueeguesop co'ollaxa ye na'alhua da la'añaxac so filisteopi. Huaña nache so Israel le'ecpi qataq so amorreopi huo'o da l-lagaxayec.
15Qaq so Samuel nache lataxala' co'ollaxa so Israel le'ecpi co'ollaq ña nca'altauec, 16qataq 'enauaque naxa naua vi'iye da nqo'ona ye Betel, Gilgal qataq ye Mispá, da yaqto' ỹaỹamaxaañi 'enauac nam 'eetapeguecpi so Israel le'ecpi maye netalec yi'iye 'alhua. 17Qaq naxa da ime, nache ỹe'eguelaxa ye Ramá, yem naña so lma'. Qaq nache netaña yemaye da ilotague' so Israel le'ecpi. Qaq nataqa'en nache naña naqa'en yemaye aso nauaxaỹaxaasheguem nca'atoxonaxalate da yaqto' lalamaqte Ñim Nataxala'.
