Da lquinaxanaxac so Pablo maye taỹa'a so 'amqaanataxanaxaicpi Tesalónica le'ecpi
1Qami' ñauochaxau' ỹaqaỹa't, qami' 'amqaanataxanaxaicpi maye qarmaye na Tesalónica:
Aỹem Pablo, Silvano qataq ñi Timoteo, qami' sequinaqta'ape maye qami' lalamaqa'ate Ñim Lo'onatac 'Enauacna maye Nta'a qataq So Qarataxala' Jesucristo.
Ỹataqta qarquiyaqteỹaxac da huo'o da qaryaxa da Ñim Lo'onatac 'Enauacna qami' nlaxatchiguilo da lsoxoyec qataq da l-lagaxayec.
Na 'amqaanataxanaxaicpi maye lma' ye Tesalónica ỹataqta naloqnaxanaxat
2-3Nache 'eetai' da sanaqtacot da qana'achecỹaxac Ñim Lo'onatac 'Enauacna maye Qarta'a, qataq da ñeqouagaxaunaqtac qalaq seỹaxanaqtacot Ñimaye da qami' itaua'n. Cha'aye saỹatenaqta da 'enauac nam qauo'oche namayepi ỹachaxan da huo'o da qarpi'iỹaxaqui Ñim Lo'onatac 'Enauacna, qataq da qarauotaxanaqtaiqui Ñimaye. Ivira'a da huo'o da qanque'eenaxaqui qalaq saishet da qami' qaỹayego't, nachaqrata da qauacheeta'a da So Qarataxala' Jesucristo qami' nca'alaxatre'c. 4Qami' qarqaỹa't: Ñim Lo'onatac 'Enauacna qami' ỹauoteque, qaq qomi' saỹaanaqta da Ñimaye qami' lca'agui'she. 5Cha'aye co'ollaq qami' sa'aqtaxanaxama da no'on na'axaỹaxac qalaq saishet da ndotre'c naua qara'aqtaqa. Nachaqrata da co'ollaq qami' souaqta'agueta qalaq qami' sachaxanaxalo da qomi' hueto'oto da la'añaxac Ñim Lo'onatac 'Enauacna qataq So Saqcha'a Na'añaxac Qui'itta da do'onataxaatapoigui da shenaqta, qaq damaye naigui da maiche qanaỹamaxataxaqui.
6Qami' qoquiigue da qarataxac qataq da no'on lataxac So Qarataxala', na'aictaxa da qalota da qanque'eenaxaqui, qalaxaye co'ollaq qauacoñiiguet da na'aqtac maye qami' ỹanema So Saqcha'a Na'añaxac Qui'itta qalaq huo'o da qantonaxaqui. 7Ỹoqo'oye qaviyiỹa'a da qami' laloqnaxanaqa'ate 'enauac nam quetague' So Jesucristo maye hueta'a ye 'alhua Macedonia qataq ye Acaya. 8De'era na'aqtaguec So Jesucristo maye qaua'axacheetac, damaye saishet da nachaqnauate' naua saqaỹapigui 'aleu' da ivira'alo, maye nataqa'en ivira'a na qalota shiỹaxauapi maye netaleguete naua qaỹoqtalo 'aleu'. Qaq ne'ena shiỹaxauapi maye hueta'alo ne'enaua 'aleu', mashe ỹaỹaten da huo'o da lta'araic qarpi'iỹaxaqui Ñim Lo'onatac 'Enauacna, qaq ỹoqo'oye qomi' sa iuen da qami' sa'axataqta'ape. 9Cha'aye 'enauac qana'aqtaxaatapigui dam ỹaỹamaqchiguiñi qarataxaqui co'ollaq qomi' qauacoñiigueta, qataq qana'aqtaxaatapiguilo qami' da 'eetec co'ollaq qaỹa'axañiiñi da qavio'oxoyiñiitac na ne'enaqtacpi maye qanatameetacotpi, nache qauo'onataxañiỹot Ñim Lo'onatac 'Enauacna maye nca'altauec qataq 'eesa. 10Nataqa'en namayepi ỹaỹaten da qami' qauacheeta'aguet So Jesucristo qom ñe'eguelaq da chegoxogue da piguem. Ñim Lo'onatac 'Enauacna nca'aleeguesop naqa'en da l-leuaxa Somaye co'ollaxa yaqto' qomi' nca'alaxateeguesopa da nhuaxanaguec na 'etaxaloxoicpi ca pa'atec na'a'q qom nmitna Somaye.
