1 Tesalonicenses 5

₁Qalaxaye qami' qarqaỹa't sa iuen da seraxañi ca na'a'q maye laloxoqui de'era. ₂Cha'aye qami' mashe qauaỹaañita que'eca na'a'q maye lviraxaqui So Qarataxala'. Camaye huetoigui ca na'a'q da sa qaỹauapeque, 'eeta'am ca cachaxaic da quetagui ye pe. ₃Cha'aye na shiỹaxauapi, qom 'eetega da 'enauac lactapiguiñi qataq saqca ca da, qataq saishet da ñe'etapigui', nache nvita namayepi ca nhuaxanaguec lta'araic, choche nque'elaxatta, 'eeta'am da nqui'ic aca 'alo hualaxai da ivita ye laloqo' da deco'o. Namayepi saishet da ỹet da nhuaxanaguec. ₄Qalaxaye qami' qarqaỹa't, saishet da qoviitaigui da qane'enaxaqui yaqto' que'eca na'a'q maye lviraxaqui So Qarataxala', saishet da qami' ique'elaxa't, 'eeta'am cam cachaxaic. ₅Cha'aye 'enauac da qoñiita huo'o da qarpi'iỹaxaqui So Qarataxala', qaq damaye 'eeta'am da qoviitaigui na le'eraxa ye na'a'q laiñi, qaq saishet da qoviitaigui na napalaxa. ₆Ỹoqo'oye iuen da ỹataqta ñeloqtec, saỹamaxataqchiguiñi da qoyecỹaxac, qataq saishet da leetapigui ye qarhuel da shenaqta'am na laỹepi shiỹaxauapi. ₇Ca sa naỹamaxateguet da lviraxac So Qarataxala' qataq huetaigui da lle'etaxaloxo qataq taxaic, camaye ỹataqta huetaigui na napalaxa. ₈Qalaxaye qomi' saishet da souaqtaigui na napalaxa, nachaqrata da souaqtaigui na yo'oqchiguiñi. Qaq ỹoqo'oye iuen da qolaqtot da ñeloqtec, qataq sauoqo'o da qarpi'iỹaxac Ñim Lo'onatac 'Enauacna qataq sauotaxac 'enauac na shiỹaxauapi. ¡Da qarpi'iỹaxac qataq da qarsoxoyec, damaye ishet da qomi' npaxaaleguete da npaxategueta naua qauema nhuennataxaco, 'eeta'am aca lpaqtaxanaqte ca ỹale alaataxaic! Qaq da saishet da seqoleguetaq de'era qarca'alaxa, nache damaye qomi' npaxaaleguete 'eeta'am aca aro'o alaataxaqui. ₉Cha'aye Ñim Lo'onatac 'Enauacna saishet da qomi' lca'agui'she da ỹauo'o ca qanhuaxanaguec ca pa'atec na'a'q. Nachaqrata da saconaxaguet ca nca'alaxa chegoqchigui So Qarataxala' Jesucristo. ₁₀Cha'aye Somaye qomi' ileualeguete co'ollaxa, da huotaique da qanachaalataxaua, na'aictaxa da ñaq ñeca'alaqtauec, huo'otaq mashe qareleu qom ñe'eguelaq Somaye. ₁₁Ỹoqo'oye qantauñiỹa't, qataq ñi 'oonolec ỹa'añaqchet ca lỹa. Qaq de'era mashe qauo'ocheetac, nachera qoquiito'ot.

₁₂Qami' qarqaỹa't, qami' ñachoxorenaqtoto da ỹataqta qauauo'oi naq 'enec na lataxala'pi na 'amqaanataxanaxaicpi. Cha'aye namayepi ỹataqta ỹauo'o da na'añaxataxac da qami' ỹapaxagueetegueque da lataxac da na'amqaanataxanaxac. ₁₃Qaq ỹoqo'oye ỹataqta qauauo'oi naq 'enec qataq ỹataqta qauauochec souaxat na ỹo'otpi, qataq qoviitaiguio' da qami' lactrapiguiñi, saqca ca da ñi 'oonolec da qoñiita.

₁₄Nataqa'en qami' qarqaỹa't, qami' seqataxalo da ỹataqta qoñiỹapega nam huotaique da saishet da do'onataxan. Qaua'añaqchichi na sa da'angui ye lauel, qataq qautauañi na ñaq saxanaxa da yo'oqta ỹa'amaqten So Qarataxala', qataq qanhualaxauñi' 'enauac na shiỹaxauapi.

₁₅Ỹataqta qanchelliỹa'a't, saqca ca isheetena'aguet ca sa ỹaỹamaxañi da ỹo'otec ca lỹa. Chaqrato' da qami' qanpogoxoiñiỹapegue' da qauo'ochec ca ỹaỹamaqchiguiñi ñi 'oonolec da qoñiita qataq 'enauac na laỹepi shiỹaxauapi.

₁₆Qami' nache 'eetai' qome da qauamaichiguiñi ₁₇Nache 'eetai' qome da qanqouagaxauñiitac. ₁₈Na'aictaxa da huo'o na qami' hueleguete, qalaxaye nache 'ena'am qaỹa'añiitacot da qana'achecỹaxaqui Ñim Lo'onatac 'Enauacna. Cha'aye nachera da 'eetapeguec Ñimaye da qoñiita, cha'aye mashe qaua'amaqchiñi So Cristo Jesús.

₁₉Saishet da qaualamache da lo'onataxanaxac So Saqcha'a Na'añaxac Qui'itta. ₂₀Nataqa'en saishet da qauo'otañi da la'aqtaxanaxac ca ỹa'aqtaxanaxan Somaye. ₂₁Qalaxaye qavi'iguiñi 'enauac, qaq cam ỹaỹamaqchiguiñi, nacheca qauaỹamaxache. ₂₂Qataq saishet da qauacoñiiguet 'enauac na ỹotta'a't sa ỹaỹamaxañi.

₂₃Qaq Ñim Lo'onatac 'Enauacna qami' ỹanema da qarlagaxayiqui, qataq nacheñi qami' iqui'itaxatte' yaqto' qauo'onataxañiỹot. Qataq saishet da qami' ỹashenegueta ca sa ỹaỹamaxañi, choche ivitta'a da ñe'eguelaq So Qarataxala' Jesucristo, yaqto' so saqcha'a qarca'alaqai, qataq da qarvilỹaxaqui qataq da qaro'ocỹaxaqui, saishet da huo'o ca qarasouaxashechi qom qanachaachiỹot Ñim Lo'onatac 'Enauacna. ₂₄Ñimaye qami' lca'agui'she da yaqto' qami' ỹalecnaxanoiguilo na lalamaxatpi. Qaq Ñimaye ỹo'ot 'enauac de'era cha'aye, nache 'eetai' naxa da ipaqueelec cam ỹachaxanapec.

₂₅Qami' qarqaỹa't, nataqa'en qomi' qanqouagaxauñiitaleguete.

₂₆Qaq ñi 'oonolec da qoñiita da nquine' ca lỹa la'amqaanataxanaxaua, nache no'on da ỹataqta napigoxoi', qalaxaye ỹachetoigui da lauotaxanaqtaic.

₂₇Cha'aye aỹem lamaxashec So Qarataxala', qaq nagui qami' seqatalo da qautaxaỹaxañi ana ỹere da na'axaỹaxana 'enauac qanqa'eñi na qarqaỹañicpi.

₂₈Seỹaxanot So Qarataxala' Jesucristo da nache queto'ot da qami' ỹachaxaategalo da lsoxoyec. Aja', nache 'eetec de'era.