1Qaq so Roboán co'ollaq ivita ye Jerusalén, nache laỹona't so ciento ochenta mil alleppi, nca'aguishecpi maye chegoxoguetpi so Judá, qataq so chegoxoguetpi so Benjamín, da yaqto' dataỹa'aguet da delogui' so Israel le'ecpi, da yaqto' ỹe'eguelaxa da ilo'ogue 'enauac somayepi. 2Qalaxaye Ñim Nataxala' detaxaỹot so Semaías, som nale Ñim Lo'onatac 'Enauacna, nache 'eeta': 3«Qonapega qome ñi Roboán, ñim llalec so Salomón, maye nta'a ye Judá, qataq 'enauac na Israel le'ecpi maye netaña ye Judá qataq ye Benjamín, qoneta': 4Da la'aqtac Ñim Nataxala', 'eeta': Saishet qome da qauloquiaxañi na maiche qarqaỹaipi, nacherata da qavi'iguelaqaỹalo naua maiche qarma'achilli', cha'aye de'era nachera da maiche sheetapeguec.»
Qaq somayepi co'ollaq hua'axaỹa da la'aqtac Ñim Nataxala', nache ỹe'eguelaq, saishet da ipaca'a da iloquiaxan so Jeroboán.
So Roboán npaxateua'a so huaqta'a't nỹecpi ye Judá
5Qaq so Roboán, nache naña co'ollaxa ye Jerusalén, qataq no'oxoosheguem som huaqta'a't nỹecpi maye ỹataqta qanpaxatteua'a maye ỹotta'a't naua nañalo ye Judá. 6Nache no'oxoosheguem ye Belén, Etam, Tecoa, 7Betsur, Soco, Adulán, 8Gat, Maresa, Zif, 9Adorayin, Laquis, Azecá, 10Sorá, Ayalón qataq ye Hebrón, qaq 'eso som huaqta'a't nỹecpi maye qanpaxattaua'a co'ollaxa maye naña ye Judá qataq ye Benjamín. 11Qataq nquigaxatec nataqa'en so lpaqtaxat somayepi, nache ỹanaña so nataxala'pi da ilo'ogue somaye, qataq ỹanem so nallec, aceite, qataq lataxa. 12Qataq ỹanem se'eso huaqta'a't nỹecpi aso npaqtaxanaqtepi qataq taquiaxaipi. Qataq no'oxoosheguem na lpaqtaxatpi 'enauac se'eso huaqta'a't nỹecpi, qaq so Roboán, nache ilotague' ye Judá qataq Benjamín.
13Huaña nache so ntaxaỹaxanaxanecpi qataq so leviitapi maye hueta'a 'enauac ye Israel, naỹa co'ollaxa da huaxaiguet so Roboán, 14nache so leviitapi ca'ai co'ollaxa so na'alhuapi, qataq som laỹepi lalamaxatpi, da yaqto' nqo'ona ye Judá qataq ye Jerusalén, cha'aye so Jeroboán qataq som llalaqpi sa ỹashenem co'ollaxa somayepi da nache queto'ot da ntaxaỹaxanaxanecpi da qaitaxaỹapegue' Ñim Nataxala'. 15Nache so Jeroboán, ỹauo'o co'ollaxa so maiche ltaxaỹaxanaxanecpi da ilo'ogue so atamnaqa'pi da yaqto' qanatamnot som ne'enaqtacpi, qataq soua huaca llalqa maye maiche lo'onataqa somaye. 16Qaq nataqa'en so shiỹaxauapi maye ỹataqta 'eesa da lhuennataxa da ỹo'oxoreetac Ñim Nataxala' maye Natamnaxala' so Israel le'ecpi, ca'ategue co'ollaxa se'eso leviitapi maye taỹa ye Jerusalén, da yaqto' ỹanot nam lachetaqtaxanaxatpi Ñim Nataxala' maye Natamnaxala' so hua'au lta'alpi. 17Qaq 'era da 'eetec se'eso shiỹaxauapi da ỹa'añaqchet da no'onataxanaxac ye Judá, qataq da itauaatac so Roboán, maye llalec so Salomón soua tres vi'iye, nache icaachigui da lataxac so David qataq so Salomón.
18Qaq so Roboán, huaroneguet co'ollaxa aso Majalat, asom llale so Jerimot, maye llalec so David, qataq aso Abijaíl, asom llale so Eliab, qataq laual so Yesé. 19Qaq so Roboán qataq aso Majalat, nache llalqa soua Jeús, Semarías qataq so Soán. 20Ime co'ollaxa qataq huaroneguet aso Macá, asom llalec so Absalón, qaq soua llalqa soomaye le'enaxa't, Abías, Atay, Ziza qataq so Selomit. 21Qaq so Roboán, dieciocho aso lhuapi, qataq sesenta aso ỹaqauga lhuapi, qalaxaye somaye ỹataqta ỹauotec aso Macá, saishet da 'eeta'am da lauoche aso laỹepi lhuapi. Qaq somaye ivi' veintiocho so llalaqpi ỹalleppi qataq sesenta aso llalepi.
22Qaq so Roboán, ỹaneuo co'ollaxa so llalec Abías, som llalec aso Macá, da lataxala' naqa'en so lqaỹañecpi, cha'aye huotaique da ỹaneuo somaye da nta'a. 23Qaq somaye ỹaỹamaxatchiguiñi co'ollaxa da laỹaanataxanaxac, da ỹanem so laỹepi llalaqpi da ilo'ogue 'enauac ye na'alhuapi so Judá, qataq so Benjamín, qataq so qanpaxatteua'a huaqta'a't nỹecpi, nache ỹanem somayepi so ỹataqta qalota nallec, qataq ỹauo'o aso qalota 'alpi da lhuapi.
