Qaq so Abías, nache nalattague' co'ollaxa so Jeroboán. 3Qaq co'ollaq nalat so Abías, nache lca'aua'a so cuatrocientos mil alleppi, maye ỹataqta 'añaxaicpi, qaq so Jeroboán, lca'aua'a so ochocientos mil alleppi, nache dataiguet somaye da nalaate'. 4Huaña nache so Abías, tasheguema añi qasoxonaxa Semarayin, maye huaña añi qasoxonaxa ye Efraín, nache ỹa'alaq, 'eeta': «¡'Am Jeroboán, qataq 'enauac qami' Israel le'ecpi, ñaq aỹem qana'axaỹaxañiỹa! 5Qami', ¿peta'a sa qauaañi da Ñim Nataxala', maye Natamnaxala' na Israel le'ecpi, da ỹanem co'ollaxa so David, qataq na llalaqpi somaye, da chochaq tatec da ilotague' na Israel le'ecpi, co'ollaq ỹo'ot so naỹamaxataxac maye saishet da qanlaxaañe? 6Qalaxaye so Jeroboán, som llalec so Nabat, maye lamaxashec so Salomón, som llalec so David, dataỹa'aguet co'ollaxa so lataxala'. 7Nache huaxaiguet som shiỹaxauapi maye sa do'onataxanpi qataq qauemaicpi, nache dataỹa'aguet co'ollaxa so Roboán, som llalec so Salomón, qaq souaxat da somaye ña nsoqolec qataq saxanaxa da da'añigui ye lauel, nache saishet da dataỹa'aguet somayepi. 8Qaq nagui, qami' ña qansheetaique da qauataỹa'aguet da lo'onataxanaxac Ñim Nataxala', maye ilotague' na llalaqpi so David, souaxat da qami' qalotoiguilo qataq qami' hueto'oto som huaca llalqa oro, maye lo'onataqa so Jeroboán, da yaqto' qanatamnaxala'ai. 9Qataq nataqa'en qami' qauo'oyiỹauec co'ollaxa so ltaxaỹaxanaxanecpi Ñim Nataxala' maye chegoxoguetpi so Aarón, qataq so leviitapi, nache qauauo'oi na qartaxaỹaxanaxanequi da qaue'enaxache nam ỹotta'a't shiỹaxauapi, maye sa ỹauatton Ñim Lo'onatac 'Enauacna, nache camachaqca shiỹaxaua maye ndotauo ca 'oonolec huaca llalec qataq ca siete peenaqpi, nache ntaxaỹaxanaxanec da qanatamnot nam saq 'en atamnaxala'pi. 10Qomi', qalaxaye saishet da qolqa'ai Ñim Nataxala', cha'aye nacheñi Ñim Qanatamnaxala', qataq nam ntaxaỹaxanaxanecpi maye do'onataxaatacot Ñim Nataxala', nachena nam chegoxoguetpi so Aarón, qataq nam huetague' da no'onataxanaxac nachena nam leviitapi. 11Qaq namayepi ye nte'eta qataq ye avit, ỹanot naxa Ñim Nataxala' ana nachetaqtaxanaqte qaỹavigaxatta, qataq na nchenaxanaxat, qataq ỹachalec so qui'itta lmala' ana nauolepi, qaq da avit nache ỹe'eraxatoigui aso ncoỹaraxanaxaquipi maye netagui aso lashe oro. Cha'aye qomi' salaxasoxoguet nam lamaxasoxonaxacpi Ñim Nataxala', maye Qanatamnaxala', qami' qalaxaye qoquiỹa'ai Ñimaye. 12Qaq Ñim Lo'onatac 'Enauacna, nacheñi Ñim Qarataxala', qaq nam ltaxaỹaxanaxanecpi Ñimaye mashe lhuotta da ỹashiiyigui ana nasheerepi, da yaqto' qami' sataỹaqa'agueta da qami' seloquiaxato. Qaq qami' Israel le'ecpi, saishet qome da qauloqui' Ñim Nataxala' maye Natamnaxala' so hua'au qarta'ailpi, cha'aye saishet qome da qanaviqui Ñimaye.»
13Qalaxaye so Jeroboán, mashe 'enapega co'ollaxa da naỹamaxaañi so nalleppi da coleesop so Abías, nache chegaqa'ague da l-laq qataq da dataỹa'ague da iloquiaxan ye Judá. 14Qaq so Judá le'ecpi, co'ollaq ỹamata'ague da pa'aỹa'ague da l-laq, nache nanoma da na Israel le'ecpi chegaqa'ague dam dataỹa'ague qataq da l-laq da iloquiaxan somayepi. Huaña nache iỹaxanot Ñim Nataxala', qataq so ntaxaỹaxanaxanecpi ỹashiiyigui aso nasheerepi. 15Qaq so Judá le'ecpi co'ollaq ỹa'alaxalec de'era alaataxac, nache Ñim Lo'onatac 'Enauacna loxonec so Jeroboán qataq 'enauac so Israel le'ecpi, nache dauegaxan naqa'en so Abías, qataq so Judá le'ecpi. 16Nache so Israel le'ecpi, dataueeguesop co'ollaxa so Judá le'ecpi, cha'aye Ñim Lo'onatac 'Enauacna ỹanem so Judá le'ecpi da loxonec somayepi. 17Nache so Abías, qataq so nalleppi ỹataqta qalota so ỹalauatpi co'ollaxa, qaq se'eso alaataxac nache ỹalauat so quinientos mil alleppi maye lca'aguishecpi so Israel le'ecpi. 18Qaq 'era da 'eetec se'eso na'a'q da so Israel le'ecpi ỹataqta qaica ca la'amaqchec qanqa'en, qaq so Judá le'ecpi ỹataqta huo'o da la'añaxac, cha'aye pi'iỹa'a Ñim Nataxala', maye Natamnaxala' so hua'au lta'alpi.
19Qaq so Abías, nache queto'ot da icogaxaatac so Jeroboán, nache deuotaxanec so huaqta'a't nỹecpi maye ỹotta'a't naua nañalo ye Betel, Jesana qataq ye Efraín, nache lỹaueegue' naqa'en so lauoreuapi nma'piolec se'eso huaqta'a't nỹecpi. 20Qaq co'ollaq ñaq do'onataxaatac so Abías, nache so Jeroboán saishet co'ollaxa da qaltaq ỹe'eguelaxa da huo'o da la'añaxac. Nache ivitta'a da Ñim Lo'onatac 'Enauacna, ique'emaqchet somaye nache ileu. 21Qaq so Abías, nache nquictauec co'ollaxa da la'añaxac. Qaq somaye catorce aso lhuapi, nache ivi' veintidós so llalaqpi ỹalleppi qataq dieciséis aso llalepi. 22Qaq nam laỹepi na'aqtaguecpi qataq nam ỹo'otpi so Abías, nache nanettalec aso nere maye huetalec da na'aqtaguec so na'aqtaxanaxanec Iddo.
