So Asa naỹamaxate' so Ben Adad
1Qaq co'ollaq ivi' treinta y seis vi'iye da nta'a so Asa, nache so Basá maye nta'a ye Israel, nqo'ona da iloquiaxan ye Judá, nache ỹo'ot so lpaqtaxat ye Ramá, yaqto' qaica ca ishet da nqo'ona da na'aqtaxane' so nta'a Asa, maye nta'a ye Judá. 2Huaña nache so Asa, ỹacona aso oro qataq aso plata, ỹachegoxotaigui aso anom laỹe' maye netaigui aso atamnaxaqui maye lalamaqte Ñim Nataxala', qataq aso netaigui so nma' lta'araic, nache ỹamaxa so Ben Adad, maye nta'a ye Siria, maye netaña ye Damasco. Qataq nataqa'en ỹamaxa da la'aqtac, 'eeta': 3«'Onaxaic taxa da aỹem qataq 'am, so'otaq ca qanaỹamaxataxac, 'eeta'am da 'eeteque co'ollaxa soua qarta'al. Qaq aỹem, 'am samaxa na oro qataq na plata, yaqto' 'auanac da 'avia'axaneguet da 'anaỹamaxataxac co'ollaq 'anaỹamaxate' ñi nta'a Basá, maye nta'a ye Israel, da yaqto' aỹem ca'ai.»
4Nache so Ben Adad, ỹaỹamaxareeta da 'eetapeguec so nta'a Asa, huaña nache ỹamaq so lataxala'pi so nalleppi, da iloquiaxan so huaqta'a't nỹecpi maye ỹotta'a't naua nañalo ye Israel, nache deuotaxanec ye Iyón, Dan, Abel Mayin qataq 'enauac so huaqta'a't nỹecpi maye ỹotta'a't naua nañalo ye Neftalí, maye naỹamaqtaxanaqa'pi. 5Qaq so Basá, co'ollaq ỹaỹaten de'era nache ỹa'axaneguet som qaỹo'ottac npaqtaxanaxat ye Ramá. 6Huaña nache so nta'a Asa, ỹamaq 'enauac so Judá le'ecpi, nache somayepi ỹache so coma'pi qataq so 'epaqpi maye hueta'a ye Ramá, som do'onataxaatega co'ollaxa so Basá, co'ollaq qaỹo'ottac so npaqtaxanaxat, qaq nache do'onataxana somaye da no'oxoosheguem so npaqtaxanaxat ye Geba qataq ye Mispá.
7Qaq nache huetoiguilo se'esoua na'axa'te da so na'aqtaxanaxanec Jananí, nqo'ona co'ollaxa so Asa, maye nta'a ye Judá, nache 'enapega 'eeta': «Qaq cha'aye 'auapagaqnauec da 'aupe'etega ñi nta'a ye Siria, qaq saishet da 'aupi'iỹa'a Ñim Nataxala' maye 'Anatamnaxala', ỹoqo'oye saishet qome da 'oxonec na nalleppi ñi nta'a ye Siria. 8¿Qataq saisheto' peta'a da na Etiopía le'ecpi, qataq nam liibiopi da ỹataqta qalota na nalleppi 'añaxaicpi, qataq qalota na netalec na caipi qataq nam netangui ana nalaataxaqui naigona? Qaq nache 'ena'am co'ollaxa Ñim Nataxala', 'am ỹanem da 'oxonecpi cha'aye 'aupi'iỹa'a co'ollaxa Ñimaye. 9Qaq cha'aye da lmeenaxanaxac Ñim Nataxala' ilotalec 'enauac ana 'alhua, da yaqto' itauan cam ỹataqta ỹa'amaqten Ñimaye. Qalaxaye 'am, de'era 'auo'ot qoneta'am ca huo'o da aloic, qaq ỹoqo'oye nagui, nache de'era taỹa'ague da 'aro'onataxanaxac, qalota qome na alaataxacpi.»
10Huaña nache so Asa, ỹataqta dalemataỹa so na'aqtaxanaxanec, nache damaxasoxoolec da qoỹanaigui aso ncoñetaxanaxaqui. Nataqa'en nache huetoiguilo se'esoua na'axa'te da so Asa, huo'o so ỹataqta sa iyacnapecpi se'eso nhuo' le'ecpi.
Da l-leuaxa so Asa
11Qaq da na'aqtaguec so Asa, chegoqchiguiña co'ollaq cheta'ague da do'onataxan, nache ivitta'a so pa'atec de'era lo'onataxanaxac, nanettalec aso nere maye huetalec da na'aqtaguec so nta'alpi ye Judá qataq ye Israel. 12Qaq co'ollaq mashe ivi' treinta y nueve vi'iye da lo'onataxanaxac so Asa, nache tatoiguilo naua lchel da lhuetaxanaxa, qaq na'aictaxa co'ollaxa da ỹataqta lta'araic de'era lhuetaxanaxa, qalaxaye saishet da nmitaique Ñim Nataxala', nacherata da nqarena som datannataxaatacpi. 13Qaq co'ollaq mashe cuarenta y uno vi'iye da lo'onataxanaxac so Asa, nache ileu. 14Qaq co'ollaq qailareñi, nache qaỹachaigui aso huachiqui maye maiche iqataxanai' co'ollaxa somaye, asom naigui so huaqta'a't nỹecpi maye lalamaxat so David. Nache qaỹachangui aso laỹe' maye nlaqchigui na coraxat, qataq nam ỹotta'a't maye ama na laita maye lo'onatac som shiỹaxauapi maye ỹataqta ỹaỹaten da ỹo'ot nam coraxat. Ime, nache qaỹauo'o so ỹataqta lta'araic norec, da yaqto' qaỹauo'o da llo'oxoyec somaye.
