So Salomón naỹamaxate' so Jirán
1So Salomón, huo'o da lhuennataxa da no'oxoosheguem aso atamnaxaqui maye lalamaqte Ñim Nataxala', qataq so maiche lma' lta'araic. 2Qaq da yaqto' ỹo'ot damaye, nache ỹauo'o so setenta mil shiỹaxauapi da yaqto' deỹoxosoxon, qataq so ochenta mil da yaqto' ichec na coma' da huaña aso qasoxonaxa, qataq tres mil seiscientos som ilo'ogue se'eso 'onataxanaxaicpi.
3Ime nache so Salomón ỹamaxa da la'aqtac so Jirán, maye nta'a ye Tiro, 'eeta': «Aỹem 'auo'otec qome dam 'auo'otec co'ollaxa so ita'a David, da 'auamaqtega co'ollaxa na qo'oipaqpi cedro da yaqto' ỹo'ot so lma' lta'araic. 4Cha'aye aỹem so'ot qome aca atamnaxaqui maye lalamaqte Ñim Nataxala' maye Ñatamnaxala', nache sanot qome Ñimaye da yaqto' savigaxat ca ichenaxanaxat maye ama da laitaỹaxac da sho'oxoren Ñimaye, qataq nache sachaigui acamaye aca nauolepi maye sa qaishetapec, qataq nache huaña da saneuo aca nachetaqtaxanaqtepi qaỹavigaxatta, ye nte'eta, qataq ye avit, qataq ye na'a'q mataxaqui, qataq da dalaxaic ñi ca'agoxoic, qataq na laỹepi naponaxacpi maye laloxoqui da qaỹo'oxoren Ñim Nataxala', maye nache 'eetai' qome da qaỹo'ottac ne'ena Israel. 5Qalaxaye aca'aca atamnaxaqui maye ño'oxoosheguem qome, iuen da ỹataqta late'erai ñaqa'en, cha'aye Ñim Qanatamnaxala' ỹataqta lta'araic, napacalec na laỹepi atamnaxala'pi. 6Qaq ỹoqo'oye ¿negue'tom ca ishet da no'oxoosheguem aca atamnaxaqui da lma' Ñimaye ye nam piguem, qataq 'enauac dam la'amaqchec, sa ivi' ye lcachiguiñi Ñimaye? ¿Qaq negue'to' aỹem da ño'oxoosheguem aca atamnaxaqui da lma' Ñimaye, qalaxaye na'aictoxo' da nacherata da savigaxat ca ichenaxanaxat da sho'oxoren Ñimaye? 7Qaq ỹoqo'oye aỹem 'anamaxa qome ca ỹale maye sa nqalaate' da ỹo'ot na lcat oro, plata, bronce qataq na laỹepi lcatpi, qataq da ỹo'ot na hualoq laỹe togaxaraic, qataq na tocalec, qataq na malaxaraic da lo'oxoỹaxac. Qataq da ỹaỹaten nataqa'en da ỹo'ot na leraxat nam chochena, da yaqto' ntaune' nam ỹaanaxanaxaicpi ỹamaxashecpi maye hueta'a na Judá, qataq na Jerusalén, maye naỹamaxate' co'ollaxa so ita'a David. 8Nataqa'en aỹem 'anamaxa qome ca qo'oipaqpi maye chegaqaña ye Líbano: Nam cedro, ciprés qataq na sándalo, cha'aye saỹaten da na 'aramaxashecpi ỹaỹaten da ichec na qo'oipaq maye chegaqaña ye Líbano. Qaq na ỹamaxashecpi itauan qome ca 'aramaxashecpi, 9da yaqto' ỹaqataxanai' ca qalota qo'oipaqpi, cha'aye aca atamnaxaqui maye so'ot qome, ỹataqta late'erai qataq ỹataqta 'onaxai. 10Qaq ca 'aramaxashecpi maye ichec qome ca qo'oipaqpi, sanem qome ca cuatro millones cuatrocientos mil kilos na trigo, qataq ca cuatro millones cuatrocientos mil kilos na cebada, qataq ca cuatrocientos cuarenta mil litros na lataxa, qataq ca cuatrocientos cuarenta mil litros na aceite.»
11Nache so Jirán maye nta'a ye Tiro, ỹamaxa aso lere so Salomón maye huetalec da la'aqtac, 'eeta': «Ñim Nataxala', 'am ỹanem co'ollaxa da 'am lta'a na Israel le'ecpi, cha'aye Ñimaye ỹauotec ne'ena lalamaxat nhuo' le'ecpi.» 12So Jirán nataqa'en, 'enapec: «¡Ỹataqta qaỹo'oxoren qome Ñim Nataxala', maye Natamnaxala' na Israel le'ecpi, maye lo'onatac na piguem qataq ana 'alhua, cha'aye ỹanem co'ollaxa so nta'a David, ñim llalec maye ỹataqta ỹaanaxanaxaic, ỹaanataxanaxaic, qataq ỹaỹaten da ntelañi maye ỹo'ot qome aca atamnaxaqui maye lalamaqte Ñim Nataxala', qataq ca nma' lta'araic maye maiche lalamaxat! 13Qaq aỹem 'am samaxa na Jirán, nam ỹale maye ỹaanaxanaxaic qataq ỹaanataxanaxaic. 14Qaq namaye nache llalec aso 'alo maye chegoxoguet so Dan, qataq som ỹale maye Tiro le'ec. Qaq namaye ỹataqta sa nqalaate' da ỹo'ot na lcat oro, plata, bronce, qataq na laỹepi lcatpi, coma', qo'oipaq, qataq na hualoq laỹe naueralec da ltogaxa, togaxaraic qataq na no'on lino, qataq ỹaỹaten da ỹo'ot na ỹotta'a't le'enaqtacpi, qataq nam laỹepi ne'enaqtacpi maye ỹotta'a't da no'onataguec maye qaỹamaxalec. Qaq nache huaxaiguet nam sa nqalatpi maye 'aramaxashecpi maye 'am no'onaxata'aguet co'ollaxa so 'arta'a David, maye ỹataxala'. 15Qaq ỹoqo'oye nagui 'am ỹataxala', 'anamaxa qome na 'aramaxashecpi ca trigo, cebada, aceite qataq cam lataxa maye 'auachaxanapec. 16Qaq qomi' nache sechegaq qome ana 'epaqpi ye Líbano, maiche acam lcata acam 'auen nache 'am seroxota, sachaqangui qome ana notaxaqui maye quiguingui na 'etaxat da tateua'a ñaqa'enaq ye Jope. Qaq 'am, maiche qouapegue' da qaira'a ye Jerusalén.»
17Ime nache so Salomón ỹo'ot aso le'enaxat lmalate 'enauac so chegaqauec shiỹaxauapi maye netaña ye Israel, asom ca'atalec aso lo'onata co'ollaxa so David, maye lta'a somaye, nache se'eso shiỹaxauapi ivi' ciento cincuenta y tres mil seiscientos ye lcata. 18Qaq nache ỹachegoxotaigui somayepi so setenta mil nỹoxosoxonaqpi, qataq ochenta mil so ichectac na coma' maye huaña aso qasoxonaxapi, qataq so tres mil seiscientos da yaqto' ilo'ogue so 'onataxanaxaicpi.
