So Josafat loxonec ye Moab qataq ye Amón
1Qaq co'ollaq mashe qaỹoqtegue de'era, nache so moabiitapi qataq so amoniitapi, huaxaiguet so meuniitapi, da iloquiaxan so Josafat, 2huaña nache huo'oi soua ỹauo'o da la'axaỹaxac so Josafat, nache 'eeta': «Chegoqchiguiña ye Edom, yem pa'aitague da le'ego aye Auaxai Leuaxai, nam anacta maye ỹataqta qalota alleppi da 'am iloquiaxan, qaq namayepi mashe nvita ye Jasesón Tamar, maye le'enaxat nagui da Engadí.»
3Nache so Josafat, ỹataqta huo'o da lcolanaxa, nache ỹe'eguenot Ñim Nataxala', ỹoqo'oye ỹamaxa da la'aqtac 'enauac so netaña ye Judá da ỹo'ot da nqouaqchetaxac. 4Huaña nache 'enauac so shiỹaxauapi maye chegaqa'a so huaqta'a't nỹecpi maye ỹotta'a't naua nañalo ye Judá, laỹona't da yaqto' iỹaxanot Ñim Nataxala', da ỹauo'o ca ntaunaguec. 5Nache so Josafat, nachaañi co'ollaq netangui na laiñi so Judá le'ecpi, hueta'a ye datatauga so dalaxai nqasoxoc aso atamnaxaqui maye lalamaqte Ñim Nataxala', 6nache 'eeta': «'Am Nataxala' maye Natamnaxala' so hua'au qarta'alpi, ¿saisheto' da nache 'Am Atamnaxala', maye qoneta'ague da piguem, qataq 'aulotague' na ỹotta'a't shiỹaxauapi? Qaq nam 'arhua'q huetaiguilo da 'ara'añaxac, qataq da qonec, maye qaica ca nala'aguet da npaxateguet. 7'Am Qanatamnaxala', ỹauaachigui co'ollaxa 'anqa'en ne'ena 'aralamaxat nhuo' Israel le'ecpi da 'auo'orauec som shiỹaxauapi maye netalec co'ollaxa ne'ena 'alhua, nache 'aỹa'anem co'ollaxa nam chegoxoguetpi so 'anauochaxaua Abraham, da yaqto' nache 'eetai' da lalamaxat 'anqa'en. 8Qaq co'ollaq mashe netalec namaye nache nauaxaỹaxaasheguem ana atamnaxaqui maye 'aralamaqte, nache 'enapec co'ollaxa: 9‹Da qomi' taleguete ca qauem maye qanhuaxanaguec, huo'otaq alaataxac, napaxaco, huo'otaq nqouaxa, nache ñanaxaua'a ana'ana atamnaxaqui, maye qoueta'a naxa, nache da 'am seỹaxanaqot souaxat ca qarhuogoxo, nache qomi' 'aua'axaỹalo qataq qomi' 'anca'alaxatrec.› 10Qaq nagui, ña 'aula'a na amoniitapi, qataq na moabiitapi, qataq nam chegaqa'a añi qasoxonaxa ye Seír, maye sa 'auashenem co'ollaxa na Israel le'ecpi da ỹa'axasoxoolec ye na'alhua namayepi, co'ollaq chegaqa'a ye Egipto, maye nacherata da huaỹoxolec 'anqa'en da yaqto' saishet da nlaxaañi. 11Qaq namayepi nagui, qomi' isheetenegueta da anac da qomi' iloquiaxa'n, qataq qomi' ỹo'oldauec da yaqto' qolqa'ai ne'ena 'alhua maye qomi' 'aỹa'anema co'ollaxa da ỹataqta qaralamaxat. 12Qaq 'Am Qanatamnaxala', ¿peta'a saisheto' da 'auo'ot ca nhuaxanaguec namayepi? Cha'aye qomi', qaica ca qara'añaxac da sataỹaqa'aguet ne'ena ỹataqta qalota alleppi, maye anac da qomi' iloquiaxa'n. ¡Cha'aye qomi' sa saỹatenaq ca shenaqtec, ỹoqo'oye 'am sachoqto'ot da qanaquitaxac!»
13Qaq nache 'enauac so Judá le'ecpi, nachatto'ot Ñim Nataxala', ỹalectauo so 'alpi, so llalaqpi, qataq so qapio'olecpi ñaqpiolec. 14Qaq co'ollaq lapoota'a't se'eso nhuo' le'ecpi, nache so Jahaziel, som llalec so Zacarías, qataq laual so Benaías, som llalec so Jeiel, qataq laual so Matanías, som leviita maye chegoxoguet so Asaf, somaye taigui so Saqcha'a La'añaxac Ñim Nataxala', 15nache so Jahaziel, 'eeta': «Qami' shiỹaxauapi maye qarma'ai na Judá, Jerusalén qataq 'am nta'a Josafat, ñaq aỹem qana'axaỹaxañiỹa, Ñim Nataxala' da la'aqtac, 'eeta': ‹Saishet da qayi'iitac huo'otaq da qauqaulliitac da qauloỹa'a ne'ena qalota alleppi, cha'aye de'era alaataxac saishet da qaralamaxache, maye nachaỹem da ỹalamaxat. 16Qonte', qom namayepi mashe nactasheguemgue na ñiguisheguem da naỹasheguema na pa'asheguem ana Sis, nache qauataiỹa'aguet qome namayepi qom huaña so la'auaxac, maye datatta ye toolec 'alhua ye Jeruel. 17Qalaxaye saishet qome da nache qami' da qauloqui de'era loquiaxac, nacherata da qañe'emaxache qome da qoviita'a cam qarauanaxanaqa'ai, yaqto' qauauañiichigui da lca'alaqtaxanaxac Ñim Nataxala', da qami' taleguete. Qami' shiỹaxauapi maye qarma'ai na Judá, qataq na Jerusalén, saishet da qayi'iitac huo'otaq da qauqaulliitac, qoqui qonte' da qauataiỹa'aguet namayepi, cha'aye aỹem Nataxala', qami' soota'agueta qome.›»
18Nache so Josafat, qataq 'enauac so shiỹaxauapi maye lma' ye Judá, qataq ye Jerusalén, ỹa'alyiñi naua l-llecte, nache ivira'aguet naqa'en na latap na 'alhua, da ỹo'oxoren Ñim Nataxala'. 19Nache so leviitapi maye chegoxoguetpi so Quehat, qataq so Coré, nachaañi nache ỹataqta nlamaxaren da ỹo'oxoren Ñim Nataxala' maye Natamnaxala' so Israel le'ecpi.
20Qaq so nte'etom so lỹa na'a'q, nache ñisheguem somayepi da yaqto' taỹa ye toolec 'alhua ye Tecoa. Qaq co'ollaq mashe ivita da jec, nache so Josafat, nachaañi nache 'eeta': «Ñaq aỹem qana'axaỹaxañiỹa qami' shiỹaxauapi maye qarma'ai na Judá, qataq na Jerusalén, qaupi'iỹa'ai qome Ñim Nataxala' maye Qanatamnaxala'ai, yaqto' qami' nca'alaxatrec, qataq qaupi'iỹa'ai qome nam la'aqtaxanaxanecpi Ñimaye, yaqto' 'enauac cam qauo'oche ỹataqta ỹaỹamaqchiguiñi.»
21Qaq so Josafat co'ollaq ime da nnate' so shiỹaxauapi, nache ỹauo'o so 'onaxanaxaicpi, qataq ỹauo'o so logoxot maye sa qaishetapec maye huo'o na llo'oxoraxatpi, da yaqto' hua'auta'ague da taỹa'ague so alleppi da ỹo'oxoreetac Ñim Nataxala', da ỹo'ootac so no'onec maye 'eeta': «Qaỹa'añiỹot da qana'achecỹaxaqui Ñim Nataxala', cha'aye da lauotaxanaqtaic chochaq tatec.»
22Qaq somayepi co'ollaq mashe ỹo'on se'eso no'onec da yo'oxonnataxan, nache Ñim Nataxala' ỹo'ot da nsomaxana't naqa'en so amoniitapi, moabiitapi qataq so lma' añi qasoxonaxa Seír, maye anac co'ollaxa da iloquiaxan so Judá le'ecpi, nache Ñim Nataxala' loxonec somayepi. 23Qaq cha'aye so amoniitapi qataq so moabiitapi, iloquiaxan so lma' añi qasoxonaxa Seír, nache nmatchiguiñi da ỹalauat, qaq co'ollaq mashe nmichiguiñi naqa'en somayepi, nache somayepi qaltaq maiche taỹa't da nalaara't. 24Qaq som alleppi Judá le'ecpi co'ollaq ivita yem qaỹoqotcheguemec maye huaña da ishet da qaỹallelec ye toolec 'alhua, nache ỹamatauga so alleppi maye npa'aguenaxauapi, nache ila'a so leuaxaicpi da laguelec yi'iye 'alhua, nache qaica co'ollaxa ca ishet da naneltaxan. 25Huaña nache so Josafat, qataq so nalleppi, tauga co'ollaxa da ỹacona so logoxoshetpi somayepi, nache ilalec da se'eso leuaxaicpi ỹataqta sallaxanecpi, huo'o so nogoxot, 'otaxatpi maye no'on, nache somayepi ỹacona da ỹauo'o lalamaxat se'eso nogoxoshetpi. Qaq se'eso nogoxoshetpi ye ỹataqta qalota, nache saishet da nalo'oguet da ỹache, qaq ỹoqo'oye tres na'axa'te da lapootac somayepi.
26Qaq co'ollaq ivita so na'a'q cuatro, nache somayepi laỹonqa' co'ollaxa ye ca'amegue ye Beraca, qaq nache huaña yemaye da ỹanot da llo'oxonnataxanaxac Ñim Nataxala', qaq ỹoqo'oye yemaye nache qoỹanagui da le'enaxat ca'amegue Beraca, qaq de'era le'enaxat nache ivitta'a nagui. 27Qaq ime co'ollaxa nache 'enauac so shiỹaxauapi maye lma' ye Judá, qataq ye Jerusalén, datalec so Josafat da ỹe'eguelaxa ye Jerusalén, qaq ỹataqta ỹa'amaqchiguiñi cha'aye Ñim Nataxala' ỹanem somayepi da ntonaxac, souaxat da huesoueeguesop so npa'aguenaxauapi. 28Qaq co'ollaq ivita ye Jerusalén, nache taua'a aso atamnaxaqui maye lalamaqte Ñim Nataxala', nache iviqueetapigui aso arpapi, qataq aso laỹepi nviquepi maye nataqa'en huo'o na lquetpi, qataq aso nasheerepi.
29Qaq som ỹotta'a't shiỹaxauapi co'ollaq ỹaỹaten da Ñim Nataxala', nacheñi Ñim deloctague' so npa'aguenaxauapi so Israel le'ecpi, nache 'enauac somayepi ỹataqta ñi'iỹa Ñim Lo'onatac 'Enauacna. 30Qaq ỹoqo'oye da lo'onataxanaxac so Josafat, ỹataqta huo'o da nlagaxayec, cha'aye Ñim Lo'onatac 'Enauacna ỹanem da qaica cara somaye, qataq da nhuoteete' so shiỹaxauapi maye lauoreuapi.
Da na'aqtaguec da lo'onataxanaxac so Josafat
31Qaq so Josafat mashe ivi' treinta y cinco vi'iye da nachaalataxac co'ollaq ỹacoolec da lo'onataxanaxac da nta'a ye Judá, nache veinticinco vi'iye da ilotague' ye Jerusalén. Qaq aso late'e le'enaxat Azuba, asom llale so Siljí.
32Qaq so Josafat, ỹataqta quetelec da no'on lataxac so lta'a Asa, nache saishet da ca'ai da llecỹaxac somaye, nacherata da ỹo'ot da ỹataqta ỹaỹamaxareeta Ñim Nataxala'. 33Qalaxaye saishet da nlaxaañi so atamnaqa'pi maye naña som qaỹoqotcheguemecpi, cha'aye se'eso nhuo' le'ecpi ñaq saxanaxa da ỹataqta imato'ot da lquiyaqteỹaxac Ñim Natamnaxala' so hua'au lta'alpi.
34Qaq nam laỹepi na'aqtaguecpi so Josafat, som chegoqchiguiña co'ollaxa qataq so loga't da lo'onataxanaxac, nache nanettalec aso nere maye huetalec da na'aqtaguec so Jehú, som llalec so Jananí, maye nataqa'en ỹalectaigui aso nere maye nanettalec da na'aqtaguec so nta'alpi ye Israel.
35Qaq co'ollaq ime de'era nache so Josafat, maye nta'a ye Judá, naỹamaxate' so Ocozías, som nta'a ye Israel, maye ỹataqta qauemaic. 36Qaq nache huaxaiguet somaye da ỹo'o't aso notaxaquipi da qanayiguingui na 'etaxat, da yaqto' qanqo'ona ye Tarsis, nache huaña ye Ezión Guéber da ỹo'ottrac asomayepi. 37Huaña nache so Eliezer, som llalec so Dodías, maye lma' ye Maresa, huo'o so la'aqtaxanaxac ỹanem so Josafat, 'eeta': «Ñim Nataxala', ilaxachigui qome nam 'auo'ottacpi souaxat da 'auauaxaiguet so Ocozías.» Qaq huaña, nache aso notaxaquipi dolagui, nache somayepi saishet da nqo'ona ye Tarsis.