Da lo'onataxanaxac so Jorán
1Qaq co'ollaq ileu so Josafat, nache qailareña ye huaña so hua'au lta'alpi maye huaigui ye huaqta'a't nỹecpi maye lalamaxat so David. Qaq da lo'onataxanaxac da nta'a, talec so llalec Jorán. 2Qaq soua lqaỹa't somaye, le'enaxa't Azarías, Yejiel, Zacarías, Micael qataq Sefatías. Qaq 'enauaque soomaye da llalqa so Josafat, maye nta'a ye Judá. 3Qaq so lta'a soomaye, ỹauo'o co'ollaxa so nme ñi 'oonolec soomaye chegaqaigui so oro, qataq plata, qataq som ỹataqta no'on nogoxoshetpi. Qataq nataqa'en ỹanem so qanpaxattaua'a huaqta'a't nỹecpi maye ỹotta'a't naua nañalo ye Judá, qalaxaye da lo'onataxanaxac da nta'a, qalaq ỹanem so Jorán, cha'aye nacheso som ỹe llalec. 4Qalaxaye so Jorán co'ollaq mashe naỹamaxalec da lo'onataxanaxac so lta'a, nache ỹalaua't soua lqaỹa't irolec so ỹeelonec, qataq nataqa'en huo'oi soua ỹalaua't nataxala'ate ye Israel. 5Qaq somaye mashe ivi' treinta y dos vi'iye da nachaalataxac co'ollaq ỹacoolec da lo'onataxanaxac, qataq ocho vi'iye da lo'onataxanaxac da ilotague' ye Jerusalén. 6Qalaxaye somaye quetegue da llecỹaxac so nta'alpi ye Israel, qataq som chegoxoguetpi so Ajab, cha'aye aso lhua somaye maiche llale so Ajab, ỹoqo'oye nam ỹo'otpi somaye ỹataqta sa ỹaỹamaxaren Ñim Nataxala'. 7Qalaxaye Ñim Nataxala' saishet da nlaxaañi som chegoxoguetpi so David, souaxato' da naỹamaxate' co'ollaxa so David, qataq da ỹan co'ollaxa so la'aqtac da nache 'eetai' naqa'en da 'ettaigui aso ncoỹaraxanaxaqui da ỹanem somaye qataq so llalaqpi.
8Qaq soua na'axa'te maye huaiguilo da lo'onataxanaxac so Jorán, nache so Edom le'ecpi dataỹa'aguet co'ollaxa ye Judá, nache ỹauo'o so maiche lta'a. 9Huaña nache so Jorán jec, nnaicapegue' so 'amaqtaqaic lataxala'pi so nalleppi, nache lỹatec aso laigonapi nalaataxaquipi, qaq se'eso pe nache ñisheguem somaye, qataq som 'amaqtaqaic lataxala'pi so nalleppi, nache iloquiaxan so edomiitapi maye coleesop co'ollaxa somayepi. 10Huaña co'ollaxa nache so Edom le'ecpi ishet da nỹotec da huesoueeguesop da la'añaxac ye Judá, nache ivitta'a nagui. Qaq nache huaiguilo co'ollaxa se'esoua na'axa'te da nataqa'en so lma' ye Libna da nỹotec, cha'aye souaxato' da so Jorán, ca'ai Ñim Nataxala' maye Natamnaxala' so hua'au lta'alpi. 11Qaq nataqa'en somaye no'oxoosheguem so atamnaqa'pi da qanatamnot so ỹaqa'a atamnaxala'pi, maye huaña aye qasoxonaxapi ye Judá, qaq somaye nacheso som ỹauega da so lma' ye Jerusalén nquisheshigui da la'amqaanataxanaxac, qataq huaỹoxouec naqa'en so lma' ye Judá.
12Qaq huaña nache so Jorán, ivita aso lere so na'aqtaxanaxanec Elías, maye 'eeta': «Ñim Nataxala' maye Natamnaxala' so 'arta'a David, da la'aqtac 'eeta': ‹Qaq souaxat da saishet da qoquetelec da llecỹaxac so 'arta'a Josafat, qataq so Asá, som nta'a ye Judá, 13maye nacherata da qoquetelec da lataxac so nta'alpi ye Israel, qaq nache 'auasouaxat da na lma' ye Jerusalén qataq na lma' ye Judá, da saỹalaxaguet Ñim Nataxala', nache 'eeta'am so llalaqpi so Ajab. Qataq nataqa'en 'aualauat so 'arqaỹañecpi, som no'on da lataxac maye saishet da 'am 'eeta'am. 14Qaq ỹoqo'oye Ñim Nataxala', talec qome naqa'en ca lta'araic nalolaxa na 'arhuo' le'ecpi, 'aỹa'alaqpi, 'arhuapi qataq 'enauac nam 'aralamaxatpi. 15Qataq 'am talec naqa'en ca qalota nalolaxapi. Qataq taigui naqa'en na 'arhuel ca 'arhuetaxanaxa, maye qaica ca lata', nache ivitta'a da nnoxotraue'c naua 'ailli'ishi.›»
16Huaña, nache Ñim Nataxala' ỹo'ot da so filisteopi qataq so arabeopi, maye lauoreua so cusiitapi ỹataqta dalemata, nache dataỹa'aguet so Jorán, 17ỹoqo'oye somayepi jec da taỹa ye Judá, nache huenoxotaua'a yi'iye 'alhua, nache ỹacona 'enauac so no'on nogoxoshetpi maye huetaigui so lma' lta'araic so nta'a, qataq nataqa'en so llalaqpi qataq aso lhuapi so Jorán. Qaq nachesota so Joacaz, som na'asa llalec somaye da no'onañi. 18Qaq co'ollaq ime 'enauac de'era, nache Ñim Nataxala' tatoigui naqa'en ana da'am so Jorán so nalolaxa maye qaica ca lata'. 19Qaq co'ollaq mashe qaỹoqteguelo soua na'axa'te, co'ollaq ivi' soua dos vi'iye, nache somaye nnoxotraue'c naua lailli'ishi souaxat se'eso lalolaxa, nache ilem da ỹataqta lta'araic nqui'ic. Qaq so lauo' le'ecpi somaye qalaq saishet da ỹe'eraxatoigui ca norec da yaqto' qaỹo'oxoren somaye, da 'eeta'am qanqa'en so hua'au lta'alpi. 20Qaq somaye mashe treinta y dos vi'iye da nachaalataxac co'ollaq ỹacoolec da lo'onataxanaxac, qaq ocho vi'iye da ilotague' ye Jerusalén. Qaq co'ollaq ileu, nache qaica ca nỹeelec, qaq co'ollaq qailareñi nache qaỹachaigui so huaqta'a't nỹecpi maye lalamaxat so David, qalaxaye saishet da qaỹalecnoigui aso nhuachiquipi so nta'alpi.
