1Qaq so vi'i siete, nache so Joyadá damaxasoxona da anac so lataxala'pi so alleppi, som Azarías, som llalec so Joroham, Ismael, som llalec so Johanán, Azarías, som llalec so Obed, Maseías, som llalec so Adaías, qataq so Elisafat, som llalec so Zicri, nache naỹamaxateto da huaxaigueta soomaye. 2Nache soomaye coleerelec 'enauac so 'alhua ye Judá, nache laỹona't so leviitapi maye chegaqa'a so huaqta'a't nỹecpi maye ỹotta'a't naua nañalo ye Judá, qataq so lataxala'pi so nhuo' le'ecpi ye Israel, nache 'enauac somayepi da taỹa ye Jerusalén. 3Qaq huaña yemaye nache 'enauac so lapoota'a'tpi naỹamaxate' so nta'a, huaña aso atamnaxaqui maye lalamaqte Ñim Nataxala'.
Nache so Joyadá, 'enapeco': «Qaq 'ena na llalec so nta'a, qaq namaye nachena qome na nta'a, cha'aye nachera da ỹachaxanapec co'ollaxa Ñim Nataxala', da ỹanem nam chegoxoguetpi so David. 4Qaq nagui, qami' qaicolaxachiguilo qome, nache ca 'oonolec laỹe da qoñiita qami' ntaxaỹaxanaxanecpi qataq leviitapi, qauloỹeegue nam ñegueuopi añi atamnaxaqui ca na'a'q mataxaqui. 5Qaq ca laỹepi qalaq ilo'ogue qome ñi nma' lta'araic, qaq ca laỹepi ilo'ogue qome so lo'oxonaxala' ye ñegueuo, qaq na nhuo' le'ecpi hueta'a qome ye nqasoxoc añi atamnaxaqui maye lalamaqte Ñim Nataxala'. 6Qalaxaye qaica qome ca ishet da pa'aigui añi atamnaxaqui maye lalamaqte Ñim Nataxala', nachenata nam ntaxaỹaxanaxanecpi, qataq na leviitapi, cha'aye namayepi mashe qaiỹotauga da huapegue' de'era no'onataxanaxac, qaq nam laỹepi nhuo' le'ecpi, qalaq 'enauac qome da ilotague' na pa'auec, da yaqto' ỹo'oxoren Ñim Nataxala'. 7Qaq nam leviitapi coleesop qome so nta'a, nache ñi 'oonolec nasoqta'a ca lo'ogoxonaxat, qaq da huo'o camachaqca da nshetaique da inoxotaua'a añi atamnaxaqui, nache qaỹalauat, qaq nache saishet qome da qandoxottec so nta'a da huo'o ca taigue.»
8Qaq so leviitapi qataq 'enauac so lma' ye Judá, ỹo'ot 'enauac nam ỹamaxalecpi so ntaxaỹaxanaxanec Joyadá. Nache ñi 'oonolec so nataxala'pi iỹotauga so maiche nalleppi, som inoxoneuo ye na'a'q mataxaqui, qataq som ime da lo'onataxanaxac se'eso na'a'q, cha'aye so ntaxaỹaxanaxanec Joyadá, saq ỹanem da jec na mashe ime da lo'onataxanaxac. 9Huaña nache so Joyadá, ỹanem ñi 'oonolec so lataxala'pi so alleppi aso taquiaxaipi, qataq aso ỹotta'a't npaqtaxanaqtepi maye lalamaqte co'ollaxa so nta'a David, maye netaigui aso atamnaxaqui maye lalamaqte Ñim Lo'onatac 'Enauacna. 10Ime, nache naloqchiiñi 'enauac se'eso shiỹaxauapi, qaq ñi 'oonolec somayepi nasoqta'a aso lataquiaxai, chegoqchiguiña da pa'aigue da aloic, nache ivitta'a na pa'aỹa'ague da ne'emaq añi atamnaxaqui, nache qaicoleesop aso nca'atoxonaxalate da qanauaatalec so nta'a. 11Huaña nache so Joyadá, qataq soua llalqa nqatrec so llalec so nta'a, nache ỹanaxanaxangui aso naro'o da nta'a, qataq ỹanem aso nere maye nanettalec da aỹamaxataxac, qaq co'ollaq ime da icorelec na lqaic somaye, nache 'enauac se'eso shiỹaxauapi ỹa'alaxalec somaye, 'eeta': «Nache 'eetai' qome da nta'a.»
12Qaq aso Atalía, co'ollaq hua'axaỹaique da l-lamaxa da la'alaxac so shiỹaxauapi, maye ỹa'alaqtalec so nta'a, nache nqo'ona aso atamnaxaqui maye lalamaqte Ñim Nataxala' asom hueta'a 'enauac som shiỹaxauapi. 13Nache ila'a so nta'a, nachattañi huaqta'ai' aso nhuoqte maye naña so ñegueuo, nache huetaua'a na laỹe so nataxala'pi, qataq so nvique lo'opi, qataq 'enauac so shiỹaxauapi maye ỹataqta ỹa'amaqchiguiñi, ỹashettapigui aso lasheerepi, qataq som 'onaxanaxaicpi ivictapigui aso lviquepi da ỹauecta'aguet da ño'oxonnataxanaxac. Huaña nache aso Atalía, ncolaxata'aisalo soua alogo nache ỹa'alaq, 'eeta':
¡Aỹem qaique'elaxat! ¡Aỹem qaique'elaxat!
14Qalaxaye so ntaxaỹaxanaxanec Joyadá 'enapega da npa'auec so lataxala'pi so alleppi nache 'enapega, 'eeta':
«Ña qanqacheeuec ara'ara 'alo, qaq da huo'o cam ca'ategue aramaye nache qaualauache qaroỹeelec ca ỹeelonec.»
Cha'aye so ntaxaỹaxanaxanec saỹashen da qaỹalauat asomaye da huaña aso atamnaxaqui maye lalamaqte Ñim Nataxala'. 15Qaq ỹoqo'oye qaỹaconeua'a asomaye nache qaỹauegueuga so lasom so lma' so caipi, maye taỹauga so nma' lta'araic, huaña nache qaỹalauat.
16Ime, nache so Joyadá, naỹamaxate' 'enauac so nhuo' le'ecpi qataq so nta'a, da yaqto' somayepi nache lalamaxat Ñim Nataxala'. 17Qaq co'ollaq ime de'era, nache 'enauac somayepi da nqo'ona aso atamnaxaqui da qanatamnot so Baal, nache nlaxaañi asomaye qataq ilaxachigui aso nca'atoxonaxalatepi, qataq so ne'enaqtacpi atamnaxala'pi. Qataq huaña so naloteuga so nca'atoxonaxalatepi da ỹalauat so Matán, maye ltaxaỹaxanaxanec so Baal. 18Qaq ime, nache so Joyadá, ỹauo'o so alleppi da iuattague' aso atamnaxaqui maye lalamaqte Ñim Nataxala', qaq so ntaxaỹaxanaxanecpi qataq so leviitapi nache ilotague' somayepi, som mashe naloqchiiñi co'ollaxa so David, da yaqto' nmeeta'a't da huapegue' da no'onataxanaxac asa'aso atamnaxaqui, da ỹaategueuo ana nachetaqtaxanaqtepi maye qaỹavigaxatta, cha'aye nanettalec aso lmalate na nqataxacpi maye ỹan co'ollaxa so Moisés, qataq da machiguiñi da do'onaxaatac, nache qaipactelec da la'aqtac so David. 19Nataqa'en ỹauo'o som ilotague'pi so ñegueuopi aso atamnaxaqui maye lalamaqte Ñim Nataxala', yaqto' saishet da inoxoneuo ca camachaqca shiỹaxaua, maye saishet da qui'itta da lataxac. 20Ime, nache iỹaxana so lataxala'pi so alleppi, qataq som shiỹaxauapi maye 'amaqtaqaicpi, qataq som nta'alpi maye ilotague' so shiỹaxauapi, qataq 'enauac som shiỹaxauapi maye lma' yi'iye 'alhua, da yaqto' nnaicapegue' so nta'a, chegoqchiguiña aso atamnaxaqui maye lalamaqte Ñim Nataxala', nache iviraxattaua'a so nma' lta'araic, tateua'a naqa'en so ñegueuo lta'araic, huaña nache qanso'onaxanaxangui aso nso'onaxaqui so nta'a, 21nache ỹataqta machiguiñi 'enauac se'eso nhuo' le'ecpi, qataq ỹataqta ỹe'emaqtac so netaiguipi so huaqta'a't nỹecpi co'ollaq mashe ime da qaỹalauat aso Atalía, qairolec so ỹeelonec.
