Da lo'onataxanaxac so Joás
1Qaq so Joás, mashe ivi' co'ollaxa soua siete vi'iye da nachaalataxac co'ollaq ỹacoolec da lo'onataxanaxac, nache cuarenta vi'iye da ilotague' ye Jerusalén. Qaq aso late'e le'enaxat Sibiá, maye Berseba lashe. 2Qaq co'ollaq ña nca'altauec so ntaxaỹaxanaxanec Joyadá, nache so Joás ỹo'ottac na ỹataqta ỹaỹamaxareeta Ñim Nataxala'. 3Qaq so Joyadá, ỹaronaxanegueta co'ollaxa so Joás soua dos 'alol, nache huo'oi soua llalqa ỹale't qataq soua llalel 'alo.
4Qaq co'ollaq mashe qaỹoqtegue de'era, nache so Joás, huo'o da lhuennataxa da ỹaỹamaxaañi aso atamnaxaqui maye lalamaqte Ñim Nataxala'. 5Qaq ỹoqo'oye laỹona't co'ollaxa so ntaxaỹaxanaxanecpi qataq so leviitapi, nache 'enapega, 'eeta': «Qanqo'oñiỹa qome nam huaqta'a't nỹecpi maye ỹotta'a't naua nañalo na Judá, nache qalaỹoñiỹa't aca anom maye chegaqaigui na Israel le'ecpi, yaqto' ye 'oonolec vi'i nache qaỹaỹamaxaañi añi atamnaxaqui maye lalamaqte Ñim Lo'onatac 'Enauacna, qaq nache sa qanaỹaloxoñi qome da qauo'oche de'era.» Qalaxaye so leviitapi saishet co'ollaxa da iỹalapegue' de'era. 6Huaña nache so nta'a, iỹaxaneuga so Joyadá som lataxala' so ntaxaỹaxanaxanecpi, nache 'enapega 'eeta': «Ta'ainco' da sa 'auỹalapegue' da qonapega nam leviitapi da ndouo aca lachetaqtaxanaqte na lma' na Judá, qataq na Jerusalén, maye so Moisés, som lamaxashec Ñim Nataxala' ỹamaxalec co'ollaxa so Israel le'ecpi da yaqto' iroua'a so npe'l maye netaña aso laỹe' da aỹamaxataxac.»
7Cha'aye aso ỹataqta qauem da lataxac Atalía, qataq soua llalqa nlaxaayiñi co'ollaxa aso atamnaxaqui maye lalamaqte Ñim Lo'onatac 'Enauacna, qataq imato'ot da ỹanot som ne'enaqtac natamnaxala'pi so sa qaishetapecpi nogoxoshetpi maye lalamaxat aso atamnaxaqui maye lalamaqte Ñim Nataxala'. 8Qaq ỹoqo'oye so nta'a damaxasoxoolec da qaỹo'ot aso laỹe' ana nachetaqtaxanaqte anom, nache qoỹanaña so pa'auec, huaqta'ai' qanqa'en so ñegueuo aso atamnaxaqui maye lalamaqte Ñim Nataxala'. 9Ime, nache qaỹa'axatem 'enauac na lma' ye Judá, qataq ye Jerusalén da yaqto' iroua'a Ñim Nataxala' aso lachetaqtaxanaqte anom maye damaxasoxoolec co'ollaxa so Moisés, som lamaxashec Ñim Nataxala' maye ỹamaxalec so Israel le'ecpi co'ollaq huaña ye toolec 'alhua. 10Nache 'enauac so nataxala'pi, qataq so nhuo' le'ecpi da ỹataqta machiguiñi nache irouo aso lachetaqtaxanaqte, ỹasaxangui aso anom laỹe' nache ivitta'a da nlaqchigui asomaye. 11Huaña nache so leviitapi, iroua'a so nta'a da yaqto' imeten aso laỹe' aso anom, qaq naxa da ila'a da qalota aso huetangui anom, nache so leraxanaxanec so nta'a, qataq som ỹaneuo co'ollaxa so lataxala' so ntaxaỹaxanaxanecpi, nache nqatsheguem asom huetangui asomaye, ime qaltaq ỹe'eguelaxatchiguiña yem netaña naxa asomaye. Qaq 'enauaque naua na'axa'te da soomaye nache 'eeta'aque de'era, nache ỹataqta qalota naxa aso laỹoñiguishe anom. 12Ime nache so nta'a qataq so Joyadá, ỹanem naxa ana anom som ilotague'pi da no'onataxanaxac asa'aso atamnaxaqui, da yaqto' iỹaxana da ỹo'onataxanaxan som ichectacpi so coma', qataq som ichectacpi so 'epaq, maye ỹaỹamaxattapiguiñi aso atamnaxaqui maye lalamaqte Ñim Nataxala', qataq som sa nqalaate' da ỹa'ara't na lcat, qataq na bronce, da yaqto' ỹaỹamaxaañi asa'aso atamnaxaqui. 13Nache se'eso ilotague'pi da no'onataxanaxac ỹacoolec da no'onataxanaxac, nache iviraxata'a da imeta naqa'en asom ỹo'ottac atamnaxaqui maye lalamaqte Ñim Nataxala', nache ỹe'eguelaxata da ỹataqta 'onaxai, qataq ỹe'eguelaxata da hua'auchiguiñi lataxac asomaye. 14Qaq co'ollaq mashe imeta asomaye, nache aso no'onañi aso anom qairoua'a so nta'a qataq so Joyadá, nache soomaye damaxasoxoorelec da qaỹo'onataxana asomaye da qaỹo'ot so no'onataxanaxatpi da yaqto' lalamaxat aso atamnaxaqui maye lalamaqte Ñim Nataxala', qataq som no'onataxanaxatpi da qaỹo'ot da ño'oxonnataxanaxac, qataq da qoỹaneuo som nachetaqtaxanaxat qaỹavigaxatta, qataq som nemaxanaxatpi lta'araicpi, qataq ỹomaxaquipi oro qataq plata. Qataq nache qoỹaatapegueua'a aso atamnaxaqui maye lalamaqte Ñim Nataxala' so nachetaqtaxanaxatpi qaỹavigaxatta co'ollaq ña nca'altauec so Joyadá.
15Qaq so Joyadá, ye mashe ỹataqta ỹa'axaiquiolec, nache ileu. Qaq co'ollaq ileu nache ivi' ciento treinta vi'iye da nachaalataxac. 16Qaq co'ollaq qailareñi, nache huaigui qanqa'en so huaqta'a't nỹecpi maye lalamaxat so David, huaqta'ai' qanqa'en som nta'alpi, cha'aye somaye ỹataqta no'on da ỹo'otec so Israel le'ecpi, qataq Ñim Lo'onatac 'Enauacna, qataq aso atamnaxaqui maye lalamaqte Ñimaye.
17Qaq co'ollaq ime da l-leuaxa so Joyadá, nache so nataxala'pi ye Judá anac da ỹo'oxoren so nta'a. Nache se'eso nta'a ỹalaxaguet na lqataxacpi somayepi. 18Qalaxaye somayepi ca'ai aso atamnaxaqui maye lalamaqte Ñim Nataxala' maye Natamnaxala' so hua'au lta'alpi, nache taỹa da natameetacot so lqui'ipi aso Aserá, qataq so laỹepi atamnaxala'pi. Qaq souaxat de'era lasouaxashet somayepi, nache Ñim Nataxala' dalemataỹa so lma' ye Judá qataq ye Jerusalén. 19Qalaxaye Ñim Nataxala' namaxa som la'aqtaxanaxanecpi da yaqto' somayepi ỹe'eguelaxa Ñimaye, qalaxaye somayepi saỹalaxaguet da lhuogoqtaxanaxac so na'aqtaxanaxanecpi.
20Huaña nache so Zacarías, som llalec so ntaxaỹaxanaxanec Joyadá, nvita som Saqcha'a La'añaxac Ñim Lo'onatac 'Enauacna, nache nachaañi tasheguema aso qaỹoqotcheguemec coma', nache 'enapega so nhuo' le'ecpi, 'eeta': «Ñim Lo'onatac 'Enauacna da la'aqtac, 'eeta': ¿Ta'ainco' da saqaualaqaiguet na ỹamaxasoxonaxacpi? Qaq souaxat de'era qauo'oche nache saishet qome da no'on da qoyecỹaxaqui. Qaq cha'aye qami', aỹem qoquiỹa'ai, nache aỹem nataqa'en qami' sheca'aisalo qome.»
21Qalaxaye somayepi dataỹa'aguet co'ollaxa so Zacarías, qaq cha'aye so nta'a damaxasoxoolec, nache somayepi ỹalauat somaye irota'a so coma', huaña ye nqasoxoc aso atamnaxaqui maye lalamaqte Ñim Nataxala'. 22Qaq so nta'a Joás, icoua'ai da lauotaxanaqtaic co'ollaxa so Joyadá, som lta'a so Zacarías, nacherata da ỹalauat so Zacarías, som 'enapec co'ollaq mashe yaqta'a da ileu, 'eeta': «Ñim Nataxala' maye ỹauaachigui de'era nacheñi qome ñim 'am nmit.»
23Qaq so lỹa vi'i, nache so alleppi Siria le'ecpi taỹa da delogui' so Joás. Huaña nache deuotaxanec ye Judá, qataq ye Jerusalén, qaq co'ollaq ime da ỹalauat som lataxala'pi so nhuo' le'ecpi, nache 'enauac som lhuotaxanaxatpi ỹamaxa so nta'a ye Damasco. 24Qaq na'aictaxa da saq 'amaqtaq so alleppi siiriopi, qalaxaye Ñim Nataxala' ỹanem somayepi da loxonec som qalota alleppi, cha'aye som shiỹaxauapi maye lma' ye Judá, ỹaxanec Ñim Nataxala' maye Natamnaxala' som hua'au lta'alpi. Qaq 'era da 'eetec da so Joás, talec da 'itchiguiñi nhuaxanaguec.
25Qaq co'ollaq jec so siiriopi nache no'onaxata'aguet so lta'araic lque'emaxa so Joás, nache som 'amaqtaqaic ltauapi somaye naỹamaxara't da dataỹa'aguet somaye, nache ỹalauat, hualec naqa'en so lmala', cha'aye ỹauo'o lvi' som llalec so ntaxaỹaxanaxanec Joyadá. Qaq co'ollaq ime, nache qailareñi qaỹachaigui som huaqta'a't nỹecpi maye lalamaxat so David, qalaxaye saishet da qaỹalecnoigui aso nhuachiquipi so nta'alpi. 26Qaq soua naỹamaxara't co'ollaxa da ỹalaua't so Joás, nachesoua so Zabad, som llalec so Simeat, maye amoniita, qataq so Jozabad, som llalec so Simerit, maye moabiita.
27Qaq 'enauac da na'aqtaguec som llalaqpi so Joás, qataq nam qalota na'aqtaxanaxacpi maye dataỹa'aguet naxa somaye, qataq da 'eetec co'ollaq ỹaỹamaxaañi aso atamnaxaqui maye lalamaqte Ñim Nataxala', nache nanettalec aso nere maye huetalec da na'aqtaguec so nta'alpi. Ime nache da lo'onataxanaxac so Joás, talec so llalec Amasías.
