Da lo'onataxanaxac so Uzías
1Qaq huaña co'ollaxa nache 'enauac so nhuo' le'ecpi maye lma' ye Judá, ỹanagui da nta'a so Uzías, talec naqa'en da lo'onataxanaxac so lta'a Amasías. Qaq so Uzías mashe ivi' co'ollaxa soua dieciséis vi'iye da nachaalataxac. 2Qaq nacheso so Uzías som qaltaq no'oxoosheguem co'ollaxa so huaqta'a't nỹecpi ye Elat, qataq ñe'eguelaxaala't somaye da ỹauo'o lalamaxat na Judá le'ecpi, co'ollaq mashe ileu so lta'a.
3Qaq so Uzías mashe ivi' dieciséis vi'iye da nachaalataxac co'ollaq ỹacoolec da lo'onataxanaxac da nta'a, nache ivi' cincuenta y dos vi'iye da ilotague' ye Jerusalén. Qaq aso late'e somaye le'enaxat Jecolías, maye lma' ye Jerusalén. 4Qaq nam ỹo'otpi so Uzías ỹataqta ỹaỹamaxareeta Ñim Nataxala', cha'aye 'eeta'am 'enauac nam ỹo'otpi co'ollaxa so lta'a Amasías. 5Qaq somaye ỹataqta npogoxoinapegue' da pi'iỹa'a Ñim Lo'onatac 'Enauacna, co'ollaq ñaq nca'altauec so Zacarías som ỹapaxagueetac co'ollaxa da huo'o naq 'enec naqa'en Ñim Lo'onatac 'Enauacna. Qaq so Uzías co'ollaq ñaq pe'etega Ñim Nataxala', nache Ñimaye ỹanem da l-lagaxayec.
6Qaq so Uzías taỹa co'ollaxa so filisteopi da iloquiaxan, nache ilaxachigui so lpaqtaxatpi so huaqta'a't nỹecpi ye Gat, Jabnia qataq ye Asdod, ime nache no'oxoosheguem so huaqta'a't nỹecpi ye Asdod, maye huaigui ye na'alhua so filisteopi. 7Qaq Ñim Lo'onatac 'Enauacna itauan somaye co'ollaq deloctague' so filisteopi, qataq so arabepi maye netaña ye Gurbaal, qataq so meuniitapi. 8Qaq so 'amoniitapi nache ỹaategueua'a co'ollaxa aso lsheetenaxanaqtepi so Uzías, nache da llo'oxoyec somaye ỹataqta ivira'a so loigue so na'alhua so Egipto le'ecpi, cha'aye da la'añaxac somaye ỹataqta nquictauec co'ollaxa.
9Nataqa'en no'oxoosheguem aso nalloxolatepi ye Jerusalén, huo'o aso ỹanaña so lasom maye naña aso lamaqai, qataq aso ỹanaña so lasom maye naña so ca'amapega't 'alhua, qataq aso lỹa ỹanaña aso lamaqai, ime nache mpaxateua'a. 10Nataqa'en no'oxoosheguem aso nalloxolatepi, ỹanalec ye toolec 'alhua, qataq ỹo'ot aso qalota lsherepi maye ñi'illoxoquipi, cha'aye ỹataqta qalota aso lalopi maye huetalec so nalochiguiñi 'alhua, qataq so nalochiguiñi 'alhua maye huaña ye pa'asheguem. Qataq nataqa'en huo'o so lo'onataxanaxanecpi maye na'atteguesheguem so 'alhua, qataq som ilotague' so uva lma'pi, maye hueta'a so qasoxonaxasat, qataq so ca'amapega't 'alhua, cha'aye somaye ỹataqta nqopita da do'onataxaalec na 'alhua.
11Qaq so Uzías, nataqa'en huo'o so nalleppi maye alaataxaicpi, qaq somayepi naxa da taỹa na alaataxac nache huo'oi naua lpa'axaco, nache quetelec da lataxac maye nanettalec aso lere so Yeguiel, som 'amaqtaqaic neraxanaxanec, qataq so 'amaqtaqaic nataxala' Maseías, maye ltaua so Jananías, som lamaxashec so nta'a 12Qaq ye lcata da ima'a't som lataxala'pi so nhuo' le'ecpi, ivi' dos mil doscientos som alaataxaicpi maye 'añaxaicpi. 13Qaq som alleppi maye ilotague' se'eso nataxala'pi, ivi' trescientos siete mil quinientos so alleppi alaataxaicpi, maye ỹataqta 'añaxaicpi da itauan so nta'a da nalat. 14Nache so Uzías ỹo'ot aso mpaqtaxanaqtepi, taquiaxaipi, aro'opi, ntogue lapoqtepi, nchecnecpi, qataq so npocnaxanaxatpi da yaqto' ỹanem 'enauac se'eso alleppi. 15Qataq huaña ye Jerusalén, da ỹamaxalec som ỹaỹaten da ỹo'ot aso 'amaqtaqai alaataxaquipi, da yaqto' ỹanasheguema na pa'asheguem aso nalloxolatepi, qataq som ỹataqta qaỹoqotcheguemec so mpaqtaxanaxat, da yaqto' nache chegoqchiguiña somaye da ỹaỹenec aso checnapi, qataq so ỹataqta lta'araic coma'. Qaq da llo'oxoyec somaye ỹataqta qaỹoqtegue, cha'aye Ñim Lo'onatac 'Enauacna ỹataqta lta'araic da ltaunaxanaxac, ỹoqo'oye somaye ivira'a da ỹataqta 'añaxaic.
16Qalaxaye somaye, co'ollaq mashe ivira da ỹataqta 'añaxaic, nache ỹacona da ño'oxonnaxac, qaq nachera da ỹo'ot da nlaguiñi somaye. Cha'aye sa ỹalaxaguet Ñim Lo'onatac 'Enauacna maye Natamnaxala' somaye, qataq taigui co'ollaxa aso atamnaxaqui maye lalamaqte Ñim Nataxala' da ỹavigaxat so lchenaxanaxat, ỹachalec aso lca'atoxolate na nchenaxanaxat. 17Qalaxaye so ntaxaỹaxanaxanec Azarías, ca'atauo'ogue co'ollaxa somaye nnaictague' so ochenta som ỹataqta 'añaxaicpi ltaxaỹaxanaxanecpi Ñim Nataxala', 18nache somayepi dataỹa'aguet so nta'a nache 'enapega, 'eeta': «'Am nta'a Uzías, da qoỹanot na nchenaxanaxat Ñim Nataxala', damaye saishet da nache 'am da 'aro'onataxanaxac, cha'aye damaye lo'onataxanaxac na ntaxaỹaxanaxanecpi maye chegoxoguet so Aarón, nam qaiỹotaugapi co'ollaxa da lo'onataxanaxac damaye. Qaq ỹoqo'oye sa 'anaỹaloxon qome da 'apa'auec, qoca'ai ne'ena maye sa qaishetapec, cha'aye huo'o da 'arasouaxashet, qaq Ñim Lo'onatac 'Enauacna saishet da 'am ỹo'oxoren qome souaxat de'era 'auo'ot.»
19Qaq so Uzías maye nasoqta'a aso laỹe' so nchenaxanaxat da yaqto' ỹaneuo so lchenaxanaxat, somaye ỹataqta dalemataỹa so ntaxaỹaxanaxanecpi. Qaq nache huaña aso datataua'a nca'atoxonaxalate maye naigui so lauel aso atamnaxaqui maye lalamaqte Ñim Nataxala', qataq datataua'a som ntaxaỹaxanaxanecpi co'ollaq nasheguem so lepra na latap somaye. 20Qaq so Azarías maye lataxala' so ntaxaỹaxanaxanecpi, qataq 'enauac som laỹepi ntaxaỹaxanaxanecpi co'ollaq ỹamato'ot somaye, nache ila'a da nasheguem so lepra na latap, nache sa ỹaỹaloxon da nqateeguesop yem hueta'a, qataq somaye nache sanaỹaloxon da pa'auec, cha'aye Ñim Nataxala' mashe ique'emaqchet somaye.
21Qaq 'era da 'eetec so nta'a Uzías da huec co'ollaxa so lepra, nache choche ivitta'a da ileu, qaq ỹoqo'oye somaye qaiỹotauga so qoỹanagui nỹec, qataq sa qaỹashenem da taigui aso atamnaxaqui maye lalamaqte Ñim Nataxala', qaq ỹoqo'oye so llalec Yotán, talec da lo'onataxanaxac da ilo'ogue so shiỹaxauapi.
22Qaq nam laỹepi na'aqtaguecpi so Uzías, chegoqchiguiña co'ollaq cheta'ague da do'onataxan, nache ivitta'a so pa'atec lo'onataxanaxac, namayepi ỹiyiñi co'ollaxa so na'aqtaxanaxanec Isaías, som llalec so Amós. 23Qaq co'ollaq ileu so Uzías, nache qailareña yem huaña so maiche lalamaxat lauo' le'ecpi, maye huaña ye saqaỹapeque yem huaña aso nhuachiquipi som nta'alpi, cha'aye somaye ilem na lepra. Ime nache so llalec Yotán, talec da lo'onataxanaxac da nta'a.
