So Ezequías ỹo'ot so Lapascua
1Huaña nache so Ezequías ỹauo'o so lamaxashecpi da tauga so Israel le'ecpi, qataq so Judá le'ecpi, qataq ỹauo'o aso lere taỹa'a so Efraín qataq so Manasés, da yaqto' icoyeguen da naua'a aso atamnaxaqui maye lalamaqte Ñim Nataxala', maye naña ye Jerusalén, da yaqto' qaỹo'ot so Lapascua maye lapaxañi co'ollaxa Ñim Nataxala', maye Natamnaxala' so Israel le'ecpi. 2Cha'aye so nta'a, co'ollaq mashe ime da nnattague' so nataxala'pi qataq 'enauac so ỹalecta'a't shiỹaxauapi maye hueta'a ye Jerusalén, nache qanasachigui da qaỹo'ot so Lapascua, huetoigui qanqa'en so ca'agoxoic dos, 3cha'aye saishet da ipacchigui da huetoigui so ỹoqta laloxoqui, souaxato' da sa lamai' so ntaxaỹaxanaxanecpi maye nqui'itaxat co'ollaxa, qataq da so shiỹaxauapi saishet co'ollaxa da laỹoota'a't da hueta'a ye Jerusalén. 4Qaq de'era nasataxac ỹataqta ỹaỹamaxareeta so nta'a, qataq so shiỹaxauapi maye laỹoota'a't, 5nache somayepi nasachigui da ỹa'axatem 'enauac so lma' ye Israel, chegoqchiguiña naqa'en ye Berseba, nache ivitta'a ye Dan, dam ncoyeguenataxanaxac da yaqto' qanqo'ona ye Jerusalén da qaỹo'ot so Lapascua, maye lapaxañi Ñim Nataxala' maye Natamnaxala' so Israel le'ecpi. Cha'aye mashe qaỹoqtegue co'ollaxa da saishet da qaỹo'oxoren se'eso na'a'q, da qaipagaqchiichigui som nache 'eetai' nanettañi.
6Qaq ime, nache jec so namaxashecpi da icoyeguen 'enauac so lma' ye Israel, qataq so lma' ye Judá, ỹachetac aso lere so nta'a qataq so ltauapi, da ỹa'axatec da lamaxasoxonaxac se'eso nta'a qataq so ltauapi, maye 'eeta': «Qami' Israel le'ecpi, qavi'iguelaqaiỹot qome Ñim Nataxala' maye Natamnaxala' so Abraham, Isaac qataq so Israel, yaqto' Ñimaye qami' ỹe'eguelaxagueta, 'enauac qami' maye qami' ỹe't da lhuaqỹaxac ñi nta'a ye Asiria. 7Saishet qome da qavi'inaxache so hua'au qarta'ailpi, qataq so qarqaỹaipi, da somayepi sa ỹalaxaguet Ñim Nataxala' maye Natamnaxala' so hua'au lta'alpi, ỹoqo'oye Ñimaye ỹaneguet da qailaxachigui somayepi, dam qauauañiichigui nagui. 8Qaq ỹoqo'oye nagui saishet qome da sa qaualaqai da qoñiỹa'am so hua'au qarta'ailpi, nacherato' da qanañañiỹot Ñim Nataxala', qataq qauanaiua'a añi atamnaxaqui maye Ñimaye chochaq tatec naqa'en da iỹotauga. Qavio'oxoreñi Ñim Nataxala' maye Qanatamnaxala'ai, yaqto' Ñimaye ỹaxaañi da qami' denotegalo. 9Cha'aye da qavi'iguelaqaiỹot Ñim Nataxala', nache yem qampa'aguenaxauaipi maye icoñettai' yem qarqaỹaipi qataq ye qaỹa'alquipi, ishet qome da ichoxoren yemayepi, nache ỹasheetec da ñe'eguelaxa ne'ena 'alhua, cha'aye Ñim Nataxala' maye Qanatamnaxala'ai ỹataqta soxoraic, qataq choxonnataxanaxaic, nache saishet da qami' imaqa'agueta da qavi'iguilaqaiỹot Ñimaye.»
10Qaq huaña nache so namaxashecpi queuolec 'enauac ye na'alhua so Efraín, qataq so Manasés, queta'aguelo naua nañalo so huaqta'a't nỹecpi, nache ivitta'a so na'alhua so Zabulón. Qalaxaye som shiỹaxauapi nda'a't da daỹalleguettac qataq ne'eetapigui somayepi. 11Qaq ñaqaiyeta huo'o so ỹalleppi maye chegoxoguet so Aser, Manasés qataq so Zabulón da nañan, nache taỹa ye Jerusalén. 12Nache nataqa'en so lma' ye Judá, Ñim Lo'onatac 'Enauacna ipoteua'a da lquiyaqteỹaxac da ipactelec da ỹo'ot dam lamaxasoxonaxac so nta'a, qataq so ltauapi, nache ipacchigui da la'aqtac Ñim Nataxala'.
13Qaq 'era da 'eetec da ỹataqta qalota so shiỹaxauapi maye laỹona't co'ollaxa, huetoigui so ca'agoxoic dos da qaỹo'oxoren so laloxoqui da qanallec aso nauole maye qaca aca lalecte maye ỹasheeraxachigui, huaña ye Jerusalén. 14Huaña nache somayepi nlaxaañi aso nca'atoxonaxalatepi, qataq som huaña naxa da qaỹavigaxat so nchenaxanaxatpi, maye naña so Jerusalén, nache qaỹasaxangui so la'auaxac Cedrón. 15Qaq co'ollaq ivireuga so na'a'q catorce so ca'agoxoic dos, nache qoỹaneuo aso nachetaqtaxanaqtepi maye huetoigui so Lapascua. Qaq so ntaxaỹaxanaxanecpi, qataq so leviitapi ye ỹataqta huo'o da la'aloxo, nache somayepi nqui'itaxat, ime nache iroua'a aso atamnaxaqui so nachetaqtaxanaxatpi qaỹavigaxatta. 16Qaq ime, nache somayepi naña so maiche lo'onataxanaqa'pi, nache ipacchigui da lataxac da lo'onataxanaxac maye ỹalectaigui so lqataxacpi so Moisés, maye lamaxashec Ñim Lo'onatac 'Enauacna. Qaq som ntaxaỹaxanaxanecpi nache iquetegaxaalec aso nca'atoxonaxalate na ltago'q so shiguiỹacpi maye irotegueuo som leviitapi. 17Qaq cha'aye so ỹalecta'a't shiỹaxauapi, qalota co'ollaxa so saishet da nqui'itaxat, qaq souaxat somayepi nache so leviitapi qalota so ỹalauat qagueta llalaqpi huaigui qanqa'en so Lapascua, da yaqto' qoỹanot Ñim Nataxala'. 18Cha'aye ỹataqta qalota som shiỹaxauapi lma' ye Efraín, Manasés, Isacar qataq Zabulón, som ỹalectaua'a so nquia'axac maye huaigui so Lapascua, qalaxaye saishet da ipactelec da nanettañi lataxac, cha'aye saishet da nqui'itaxat. Qalaxaye so Ezequías, natameelec somayepi, 'eeta': «'Am Nataxala', maye 'am choxonnataxanaxaic, 'auchoxoren qome nam ỹataqta huesota da lquiyaqteỹaxac maye 'am nmittaique, 19'Am Nataxala', maye 'Am Natamnaxala' so hua'au lta'alpi namayepi, na'aictoxo' da saishet da nqui'itaxat namayepi, da ipaqueelec som nanettañi lataxac da qotaua'a añi atamnaxaqui.»
20Qaq Ñim Nataxala', hua'axaỹa co'ollaxa da natamnaxac so Ezequías, nache ichoxoren se'eso nhuo' le'ecpi. 21Huaña nache so Israel le'ecpi maye hueta'a ye Jerusalén ỹataqta machiguiñi, nache imattrec soua siete na'axa'te da ỹo'oxoreetac so na'a'q maye laloxoqui da qanallec aso nauole maye qaca aca lalecte. Qaq so ntaxaỹaxanaxanecpi qataq so leviitapi, 'enauaque se'esoua na'axa'te da do'onaxaatac ỹo'oxoreetac Ñim Nataxala', do'onaxaata'ai' aso lviquepi. 22Nache so Ezequías, ỹataqta ntootapeguec so leviitapi, souaxat da somayepi ỹachaxan da ỹataqta lhuotta da ỹo'oxoren Ñim Nataxala'.
Qaq co'ollaq ime da ỹalectaua'a so nquia'axac maye huaiguilo se'esoua siete na'axa'te, da ỹaatapegueuo asom lachetaqtaxanaqtepi qanhuaachigui, qataq da ỹo'oxoreetac Ñim Nataxala' maye Natamnaxala' so hua'au lta'alpi. 23Nache 'enauac se'eso laỹoota'a't shiỹaxauapi nasachigui da qaltaq qanayecot se'eso ño'oxonnataxanaxac soua lỹa't siete na'axa'te, nache somayepi ỹataqta machiguiñi da qaltaq ishet da ỹo'ot se'eso ño'oxonnataxanaxac. 24Cha'aye so Ezequías, maye nta'a ye Judá, ỹaatem co'ollaxa se'eso shiỹaxauapi so mil huaca llalaqpi, qataq siete mil aso qaguetapi, qaq nataqa'en so nataxala'pi ỹaatem se'eso nhuo' le'ecpi so mil huaca llalaqpi, qataq diez mil aso qaguetapi, nache ỹataqta qalota so ntaxaỹaxanaxanecpi so nqui'itaxat. 25Qaq nache 'enauac so shiỹaxauapi maye lma' ye Judá, ntaxaỹaxanaxanecpi, leviitapi, qataq 'enauac so shiỹaxauapi maye chegaqa'a ye Israel, qataq som chegaqauecpi maye chegaqa'a ye na'alhua so Israel, qataq som netañapi co'ollaxa ye Judá, ỹataqta machiguiñi. 26Qaq huo'o co'ollaxa so ỹataqta lta'araic tonaxac huaña ye Jerusalén, cha'aye chegoqta'a co'ollaq nta'a so Salomón, som llalec so David, maye nta'a ye Israel, da saishet da huo'o ca 'eeta'am se'eso huaña ye Jerusalén. 27Ime co'ollaxa nache so ntaxaỹaxanaxanecpi, qataq so leviitapi, nachaañi nache talec naqa'en so no'on la'aqtac so shiỹaxauapi, nache Ñim Nataxala' hua'axaỹa somayepi, cha'aye se'eso natamnaxac iviro'ot na piguem, yem ỹataqta qui'itta lanataqa' Ñim Lo'onatac 'Enauacna.
