Da lo'onataxanaxac so Manasés
1Qaq so Manasés, mashe ivi' soua doce vi'iye da nachaalataxac co'ollaq ỹacoolec da lo'onataxanaxac da nta'a, nache ivi' soua cincuenta y cinco vi'iye da lo'onataxanaxac da ilotague' ye Jerusalén. 2Qalaxaye somaye ỹo'ot co'ollaxa nam ỹataqta saỹaỹamaxaren Ñim Nataxala', cha'aye ỹe'enaxat da qauem lataxac som ỹotta'a't shiỹaxauapi maye Ñim Nataxala' ỹo'orauec co'ollaxa, ỹauaachigui naqa'en so Israel le'ecpi, 3qataq ỹe'eguelaxa da no'oxoosheguem som qaỹoqotcheguemec atamnaqa'pi maye so lta'a Ezequías ilaxachigui co'ollaxa, nache no'oxoosheguem aso nca'atoxonaxalatepi da ỹo'oxoren so lqui'ipi so Baal, qataq ỹo'ot so lqui'ipi aso Asera, qataq nataqa'en natamnot qataq ỹo'oxoren 'enauac ana huaqaañipi maye neto'ot na piguem, 4qataq no'oxoosheguem aso nca'atoxonaxalatepi ỹanaña aso atamnaxaqui maye lalamaqte Ñim Nataxala', maye detaqtega co'ollaxa Ñim Nataxala' co'ollaq 'eeta': «Ne'ena Jerusalén, nache 'eetai' qome da hueta'a da ỹe'enaxat.» 5Qataq no'oxoosheguem aso laỹepi nca'atoxonaxalatepi, naña naqa'en soua dos nqasoxoco aso atamnaxaqui maye lalamaqte Ñim Nataxala', da yaqto' ỹanot ana huaqaañi late'eraipi maye neto'ot na piguem. 6Nataqa'en ỹavigaxa't soua llalqa da yaqto' lachetaqtaxanqa'ate huaña so ca'amegue ye Ben Jinón, qataq napaxaguena da qaiỹaxaneuga na lqui'ipi so leuaxaicpi, qataq da qailaviigui ca nỹa, qataq da qanquigaxat da lataxac camachaqca, qataq lapaxañi da lataxac da qaiỹaxaneuga na nqui'ipi, qataq da ñi'iyaqnataxanaxac. Nache nquigaxattauec nam qauem maye ỹo'otpi, maye ỹataqta saỹaỹamaxaren Ñim Nataxala', nache ivira'a da inogoqchet Ñimaye. 7Nataqa'en ỹanaigui aso atamnaxaqui maye lalamaqte Ñim Nataxala' so le'enaqtac nqolac, maye Ñim Nataxala' mashe hueqattega co'ollaxa so David, qataq so llalec Salomón, co'ollaq 'eeta':
Ana'ana atamnaxaqui maye naña na Jerusalén, maye lleca'aguishe co'ollaq lleca'agui 'enauac nam maiche nalamaxat nhuo' Israel le'ecpi, anamaye nache 'eetai' qome da hueta'a da ỹe'enaxat. 8Qaq saishet qome da she'eguelaxa da so'orauec na Israel le'ecpi maye hueta'a ne'ena 'alhua maye sanalec co'ollaxa so hua'au lta'alpi, qom ipacchigui na ỹamaxasoxonaxacpi, qataq da ỹo'ot 'enauac na ỹapaxaguenataxanaxacpi, maye chegoqchigui ñaqa'en co'ollaxa so ỹamaxashec Moisés da sanem namayepi.
9Qalaxaye so Manasés ỹo'ot co'ollaxa da so hueta'a ye Judá, qataq som hueta'a ye Jerusalén da quegue som qauem nqa'aic, qataq da ỹo'ot nam qauemsat maye ỹo'ottac co'ollaxa som ỹotta'a't shiỹaxauapi maye Ñim Nataxala' ilaxachigui co'ollaxa, ỹauaachigui naqa'en so Israel le'ecpi. 10Qaq Ñim Nataxala' detaxaỹot co'ollaxa so Manasés qataq so lauo' le'ecpi, qalaxaye somayepi saishet co'ollaxa da ỹalaxaguet Ñimaye. 11Qaq ỹoqo'oye Ñim Nataxala' ỹo'ot da anac so lataxala'pi so nalleppi so nta'a ye Asiria, nache somayepi ỹaconeua'a so Manasés, nache icoñerai' ỹanagui so ncoñetaxanaxat lcat bronce, nache ỹauega ye Babilonia. 12Qalaxaye somaye co'ollaq huo'o da lhuogoxo, nache iỹaxanot Ñim Nataxala' maye Natamnaxala', nache ỹataqta nmanot Ñim Natamnaxala' som hua'au lta'alpi. 13Qaq co'ollaq natamen, nache Ñim Lo'onatac 'Enauacna hua'axaỹa da nachoxonnaxac somaye, nache ỹe'eguelaxa naqa'en ye Jerusalén da yaqto' qaltaq ilo'ogue da no'onataxanaxac. Qaq huaña nache so Manasés, ỹaỹaten da Ñim Nataxala' nacheñi Ñim Lo'onatac 'Enauacna.
14Qaq co'ollaq ime de'era, nache so Manasés no'oxoosheguem so npaqtaxanaxat pa'aỹauec, da mpaxateua'a so huaqta'a't nỹecpi maye lalamaxat so David, qaq chegoqchiguiña naqa'en so pa'aigue da nala' lliguisheguem ye Guijón, nache taalec so ca'amegue nache ivitta'a so lasom maye le'enaxat Nỹaq, nache coleelec naqa'en ye Ofel, qaq se'eso npaqtaxanaxat ỹataqta qaỹoqotcheguema naqa'en. Qaq nataqa'en ỹauo'o so lataxala'pi so alleppi, da ỹanaña 'enauac som napotaua'a huaqta'a't nỹecpi maye ỹotta'a't naua nañalo ye Judá. 15Qataq nataqa'en nqateeguesop aso atamnaxaqui maye lalamaqte Ñim Nataxala', som atamnaxala'pi maye chegaqauec qataq so nqolac, qataq 'enauac aso nca'atoxonaxalatepi maye no'oxoosheguem co'ollaxa, ỹanaña aso qasoxonaxa maye naña aso atamnaxaqui qataq ye Jerusalén, nache ỹasaxauga so pa'auec so huaqta'a't nỹecpi. 16Qaq ime nache ỹaỹamaxaañi aso nca'atoxonaxalate maye lalamaqte Ñim Nataxala', nache ỹachalec asomaye so nachetaqtaxanaxatpi qaỹavigaxatta maye naigui da nlagaxayec, qataq da qoỹan da 'achecỹaxac, qataq ỹamaxalec so hueta'a ye Judá da ỹo'oxoren Ñim Nataxala', Ñim Natamnaxala' so Israel le'ecpi. 17Qalaxaye som nhuo' le'ecpi nache queto'ot da ỹavigaxattac aso lachetaqtaxanaqte da hualec naqa'en aso lca'atoxonaxalatepi som ỹaqa'a da la'amqaanataxanaxac, na'aictaxa da nacheñi Ñim Nataxala' maye Natamnaxala' da ỹaatacot.
18Qaq na laỹepi na'aqtaguecpi so Manasés qataq da natamnaxac da natameetacot Ñim Lo'onatac 'Enauacna, qataq naua la'aqtaqa som na'aqtaxanaxanecpi co'ollaq ỹa'axattac da le'enaxat Ñim Nataxala', Ñim Natamnaxala' so Israel le'ecpi, nache nanettalec aso nere maye huetalec nam na'aqtaguecpi so nta'alpi ye Israel. 19Da natamnaxac qataq co'ollaq qaỹasateguet, qataq 'enauac nam lasouaxashetpi, qataq da sa ỹalaq qataq nam huañapi da no'oxoosheguem so atamnaqa'pi maye naña so qaỹoqotcheguemapi, qataq som ỹanaña co'ollaxa so lqui'ipi aso Asera, qataq som nqolacpi co'ollaq saxanaxa da nmanot Ñim Lo'onatac 'Enauacna, nache nanettalec aso nere maye huetalec da na'aqtaguec som na'aqtaxanaxanecpi. 20Qaq co'ollaq ileu so Manasés, nache qailareña so nanaxanaqa' maye huaña so lma' lta'araic somaye. Qaq ime co'ollaxa, nache da lo'onataxanaxac somaye, talec so llalec Amón.
Da lo'onataxanaxac so Amón
21Qaq so Amón mashe ivi' co'ollaxa soua veintidós vi'iye da nachaalataxac co'ollaq ỹacoolec da lo'onataxanaxac da nta'a, nache ivi' dos vi'iye da ilotague' ye Jerusalén. 22Qalaxaye ỹo'ot co'ollaxa nam ỹataqta qauem maye sa ỹaỹamaxaren Ñim Nataxala', 'eeta'am nam ỹo'otpi co'ollaxa so lta'a Manasés, cha'aye ỹaatacot so lachetaqtaxanaxat qataq ỹo'oxoreetac 'enauac so nqolacpi maye ỹo'ot co'ollaxa so lta'a Manasés. 23Qalaxaye saishet co'ollaxa da nmanot Ñim Nataxala' da 'eeta'am da ỹo'ot co'ollaxa so lta'a Manasés, nacherata da nquigaxattasheguem na lasouaxashetpi. 24Qaq so nataxala'pi dataỹa'aguet co'ollaxa somaye, nache ỹalauat huaigui naqa'en so lma' lta'araic. 25Qalaxaye som shiỹaxauapi maye lma' yi'iye 'alhua, ỹalauat co'ollaxa 'enauac se'eso nataxala'pi maye dataỹa'aguet so nta'a Amón, qaq da lo'onataxanaxac da nta'a, nache talec qanqa'en so llalec Josías.
