2 Crónicas 6

₁Huaña nache so Salomón 'enapeco':

₃Ime, nache so nta'a dataigue da pa'aỹa'ague so lapoota'a't Israel le'ecpi, nache ỹanem da no'on la'aqtac. ₄Nache 'enapec:

«Ỹataqta qaỹo'oxoren qome Ñim Nataxala' maye Natamnaxala' na Israel le'ecpi, cha'aye ipacchigui dam ỹachaxanapeguem co'ollaxa so ita'a David, co'ollaq 'eeta': ₅‹Chegoqta'a so na'a'q co'ollaq ñeqateeguesop ye Egipto na ỹalamaxat nhuo' le'ecpi, nache saishet da huo'o ca lleca'aua'a na huaqta'a't nỹecpi maye lma' na maiche nhuo' Israel le'ecpi, da yaqto' qoỹanaña da qano'oxoosheguem aca atamnaxaqui da yaqto' hueta'a da ỹe'enaxat, qataq saishet da huo'o ca lỹa shiỹaxaua da lleca'aguishec da yaqto' ilo'ogue na ỹalamaxat nhuo' Israel le'ecpi. ₆Qalaxaye aỹem lleca'ateua'a ye Jerusalén da yaqto' nache hueta'a da ỹe'enaxat, qataq lleca'ateua'a so David, da yaqto' ilo'ogue na ỹalamaxat nhuo' Israel le'ecpi.› ₇So ita'a David huo'o da lyaxa co'ollaxa da no'oxoosheguem aca atamnaxaqui da qaỹo'oxoren Ñim Nataxala' maye Natamnaxala' na Israel le'ecpi. ₈Qalaxaye, Ñim Nataxala' 'enapega co'ollaxa somaye, 'eeta': ‹Aja', ỹaỹamaqchiguiñi da 'arhuennataxac da 'auo'ot aca atamnaxaqui. ₉Qalaxaye saishet da nache 'am da 'auo'ot qome acamaye, maye nachecata cam 'aỹa'alec da ỹo'ot qome acamaye.›

₁₀Qaq nagui Ñim Nataxala', ipaqueelec dam ỹan co'ollaxa la'aqtac. Nache ỹataqta ipacchigui dam la'aqtac co'ollaxa da nagui, aỹem talec da lo'onataxanaxac so ita'a David, qataq mashe ñeso'ootangui añi so'onaxaqui da aỹem nta'a na Israel, qataq mashe ño'oxoosheguem añi atamnaxaqui maye lalamaqte Ñim Nataxala', maye Natamnaxala' na Israel le'ecpi. ₁₁Qataq nache sachaigui añimaye, añi arca maye laỹe' soua nqataxaco maye nanettaleguete da naỹamaxataxac Ñim Nataxala', co'ollaq naỹamaxate' na Israel le'ecpi.»

₁₂Ime co'ollaxa nache so Salomón, taỹa so netaña aso nca'atoxonaxalate maye lalamaqte Ñim Nataxala', ỹauaachigui 'enauac so lapoota'a't Israel le'ecpi, nache ỹaayishegue'm naua lhua'q. ₁₃Cha'aye somaye damaxasoxoolec co'ollaxa da qaỹo'ot so lapiaxala', maye chegaqaigui na bronce, maye ivi' dos metros y veinticinco centímetros ye lalogaxa qataq nache 'eeta'am ye lcategue somaye, qataq un metro treinta y cinco centímetros ye lshequitcheguema, qaq somaye ỹanaña co'ollaxa so laiñi so qasoxoc, qaq nache talec somaye da ỹa'alyiñi naua l-llecte, ỹauaachigui so lapoota'a't Israel le'ecpi, da ỹaayishegue'm naua lhua'q, ỹanoto na piguem, nache 'eeta': ₁₄«'Am Nataxala', maye Natamnaxala' na Israel le'ecpi, qaica ca lỹa Atamnaxala' na piguem, huo'otaq ana 'alhua da 'am 'eeta'am, cha'aye 'am ỹataqta 'aupaqueelec da 'anaỹamaxataxac, qataq da 'arauotaxanaqtaic cam ỹataqta 'am imato'ot da lquiyaqteỹaxac da 'am do'onataxaatacot, ₁₅qataq 'aupaqueelec dam 'ara'aqtac maye 'aỹa'anem co'ollaxa so ita'a David, qaq ne'ena na'a'q, da 'arhuaqỹaxac ipacchigui naqa'en dam qonapec co'ollaxa. ₁₆Qaq nagui 'Am Nataxala' maye Natamnaxala' na Israel le'ecpi, nataqa'en 'aupaqueelec qome dam 'auachaxanapeguem co'ollaxa so ita'a David, maye 'aramaxashec, co'ollaq qonapec: Saishet qome da saqca ca 'oonolec na 'aỹa'alaqpi da nso'ootangui añi so'onaxaqui na Israel, da namayepi iren da lataxac, qataq quetelec na iqataxacpi, 'eeta'am da 'arataxac co'ollaq aỹem 'auo'onataxaatacot. ₁₇Qaq nagui 'Am Nataxala' maye 'Am Natamnaxala' na Israel le'ecpi, ña 'aupacchigui qome da 'auachaxanapeguem co'ollaxa so 'aramaxashec David.

₁₈Qalaxaye 'Am Atamnaxala', ¿peta'a 'ausheto' da 'aualectaigui na shiỹaxauapi maye netalec ana 'alhua? Ye na piguem maye ỹataqta qalochiguiñi qalaq saishet da 'am nalo'oguet da 'am nllañi, ¿qaq ca 'eeteco' da 'am nala'aguet da qonetaigui ana'ana atamnaxaqui maye sauotaique da 'arma'? ₁₉Qalaxaye 'Am Nataxala' maye Ñatamnaxala', ña 'auqocha'a qome da ñatamnaxac qataq da ñachoxonnaxac, ña 'aua'axaỹa qome da lỹaxanaxac qataq da natamnaxac maye 'am ỹaatacot ne'ena 'aramaxashec. ₂₀Qataq da 'armeenaxanaxac nache huetalec qome ana'ana atamnaxaqui, ye na'a'q qataq ye pe, anam 'autaxaỹa co'ollaxa da nache 'aranataqa', qaq ña 'aua'axaỹa da nachoxonnaxac ne'ena 'aramaxashec, maye hueta'a anamaye. ₂₁Qataq 'ana'axaỹaxana da ñachoxonnaxac ne'ena 'aramaxashec, qataq na 'aralamaxat nhuo' Israel le'ecpi, da hueta'a ne'ena da natamen. Qaq ña 'aua'axaỹa qome da qoueta'a na piguem maye 'arma', ñaq 'aua'axaỹa qome, qataq 'auapalaxat na qarasouaxashetpi.

₂₂Qaq da huo'otaq huo'o ca hueto'ot ca lasouaxashet ca lỹa, nache da qaỹamaxalec da naua'a añi nca'atoxonaxalate maye naña ana atamnaxaqui da ỹan ca la'aqtac, ₂₃nache 'aua'axaỹa qome camaye da qoueta'a na piguem, nache qouapegue' qome da 'anmit na 'aramaxashecpi, nache 'auauo'o ca nhuaxanaguec cam huo'o ca lasouaxashet, qaq talec 'anqa'en nam qauem maye ỹo'otpi camaye, nache talec 'anqa'en ca ỹaỹamaqchiguiñi cam qaica cam ỹasouaxat, nache ipacchigui 'anqa'en ca ỹaỹamaqchiguiñi lataxac.

₂₄Qaq da que'eca npa'aguenaxauapi loxonec ne'ena 'aralamaxat nhuo' Israel le'ecpi, souaxat da 'am hueto'ot ca lasouaxashet, nache da ỹe'eguelaxa da ỹo'oxoren da 'are'enaxat, qataq da 'am natamnot da hueta'a ana'ana atamnaxaqui, ₂₅nache 'aua'axaỹa qome namayepi da qoueta'a na piguem, nache 'auapalaxat na lasouaxashetpi, nache 'añe'eguelaxata na 'alhua maye 'aỹa'anem co'ollaxa namayepi qataq som hua'au lta'alpi.

₂₆Qaq da qaica ca auot nache deqaqa na 'alhua, souaxat da na 'aralamaxat nhuo' le'ecpi 'am hueto'ot ca lasouaxashet, nache da 'am natamnot da hueta'a ne'ena qataq ỹo'oxoren da 'are'enaxat qataq da ntouen da huo'o da lasouaxashet, souaxat da 'auauo'o da nque'eenaxac. ₂₇Nache 'aua'axaỹa qome namayepi da qoueta'a na piguem, qataq 'auapalaxat na lasouaxashetpi na 'aramaxashecpi, qataq na 'aralamaxat nhuo' Israel le'ecpi, qataq 'auapaxaguenec da no'on ñecỹaxac da yaqto' nache quetegue namayepi, nache 'anamaq ca auot da talec 'anqa'en na 'alhua maye 'aỹa'anem co'ollaxa da lalamaxat nam 'aralamaxat nhuo' le'ecpi.

₂₈Qaq ne'ena 'alhua da huo'o ca nqouaxa, nalolaxa, huo'otaq da ana nañiguishe deqaqa souaxat ca napaxaỹaxa, huo'otaq anac ca lalaxat, shiiquioxoi huo'otaq na pelgaxanaq, huo'otaq da anac ca npa'aguenaxauapi da coleesop da iloquiaxan, huo'otaq ca camachaqca lỹa qauem, huo'otaq nhuetaxanaxa, ₂₉nache 'aua'axaỹa qome da natamnaxac qataq da nachoxonnaxac ca camachaqca shiỹaxaua, huo'otaq da 'enauac ne'ena 'aralamaxat nhuo' Israel le'ecpi da huo'otaq nanomta da huo'o ca nqui'ic, huo'otaq lasouaxashet, nache da natamen ỹachaxaatregue naua lhua'q da pa'aigue ana'ana atamnaxaqui, ₃₀qaq ña 'aua'axaỹa qome da qoueta'a na piguem maye 'arma', qataq 'auchoxoren qome, nache ipacchigui 'anqa'en da talec ñi 'oonolec ca maiche llecỹaxac maye 'auaỹaten, cha'aye nache 'amta da 'auauattoota da lquiyaqteỹaxac na shiỹaxauapi. ₃₁Yaqto' namayepi, 'am ỹo'oxoren qataq 'am ỹalaxaguet 'enauaque naua na'axa'te da nachaalataxac, da netalec ana 'alhua maye 'aỹa'anem co'ollaxa so hua'au qarta'alpi.

₃₂Qaq nataqa'en cam chegaqauec maye saishet da lauo' le'ec nam 'aralamaxat nhuo' Israel le'ecpi, maye chegaqa'a ca qaỹoqta 'alhua, souaxat da 'amaqtaqaic 'are'enaxat, qataq da la'añaxac na 'arhuaq, da anac da natamen huaña ana'ana atamnaxaqui, ₃₃nache 'aua'axaỹa qome da qoueta'a na piguem maye 'arma', nache 'aỹa'anem qome cam iỹaxanaique, yaqto' 'enauac na ỹotta'a't shiỹaxauapi ana 'alhua ỹauatton da 'are'enaxat, da 'eeta'am na 'aralamaxat nhuo' Israel le'ecpi, qataq ỹaỹateeta da ana'ana atamnaxaqui maye ño'oxoosheguem, nache huaña da qaiỹaxana da 'are'enaxat.

₃₄Qataq na 'aralamaxatpi nhuo' le'ecpi da jec da delogui' ca npa'aguenaxauapi, da quetegue ca nqa'aic maye 'auauecteuga, nache da natamen datategue da pa'aigue nam huaqta'a't nỹecpi maye 'arca'aguishecpi, qataq ana atamnaxaqui maye ño'oxoosheguem da yaqto' hueta'a da 'are'enaxat, ₃₅nache 'aua'axaỹa qome ca natamnaxac namayepi da qoueta'a na piguem, qataq 'aueelec qome namayepi.

₃₆Qaq qom 'am ỹacho'ot cam lasouaxashet namayepi, qaq cha'aye qaica ca shiỹaxaua ca saqca ca lasouaxashet, qaq da huo'otaq 'aualemataỹa namayepi, nache 'aỹa'aneguet ca npa'aguenaxauapi yaqto' loxonec nache ỹauega ca lỹa 'alhua qaỹoqta huo'otaq sa qaỹapeque, ₃₇nache da huo'otaq hueta'a ca 'alhua maye qaỹauega da noxonec nache da 'am ỹe'egueloqot qataq da 'am nachoxonnot, 'eeta': ‹Qomi' huo'o da qarasouaxashet, qataq huo'o da qanpe'enaxac, cha'aye ỹataqta qauem da so'otaq› ₃₈qaq namayepi da ỹataqta 'am imato'ot da lquiyaqteỹaxac, qataq da nachaalataxac da 'am ỹe'egueloqot qom hueta'a cam 'alhua maye qaỹauega da noxonec, nache da natamen natategue na pa'aigue na 'alhua maye 'aỹa'anem co'ollaxa so hua'au lta'alpi, qataq na pa'aigue nam huaqta'a't nỹecpi maye 'arca'aguishecpi, qataq ana atamnaxaqui maye ño'oxoosheguem da yaqto' hueta'a da 'are'enaxat, ₃₉qaq ña 'aua'axaỹa qome da qoueta'a na piguem maye 'arma', cam natamnaxac qataq cam nachoxonnaxac namayepi, qataq 'aueelec qome, qataq 'auapalaxat ca lasouaxashetpi na 'aralamaxat nhuo' le'ecpi.

₄₀Qaq nagui, 'Am Ñatamnaxala', 'am ñachoxonnot da huetalec qome da 'armeenaxanaxac ne'ena, qataq 'aua'axaỹa qome ca atamnaxac da huaña ne'ena.