1Qaq so Salomón co'ollaq ime da natamnaxac, nache anac so norec chegoqo'ot na piguem, nache ỹavigaxatta so nachetaqtaxanaxat qaỹavigaxatta, qataq so laỹepi nachetaqtaxanaxatpi, huaña nache da llo'oxoyec Ñim Nataxala' ỹataqta imattaigui aso atamnaxaqui. 2Qaq ỹoqo'oye so ntaxaỹaxanaxanecpi saishet da pa'aigui aso atamnaxaqui. 3Qaq so Israel le'ecpi co'ollaq ỹauaachigui da naañi so norec qataq da llo'oxoyec Ñim Nataxala' talec aso atamnaxaqui, nache somayepi ỹa'alyiñi naua l-llecte nache iviraxata'aguet na latap so coma', nache ỹo'oxoren qataq ỹanot da na'achecỹaxac Ñim Nataxala', 'eeta': «Ñim Nataxala' ỹataqta soxoraic, qaq da lauotaxanaqtaic chochaq tatec.»
4Huaña nache so nta'a qataq 'enauac so nhuo' le'ecpi, ỹanot Ñim Nataxala' aso lachetaqtaxanaqtepi, 5nache so nta'a Salomón ỹaneuo so veintidós mil huacapi, qataq aso ciento veinte mil qaguetapi da lachetaqtaxanaqtepi. Qaq 'era da 'eetec da so nta'a, qataq 'enauac so Israel le'ecpi, da ỹaneuo aso atamnaxaqui maye lalamaqte Ñim Lo'onatac 'Enauacna.
6Qaq so ntaxaỹaxanaxanecpi qalaq nache hueta'a nam maiche lo'onataxanaqa'pi, qaq so leviitapi nache iviqueetapigui aso lviquepi maye lo'onatapi co'ollaxa so nta'a David, nache ỹo'ootac so no'onec maye 'eeta': «Cha'aye da lauotaxanaqtaic Ñimaye, chochaq tatec», nache ỹo'ootac na lo'onecpi co'ollaxa so David. Qaq so ntaxaỹaxanaxanecpi ỹashettapigui ana lasheerepi datata'aguet so Leviitapi, qaq so Israel le'ecpi qalaq 'enauac da nachattañipi. 7Qaq so Salomón nataqa'en ỹaneuo so laiñi so qasoxoc, maye huaña so datatauga aso atamnaxaqui maye lalamaqte Ñim Nataxala', nache huaña yemaye da ỹaneuo aso lachetaqtaxanaqtepi qaỹavigaxatta, qataq so lcheta aso nachetaqtaxanaqte qanhuaachigui, qaq cha'aye aso nca'atoxonaxalate bronce maye lo'onata so Salomón, sanalolec co'ollaxa aso nachetaqtaxanaqtepi qaỹavigaxatta, qataq aso nachetaqtaxanaqte maye chegaqaigui na ala na nañiguishec, qataq so lcheta.
8Qaq huaña nache so Salomón, qataq 'enauac so Israel le'ecpi, huetoiguilo naqa'en soua siete na'axa'te da ỹo'ot se'eso naponaxac. Qaq nache ỹataqta qalota so shiỹaxauapi so ỹalectaua'a se'eso naponaxac, chegoqchiguiña so ñegueuo ye Jamat, nache ivitta'a so la'auaxac ye Egipto. 9Qaq so na'a'q ocho, nache ỹo'ot so ỹataqta lta'araic naponaxac, cha'aye huetoiguilo naqa'en soua siete na'axa'te da ỹaategueuo aso nca'atoxonaxalate, qataq huetoiguilo naqa'en soua lỹa't siete na'axa'te da iuennate co'ollaq qanayenaigui so nauecañi npe'lpi maye qo'oipaq lcouepi. 10Qaq so na'a'q veintitrés so ca'agoxoic siete, nache so nta'a Salomón 'enapega so nhuo' le'ecpi da ỹe'eguelaxalo naua lma'ate, nache somayepi ỹachetec da machiguiñi qataq ỹa'amaqchiguiñi souaxat da no'on maye Ñim Nataxala' ỹo'otec co'ollaxa so David qataq so Salomón, qataq som lalamaxat nhuo' Israel le'ecpi.
Ñim Lo'onatac 'Enauacna naỹamaxate' so Salomón
11Qaq so Salomón co'ollaq imat aso atamnaxaqui maye lalamaqte Ñim Nataxala', qataq so lma' lta'araic so nta'a, qataq 'enauac nam iuennategapi co'ollaxa da ỹo'ot, ỹataqta ỹaỹamaqchiguiñi. 12Qaq huaña nache huaigui so pe, da Ñim Nataxala' nachaxana so Salomón, nache 'enapega, 'eeta': «Aỹem sa'aqchigui so 'anatamnaxac, nache aỹem lleca'ateua'a ne'ena nma', da naña ana atamnaxaqui, da yaqto' qaỹachaña ca nachetaqtaxanaxatpi. 13Qaq da huo'otaq sa ñamaq ca auot maye chegoqo'ot na piguem, huo'otaq da ñamaq aca shiiquioxoipi da chec na huetalec na no'onaxa, huo'otaq da ñamaxa ca nalolaxa na ỹalamaxat nhuo' le'ecpi, 14qaq da huo'otaq nman na ỹalamaxat nhuo' le'ecpi maye iỹaxaatega da ỹe'enaxat, qataq da natamen, qataq aỹem nmitaique, qataq da ỹaxanec da qauem lataxac, nache aỹem sa'axaỹa qome da soota'a na piguem, nache sapalaxat na lasouaxashetpi, qataq ñataren na na'alhua namayepi. 15Nache da imeenaxanaxac huetalec namaye qataq sa'axaỹa qome ca atamnaxac da huaña qanqa'en ne'ena, 16cha'aye nagui aỹem lleca'ateua'a qataq seỹotauga ana'ana atamnaxaqui da yaqto' chochaq tatec da hueta'a da ỹe'enaxat, nache da imeenaxanaxac qataq da iquiyaqteỹaxac nache 'eetai' qome da hueta'a anamaye. 17Qaq 'am, da huo'otaq qoneta'am da lataxac so 'arta'a David, da 'auo'ot 'enauac nam 'am samaxalecpi, qataq da 'aupacchigui nam llapaxañi lataxacpi qataq na iqataxacpi, 18nache qaica qome ca iraxanai' da 'aro'onataxanaxac, nache sepacchigui dam ñaỹamaxataxac co'ollaq ñaỹamaxate' so 'arta'a David, co'ollaq shenapega sheeta': Saishet qome da saqca ñaqa'en ca 'am chegoxoguet da ilo'ogue na Israel le'ecpi. 19Qalaxaye da aỹem qoquiỹa'ai, qataq sa qaualaqaiguet na iqataxacpi qataq na ỹamaxasoxonaxacpi maye qami' sanema, nacherata da qanqo'oñiỹa da qavio'oxoreñiitac qataq qanatamñiitacot na ỹaqa'a atamnaxala'pi, 20nache aỹem, qami' ñeqateeguesopa qome na 'alhua maye qami' sanema, qataq sheca'ai ana atamnaxaqui maye seỹotauga da yaqto' hueta'a da ỹe'enaxat, nache saneguet da choche ỹe'eetac 'enauac na ỹotta'a't shiỹaxauapi. 21Qaq ana'ana atamnaxaqui maye ỹataqta 'amaqtaqai, anamaye ỹe'eguelaxa qome da choche lapoosheguem na coma', cha'aye ỹataqta nlachiguiñi, nache 'enauac ca nlectot anamaye ỹataqta ỹe'elaxa nache, 'eeta': ¿Chaq ta'ainco' Ñim Nataxala' da 'eetec naqa'en de'era ne'ena 'alhua qataq ana atamnaxaqui? 22Nache camayepi maiche 'eeta': ‹Cha'aye namayepi ca'ai Ñim Nataxala' maye Natamnaxala' so hua'au lta'alpi, maye nqateeguesop co'ollaxa ye Egipto, nache taỹa da ỹo'oxoreetac qataq natameetacot nam ỹaqa'a atamnaxala'pi, qaq ỹoqo'oye Ñim Nataxala', talec naqa'en de'era qauen namayepi.›»
