1-2Aỹem qoỹeetegacnaxa da qaica ca ỹa'amaqchec da qami' sootaiguilo, qalaxaye naxa da aỹem qaỹoqta, qalaq ỹataqta saq llivigui ye iuel. Qaq aỹem qami' ñachoxonnoiguilo chegoqchigui da lsoxosoxonaxac qataq da lauotaxanaqtaic So Cristo, da qom qami' sevitalo, qalaq saishet da aỹem qauamaqỹalec, da yaqto' sa sareno'ot da shenapega nam qomi' quetapegueleguete, cha'aye namayepi 'eetega da so'otaqtac damaye, cha'aye huo'o cam yo'oqchigui ñaquitaqtaique, shenaqta'am nam laỹepi shiỹaxauapi maye huetalec ana 'alhua. 3Cha'aye 'eesa da choche qomi' shiỹaxau', qalaxaye saishet da shenaqta'am na shiỹaxauapi maye huetalec ana 'alhua da huo'otaq deloqui. 4Cha'aye dam qaro'ogoxonaxat da huo'otaq seloquiaq, saishet da nachena na lo'ogoxonaxat nam shiỹaxauapi maye huetalec ana 'alhua. Cha'aye damaye nachera da la'añaxac Ñim Lo'onatac 'Enauacna, da yaqto' ishet da selaxataxagui nam ñe'eguenaxaquipi, nataqa'en nam mpa'aguenataxanaxacpi, 5qataq da ño'oxonnaxac nam huotaique da npaxateguet da yaqto' saishet da ivira da ỹoqta qaỹauatton Ñim Lo'onatac 'Enauacna. Sachegoxotaqchigui de'era na'añaxac da so'ogoxonaxa da yaqto' na 'etaxaloxoicpi naralaxa't naua lhuennataxaco, nache ỹalaxaguet So Cristo. 6Qataq ỹataqta qaica ca shegaqtega da sauoqo'o ca nhuaxanaguec 'enauac nam saishet da ỹalaxaguet So Cristo, sa'auaxanaqchiyiñi qami' choche ivitta'a que'eca na'a'q da 'enauac na shiỹaxauapi da ỹataqta ỹalaq.
7Qami' qauloitagui ca yo'oqchigui shiỹaxaua. Qom huo'otaq huo'o ca 'eetega da quetague' So Cristo, qaq camaye no'on da ỹaỹateeta da qomi' nataqa'en qolaqtague' Somaye. 8Qaq na'aictaxa da huo'otaq aỹem qapio'olec da sagaqtenapeguec da shenec, qalaxaye saishet da ña'aloxootac. Cha'aye Som Qarataxala' aỹem ỹami' da ỹa'añaxac da qami' ñataỹañalo, da yaqto' qami' setaua'n da nquiguisheguem da qarpi'iỹaxaqui Somaye, qaq saishet da qami' ñelaxaayiñi. 9Qataq saishet da qaupi'itaxañiitega da sauotaique da qami' sequichoqche't nagui da qami' samaxalo naua ỹere. 10Cha'aye huo'o na 'eetega da naua ỹa'aqtaqa maye huetaleguete ana ỹere ỹataqta sa nsattegueta, qataq huo'o da la'añaxa'c, qaq dam ỹataxac da setaqtac, qalaq qaica ca ỹa'añaxac, qataq sa saỹaten da ỹaỹamaqchiyiñi naua ỹa'aqtaqa qataq ỹataqta qaica ca ỹayego't naua ỹa'aqtaqa, nachaqrata da qaỹo'ota'n. 11Qalaxaye que'eca shiỹaxauapi maye 'enapec de'era, camayepi no'on da ỹaỹateeta nataqa'en da qom qami' ñeqo'onalo, nache sachetac da ỹa'añaxac 'eeta'am da ỹa'añaxac da setaqtac da samaq ana ỹere da aỹem qaỹoqta.
12Cha'aye aỹem saishet da sauotaique da sheeta'am nam detaqtacpi da maiche ño'oxoreetapeguela't. Cha'aye da huo'o ca maiche naloqnaxaatapeguela't, nache camaye qaica ca laỹaanataxanaxac. 13Cha'aye qomi' saishet da huo'otaq sagaqapeguec da ñapagaqalec cam tachiguiña cam qomi' qoỹanema. Cha'aye Ñim Lo'onatac 'Enauacna maye nacheñi Ñi ỹa'an ca loga't cam qaro'onataxanaqa', qaq nacheñi Ñimaye Ñim qomi' ỹanema da huo'omshe seviraqa'alo qami' maye qoñiitaña na nỹecpi Corinto. 14Qaq ỹoqo'oye saishet da huo'otaq ñapacalec dam aỹem qoỹanem ỹo'onataxanaxac, qalaxaye sa'auchiguiñi da sevira'a na nỹecpi na Corinto da sa'axattac da no'on na'axaỹaxac maye na'aqtaguec So Jesucristo. 15Qataq saishet da ñepa'axanapeguelec ca lo'onatac ca lỹa shiỹaxaua da huo'otaq se'enaxatteguem ca maiche ỹalamaxat. Nachaqrata da aỹem ñaquitta'a da nquic da qarpi'iỹaxaqui Ñim Lo'onatac 'Enauacna, yaqto' aỹem ishet da nquictec da ỹo'onataxanaxac da qoñiita. 'Era da sauotaique da seviraxata'a da ỹo'onataxanaxac. 16Nataqa'en huo'o da iyaxa da sa'axatec da no'on na'axaỹaxac da sevira'a ca qaỹoqta 'alhua, nam qoviita'a nỹecpi Corinto cam saxanaqca ca ivira'a nam 'aqtaxanaxaicpi. Yaqto' qaica ca 'eetega da ño'oxoreetapigui ca lo'onatac ca lỹa shiỹaxaua.
17Cha'aye naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna, 'eeta': Da huo'o ca nshetaique da na'amaqten, qaq camaye no'on da na'amaqteeto'ot Ñim Nataxala'. 18Cha'aye ca shiỹaxaua maye qaỹaỹamaxareeta, saishet da nacheca cam maiche ño'oxoreetapeguela't, nachaqcata cam ỹaỹamaxareeta Ñim Nataxala'.
