1Qaq mashe ivi' tres nagui da she'eguelaxalec da qami' ñeqo'onalo. Qaq qantooñita'aque qome naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna, 'eetra': Da qaỹauo'o ca lasouaxashet ca nỹa, qalaq iue'n caua dos huo'otaq tres shiỹaxau' da da'aqtaxa'n. 2Co'ollaq mashe dos da she'eguelaxalec da qami' ñamaqtegalo, nache qami' secoyegueete' da nam huo'o ca lasouaxashet aỹem ỹataqta ña'axannec da shenapega, semata'aguet nam taỹa'a nataqa'en da ỹo'ot de'era ñe'etaxaloxo. Qaq nagui da aỹem qaỹoqta, nache qaltaq she'eguelaxaalec de'era. 3Qaq damaye so'ot, cha'aye qami' qanmichiitaique cam ichoxot da So Cristo aỹem detaxaigui. Qataq So Cristo saishet da saqca ca la'añaxac da qami' ỹaỹamaxaayiñi, chaqrata da Somaye yo'oq da la'añaxac da qami' huetaiguilo. 4Qaq 'eesa da 'eco' qaica ca la'añaxac Somaye co'ollaq qaiuaxaneuo, qalaxaye nagui Somaye nca'altauec chegoqchigui da la'añaxac Ñim Lo'onatac 'Enauacna. Qaq ỹoqo'oye qomi' ñeuanaqaua'a So Cristo da qaica ca qara'añaxac. Qalaxaye huo'o da qana'achec, cha'aye ñeuanaqaua'a da la'añaxac Somaye qataq da lca'alaxa maye chegoqo'ot Ñim Lo'onatac 'Enauacna. Qaq qom qami' sevitaxalo, nache ishet da ỹataqta qami' sachaxanaxalo de'era na'añaxac.
5Qaq maiche qanmicheela't qome, yaqto' ishet da qauaỹaañita qom ỹoqta 'eesa da qaua'amaqchiñiitac So Cristo. Qaq ỹataqta qañe'egueñiila't qome, qaq qom qauañoxoche, nache ỹoqta 'eesa da qami' hueta'agueta Somaye. Qalaxaye da saishet da 'eesa da qaupi'iỹa'ai So Cristo, nache damaye ỹa'axat da saishet da qami' hueta'agueta Somaye. 6Qaq ỹoqo'oye huo'o da ñaquitaxac da qoñiita da ỹataqta qauaỹaañita da qomi' saishet da choche qomi' tenataxanaxaiqa, cha'aye mashe ñemataxai' da qañe'eguenataguec. 7Saishet da shegaqtega da 'ena'am da huo'o ca qarlamaxataxac. Chaqrata da ñeqouagaxaunaqtacot Ñim Lo'onatac 'Enauacna, da yaqto' qami' saishet da qauo'oche ca sa ỹaỹamaxañi. Qaq saishet da seỹaxanaqtacot Ñimaye souaxat da mashe ñauanaxai' da qañe'eguenataguec, nachaqrata da sauoqtaique da qami' qauo'ocheetac cam ỹaỹamaqchiguiñi. 8Nachaqrata da so'otaq cam itauan ca 'eesa lataxac, qataq saishet da so'otaq cam dataỹa'aguet damaye. 9Qaq ỹoqo'oye da qami' 'añaxaiqa, nache qomi' ỹataqta samaqchiguiñi da qaica ca qara'añaxac. Qaq qolaqtot da ñeqouagaxaunaqtaleguete qami', yaqto' qanquiquiita'aguet da nalochiguiñi da qarpi'iỹaxaqui So Cristo. 10Qaq qami' samaxalo ana ỹere nagui da saxanaxa da qami' ñeqo'onalo, yaqto' huo'o ca qardaqa'ai da qanaralaxache da qarataxaqui, yaqto' saishet da huo'otaq qami' sa sechera'ape qom qami' sevitalo. Cha'aye dam na'añaxac maye aỹem ỹami' Ñim Lo'onatac 'Enauacna, damaye setaunaxanot da yaqto' nquiguisheguem da qanaquitaxaqui Ñimaye, qaq saishet da yaqto' qami' selaxachiguilo.
11Nachaqrata de'era, qami' ñauochaxau' ỹaqaỹa't. Qami' sequiita'ape qataq qami' seỹaxanoiguilo da nache 'eetai' da qauamaichiguiñi. Qanpogoxoiñiỹapegue' da qanquigaxachiitasheguem da no'on qarataxaqui. Aỹem qaualaqaiguet qome. Qataq qanaỹamaxayiñeeta't qataq qavi'imaqaitac. Qaq Ñim Lo'onatac 'Enauacna Ñim qomi' lauotaqa'ate qataq qomi' ỹanema da qarlagaxayec, Ñimaye qami' hueta'agueta. 12Qaq ñi 'oonolec da qoñiita da nquine' ca lỹa la'amqaanataxanaxaua, nache ỹataqta ỹachetoigui da lta'araic lauotaxanaqtaic. 'Enauac na qarqaỹañicpi maye ỹa'amaqten So Jesús qami' iquiita'ape.
