2 Corintios 2

₁Qaq souaxat da maiche iuennataxac da saishet da sauotaique da qami' saquicoqche't, nache ỹaỹamaqchiguiñi ñaqa'en da saishet da qami' ñamaqtegalo. ₂Cha'aye da aỹem sauo'o ca qaraquicoqoi, qaq ¿negue'to' ca ishet da ỹo'ot ca ỹamaicỹaxac? Taxaso' nacheqami' maye qami' saquicoqchetta'ape. ₃Qaq ỹoqo'oye qami' samaxalo co'ollaxa aso ỹere, cha'aye saishet da saỹamaxaren da qami' ñeqo'onalo da yaqto' aỹem qauaquicoqchichi, qamaq nachaqcatactaxa ca ỹamaicỹaxac da qauo'oche. Qaq ỹoqo'oye aỹem saỹateeta da huo'otaq aỹem samachiguiñi, qaq 'enauac da qoñiita qauamaichiguiñi. ₄Qalaxaye co'ollaxa settapiguiñi asa'aso ỹere, qalaq ỹataqta lta'araic da ỹaquicoxo qataq sa saỹaten ca sheetec, ivira'a da ñeỹeetac. Qaq saishet da shiyiñi asomaye da yaqto' qami' ỹaquicoqche't, nachaqrata da ñeshetaique da qauaỹaañi da ỹataqta lta'araic da ỹauotaxanaqtaic da qoñiita.

₅Saishet da ñequigaxatapeguec de'era, qalaxaye cam ỹo'ot ca ỹaquicoxo, camaye saishet da nachaqaỹemta da aỹem ỹaquicoqchet. Cha'aye nataqa'en 'enauac da qoñiita da cara'ac da qami' ỹaquicoqchet. ₆Qalaxaye 'eeso'oya' dam mashe qauo'ochec nhuaxanaguec que'eca shiỹaxaua. ₇Qaq nagui no'on da qauchoxoyiñi camaye, qataq qautauañi yaqto' machiguiñi. Ten, qom huo'otaq ỹaguec da laquicoxo, nache ishet da qaica ca naquitaxac. ₈Qaq ỹoqo'oye qaltaq qami' ñachoxonnoiguilo da qauachaxañiỹa da qarauotaxanaqtaiqui camaye. ₉Co'ollaq qami' samaxalo aso ỹere, qaq nache huetalec 'enauac de'era. Qaq qami' samaxalo asomaye, cha'aye ñeshetaique da qami' she'egue'n, da qami' lhuotte' da qoquiigue nam ỹapaxaguenataxanaxacpi. ₁₀Qaq ỹoqo'oye nagui cam qami' mashe qauchoxoyiñi, qaq nataqa'en aỹem sechoxoren camaye. Cha'aye cam aỹem sechoxoren da huo'otaq huo'o ca ỹasouaxat, qalaq camaye sechoxoren souaxat da qoñiita. Qaq damaye ỹauaachigui ñaqa'en So Cristo. ₁₁Yaqto' so pa'aguenataxanaxaic saishet da huo'o ca llegueuo da shenaqta, cha'aye qomi' mashe saỹaanaqte' naua qauema 'eetapegueco.

₁₂Co'ollaq aỹem sevita ye nỹecpi ye Troas da sa'axat da no'on na'axaỹaxac maye na'aqtaguec So Cristo. Qaq huaña yemaye, nache ỹataqta qaica ca aỹem nqanaxat da sa'axattac da lo'onataxanaxac So Qarataxala'. ₁₃Qalaxaye da iquiyaqteỹaxac saq maguiñi souaxat da sa ñauane' so qarqaỹa Tito. Ỹoqo'oye, nache ñecoyeguene' so 'amqaanataxanaxaicpi maye hueta'a ye nỹecpi ye Troas, ime, nache saỹa ye 'alhua Macedonia.

₁₄Qaq ỹoqo'oye qomi' sanaqot da qana'achec Ñim Lo'onatac 'Enauacna, da qomi' ỹalecnaxaneua'alo da lauegaxanaxac So Cristo Jesús qataq qomi' ỹanema da sa'axataq da na'aqtaguec So Cristo da yaqto' 'enauac da qaỹauatton. ₁₅Qataq shenaqta'am da alaitaỹaxac cam nchenaxanaxat maye ỹanot Ñim Lo'onatac 'Enauacna So Cristo, qataq ỹataqta huaỹoxonec da alaitaỹaxac, ivirauga nam mashe qanca'alaxatec qataq nam ñaq huetaigui da lsomaxac. ₁₆Qalaxaye nam taỹa'a da deqat, ne'ena nchenaxanaxat, da alaitaỹaxac 'eeta'am ca dalaataxanapec. Qalaxaye nam taỹa'a da nca'alec, damaye 'eeta'am naqa'en cam ama na laita maye chegaqaigui da achaalataxac. Qaq ¿chaq negue'to' ca ishet da nalotaua'a de'era no'onataxanaxac? ₁₇Qalaxaye qomi' saishet da 'eco' qomi' nmenaxaiqa da semenaqta'ape naua la'aqtaqa Ñim Lo'onatac 'Enauacna, da huo'otaq shenaqta'am nam qalota maye ỹashaxaare'c naua na'aqtaqa. Nachaqrata da ỹataqta qomi' 'eesora da sa'aqtaxanaqtac, qaq qomi' ỹaỹate'n Ñim Lo'onatac 'Enauacna, cha'aye maiche qomi' lamaxa'she qataq ña'araqtaua'a So Cristo.