1Ñim Lo'onatac 'Enauacna Ñimaye ỹataqta qomi' ỹauoteque. Ỹoqo'oye qomi' ipataxaleguete de'era no'onataxanaxac, qaq ỹoqo'oye saishet da saq ña'añaxataq. 2Saishet da huo'o ca qomi' ỹa'aloqche't, qataq saishet da huo'o ca soxotaqtañi. Saishet da satenachetaqtac na shiỹaxauapi qataq saishet da ñaralaxataq da la'aqtaxanaxac Ñim Lo'onatac 'Enauacna. Nachaqrata da Ñim Lo'onatac 'Enauacna qomi' ỹaỹateete' da qara'aqtaxanaxac da ỹataqta 'eesa. Ỹoqo'oye 'enauac na shiỹaxauapi ishet da pi'iỹa'alo qomi'. 3Nachaqnata nam saishet da ỹaỹaten de'era no'on na'axaỹaxac maye sa'axataqtac, namayepi saishet da qanca'alaxatec. 4Dam no'on na'axaỹaxac, damaye qomi' da'aqtaxanema da la'amaqchec So Cristo, qaq Somaye qomi' ỹachaxanalo da la'amaqchec Ñim Lo'onatac 'Enauacna. De'era na'aqtaxanaxac 'eroigui, 'eeta'am na le'eraxa aca ncoỹaraxanaxaqui. Qalaxaye nam saishet da ỹa'amaqten saishet da ila'a, cha'aye so pa'aguenataxanaxaic saishet da ỹashenem da ila'a. 5Qataq da sa'aqtaxanaqtac, qalaq saishet da maiche ña'aqtaxanaqtapeguela't. Chaqrata da qomi' sa'axataqtac So Jesucristo da nacheso So Qarataxala'. Qataq qami' souaqtegueto, souaxat da qarauoche So Jesucristo. 6Co'ollaq Ñim Lo'onatac 'Enauacna ỹo'ot ana 'alhua, nache da la'aqtac, 'eeta': «Huo'o qome aca icoỹarelec na napalaxa.» Qaq co'ollaq qomi' ỹaỹaanaxanaxaneque da no'on na'axaỹaxac, nache nataqa'en icoỹaroigui da qantoonaxac, yaqto' chegoqchigui So Cristo da sauattonaq da la'amaqchec Ñimaye.
Da quitaxac da qanayeuaigui da que'eenaxac
7Co'ollaq Ñim Lo'onatac 'Enauacna qomi' ỹanema da no'on na'axaỹaxac, nache ỹachagui de'era nsallaxa asom qaica ca la'añaxac no'oxona 'alhuole. Yaqto' da sa'axataqtac da no'on na'axaỹaxac, nache na shiỹaxauapi ỹaỹaten da de'era na'añaxac chegoqo'ot Ñim Lo'onatac 'Enauacna, qaq saishet da nache qomi' maye shenaqta'am acatai' 'alhuole maye qaica ca la'añaxac. 8Qaq ỹoqo'oye na'aictaxa da souaqaigui ca qarqalaic, qalaxaye saishet da qaica ca qara'añaxac. Qataq 'eetai' taxa da souaqaigui da qarhuogoxo, qalaxaye saishet da deqat da qanaquitaxac. 9Na shiỹaxauapi qomi' icaata'ape, qalaxaye Ñim Lo'onatac 'Enauacna saishet da qomi' ỹala't. Qataq na'aictaxa da souaqañi qanqa'en, qalaxaye saishet da qomi' qaỹalaua't. 10Qaq na'aictaxa cam sataxague, qalaq 'enauac da qaila'a da qanque'eenaxac, da 'eeta'am da nque'eenaxac So Cristo. Qataq souaxat da salaxasoxoguet, nache qomi' nache 'eetai' da souaqtaigui da lchec da nleuaxa. 11Qalaxaye nataqa'en ishet da chegoqchiguilo qomi' da qaila'a da So Jesús, da huo'o da la'añaxac da ỹanem da lca'alaxa na leuaxaicpi. 12Qaq nache 'eetec, da qomi' ñequigaqta'aguet da nleuaxa, qaq qami', qalaxaye qanquiquiita'aguet da dalaxaic nca'alaxa.
13Naua nanettaleguete ana nere maye huetalec na la'aqtacpi Ñim Lo'onatac 'Enauacna, 'eeta': «Aỹem sa'amaqten Ñim Lo'onatac 'Enauacna, ỹoqo'oye setaqa.» Qomi' nataqa'en sepi'iỹaqa'a Ñimaye, ỹoqo'oye sa'axataqtac da no'on na'axaỹaxac. 14Cha'aye saỹaanaqta Ñimaye da qom seleuaq, nache ỹoltaq qomi' nca'alaxatre'c, 'eeta'am naqa'en da 'eetec co'ollaxa So Jesús da qaltaq nca'alec naqa'en. Ime, qaq qomi' lỹatreuo naqa'en da senoxonaxaua'a ca netaña Ñimaye. 15'Enauac de'era maiche qaraỹamaqai. Cha'aye da nquictauec nam ỹaconeguet da lsoxoyec qataq da lauotaxanaqtaic Ñim Lo'onatac 'Enauacna, nache ỹataqta qalota nataqa'en nam ỹaatacot da na'achec qataq ỹo'oxoreetac da la'amaqchec Ñimaye.
16Qaq ỹoqo'oye saishet da saq ña'añaxataq. Na'aictaxa da taỹañicra da la'añaxac da qaro'ocỹaxac, qalaxaye dam saqcha'a qarca'alaxa nquictasheguem da la'añaxac. 17Cha'aye naua qanque'eenaxaco nagui de'era qanachaalataxac, naamaye saq 'amaqtache qataq saqaỹaloq da inoxoore'c. Qaq qana'achec da nachenaua naua chegoqchiguilo naqa'en Ñim Lo'onatac 'Enauacna da ỹataqta qomi' nlaxatchiguilo da lta'araic ño'oxoyec maye qaica ca loga't. 18Qaq ỹoqo'oye saishet da seloqtagui cam yo'oqchigui. Nachaqcata ca saqcha'a. Cha'aye cam yo'oqchigui, qalaq saishet da 'eetai', qaq cam saqcha'a, camaye qaica ca loga't.
