2 Corintios 6

₁Cha'aye qomi' ltau' Ñim Lo'onatac 'Enauacna de'era lo'onataxanaxac. Qaq ỹoqo'oye qami' ñachoxorenaqtoiguilo da saishet qome da saqca ca naigui qanqa'eñi da lqouagaxanaqtaic maye qami' ỹachaxanalo Ñimaye. ₂Cha'aye Ñimaye, naua la'aqtaqa maye nanettrañi, 'eetra':

Qaq nachena na na'a'q nchoxonnataxanaxaqui; qataq nachena na na'a'q nca'alaqtaxanaxaqui.

₃Saishet da saỹamaxarenaq da huo'o ca quetapeguelec da qaro'onataxanaxac. Ỹoqo'oye ñepogoxoinaqtapegue' da saishet da qauem ca qana'aqtaguec. ₄'Enauac nam so'otaqpi sauoqtaique da ichoxot da qomi' lo'onataxanaxanaqa Ñim Lo'onatac 'Enauacna, qataq souaxalec da qarhualaxavic. Huo'o da qanque'eenaxac, qataq qalota na seviraxaguet qarqalaic qataq na qarhuenaxanaxapi. Qataq nataqa'en qomi' qaỹalasheeta'ape. ₅Qataq qomi' qaiuaxaata'ape qataq qomi' qaicoñe't, qomi' qaicogaxaata'ape qataq ỹaguec da qaro'onataxanaxac, ivira'a da saishet da so'ochaq qataq seqouataq. ₆Nataqa'en ichoxot da qomi' so'onataxanaqtacot Ñim Lo'onatac 'Enauacna souaxat da no'on qarataxac, qataq da qarauattonaxanaxac maye 'eesa qataq da qarhualaxavic, qataq da qarauotaxanaqtaic, qataq da nache 'eetai' da qomi' hueta'agueta So Saqcha'a Na'añaxac Qui'itta, qataq dam 'eesa qarsoxoyec, ₇qataq so'ogoxonaxa da la'añaxac Ñim Lo'onatac 'Enauacna da sa'axataqtac da na'aqtaxanaxac maye ỹataqta 'eesa. Qaq da huo'o na seviraxaguet qarqalaic, nache sataỹaqa'aguet, seroxogueta naua ỹaỹamaqchiyiñi so'ota'q qataq naua ỹaỹamaqchiyiñi qartaxaỹaxaco. ₈Qaq huo'o ye na'a'q, nache huo'o da qaño'oxonnataguec, qaq ye lỹa na'a'q qalaq sa qomi' qaiyacna'ape. Qataq huo'o da no'on da qana'aqtaguec qataq huo'o da qauem da qana'aqtaguec. Na'aictaxa da ỹataqta 'eesora nam qartaxaỹaxaco qalaq qoỹeetega da qomi' tenataxanaxaiqa. ₉Qataq huo'o da qoỹeetega qomi' sa qaỹauatto'n, na'aictaxa da ỹataqta qomi' nauattonataqa. Qataq huo'o da souaqaigui da lchec da nleuaxa, qalaxaye ñaqaiyeta ña ñeca'alaqtauec. Huo'o da qomi' qaiuaxaata'ape, qalaxaye saishet da qomi' qaỹalaua't. ₁₀'Eeta'am da saquicoqtac, qamaq ỹoqta 'eesa da qomi' samaqtapiguiñi. 'Eeta'am da qomi' choxora'q, qalaxaye qalota na sesallaqchetaq. Na'aictaxa da qaica ca ye da shenaqta, qalaxaye qaica ca seuenaqtac.

₁₁Qami' qarqaỹa't maye qarmaye na Corinto, qomi' ỹataqta qaica ca sauoqtaique da qami' setaxasoxoiguilo, ỹataqta imauec da qarquiyaqteỹaxac da qaica ca 'oonolec soxotaqtapiguiñi. ₁₂Qaq saishet da huo'o ca 'oonolec da qoñiita da huo'o ca soxotaqtapiiguesop, qalaxaye qami' maye huo'oi naua qo'oxocheetapeguesopa qomi'. ₁₃Qaq nagui qami' ñachoxoreetoiguilo, sheeta'am ca nta'a da nachoxoreetoigui ca llalaqpi, da ỹataqta qauauacheetoiguilo naua qarquiyaqchilli' da qoñiita'am aỹem da qaica ca sauotaique da qami' setaxaiguilo.

₁₄Saishet da qa'aitapegueua'a nam ỹo'ottacpi nam saishet da quetague' So Cristo. Cha'aye da no'on saishet da taỹapegueua'a cam qauem. Nataqa'en saishet da huaqta'a't na yo'oqchiguiñi qataq na napalaxa. ₁₅Qataq saishet da nhuoteeta't So Cristo qataq so pa'aguenataxanaxaic. Qataq nam quetague' So Cristo saishet da iỹaxana da lqaỹa nam saishet da quetague' Somaye. ₁₆Qomi' maye qomi' lma' Ñim Lo'onatac 'Enauacna maye nca'altauec, qaq Ñimaye da qomi' hueta'agueta, nache saishet da saqtegueua'a nam ỹo'oxoreetac na ne'enaqtacpi maye qanatameetacotpi. Cha'aye Ñim Lo'onatac 'Enauacna 'eeta':