2 Corintios 7

₁Qaq ỹoqo'oye qami' ñauochaxau' ỹaqaỹa't, 'era da qomi' qaỹachaxanapecoto. Qaq ỹoqo'oye saishet qome da so'otaq ca qauem, nachaqrato' da qomi' huesochiyiñi qataq saishet da huo'o ca qarasouaxashet hueto'ot Ñim Lo'onatac 'Enauacna, yaqto' Ñimaye qomi' ỹaconegueta. Sho'oxorenaq Ñim Lo'onatac 'Enauacna qataq ñepogoxoinaqapegue' da qomi' qui'itte', shenaqta'am Ñimaye.

₂Qaq ỹoqo'oye qauauo'oi ca qardaqa' naua qarquiyaqchilli'. Cha'aye saishet da huo'o ca so'otaxac ca sa ỹaỹamaxañi qataq saishet da huo'o ca seque'emaqchetaq qataq da satenachetaq. ₃Qaq saishet da shenapec de'era da yaqto' qauem da qarhuennataxaqui, cha'aye mashe ime caillaye da ỹa'aqtac da qami' ỹataqta qanhuañiỹaua'a da iquiyaqteỹaxac, da yaqto' qami' ñachaalataxau' qataq da qami' ileuaxa'u. ₄Qaq ỹataqta qalota da ñaquitaxac qataq ña'amaqteetai' souaxat da qoñiita. Qataq ỹataqta samachiguiñi, na'aictaxa da qalota na seviraxaguet lqalaicpi qalaq aỹem ñanomteguet da ỹa'añaxac qataq aỹem nlaqchigui da ñetonaxac.

₅Chegoqta'a co'ollaq ñeviraxa na 'alhua Macedonia, nache qaica ca qanmataqa'. Nachaqrata da huo'o da lta'araic qanque'eenaxac. Sataqta'aguet nam qomi' ipa'agueetacpi qataq da maiche qarcolanaxa. ₆Qalaxaye Ñim Lo'onatac 'Enauacna maye ishet da ỹa'añaqchet cam huo'o da nque'eenaxac, Ñimaye qomi' ỹa'añaqche't ỹachegoxotchigui da lviraxac so Tito. ₇Qaq saishet da nachaqrata da lviraxac somaye da qomi' ỹa'añaqche't, cha'aye nataqa'en saỹaanaq da somaye ỹataqta lta'araic da ntonaxac souaxat da qoñiita. So Tito qomi' da'aqtaxaatapeguema da qami' ỹataqta huo'o da qaryaqai da qomi' qanauañito, qataq qomi' da'aqtaxaatapeguema dam qaraquicoqoi souaxat dam souaqaigui qataq da qaica ca qaramaxayiqui souaxat aỹem. Qaq can sa'axaỹa de'era, nache ỹataqta nquictec da ñetonaxac.

₈Aso ỹere maye qami' samaxalo co'ollaxa asomaye ỹataqta qami' ỹaquicoqche't, qalaxaye saishet da huo'o ca ñetogotaxac souaxat da qami' samaxalo asomaye. Qaq na'aictaxa da saỹaten da asomaye qami' ỹaquicoqche't, qalaxaye nataqa'en saỹaten da sa qaỹauec da qaraquicoqoi. ₉Qaq nagui ỹataqta huo'o da ñetonaxac, cha'aye de'era qaraquicoqoi qami' ỹo'oteque da dalaxaic qarataxaqui qataq chegoqchigui damaye da qauỹaxañiỹot Ñim Lo'onatac 'Enauacna da qami' ichoxore'n. Qaq damaye maiche 'eetapeguec Ñimaye. Ỹoqo'oye saishet da sa'amaqten da qami' so'otaxaque ca qauem souaxat da qami' samaxasaxalo aso qorere. ₁₀Da Ñim Lo'onatac 'Enauacna da qami' ỹaquicoqche't, nache saishet qome da qoquiitega, cha'aye de'era qaraquicoqoi damaye qami' ỹo'otegueta da qanaralaxache da qarataxaqui qataq qauỹaxañiỹaique da qami' qaichoxore'n qataq qami' qanca'alaxatre'c. Qalaxaye da naquicoxo maye chegaqaigui nam qauem maye huetalec ana 'alhua, nachaqrata maye ishet da dalaataxan. ₁₁Qaq ¡ỹataqta 'onaxaic Ñim Lo'onatac 'Enauacna da qami' ỹaquicoqche't! ¡Ña qauloỹa nagui dam naigui! Damaye ỹo'ot da qami' qauaỹaañi da aỹem qaica ca ỹasouaxashet, nache ivira'a da aỹem qavicheetapeguelec, nataqa'en qaunoitac souaxat da huo'o da qarcolanaqai da huo'o ca sevireguet. Huo'o nataqa'en da qaryaqai da aỹem qanauañi' qataq qauauo'oi ca nhuaxanaguec cam huo'o da lasouaxashet. Qaq 'enauac de'era qami' qauachaxañi da nache 'ena'am saishet da huo'o ca qarasouaxashechi. ₁₂Cha'aye co'ollaq settapiguiñi aso ỹere, qalaq saishet da seuennatega cam shiỹaxaua maye ỹo'ot ca qauem, huo'otaq cam huo'o ca qaỹo'otec. Nachaqrata da sauotaique da Ñim Lo'onatac 'Enauacna, qami' ỹauaachiguilo da lta'araic qarhuogoqoi da shenaqta. ₁₃Qaq de'era qomi' ỹo'oteque da samaqchiguiñi.

So Tito ỹataqta machiguiñi cha'aye qami' qautauañi da yaqto' somaye queta da la'añaxac. Qaq damaye ỹactec da qantonaxac naqa'en. ₁₄Qaq mashe sheetega so Tito da aỹem ỹataqta huo'o da ña'amqaanaxac souaxat qami'. Cha'aye saishet da huo'o ca aỹem qauo'ochec qauem. Chaqrata da 'enauac nam sa'aqtaxanaqteguem so Tito ỹataqta 'eesa, nataqa'en ỹataqta 'eesa nam sa'aqtaxanaqteguema qami'. ₁₅So Tito tachigui ye lauel naxa 'enauac da qaralaxayiqui qataq da lta'araic 'enec qanqa'eñi. Qaq ỹoqo'oye somaye ỹataqta lta'araic da lauoche da qoñiita. ₁₆Qaq huo'o da ñetonaxac, souaxat da ỹataqta huo'o da ñaquitaxac da qoñiita.