Da l-leuaxa so Ocozías
1Qaq co'ollaq mashe ileu so Ajab, nache so Moab le'ecpi, dataỹa'aguet so Israel le'ecpi. 2Qaq so Ocozías naañi co'ollaxa, chegoqotcheguema so nalloxoqui, so pa'asheguem so lma' lta'araic, maye naña ye Samaria, nache somaye lta'araic so lque'emaxa. Qaq huaña nache huo'oi soua ỹama'q da yaqto' ichemaxata so Baal Zebub, maye atamnaxala' ye Ecrón, cha'aye somaye ỹauotaique da ỹaỹaten da ivira'a da qaltaq no'oita. 3Qalaxaye so lamaxashec Ñim Nataxala', 'enapego' so Elías maye lma' ye Tisbé, 'eeta': Qoñisheguem qome, nache 'auca'ateguet na lamaxashecpi ñi nta'a maye lma' ye Samaria, nache 'aunat, qoneta': ¿Peta'a qaico' ca Atamnaxala' na Israel, ỹoqo'oye qanqo'oñiỹa da qaunache cam Baal Zebub maye atamnaxala' ye Ecrón? 4Ỹoqo'oye 'era da la'aqtac Ñim Nataxala', maye taỹa'a ca Ocozías, 'eeta': «'Am, saishet da 'avi'eguelaxa da qoñisheguem da qouetalec na 'armala', nacherata da 'aleu qome.» Nache so Elías jec da ỹo'ot de'era. 5Nache co'ollaq ỹe'eguelaxauo so namaxashecpi, nache so nta'a inat somayepi, 'eeta': «¿Ta'ainco' ye qañe'eguelaqaiuo?» 6Nache somayepi 'enapeco': Qomye huo'o so ỹale, qomi' nqanaxattegueta, nache qomi' 'enapegalo da she'eguelaxasoxoua'a cam nta'a maye qomi' lamaxa'she. Nache sa'aqtaxanaxam da la'aqtac Ñim Nataxala', 'eeta': «¿Peta'a qaico' ca Atamnaxala' na Israel, ỹoqo'oye 'auamaxasoxona da qainat cam Baal Zebub maye atamnaxala' ye Ecrón? Qaq souaxat de'era 'auo'ot, nache 'am, saishet da 'avi'eguelaxa da qoñisheguem da qouetalec na 'armala', nacherata da 'aleu qome.» 7Nache so nta'a, ina't soomaye, 'eeta': ¿Ca 'eetec da lataxac que'eca ỹale, maye qami' nqanaxattegueta, da qami' da'aqtaxanema de'era? 8Nache soomaye 'enapeco':
Qomye somaye ỹaatañi so npo' huo'o na laue, qataq lo'oc so nsaataxaqui.
Nache so nta'a ỹa'alaq, 'eeta':
¡'Ah! ¡Nacheca ca Elías maye Tisbé le'ec! 9Nache somaye sa naỹaloxon da damaxasoxona so Elías, ỹamaq so huataxanaq lta'a, lỹatac so cincuenta nalleppi. Qaq co'ollaq ivita so netaña so Elías, nache somaye nso'ootañi, netaña so pa'asheguem aso qasoxonaxa. Nache som huataxanaq lta'a, 'enapega somaye, 'eeta':
¡'Am na'aqtaxanaxanec, ñi nta'a 'eetega da 'aunotec! 10Nache so Elías, 'enapeco':
Da 'eesa da aỹem na'aqtaxanaxanec, nache naañi qome ca norec maye chegoqo'ot na piguem, nache 'am ỹavic qataq na 'analleppi.
Huaña, nache nque'elaxatta da naañi so norec, maye chegoqo'ot na piguem, nache somaye, qataq so nalleppi nmichiguiñi da ỹavic. 11Nache so nta'a, qaltaq ỹamaq so lỹa huataxanaq lta'a, qataq so laỹe cincuenta alleppi, nache nqo'ona so Elías, nache 'enapego', 'eeta':
¡'Am na'aqtaxanaxanec, ñi nta'a 'eetega da sa 'anaỹaloxon da 'aunotec! 12Nache so Elías, 'enapeco':
Da 'eesa da aỹem na'aqtaxanaxanec, nache naañi qome ca norec maye chegoqo'ot na piguem, nache 'am ỹavigaxat, qataq na cincuenta 'analleppi.
Huaña, nache nque'elaxatta da naañi so norec maye chegoqo'ot na piguem, nache somaye, qataq so nalleppi, nmichiguiñi da ỹavic. 13Nache so nta'a qaltaq ỹe'eguelaxalec da ỹamaq so lỹa huataxanaq lta'a, qataq so cincuenta alleppi. Qalaxaye se'eso huataxanaq lta'a, co'ollaq tasheguema so netaña so Elías, nache ỹa'aroto naua l-llectel, qataq nachoxoreetot, 'eeta':
'Am na'aqtaxanaxanec, ñaq aỹem 'auchoxoren taxa, nache qaica ca qona'ac da ñachaalataxac, qataq da nachaalataxac ne'ena cincuenta 'aramaxashecpi. 14Cha'aye mashe dos da naañi so norec, maye chegoqo'ot na piguem, nache ỹavigaxa't soua dos huataxanaq lta'al, qataq so nalleppi. Ỹoqo'oye ỹataqta 'am ñachoxoreetot nagui da aỹem 'anqouaguec. 15Nache so lamaxashec Ñim Nataxala' 'enapega so Elías, 'eeta':
'Aunotec qome, nache 'auca'ategue damaye, qataq saishet da 'aye'etega.
Nache so Elías huenotec, nache ca'ategue so huataxanaq lta'a, da nqo'ona so nta'a. 16Nache 'enapego' so nta'a, 'eeta':
Da la'aqtac Ñim Nataxala', 'eeta': «Qaq souaxat da 'auamaq so 'aramaxashecpi, da yaqto' 'aunat cam Baal Zebub maye atamnaxala' ye Ecrón, 'eeta'amo' da qaica Ñim Atamnaxala' na Israel da yaqto' 'aunat, nache 'am nagui saishet da 'avi'eguelaxa da qoñisheguem da qouetalec na 'armala', nacherata da 'aleu qome.» 17Qaq 'era da 'eetec co'ollaq ileu so Ocozías, nache ipacchigui da la'aqtac Ñim Nataxala', maye ỹa'axat co'ollaxa so Elías. Qaq souaxat da qaica ca llalec so Ocozías, nache da lo'onataxanaxac da nta'a, talec so lqaỹa Jorán. Qaq damaye huetoiguilo soua dos vi'iye da nta'a so Jorán, maye llalec so Josafat, som nta'a co'ollaxa ye Judá. 18Qaq nam laỹepi na'aqtaguecpi, qataq nam ỹo'otpi so Ocozías, nache nanettalec aso nere, maye huetalec da na'aqtaguec so nta'alpi ye Israel.
